Pɩwɛ-ŋ kaɖɛ nabʋyʋ taa se ŋtɔzɩ tɔm ndʋ ŋkpɛlɩkaa nɛ pitileɖita yɔ tɩ-yɔɔ? Pɩtalɩɣ ɖa-taa paa anɩ mbʋ ɖoŋ ɖoŋ. Ɛbɛ pɩzɩɣ nɛ pɩsɩnɩ-ŋ? Cuuzi lɩmaɣza sɔsɔna taa.

Ŋŋkpɛlɩkɩɣ lɛ, sɩŋɩɣ ɖoŋ ɖoŋ nɛ ŋmaɣ lɩmaɣza wena a-tɔm kɩlɩ cɛyʋʋ yɔ. Na ɛzɩma apostoloo Pɔɔlɩ sɩnɩ e-koobiya mba pɛkpɛlɩkɩɣ tɔm ndʋ ɛma-wɛ yɔ se pala mbʋ yɔ. Ɛyɔɔdaa se: «Tʋnɛ tɩkɩlɩnɩ cɛyʋʋ.» (Ebr. 8:1) Ɛtɩŋnɩ tɔm ndʋ tɩ-yɔɔ nɛ ɛsɩnɩ ɛ-tɔm welisiyaa se panɩɩ ndʋ ɛcaɣ yɔɔdʋʋ yɔ tɩ-taa nɛ pana ɛzɩma paa lɩmaɣzɩyɛ nɖɩ lɛ ɖɩlabɩ nɔɔ kʋɖʋmaɣ nɛ tɔm ndʋ eɖiɣni yɔɔdʋʋ yɔ.

Ŋtɛŋ kpɛlɩkʋʋ lɛ, ŋpɩzɩɣ nɛ ŋkpaɣ ɛzɩ cɛcɛsɩ 10 mbʋ yɔ nɛ ŋmaɣzɩ tɔm ndʋ ŋkpɛlɩkaa yɔ tɩ-taa lɩmaɣza sɔsɔna yɔɔ. Ye ŋŋtɔzʋʋ a-yɔɔ yɔ, ɖaɣnɩ cɔnʋʋ tɔm ñʋŋ cikpeŋ yaa kalɩ paa tayʋʋ mbʋ lɛ pɩ-kajalaɣ tɔm loyaɣ nɛ pɩsɩnɩ-ŋ nɛ ŋtɔzɩ. Ye ŋkpɛlɩkɩ tɔm kɩfatʋ natʋyʋ yɔ, ñaɣ pana nɛ ŋtɩŋnɩ ña-maɣmaɣ ñɔ-tɔm pee yɔɔ nɛ ŋlɩzɩ tɩ-taa. Ŋŋtazɩɣ lɩmaɣza sɔsɔna taa lɛ, pɩtasɩna se pɩsɩɣnɩ-ŋ se ŋtɔzʋʋ tɔm yɔɔ lɛ, pɩsɩɣnɩ-ŋ ɖɔɖɔ nɛ ŋna ɛzɩma ŋpɩzɩɣ nɛ ŋɖɔ tɔm ndʋ ŋkpɛlɩkaa yɔ tɩ-yɔɔ ñe-wezuu caɣʋ taa yɔ.