TƆM ÑƲƲ ŊGƲ ÐƖKPƐLƖKƖƔ YƆ 40
HENDU 30 Man-Caa, mɛ-Ɛsɔ nɛ man-Taabalʋ
Yehowa ‘waɣ mba pa-laŋa pʋʋtaa yɔ’
«Ɛwaɣ mba pa-laŋa pʋʋtaa yɔ; ɛhɔkʋʋ pe-heŋ.» —KEƔ. 147:3.
LƖMAƔZƖYƐ SƆSƆÐƐ
Yehowa maɣzɩɣ mba panɩɣ siziŋ pa-maɣzɩm taa yɔ pɔ-yɔɔ siŋŋ. Tɔm ñʋʋ kʋnɛ, kɩkaɣ-ɖʋ sɩnʋʋ nɛ ɖɩna ɛzɩma ɛhɛzɩɣ ɖa-laŋɩyɛ alɩwaatʋ ndʋ ɖɩwɛ laŋwɛɛkɩyɛ taa yɔ. Kɩkaɣ-ɖʋ sɩnʋʋ ɖɔɖɔ nɛ ɖɩna ɛzɩma ɖɩpɩzɩɣ nɛ ɖɩhɛzɩ ɛyaa lalaa laŋa yɔ.
1. Yehowa cɔŋnɩ ɛ-sɛyaa lɛ, ɛzɩma pɩlakɩ-ɩ?
ALƖWAATƲ ndʋ Yehowa cɔŋnɩ ɛ-sɛyaa tɛtʋ yɔɔ yɔ, ɛbɛ ɛnaɣ? Ɛsɩm alɩwaatʋ ndʋ ɖɩnɩɣ leleŋ yɔ nɛ alɩwaatʋ ndʋ ɖɩnɩɣ wɩzasɩ yɔ. (Keɣ. 37:18) Alɩwaatʋ ndʋ ɛnaɣ se ɖɩwɛɛ nɛ ɖɩlakɩ mbʋ payɩ ɖɩpɩzɩɣ yɔ nɛ ɖɩsɛɣ-ɩ paa ɖɩwɛɛ nɛ ɖɩnɩɣ siziŋ ɖa-maɣzɩm taa yɔ, pɩlakɩ-ɩ leleŋ siŋŋ. Kɔzɩ kɔzɩ lɛ, ɛsɔɔlɩ siŋŋ se ɛsɩnɩ-ɖʋ nɛ ɛhɛzɩ ɖa-laŋɩyɛ.
2. (a) Ɛbɛ Yehowa lakɩ mba pa-laŋa pʋʋtaa yɔ? (b) Nɛ ɛbɛ ɖɩpɩzɩɣ ɖɩla nɛ ɛzɩma Yehowa sɩɣnɩ-ɖʋ yɔ pɩwazɩ-ɖʋ?
2 Keɣa 147:3 yɔɔdʋʋ se mba pa-laŋa pʋʋtaa yɔ, Yehowa ‘hɔkʋʋ pe-heŋ.’ Mayaɣ ŋga kawɩlɩɣ ɛzɩma Yehowa sɩɣnɩ mba pɛwɛ laŋwɛɛkɩyɛ taa yɔ nɛ sɔɔlɩm yɔ. Ɛlɛ, ɛbɛ pɩwɛɛ se ɖɩla nɛ ɛzɩma Yehowa sɩɣnɩ-ɖʋ yɔ pɩwazɩ-ɖʋ? Ðɩna kɩɖaʋ nakʋyʋ. Ðɔkɔtɔ weyi ɛwɛ niye yɔ, ɛpɩzɩɣ ɛñaɣ pana nɛ ɛsɩnɩ ɛyʋ weyi pɩkʋ-ɩ yɔ nɛ e-heŋ waa. Ɛlɛ, pɩsa nɛ pɩwazɩ ɛyʋ weyi pɩkʋ-ɩ yɔ lɛ, pɩpɔzʋʋ se ɛɖɔ ɖɔkɔtɔ lɔŋ tasʋʋ yɔɔ camɩyɛ. Tɔm ñʋʋ kʋnɛ kɩ-taa, ɖɩkaɣ naʋ tɔm ndʋ Yehowa tɩŋɩɣnɩ Bibl yɔɔ nɛ eheyiɣ mba pɛwɛ laŋwɛɛkɩyɛ taa yɔ. Ðɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩɖɔ lɔŋ weyi ɛtasɩɣ-ɖʋ nɛ sɔɔlɩm yɔ ɩ-yɔɔ yɔ.
YEHOWA TƆZƲƲ-ÐƲ SE ÐƖMƲ ÑƖM SIŊŊ Ɛ-ƐSƖNDAA
3. Ɛbɛ yɔɔ nabɛyɛ maɣzɩɣ se patɩlɩɩ pʋyʋ?
3 Ðɩwɛ ɛjaɖɛ nɖɩ ɖɩ-taa yɔ, sɔɔlɩm fɛyɩ; nɛ piyeba nɛ ɛyaa sakɩyɛ maɣzɩɣ se patɩlɩɩ pʋyʋ. Payaɣ koobu halɩñɩnʋ nɔɔyʋ se Helen. a Ɛyɔɔdaa se: «Manpaɣlɩ hɔʋ ŋgʋ kɩ-taa yɔ sɔɔlɩm taawɛɛ kɩ-taa. Man-caa kaawɛ puuyaɣ nɛ eheyaɣ-m paa evemiye nɖɩ se mɛnfɛyɩ wazaɣ nakɛyɛ.» Pɩtɩla, ɛzɩ Helen yɔ, pawɩlɩɣ-ŋ ñaŋ nɛ ɖoŋ ɖoŋ lɛ, patʋʋ-ŋ yaa peyeki se ŋmaɣzɩ se ŋfɛyɩ wazaɣ nakɛyɛ. Ye mbʋ yɔ, pɩpɩzɩɣ nɛ pɩlabɩ-ŋ kaɖɛ se ŋtisi se toovenim taa lɛ, nɔɔyʋ maɣzɩɣ ñɔ-yɔɔ.
4. Ɛzɩ Keɣa 34:18 yɔɔdʋʋ yɔ, tɔm ndʋ Yehowa sɔɔlaa se ɖa-taa ɛtɛmna?
4 Paa ɛyaa lalaa ɩwɩlɩ-ŋ ñaŋ yɔ, ña-taa pɩzɩɣ nɛ pɩtɛ se Yehowa sɔɔlɩ-ŋ nɛ ŋmʋ ñɩm ɛ-ɛsɩndaa. «[Ɛñɔtɩnɩ] mba pa-laŋa pʋʋtaa yɔ.» (Kalɩ Keɣa 34:18.) Ye ŋwɛ laŋwɛɛkɩyɛ taa yɔ, tɔzɩ se Yehowa na wɛtʋ kɩbandʋ ña-laŋɩyɛ taa nɛ ɛhɔmɩ-ŋ nɛ ɛkɔnɩ ɛ-cɔlɔ. (Yoh. 6:44) Ɛsɔɔlɩ paa ɛzɩmtaa se ɛsɩnɩ-ŋ, mbʋ pʋyɔɔ yɔ ŋmʋ ñɩm ɛ-ɛsɩndaa.
5. Wɛtʋ ndʋ Yesu kaawɛnɩ ɛyaa mba ɛyaa lalaa maɣzaɣ se patɩlɩɩ pʋyʋ yɔ pɔ-yɔɔ yɔ, ɛbɛ tɩkpɛlɩkɩɣ-ɖʋ?
5 Ye ɖɩmaɣzɩɣ Yesu kɩɖaʋ yɔɔ yɔ, pɩsɩɣnɩ-ɖʋ nɛ ɖɩtɩlɩ ɛzɩma pɩlakɩ Yehowa yɔ. Alɩwaatʋ ndʋ Yesu kaawɛ tɛtʋ yɔɔ yɔ, ɛlakaɣ camɩyɛ lakasɩ ɛyaa mba ɛyaa lalaa maɣzaɣ se patɩlɩɩ pʋyʋ yɔ. (Mat. 9:9-12) Kɩɖaʋ nakʋyʋ yɔ: Halʋ nɔɔyʋ kaawɛnɩ kʋdɔŋ sɔsɔʋ nakʋyʋ nɛ ɛñɩnaɣ se ɛ-yɔɔ ɛcɛ. Nɛ alɩwaatʋ ndʋ ewoba nɛ etukuni Yesu toko yɔ, Yesu hɛzɩ ɛ-laŋɩyɛ nɛ ɛsamɩ-ɩ e-tisuu yɔɔ. (Mark. 5:25-34) Yesu maɣzɩnɩ ɛ-caa wɛtʋ kɩbandʋ ɖeyi ɖeyi. (Yoh. 14:9) Ye mbʋ, ña-taa pɩzɩɣ nɛ pɩtɛ se ŋmʋ ñɩm Yehowa ɛsɩndaa nɛ ɛnaɣ ñɛ-wɛtʋ kɩbandʋ, pɩkpɛndɩnɩ ñe-tisuu nɛ sɔɔlɩm mbʋ ŋwɛnɩ ɛ-yɔɔ yɔ.
6. Ye pɩlakɩ nɔɔyʋ ɛzɩ ɛtɩlɩɩ pʋyʋ yɔ, ɛbɛ ɛpɩzɩɣ nɛ ɛla?
6 Ye pɩwɛ-ŋ kaɖɛ se ŋyele maɣzʋʋ se ŋtɩlɩɩ pʋyʋ yɔ, ɛbɛ ŋpɩzɩɣ nɛ ŋla? Kalɩ Bibl masɩ nzɩ siyeki nɛ ña-taa tɛ se ŋmʋ ñɩm Yehowa ɛsɩndaa yɔ nɛ ŋmaɣzɩ sɩ-yɔɔ. b (Keɣ. 94:19) Ye ŋtɩpɩzɩ nɛ ŋtalɩ kaɖʋwa nakɛyɛ yaa ye pitibi-ŋ yɔɔɔ mbʋ pʋyɔɔ yɔ ŋŋpɩzɩɣ nɛ ŋlakɩ sakɩyɛ ɛzɩ lalaa yɔ, taakʋ ñɔ-tɔm. Yehowa ɛɛɖaŋɩɣ se ɖɩla mbʋ pɩcɛzɩ ɖo-ɖoŋ yɔɔ yɔ. (Keɣ. 103:13, 14) Ye nɔɔyʋ kaalabɩ-ŋ kañatʋ tomnaɣ yɔɔ yaa maɣzɩm taa yaa kʋzʋʋ nʋmɔʋ taa nɛ pɩɖɛɛ yɔ, taakʋ ñɔ-tɔm pɩ-yɔɔ. Pɩtɩlɩɩnɩ ñɔ-cɔlɔ. Tɔzɩ se mba palakɩ lalaa kañatʋ yɔ, mba Yehowa pɔzʋʋ akɔnta, pɩtɩkɛ mba palabɩ-wɛ kañatʋ yɔ. (1 Pɩy. 3:12) Paalabɩ Sandra kañatʋ ɛ-pɩjatʋ taa, ɛyɔɔdaa se: «Mɔnpɔzʋʋ Yehowa ɖoŋ ɖoŋ se ɛsɩnɩ-m nɛ mana wɛtʋ kɩbandʋ ndʋ ɛnaɣ mɔ-yɔɔ yɔ.»
7. Mbʋ pɩtalɩ-ɖʋ ɖe-wezuu caɣʋ taa yɔ, ɛzɩma ɖɩpɩzɩɣ nɛ ɖɩlabɩnɩ-pʋ tʋmɩyɛ camɩyɛ Yehowa sɛtʋ taa?
7 Taapɩtɩ kaaʋ se Yehowa pɩzɩɣ nɛ ɛtɩŋnɩ ñɔ-yɔɔ nɛ ɛsɩnɩ ɛyaa lalaa. Ɛɖʋ-ŋ hɩɖɛ nɛ ɛha-ŋ waɖɛ se ña nɛ ɩ ɩkpɛndɩ nɛ ɩla tʋmɩyɛ ɛ-sɛtʋ taa. (1 Kɔr. 3:9) Pɩtɩla, mbʋ pɩtalɩ-ŋ ñe-wezuu caɣʋ taa yɔ, piyeba nɛ pɩwɛ-ŋ kɛlɛʋ se ŋnɩɣ ɛyaa siziŋ nɛ ŋnɩɣ ɖɔɖɔ ɛzɩma pɩlakɩ-wɛ yɔ pɩ-taa. Ŋpɩzɩɣ ŋla sakɩyɛ nɛ ŋsɩnɩ-wɛ. Helen weyi ɖɩyɔɔdɩ ɛ-tɔm nɛ pɩɖɛɛ yɔ, lalaa kaasɩnɩ-ɩ nɛ lɛɛlɛɛyɔ, ɛpɩzɩɣ nɛ ɛsɩnɩ lalaa camɩyɛ. Ɛyɔɔdaa se: «Mamaɣzaɣ se mɛnfɛyɩ wazaɣ nakɛyɛ, ɛlɛ Yehowa yeba nɛ menɖiɣzina se ɛsɔɔlɩ-m nɛ ɛtɩŋɩɣnɩ mɔ-yɔɔ nɛ ɛsɩɣnɩ lalaa.» Helen kɛ paa ɖooye nʋmɔʋ lɩzɩyʋ nɛ ɛ-taa wɛ leleŋ.
YEHOWA SƆƆLAA SE ÐA-TAA ƐTƐ SE EKPEƔ-ÐƲ ÐA-KƖWƐƐKƖM
8. Tɔm ndʋ Yehowa heyiɣ-ɖʋ Izaayii 1:18 taa?
8 Yehowa sɛyaa nabɛyɛ nɩɣzɩɣ siŋŋ, mbʋ pʋyɔɔ yɔ paalabɩ kɩwɛɛkɩm nabʋyʋ nɛ pɩɖɛɛ. Pɩtɩla paalabɩ kɩwɛɛkɩm mbʋ pʋcɔ nɛ pamɩyɩsɩɣ-wɛ lɩm yaa pa-lɩm mɩyɩsʋʋ wayɩ palabɩ-pʋ. Ɛlɛ pɩwɛɛ se ɖɩtɔzɩ se Yehowa hɛyɩ kɩhɛyʋʋ pʋ-ñʋʋ taa mbʋ pʋyɔɔ yɔ ɛsɔɔlɩ-ɖʋ siŋŋ. Ða-taa pɩzɩɣ nɛ pɩtɛ se ɛsɔɔlaa se ɖitisi nɛ ɖɩmʋ kʋjɔʋ ŋgʋ. Yehowa sɔɔlaa se ɖa-taa ɛtɛ se ye «ɖɩñɔɔzɩ tɔm [ɖa nɛ ɩ] ɖɛ-hɛkʋ taa» c yɔ, ekpeɣu-ɖʋ ɖa-kɩwɛɛkɩm caɣ caɣ. (Kalɩ Izaayii 1:18.) Ða-taa wɛ leleŋ siŋŋ se ɖa-Caa sɔɔlɩm tʋ Yehowa ɛɛtɔzʋʋ kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. Alɩwaatʋ kʋɖʋmtʋ ndʋ tɩ-taa lɛ, ɛɛsɔʋ kɩbandʋ ndʋ ɖɩlaba yɔ tɩ-yɔɔ kaaʋ.—Keɣ. 103:9, 12; Ebr. 6:10.
9. Ɛbɛ yɔɔ pɩfɛyɩ se ɖɩka ɖa-lɩmaɣza kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ?
9 Ye ŋwɛɛ nɛ ŋnɩɣzɩɣ kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ yɔ, ñaɣ pana nɛ ŋka ña-lɩmaɣza mbʋ ŋɖiɣni labʋ lɛɛlɛɛyɔ nɛ mbʋ ŋkaɣ pɩzʋʋ nɛ ŋla cee wayɩ yɔ pɩ-yɔɔ. Iyele nɛ ɖɩna apostoloo Pɔɔlɩ kɩɖaʋ. Ekpiɖaa se ɛɛnazɩ Krɩstʋ mba nɛ pɩɖɛɛ, ɛlɛ ɛɛnawa se Yehowa kpaɣaa nɛ ekpeɣ-i. (1 Tim. 1:12-15) Pʋwayɩ, ɛzɩ ewobi pɩ-yɔɔ nɛ ɛmaɣzɩɣ kɩwɛɛkɩm mbʋ ɛlaba nɛ pɩɖɛɛ yɔ pɩ-yɔɔ? Pɩtʋʋ fɛyɩ se ɛtaawɛɛ nɛ ɛmaɣzɩɣ pɩ-yɔɔ, nɛ ɛtaamaɣzɩɣ ɖɔɖɔ mbʋ ɛlaba nɛ ɛpɩsɩ Farɩsɩ tʋ weyi pañaŋaɣ-ɩ yɔ pɩ-yɔɔ. (Filp. 3:4-8, 13-15) Ɛlɛ Pɔɔlɩ labɩ ɛ-Ɛsɔ sɛtʋ tʋmɩyɛ nɛ kpekpeka nɛ ɛka ɛ-lɩmaɣza mbʋ pɩwɛnɩ ɛsɩndaa yɔ pɩ-yɔɔ. Ɛzɩ Pɔɔlɩ yɔ, ña ɖɔɖɔ ŋŋpɩzɩɣ nɛ ŋlɛɣzɩ mbʋ pɩtɛm labʋ yɔ. Ɛlɛ ŋpɩzɩɣ nɛ ŋɖʋ Yehowa hɩɖɛ wɛtʋ ndʋ tɩ-taa ŋwɛ lɛɛlɛɛyɔ yɔ tɩ-taa nɛ ŋka ña-lɩmaɣza cee wayɩ kɩbaŋʋ ŋgʋ kɩ-tamaɣ Yehowa labɩ-ŋ yɔ kɩ-yɔɔ.
10. Ye ɖɩɩlabɩ lakasɩ nasɩyɩ nɛ sɩɖʋ nabɛyɛ ɖɩwɩzɩyɛ yɔ, ɛbɛ ɖɩpɩzɩɣ nɛ ɖɩla?
10 Pɩtɩla, ŋwɛɛ nɛ ŋnɩɣzɩɣ mbʋ pʋyɔɔ yɔ ŋŋlabɩ lakasɩ nasɩyɩ nɛ sɩɖʋ nabɛyɛ ɖɩwɩzɩyɛ. Ɛbɛ pɩzɩɣ nɛ pɩsɩnɩ-ŋ? La mbʋ ŋpɩzɩɣ yɔ nɛ ŋñɔɔzɩ mbʋ ŋwɛɛkaa yɔ. Pɩtasɩ lɛ, tendi ɛyaa mba se pakpaɣ nɛ pekpeɣ-ŋ. (2 Kɔr. 7:11) Pɔzɩ Yehowa se ɛsɩnɩ ɛyaa mba ña-lakasɩ kɔnɩ-wɛ kaɖɛ yɔ. Ɛpɩzɩɣ nɛ ɛsɩnɩ ña nɛ ɛyaa mba ŋɖʋ-wɛ ɖɩwɩzɩyɛ yɔ nɛ iwolo pɩ-yɔɔ nɛ ɩsɛɛ-ɩ nɛ ɩwɛɛ laŋhɛzɩyɛ taa.
11. Ɛbɛ ɖɩpɩzɩɣ nɛ ɖɩkpɛlɩkɩ nayʋ Yoonaa kɩɖaʋ taa? (Cɔnɩ ɖɔɖɔ yɔɔ kɩlɛmʋʋ.)
11 Kpɛlɩkɩ lɔŋ hɔɔlɩŋ weyi ɩ-taa picoɖi-ŋ yɔ ɩ-taa, nɛ ŋtisi faaa nɛ Yehowa labɩnɩ-ŋ tʋmɩyɛ ɛzɩ ɛsɔɔlʋʋ yɔ. Yele nɛ ɖɩna nayʋ Yoonaa kɩɖaʋ. Ɛsɔ kaaɖʋ-ɩ paɣtʋ se ewolo Niniivi, kɩɩwɛnɩ wɩsɩ ɖɩlɩyɛ hɔɔlʋʋ taa; ɛlɛ ese nɛ ɛkpaɣ wɩsɩ ɖɩɖʋyɛ taa nʋmɔʋ se ewolo Tarɩsiisi. Yehowa sɩɣzɩ Yoonaa lɔŋ, nɛ Yoonaa kpɛlɩkɩ lɔŋ hɔɔlʋʋ ŋgʋ kɩ-taa picoɖi-i yɔ kɩ-taa. (Yon. 1:1-4, 15-17; 2:7-10) Yehowa taakizi se Yoonaa ɛtaatasɩ kɛʋ ɛ-nayʋ. Ɛsɔ tasɩ-ɩ haʋ waɖɛ se ewolo Niniivi; nɛ lɛɛlɛɛyɔ lɛ, etisi lɛɛ lɛɛ nɛ ewolo. Paa pɩɩcɛyɩ Yoonaa se ɛlabɩ mbʋ pɩfɛyɩ ɖeu yɔ, pɩtɩɖɩɣ-ɩ nʋmɔʋ se ɛtaala tʋmɩyɛ nɖɩ Yehowa ɖʋ-ɩ pʋwayɩ yɔ.—Yon. 3:1-3.
Nayʋ Yoonaa hiɣ ñʋʋ yabʋ kpakpayaɣ sɔsɔɔ taa nɛ pɩtɛ lɛ, Yehowa tasɩ-ɩ heyuu se ewolo Niniivi nɛ esusi ɛ-tɔm (Cɔnɩ tayʋʋ 11)
YEHOWA TƖŊƖƔNƖ FEZUU KIÐEÐEU YƆƆ NƐ ƐHƐZƖƔ ÐA-LAŊƖYƐ
12. Alɩwaatʋ ndʋ asɛyʋʋ nakʋyʋ talɩɣ-ɖʋ yɔ, ɛzɩma tɩyɛ Yehowa haɣ-ɖʋ laŋhɛzɩyɛ? (Filiipi mba 4:6, 7)
12 Alɩwaatʋ ndʋ asɛyʋʋ nakʋyʋ talɩɣ-ɖʋ yɔ, Yehowa tɩŋɩɣnɩ e-fezuu kiɖeɖeu yɔɔ nɛ ɛhɛzɩɣ ɖa-laŋɩyɛ. Iyele nɛ ɖɩna mbʋ pɩtalɩ Ron nɛ Carol alɩwaatʋ ndʋ pa-pɩyalʋ kʋ ɛ-tɩ yɔ. Pɔyɔɔdaa se: «Ðɩɩkatɩ kala sakɩyɛ nɛ pɩɖɛɛ, ɛlɛ ɖɩnɛ ɖɩkpaɖɩ a-tɩŋa. Ðoo sakɩyɛ ɖɛwa nɛ ɖɩtaapɩzɩɣ se ɖiɖoo, pʋyɔɔ ɖɩtɩmnɩ Yehowa, nɛ ɖihiɣ laŋhɛzɩyɛ nɖɩ ɖɩ-tɔm pɔyɔɔdɩ Filiipi mba 4:6, 7 taa yɔ.» (Kalɩ Filiipi mba 4:6, 7.) Ye ŋwɛɛ nɛ ŋkatɩɣ kaɖɛ naɖɩyɛ nɛ ŋwɛɛ laŋwɛɛkɩyɛ taa yɔ, ŋpɩzɩɣ nɛ ŋtɩmnɩ Yehowa nɛ ŋheyi-i mbʋ ɖeyi ɖeyi pɩwɛɛ nɛ pɩlakɩ-ŋ yɔ, nɛ ŋpɩzɩɣ nɛ ŋla mbʋ tam ɛzɩma ŋsɔɔlaa yɔ. (Keɣ. 86:3; 88:1) Pɔzʋʋ Yehowa ɖoŋ ɖoŋ se ɛha-ŋ e-fezuu kiɖeɖeu. Ɛkaɣ-ŋ sɩnʋʋ paa ɛzɩmtaa.—Luka 11:9-13.
13. Ɛzɩma fezuu kiɖeɖeu pɩzɩɣ nɛ kɩsɩnɩ-ɖʋ nɛ ɖɩsɛɛ Yehowa siɣsiɣ? (Efɛɛzɩ mba 3:16)
13 Ŋwɛɛ nɛ ŋkatɩɣ kaɖɛ naɖɩyɛ nɛ pɩlakɩ-ŋ ɛzɩ ño-ɖoŋ tɛma yɔ? Fezuu kiɖeɖeu pɩzɩɣ nɛ kɩha-ŋ ɖoŋ nɛ ŋwolo pɩ-yɔɔ nɛ ŋsɛɣ Yehowa siɣsiɣ. (Kalɩ Efɛɛzɩ mba 3:16.) Iyele nɛ ɖɩna koobu halɩñɩnʋ Flora kɩɖaʋ. Ɛ nɛ ɛ-walʋ paakɛ Ɛsɔtɔm tiyiyaa, nɛ pʋwayɩ ɛ-walʋ la acɛyɛ nɛ ɛ nɛ ɩ pɛcɛ nesi. Flora yɔɔdaa se: «Mbʋ ɛɛlaba yɔ pɩɩwɛɛkɩ ma-laŋɩyɛ siŋŋ, nɛ mantaapɩzɩɣ se mamaɣzɩ nabʋyʋ yɔɔ nɛ pɩtasɩnɩ mbʋ ɛlabɩ-m yɔ. Mantɩmnɩ Yehowa se ɛha-m e-fezuu kiɖeɖeu nɛ pɩsɩnɩ-m nɛ mɔnɖɔkɩ ma-laŋɩyɛ. Yehowa ha-m mbʋ pɩpɔzaɣ-m yɔ se ma-laŋɩyɛ ɛhɛɛ nɛ malʋbɩnɩ ɖɔɖɔ mbʋ mamaɣzaɣ kiɖe tɛɛ se maapɩzɩɣ nɛ malʋbɩna yɔ.» Flora kaanawa se Ɛsɔ sɩnɩ-ɩ nɛ ɛtaa-ɩ liu nɛ pɩkɩlɩ, nɛ ɛ-taa tɛma se ɛkaɣ-ɩ sɩnʋʋ kʋñɔmɩŋ weyi payɩ ɛkaɣ katʋʋ yɔ ɩ-taa. Ɛtasɩ yɔɔdʋʋ se: «Keɣa 119:32 taa tɔm labɩ mɔ-hɔɔlʋʋ taa. Tɩtɔŋ se: “Mankaɣ tɩŋʋʋ ña-paɣtʋ nʋmɔʋ nɛ kpekpeka mbʋ pʋyɔɔ yɔ ŋñɔɔzʋʋ-kʋ lone ma-laŋɩyɛ taa.”»
14. Ɛbɛ ɖɩpɩzɩɣ ɖɩla nɛ fezuu kiɖeɖeu la tʋmɩyɛ ɖɔ-yɔɔ?
14 Ŋtɩmɩɣ nɛ ŋpɔzɩ Yehowa se ɛha-ŋ e-fezuu kiɖeɖeu nɛ pɩtɛ lɛ, ɛbɛ pɩwɛɛ se ŋla? La tʋma wena ayeki se fezuu kiɖeɖeu ɛla tʋmɩyɛ ñɔ-yɔɔ yɔ. Tʋma ana a-taa naayɛ lɛ se ŋwoki kediɣzisi nɛ ŋsusuu lalaa tɔm. Kalɩɣ Ɛsɔtɔm paa evemiye nɖɩ. Pɩkaɣ-ŋ sɩnʋʋ nɛ ŋmaɣzɩɣ tɩ-yɔɔ. (Filp. 4:8, 9) Ŋŋkalɩɣ Bibl lɛ, maɣzɩ Bibl taa ɛyaa mba pakatɩ kala yɔ pɔ-yɔɔ nɛ ŋmaɣzɩ ɖɔɖɔ ɛzɩma Yehowa sɩnɩ-wɛ nɛ pɔɖɔkɩ pa-laŋa a-taa yɔ pɩ-yɔɔ. Sandra weyi ɖɩyɔɔdɩ ɛ-tɔm nɛ pɩɖɛɛ yɔ, ɛɛwɛ laŋwɛɛkɩyɛ taa mbʋ pʋyɔɔ yɔ ɛɛkatɩ kʋñɔmɩŋ sakɩyɛ e-wezuu caɣʋ taa. Ɛyɔɔdaa se: «Yosɛɛfʋ kɛdaɣ kpazɩɣ-m ɖoŋ siŋŋ. Etiyele se ɛ-kʋñɔmɩŋ nɛ mulum lakasɩ nzɩ palabɩ-ɩ yɔ, sɩcamɩ ɛ nɛ Yehowa pa-taabalɩyɛ.»—Kiɖe 39:21-23.
YEHOWA TƖŊƖƔNƖ ÐO-KOOBIYA YƆƆ NƐ ƐHƐZƖƔ ÐA-LAŊƖYƐ
15. (a) Mba pɩzɩɣ nɛ pɛhɛzɩ ɖa-laŋɩyɛ? (b) Nɛ ɛzɩma papɩzɩɣ nɛ pasɩnɩ-ɖʋ? (Cɔnɩ ɖɔɖɔ kɩlɛmʋʋ.)
15 Alɩwaatʋ ndʋ ɖɩwɛɣ kʋñɔŋ taa yɔ, ɖo-koobiya pɩzɩɣ nɛ «pɛhɛzɩ [ɖa]-laŋɩyɛ siŋŋ.» (Kol. 4:11) Nʋmɔŋ weyi ɩ-yɔɔ Yehowa tɩŋɩɣna nɛ ɛwɩlɩɣ-ɖʋ sɔɔlɩm yɔ, ɩ-taa nakʋyʋ lɛ ɖo-koobiya. Ðo-koobiya pɩzɩɣ nɛ pɛhɛzɩ ɖa-laŋɩyɛ alɩwaatʋ ndʋ pakpakɩɣ pa-alɩwaatʋ nɛ pacakɩ ɖɔ-cɔlɔ yɔ. Nɛ alɩwaatʋ ndʋ ɖiheyiɣ-wɛ ɛzɩma pɩlakɩ-ɖʋ yɔ nɛ pewelisiɣni-ɖʋ yɔ, pɩhɛzɩɣ ɖa-laŋɩyɛ ɖɔɖɔ. Papɩzɩɣ nɛ pakalɩ-ɖʋ Bibl mayaɣ nakɛyɛ nɛ pɩhɛzɩ ɖa-laŋɩyɛ, yaa papɩzɩɣ pɔkɔɔ nɛ ɖa nɛ wɛ ɖɩkpɛndɩ nɛ ɖɩtɩmɩ. d (Roma 15:4) Nabʋyʋ taa, koobu nɔɔyʋ pɩzɩɣ nɛ ɛtɔzɩ-ɖʋ Yehowa lɩmaɣzɩyɛ naɖɩyɛ yɔɔ, nɛ pɩpɩzɩɣ pɩsɩnɩ-ɖʋ nɛ ɖiwolo pɩ-yɔɔ nɛ ɖɩɖɔkɩ ɖa-laŋɩyɛ. Alɩwaatʋ ndʋ ɖɩwɛɣ laŋwɛɛkɩyɛ taa yɔ, ɖo-koobiya Krɩstʋ ñɩma pɩzɩɣ ɖɔɖɔ nɛ pala nabʋyʋ ɖeyi ɖeyi nɛ pasɩnɩ-ɖʋ; papɩzɩɣ nɛ paha-ɖʋ tɔɔnaɣ.
Taabalaa kɩbama mba papɩzɩɣ nɛ pataa-wɛ liu nɛ pɔsɔɔlɩ Yehowa yɔ, papɩzɩɣ nɛ pɛhɛzɩ ña-laŋɩyɛ nɛ pasɩnɩ-ŋ (Cɔnɩ tayʋʋ 15)
16. Pɩtɩla, ɛbɛ pɩpɔzʋʋ se ɖɩla nɛ lalaa sɩnɩ-ɖʋ?
16 Pɩsa nɛ lalaa sɩnɩ-ɖʋ lɛ, nabʋyʋ taa pɩpɔzʋʋ se ɖɩpɔzɩ-wɛ. Ðo-koobiya sɔɔlɩ-ɖʋ nɛ pɔsɔɔlaa se pasɩnɩ-ɖʋ. (Adu. 17:17) Ɛlɛ pɩtɩla, paasɩŋ ɛzɩma pɩlakɩ-ɖʋ yɔ yaa mbʋ pɩpɔzʋʋ-ɖʋ yɔ. (Adu. 14:10) Ye ŋwɛ laŋwɛɛkɩyɛ taa yɔ, ŋpɩzɩɣ nɛ ŋyɔɔdɩnɩ ña-taabalaa kɩbama nɛ ŋheyi-wɛ ɛzɩma pɩlakɩ-ŋ yɔ. Yele nɛ patɩlɩ mbʋ papɩzɩɣ pala nɛ pasɩnɩ-ŋ yɔ. Ŋpɩzɩɣ nɛ ŋlɩzɩ se ŋheyiɣ ña-taa tɔm ɛgbɛyɛ taa ɛzʋtʋyʋ nɔɔyʋ yaa ɛgbɛyɛ taa ɛzʋtʋyaa 2 mba ña nɛ wɛ ɩmalɩnɩ ɖama yɔ. Koobiya halɩñɩma nabɛyɛ ɖiɣzinaa se alɩwaatʋ ndʋ pɔyɔɔdʋʋnɩ koobu halɩñɩnʋ weyi ɛpɩ fezuu taa yɔ, pɩhɛzɩɣ pa-laŋa.
17. (a) Kala wena pɩzɩɣ ayele nɛ ɖiposi ɖa-tɩ nɛ koobiya? (b) Nɛ ɛbɛ pɩzɩɣ pɩsɩnɩ-ɖʋ nɛ ɖɩlʋbɩnɩ kala ana?
17 Ñaɣ pana nɛ ŋtaaposi ña-tɩ nɛ koobiya. Nabʋyʋ taa, ŋpɩzɩɣ nɛ ŋwɛɛ laŋwɛɛkɩyɛ taa nɛ pɩlakɩ-ŋ ɛzɩ nɔɔyʋ ɛtaawɛɛ ñɔ-cɔlɔ yɔ. Alɩwaatʋ natʋyʋ, pɩtɩla ño-koobiya ɩɩnɩɣ ɛzɩma pɩlakɩ-ŋ yɔ pɩ-taa camɩyɛ, yaa papɩzɩɣ nɛ pɔyɔɔdɩ natʋyʋ nɛ tɩwɩzɩ-ŋ. (Yak. 3:2) Taayele nɛ kala ana ayele nɛ ŋposini ño-koobiya. Yehowa pɩzɩɣ nɛ ɛtɩŋnɩ pɔ-yɔɔ nɛ ɛkpazɩ-ŋ ɖoŋ. Payaɣ ɛgbɛyɛ taa ɛzʋtʋyʋ nɔɔyʋ se Gavin. Ɛwɛnɩ lɩmaɣza taa kʋdɔŋ. Ɛyɔɔdaa se: «Ðoŋ ɖoŋ lɛ, pɩlakɩ-m ɛzɩ mantaayɔɔdɩnɩ man-taabalaa yaa mantaawɛɛ pɔ-cɔlɔ yɔ.» Ɛlɛ Gavin ñakɩ pana nɛ ɛ nɛ e-koobiya pacakɩ. Nɛ ɖoŋ ɖoŋ ɛlakɩ mbʋ lɛ, pɩkpazɩɣ-ɩ ɖoŋ. Payaɣ koobu halɩñɩnʋ nɔɔyʋ se Amy. Ɛyɔɔdaa se: «Mbʋ pɩtalɩ-m me-wezuu caɣʋ taa nɛ pɩɖɛɛ yɔ pʋyɔɔ lɛ, pɩwɛ-m kaɖɛ se mantaa ɛyaa liu. Ɛlɛ mɛwɛɛ nɛ mañakɩ pana se mɔnsɔɔlɩ mon-koobiya nɛ mantaa-wɛ liu ɛzɩ Yehowa lakʋʋ yɔ. Manawa se ye malakɩ mbʋ yɔ, pɩhaɣ Yehowa taa leleŋ, nɛ pɩhaɣ-m taa leleŋ ɖɔɖɔ.»
TAMAƔ ŊGA YEHOWA LABƖ CEE WAYƖ YƆƆ YƆ KAPƖZƖƔ NƐ KƐHƐZƖ ÐA-LAŊƖYƐ
18. (a) Ɛbɛ ɖɩpɩzɩɣ nɛ ɖɩɖaŋ cee wayɩ? (b) Nɛ ɛbɛ ɖɩpɩzɩɣ nɛ ɖɩla lɛɛlɛɛyɔ?
18 Pɩkazɩ pazɩ lɛ, Yehowa kaɣ ɖɩzʋʋ mbʋ payɩ pɩkɔŋnɩ-ɖʋ laŋwɛɛkɩyɛ yɔ nɛ eyele nɛ siziŋ weyi payɩ ɖɩnɩɣ yɔ ɩsɩɩ tɩnaɣ. (Natʋ 21:3, 4) Alɩwaatʋ ndʋ lɛ, mbʋ payɩ ɖɩɩkataa nɛ pɩkɔnɩ-ɖʋ laŋwɛɛkɩyɛ yɔ, «pɩɩkaɣ ɖɔɖɔ tasʋʋ kpaʋ laŋɩyɛ taa.» (Iza. 65:17) Ɛzɩ ɖɩnaʋ yɔ, Yehowa ‘hɔkʋʋ ɖe-heŋ’ halɩ sɔnɔ maɣmaɣ. Yele nɛ mbʋ mbʋ Yehowa haɣ-ŋ se pɩhɛzɩ ña-laŋɩyɛ yɔ, pɩwazɩ-ŋ. Taapɩtɩ paa ññɩɩ, «ɛcɔŋnɩ [ñɔ]-yɔɔ.»—1 Pɩy. 5:7.
HENDU 7 Yehowa kɛnɩ ɖo-ɖoŋ
a Pɛlɛɣzɩ hɩla.
b Kalɩ aɖakaɣ « Ŋmʋ ñɩm Yehowa ɛsɩndaa.»
c Pɩsa nɛ ɖa nɛ Yehowa «ɖɩñɔɔzɩ tɔm ɖɛ-hɛkʋ taa» lɛ, pɩpɔzʋʋ se ɖɩpɔzɩ-ɩ se ɛkpaɣ ɖa-kɩwɛɛkɩm nɛ ekpeɣ-ɖʋ nɛ ɖɩlɛɣzɩ ɖa-lakasɩ nɛ ɖɩwɩlɩ se ɖikpiɖaa. Ye ɖɩlabɩ kɩwɛɛkɩm sɔsɔm nabʋyʋ yɔ, pɩpɔzʋʋ ɖɔɖɔ se ɖɩpɔzɩ ɛgbɛyɛ taa ɛzʋtʋyaa nɛ pasɩnɩ-ɖʋ.—Yak. 5:14, 15.
d Ŋpɩzɩɣ nɛ ŋñɩnɩ masɩ nzɩ sɩwɛ tɔm ñʋŋ «Nɩɣzɛ» nɛ «Laŋɩyɛ hɛzʋʋ» tɛɛ yɔ Masɩ nzɩ siɖiyiɣ Krɩstʋ tʋ yɔ takayaɣ taa.
