“MAAWƐNƖ pɩnzɩ 15 lɛ maha man-tɩ nɛ pamɩyɩsɩ-m lɩm, nɛ pɩlabɩ fenasɩ loɖo lɛ, manpɩsɩ nʋmɔʋ lɩzʋʋ sɩnɩyʋ. Pɩlabɩ pɩnaɣ kʋɖʋmaɣ pʋwayɩ lɛ, manpɩsɩ paa ɖooye nʋmɔʋ lɩzɩyʋ. Mɛntɛm Liisee sukuli lɛ, mɔnpɔzɩ se mowoki nɛ monsusi tɔm ɖenɖe tɔm susuyaa tɩɖɔɔ yɔ. Alɩwaatʋ ndʋ lɛ, maawɛ me-neze cɔlɔ, ɛlɛ ɛtaakɛ Yehowa Aseɣɖe Tʋ. Nɛ maasɔɔlaa se monposini ɖɛ-tɛtʋ nɛ me-neze. Ɛlɛ egeetiye yɔɔ cɔnɩyʋ heyi-m se mancaɣ mɛn-tɛtʋ taa peeɖe na nɛ monsusi tɔm. Eheyi-m mbʋ lɛ, pitibi-m yɔɔɔ kpem. Mantaasɔɔlɩ se meyele nɛ ɛna se man-taa fɛyɩ leleŋ. Peeɖe mɔnsɔbɩ ma-ñʋʋ nɛ mɛnɖɛɛ se mamaɣzɩ ndʋ eheyi-m yɔ tɩ-yɔɔ. Meheyi koobu halɩñɩnʋ weyi ma nɛ ɩ ɖɩlakaɣ nʋmɔʋ lɩzʋʋ tʋmɩyɛ yɔ se: ‘Pɩlakɩ-m ɛzɩ mɛwɛɛ nɛ malakɩ ɛzɩ Yoonaasɩ yɔ. Ɛlɛ pʋwayɩ, Yoonaasɩ ñɔkɔm nɛ ewolo Niniivi. Ye mbʋ, ma ɖɔɖɔ mentisiɣ nɛ mancaɣ ɖenɖe peheyi-m se mala tʋmɩyɛ yɔ.’

“Pɩlakɩ pɩnzɩ naanza yɔ mɛwɛʋ nɛ malakɩ nʋmɔʋ lɩzʋʋ tʋmɩyɛ mɛn-tɛtʋ taa yɔ, nɛ lɛɛlɛɛyɔ lɛ manaɣ se pɩɩkɛnɩ lɔŋsɩnɖɛ se mala mbʋ pɔpɔzɩ-m yɔ. Lɩmaɣza kɩdɛkɛda wena maawɛna yɔ, ana pɩɩwɛɛ se malʋbɩna. Lɛɛlɛɛyɔ lɛ, mɛwɛɛ nɛ mehikiɣ taa leleŋ siŋŋ. Fenaɣ nakɛyɛ, mɛnkpɛlɩkɩnɩ ɛyaa 24 Bibl. Mɛnsɛɣ Yehowa se ɛlabaɣ lɛ, mbʋ pʋyɔɔ yɔ me-neze weyi ɛkaɖaɣnɩ-m kiɖe tɛɛ yɔ, ma nɛ ɩ ɖɔɖɔ ɖɩpaɣzɩ Bibl kpɛlɩkʋʋ.”

Halʋ nɔɔyʋ kpɛlɩkɩɣ Bibl Fiiji ɛjaɖɛ taa, nɛ pɩɩwɛɛ se ɛlɩzɩ se ewoki Yehowa Aseɣɖe Tɩnaa kigbeɣluu nakʋyʋ yaa ɛsɩɣ ɛ-walʋ nɛ powolo ɛ-hɔʋ taa tʋ nɔɔyʋ lʋlʋʋ kazandʋ taa. Ɛ nɛ ɛ-walʋ panɩɩnɩ ɖama se ɛpɩzɩɣ nɛ ewolo kigbeɣluu. Nɛ eheyi ɛ-walʋ se pɛtɛŋ kigbeɣluu lɛ, ɛnʋ tɩŋ ɛ-wayɩ kazandʋ taa. Ɛlɛ, alɩwaatʋ ndʋ ɛlɩnɩ kigbeɣluu nɛ ɛpɩsɩ ɖɩɣa lɛ, ɛna se pɩɩwɛɣ ɖeu se ewolo lone nɖɩ ɖɩ-taa pɩpɩzɩɣ nɛ pɩkɔnɩ-ɩ kaɖɛ fezuu taa yɔ, nɛ pʋyɔɔ lɛ ɛtɩtɩŋ ɛ-walʋ kazandʋ taa.

Alɩwaatʋ ndʋ tɩ-taa lɛ, ɛ-walʋ heyi ɛ-tɛ mba se ɛ nɛ ɛ-halʋ panɩnɩ ɖama se ɛlɩɣnɩ Yehowa Aseɣɖe Tɩnaa kediɣzaɣ nakɛyɛ taa lɛ, ɛkɔɔ pɔ-cɔlɔ. Peeɖe paba heyi-i se: “Ɛɛkaɣ kɔm; Yehowa Aseɣɖe Tɩnaa ɩɩtɔkɩ lʋlʋʋ kazandʋ.” *

Piyeba nɛ abalʋ taa la leleŋ se ɛ-halʋ ñɔnɩ e-tisuu nɛ ɛtɩla mbʋ ɛ-ɛhʋyɛ ɛɛhaɣ-ɩ nʋmɔʋ se ɛla yɔ. Ɛzɩma halʋ ɛnʋ ɛɖɔkɩ e-siɣsiɣ wɛtʋ yɔ, pɩsɩnɩ-ɩ pʋwayɩ nɛ ɛlɩzɩ aseɣɖe ɛ-walʋ nɛ ɛyaa lalaa. Pee wena pɩlʋlaa? Ɛ-walʋ tisaa nɛ ɛpaɣzɩ Bibl kpɛlɩkʋʋ nɛ ɛpaɣzɩ ɖɔɖɔ kediɣzisi wobu.