1-2. (a) Ɛbɛ yɔɔ Armaagedɔɔ kɛ taa leleŋ tɔm? (b) Tɔm pɔzʋʋ mbʋ taa ɖɩkaɣ tazʋʋ tɔm ñʋʋ kʋnɛ kɩ-taa?

ƐYAA nabɛyɛ maɣzɩɣ se bɔmbɩ nakʋyʋ kaɣnɩ yaʋ yaa asɛyʋʋ nakʋyʋ kaɣnɩ labʋ nɛ pɩɖɩzɩ ɛjaɖɛ kpeekpe. Nɛ pamaɣzɩɣ se mbʋ payaɣ se Armaagedɔɔ. Ɛlɛ pɩtɩkɛ tɔm ndʋ Bibl wɩlɩɣ. Kɩwɩlɩɣ se piileɖiɣ lɛ, you nakʋyʋ kaɣ labʋ nɛ kɩkaɣ lʋlʋʋ pee kɩbana siŋŋ. Payaɣ you ŋgʋ se Armaagedɔɔ. Nɛ tɔm ndʋ Bibl yɔɔdɩ you ŋgʋ kɩ-yɔɔ yɔ, pɩwɛɛ se tɩha-ɖʋ taa leleŋ. (Natʋ 1:3) Armaagedɔɔ you ɛɛkaɣ ɖɩzʋʋ ɛyaa ɛlɛ kɩkaɣ pa-ñʋʋ yabʋ kɩyabʋ. Ɛzɩma tɩyɛ?

² Bibl wɩlɩɣ se Armaagedɔɔ you kaɣ yebu nɛ ɛyaa kewiyitu tɔɔʋ sɩɩ tɩnaɣ nɛ kɩya ɛyaa ñʋʋ. You ŋgʋ, kɩkaɣ ɖɩzʋʋ kɩdɛkɛdaa nɛ kɩya ɛyaa mba pɛwɛ siɣsiɣ yɔ pa-ñʋʋ. Kɩkaɣ yabʋ ɛyaa ñʋʋ nɛ kɩkandɩyɩ tɛtʋ yɔɔ se nɔɔyʋ ɛtaawɛɛkɩ-tʋ. (Natʋ 11:18) Pɩsa nɛ ɖɩnɩɩ tɔm ndʋ tɩ-taa kpayɩ kpayɩ lɛ, iyele nɛ ɖɩtazɩ tɔm pɔzʋʋ naanza pʋnɛ pɩ-taa: Ɛbɛ Armaagedɔɔ kɛnaa? Ɛbɛ kaɣ yebu nɛ kɩpaɣzɩ? Ɛbɛ ɖɩpɩzɩɣ ɖɩla nɛ ɖɩwɛɛ ɛyaa mba pakaɣ pa-ñʋʋ yabʋ Armaagedɔɔ taa yɔ pa-taa? Armaagedɔɔ ɖiɣni ñɔtʋʋ kpam; ye mbʋ, ɛbɛ ɖɩpɩzɩɣ ɖɩla nɛ pɩsɩnɩ-ɖʋ nɛ ɖɩɖɔkɩ ɖe-siɣsiɣ wɛtʋ kpam?

3. (a) Tɔm piye “Armaagedɔɔ” tɔbʋʋ lɛ suwe? (b) Ɛzɩ Natʋ 16:14, 16 yɔɔdʋʋ yɔ, ɛbɛ yɔɔ ɖɩpɩzɩɣ nɛ ɖɩyɔɔdɩ se Armaagedɔɔ tɩkɛ tɛtʋ yɔɔ lone naɖɩyɛ hɩɖɛ?

³ Kalɩ Natʋ 16:14, 16. Tam kʋɖʋm ɖeke palabɩnɩ tʋmɩyɛ tɔm piye “Armaagedɔɔ” Bibl taa. Tɔm piye nɖɩ ɖɩlɩnɩ Ebree kʋnʋŋ taa, nɛ ɖɩ-tɔbʋʋ lɛ se “Megiidoo Pʋʋ.” (Natʋ 16:16; pɩ-tɛɛ tɔm.) Megiidoo kaakɛ caanaʋ taa Izrayɛɛlɩ tɛtʋ natʋyʋ. (Yoz. 17:11) Ɛlɛ Armaagedɔɔ tɩkɛ tɛtʋ yɔɔ lone naɖɩyɛ hɩɖɛ. Toovenim taa lɛ, Armaagedɔɔ sɩŋnɩ ɛzɩma “tɛtʋ kpeekpe yɔɔ awiya” kpeɣlaa se akaɖɩnɩ Yehowa yɔ. (Natʋ 16:14)  Paa mbʋ yɔ, tɔm ñʋʋ kʋnɛ kɩ-taa, ɖɩkaɣ ɖɔɖɔ labɩnʋʋ tʋmɩyɛ tɔm piye “Armaagedɔɔ” se ɖɩyɔɔdɩ you ŋgʋ kɩkaɣ labʋ tɛtʋ yɔɔ awiya kpeɣluu wayɩ kpaagbaa yɔ kɩ-tɔm. Ɛzɩma ɖɩlaba nɛ ɖɩtɩlɩ se Armaagedɔɔ tɩkɛ lone naɖɩyɛ keekee, ɛlɛ kɩsɩŋnɩ lone naɖɩyɛ na? Kajalaɣ lɛ, lone naɖɩyɛ fɛyɩ nɛ payaɣ-ɖɩ se Megiidoo pʋʋ. Nabʋlɛ lɛ, tɛtʋ ndʋ tɩcɔ Megiidoo nɛ tɩta yɔ tɩkɩlɩ ññɩɩ nɛ pʋyɔɔ lɛ, “tɛtʋ kpeekpe yɔɔ awiya” nɛ a-sɔɔjanaa nɛ you wondu ɩɩpɩzɩɣ nɛ tɩmaɣ tɩ-taa. Nabudozo lɛ, ɖɩkaɣ naʋ tɔm ñʋʋ kʋnɛ kɩ-taa se Armaagedɔɔ you kaɣ paɣzʋʋ alɩwaatʋ ndʋ ɛjaɖɛ yɔɔ “awiya” kaɣ kʋyʋʋ Ɛsɔ samaɣ yɔɔ yɔ. Ŋgʋ Ɛsɔ samaɣ ŋga kamɩzɩ tɛtʋ kpeekpe yɔɔ.

4. Ɛbɛ yɔɔ Ɛsɔ yeba nɛ nɔɔ kʋɖʋmaɣ nakɛyɛ wɛɛ kɛdɛzaɣ you sɔsɔʋ nɛ Megiidoo pɛ-hɛkʋ taa?

⁴ Ɛbɛ yɔɔ Yehowa yeba nɛ nɔɔ kʋɖʋmaɣ nakɛyɛ wɛɛ kɛdɛzaɣ you sɔsɔʋ nɛ Megiidoo pɛ-hɛkʋ taa? Megiidoo nɛ Yizreyɛɛlɩ fɛɛʋ ŋgʋ kɩɩñɔtɩnɩ peeɖe yɔ, pɛkɛ lona wena a-taa palabɩ yoŋ sakɩyɛ yɔ. Nabʋyʋ taa, Yehowa kaasɩnɩ ɛ-samaɣ nɛ kawa yoŋ ɛnɩ. Kɩɖaʋ nakʋyʋ yɔ: Ɛsɔ sɩnɩ Izrayɛɛlɩ tɔm hʋyʋ Baaraakɩ “Megiidoo pɔɔ cɔlɔ” nɛ ɛwa Kanaŋ sɔɔjanaa pɩlʋʋ ŋgʋ Sisera kaakɛ ki-wiyaʋ yɔ. Baaraakɩ nɛ nayʋ halɩñɩnʋ Debora pɛsɛ Yehowa ɛzɩma ɛlɛ labɩ maamaaci nɛ ɛsɩnɩ-wɛ nɛ pawa you ŋgʋ yɔ pɩ-yɔɔ. Pete hendu se: “Tɩɩnzɩ yo ɖooo ɛsɔdaa . . . sɩ nɛ Sisera poyoo. Kisoŋ pɔɔ kpaɣ po-tomnasɩ.”—Th. 5:19-21.

5. Ɛzɩma tɩyɛ Armaagedɔɔ you kaɣ wɛʋ ndɩ kpem nɛ you ŋgʋ Baaraakɩ laba yɔ?

⁵ Baaraakɩ nɛ Debora pɛtɛzɩ pe-hendu nɛ tɔm tʋnɛ: “Mbʋ ɖɔɖɔ ño-koyindinaa kpeekpe ile, [Yehowa! Mba pɔsɔɔlʋʋ-ŋ] yɔ, pañɩlɩsɩ ɛzɩ wɩsɩ lɩɣʋ nɛ sɩñɩlɩsɩɣ yɔ.” (Th. 5:31) Pakaɣ ɖɩzʋʋ Ɛsɔ koyindinaa Armaagedɔɔ you taa nɛ paya mba pɔsɔɔlɩ Ɛsɔ yɔ pa-ñʋʋ. Ɛlɛ tʋkaɣ sɔsɔɔ nakɛyɛ wɛ yoŋ ɛnɩ ɩ-naalɛ ɩ-hɛkʋ taa. Yehowa samaɣ ɩɩkaɣ you Armaagedɔɔ you taa. Halɩ paakaɣ wɛnʋʋ you wondu. Po-ɖoŋ kaɣ lɩnʋʋ ɛzɩma ‘posuŋ tamɩyɛ nɛ pɛwɛɛnɩ lidaʋ’ Yehowa nɛ ɛ-sɔɔjanaa mba pɛwɛ ɛsɔdaa yɔ pɔ-yɔɔ yɔ pɩ-cɔlɔ.—Iza. 30:15; Natʋ 19:11-15.

6. Nʋmɔŋ weyi ɩ-yɔɔ Yehowa pɩzɩɣ nɛ ɛtɩŋna nɛ ɛwa e-koyindinaa Armaagedɔɔ you taa?

⁶ Ɛbɛ yɔɔ Ɛsɔ kaɣ tɩŋnʋʋ nɛ ɛwa e-koyindinaa Armaagedɔɔ you taa? Ɛpɩzɩɣ nɛ ɛtɩŋnɩ nʋmɔŋ ndɩ ndɩ yɔɔ. Ɛpɩzɩɣ nɛ ɛtɩŋnɩ tɛtʋ ñamsʋʋ, ɖɔmbɛɛ nɛ tɛʋ nazʋʋ yɔɔ nɛ ɛwa you ŋgʋ. (Yɔɔb 38:22, 23; Ezek. 38:19-22) Ɛpɩzɩɣ eyele nɛ e-koyindinaa yooni ɖama pa-taa pe-ɖeke. (4 Aw. 20:17, 22, 23) Nɛ ɛpɩzɩɣ eyele ɖɔɖɔ nɛ e-tiyiyaa kʋ ɛyaa kɩdɛkɛdaa. (Iza. 37:36) Paa nʋmɔʋ ŋgʋ yɔɔ Ɛsɔ ɛtɩŋnaa yɔ, ɛkaɣ wabʋ e-koyindinaa. Pakaɣ e-koyindinaa kpeekpe ɖɩzʋʋ. Nɛ pakaɣ siɣsiɣ tɩnaa kpeekpe ñʋʋ yabʋ.—Adu. 3:25, 26.

7-8. (a) Ɛzɩ 1 Tesalooniiki mba 5:1-6 yɔɔdʋʋ yɔ, tɔm ndʋ ɛjaɖɛ ñʋndɩnaa kaɣ susuu nɛ wiɖiyi patisusi-tʋ nɛ pana? (b) Ɛbɛ yɔɔ tɔm susuu mbʋ pɩkaɣ kɛʋ cɛtɩm sɔsɔm?

⁷ Pakaɣ mabʋ “Laŋhɛzɩyɛ nɛ pɛɛyɛ” kubuka pʋcɔ nɛ “Yehowa kɩyakʋ” talɩ. (Kalɩ 1 Tesalooniiki mba 5:1-6.) “Yehowa kɩyakʋ” ŋgʋ pɔyɔɔdɩ kɩ-tɔm 1 Tesalooniiki mba 5:2 taa yɔ, ŋgʋ lɛ “kʋñɔŋ sɔsɔʋ.” (Natʋ 7:14) Ɛbɛ kaɣ-ɖʋ sɩnʋʋ nɛ ɖɩna se kʋñɔŋ sɔsɔʋ caɣ paɣzʋʋ? Bibl yɔɔdʋʋ se pakaɣ susuu tɔm ndʋ patisusi wiɖiyi nɛ pana yɔ. Tɔm ndʋ, ti-susuu kaɣnɩ wɩlʋʋ se kʋñɔŋ sɔsɔʋ caɣ paɣzʋʋ.

⁸ Pakaɣ susuu se “laŋhɛzɩyɛ nɛ pɛɛyɛ” talaa kɛlɛ. Ɛbɛ yɔɔ ɛjaɖɛ ñʋndɩnaa kaɣ yɔɔdʋʋ mbʋ? Ɛsɔ sɛtʋ ñʋndɩnaa kaɣ pɔ-yɔɔ kpɛndʋʋ nɛ posusi tɔm ndʋ yaa we? Pɩtɩla. Paa pɩtɩkɛ suwe yɔ, tɔm ndʋ ti-susuu kaɣ kɛʋ  eleeu fezuu taa cɛtɩm tɔm taa lɛɛtʋ. Ɛlɛ, cɛtɩm tɔm ndʋ tɩkaɣ ɖʋzʋʋ ɛyaa siŋŋ mbʋ pʋyɔɔ yɔ, tiyeki nɛ pamaɣzɩ se pɛwɛ pɛɛyɛ taa, ŋgʋ lɛɛlɛɛyɔ kʋñɔŋ sɔsɔʋ ŋgʋ wiɖiyi kɩtɩkɔɔ ɛyaa yɔɔ nɛ kɩna yɔ kɩcaɣ paɣzʋʋ. Ɛɛɛ, “ɖɩzʋʋ mbʋ patɩɖʋna yɔ pɩkaɣ pɔ-yɔɔ tibu tuda, ɛzɩ lʋlʋʋ wɩzasɩ tuduu halʋ hoɣa tʋ yɔ.” Ɛbɛ kaɣ talʋʋ Yehowa sɛyaa siɣsiɣ ñɩma alɩwaatʋ ndʋ tɩ-taa? Pataatɩlɩ alɩwaatʋ ndʋ tɩ-yɔɔ ɖeyi ɖeyi kʋñɔŋ sɔsɔʋ kaɣ paɣzʋʋ yɔ; pʋyɔɔ lɛ, kɩpɩzɩɣ nɛ kitudi-wɛ, ɛlɛ paatɛm pa-tɩ ñɔɔzʋʋ nɛ paɖaŋ kpam.

9. Yehowa kaɣ ɖɩzʋʋ Sataŋ ɛjaɖɛ kpeekpe tam kʋɖʋm na? Lɩzɩ pɩ-taa.

⁹ Yehowa ɛɛkaɣ ɖɩzʋʋ Sataŋ ɛjaɖɛ kpeekpe tam kʋɖʋm ɛzɩ ɛɛlabʋ Noowa alɩwaatʋ taa yɔ. Ɛlɛ, ɛkaɣ ɖɩzʋʋ hɔɔlʋʋ kʋɖʋmʋʋ nɛ pʋwayɩ lɛ ɛtɛzɩ lɛɛkʋ. Kajalaɣ lɛ, ɛkaɣ ɖɩzʋʋ Babilɔɔnɩ sɔsɔʋ ŋgʋ kɩkɛ ɖɔɖɔ cɛtɩm Ɛsɔ sɛtʋ agbaa kɩgbɛndʋʋ yɔ. Pʋwayɩ Armaagedɔɔ you taa lɛ, ɛtɛzɩ ɖɩzʋʋ Sataŋ ɛjaɖɛ hɔɔlʋʋ ŋgʋ kɩkazaa yɔ, pʋ-tɔbʋʋ se politiki agbaa, you wondu nɛ tadɩyɛ agbaa. Iyele nɛ ɖɩtazɩ lɛɛlɛɛyɔ ɖɩzʋʋ mbʋ pɩ-naalɛ pɩ-taa camɩyɛ nɛ pɩkpaɖɩ.

10. Ɛzɩ Natʋ 17:1, 6 nɛ 18:24 yɔɔdʋʋ yɔ, ɛbɛ yɔɔ Yehowa kaɣ ɖɩzʋʋ Babilɔɔnɩ sɔsɔʋ?

¹⁰ “Halʋ tɩ pɛdɩyʋ sɔsɔ . . . tɔm hʋʋ.” (Kalɩ Natʋ 17:1, 6; 18:24.) Babilɔɔnɩ sɔsɔʋ pisi Yehowa hɩɖɛ siŋŋ. Kɩwɩlɩ cɛtɩm tɔm Ɛsɔ yɔɔ. Kɩlabɩ fezuu taa acɛyɛ, pʋ-tɔbʋʋ se kɩɖʋ ɛgbɛyɛ nɛ tɛtʋ yɔɔ awiya. Kɩlabɩnɩ tʋmɩyɛ ɖoŋ weyi kɩwɛna yɔ nɛ kimuli kɩ-taa ñɩma. Kɩkʋ ɛyaa sakɩyɛ, halɩ pɩkpɛndɩnɩ Ɛsɔ sɛyaa nabɛyɛ. (Natʋ 19:2) Ɛzɩma Yehowa kaɣ ɖɩzʋʋ Babilɔɔnɩ sɔsɔʋ?

11. (a) Ɛbɛ ‘tɛtɛgbɩnɛ nɖɩ ɖɩsɛ cɩɩɩ’ yɔ ɖɩkɛnaa? (b) Nɛ ɛzɩma Ɛsɔ kaɣ-ɖɩ tʋmɩyɛ labɩnʋʋ se ɛɖɩzɩ Babilɔɔnɩ sɔsɔʋ?

¹¹ Yehowa kaɣ tɩŋnʋʋ ‘tɛtɛgbɩnɛ nɖɩ ɖɩsɛ cɩɩɩ’ yɔ ‘ɖɩ-hɩŋ hiu’ yɔɔ nɛ ɛɖɩzɩ “halʋ tɩ pɛdɩyʋ sɔsɔ.” Tɛtɛgbɩnɛ nɖɩ ɖɩsɩŋnɩ ajɛɛ kɩgbɛndʋʋ ɛgbɛyɛ nɖɩ payaɣ se ONU yɔ. Hɩŋ hiu ñasɩŋnɩ kominawaa mba paɖʋʋ nesi ɛgbɛyɛ nɖɩ yɔ. Alɩwaatʋ ndʋ Ɛsɔ ɖʋwa yɔ tɩtalɩɣ lɛ,  kominawaa mba pakaɣ kʋyʋʋ nɛ pakaɖɩnɩ Babilɔɔnɩ sɔsɔʋ. ‘Pakaɣ wɛɛkʋʋ kɩ-ñɩm tɩŋa nɛ peyebi-kʋ ndaakpeɖe’ pʋ-tɔbʋʋ se pamʋʋ kɩ-ñɩm tɩŋa nɛ pokuli kɩdɛkɛdɩm mbʋ payɩ kɩlakaɣ yɔ pɩ-yɔɔ kaɣlaa. (Natʋ 17:3, 16) Ðɩzʋʋ mbʋ, ɛzɩma piileɖiɣ yɔ pʋyɔɔ lɛ, pɩkaɣ wɛʋ ɛzɩ kɩyakʋ kʋɖʋmʋʋ ɖeke taa pɩlaba yɔ. Nɛ pɩɩkaɣ kɛdɩnʋʋ mba paɖʋwaɣ Babilɔɔnɩ sɔsɔʋ ŋgʋ nesi yɔ; mbʋ pʋyɔɔ yɔ, kɩkpazaɣ kɩ-tɩ nɛ kɩyɔɔdʋʋ se: “Mancaɣaa ɛzɩ abiɖe yɔ, nɛ mantɩkɛ lelu, nɛ maakaɣ caɣʋ kʋñɔwiye wiɖiyi.”—Natʋ 18:7, 8.

12. (a) Ɛbɛ Yehowa ɛɛkaɣ haʋ ajɛɛ nʋmɔʋ se ala? (b) Nɛ ɛbɛ yɔɔ?

¹² Ɛsɔ ɛɛkaɣ haʋ ajɛɛ nʋmɔʋ se aɖɩzɩ ɛ-samaɣ. Ɛ-hɩɖɛ wɛ kɔ-yɔɔ nɛ kañam paɣtʋ ndʋ ɛɖʋ-kɛ se kalɩɩ Babilɔɔnɩ sɔsɔʋ taa yɔ. (Tʋma 15:16, 17; Natʋ 18:4) Samaɣ ŋga ka-taa ñɩma ñaɣ pana ɖɔɖɔ siŋŋ nɛ pasɩnɩ lalaa nɛ palɩɩ kɩ-taa. Pʋyɔɔ lɛ, Yehowa sɛyaa ɩɩkaɣ hiɣu “kɩ-kɩjɩkpɩŋ hɔɔlʋʋ nakʋyʋ.” Ɛlɛ, pɩkaɣ takʋʋ pe-tisuu.

13. (a) Anɩ payaɣ se Gɔɔgɩ? (b) Ɛzɩ Ezekɩyɛɛlɩ 38:2, 8, 9 yɔɔdʋʋ yɔ, ɛbɛ kaɣ yebu nɛ Gɔɔgɩ kʋyɩ Ɛsɔ samaɣ yɔɔ?

¹³ You ŋgʋ Gɔɔgɩ kaɣ labʋ yɔ. (Kalɩ Ezekɩyɛɛlɩ 38:2, 8, 9.) Yehowa ɖɩzɩɣ cɛtɩm Ɛsɔ sɛtʋ agbaa tɩŋa payɩ nɛ pɩtɛ lɛ, Ɛsɔ sɛtʋ ɛgbɛyɛ kʋɖʋmɖɩyɛ ɖeke koŋ pɩkaɣ kazʋʋ tɛtʋ yɔɔ. Yehowa sɛyaa ɖeke pɩkaɣ kazʋʋ. Sataŋ kaɣ mʋʋ pana siŋŋ. Ɛkaɣ wɩlʋʋ ɛ-pana ana, pɩtɩŋnɩ ɛzɩma ɛlakɩnɩ tʋmɩyɛ “azuluma fezuu taa tɔm” se etuzi ajɛɛ kɩgbɛndʋʋ nɛ kɩkʋyɩ Yehowa sɛyaa yɔɔ yɔ. (Natʋ 16:13, 14) Ajɛɛ kɩgbɛndʋʋ ŋgʋ payaɣ se ‘Gɔɔgɩ weyi ɛlɩnɩ Maagɔɔgɩ tɛtʋ taa yɔ.’ Alɩwaatʋ ndʋ ajɛɛ kʋyʋʋ Yehowa samaɣ yɔɔ lɛ, Armaagedɔɔ you paɣzɩɣ.—Natʋ 16:16.

14. Ɛbɛ Gɔɔgɩ kaɣ ɖiɣzinuu?

¹⁴ Gɔɔgɩ kaɣ taʋ liu ‘e-tomnaɣ nee,’ pʋ-tɔbʋʋ se ɛ-sɔɔjanaa ɖoŋ. (4 Aw. 32:8) Ða lɛ, ɖɛ-Ɛsɔ Yehowa ɖɩkaɣ taʋ liu nɛ ajɛɛ ɛsɩndaa lɛ, pɩkaɣ wɛʋ ɛzɩ ɖɩwɛɛ nɛ ɖɩlakɩ  kɩmɛlɛndʋ yɔ. Ɛbɛ yɔɔ? Mbʋ pʋyɔɔ yɔ, Babilɔɔnɩ sɔsɔʋ kaawɛ ɖoŋ siŋŋ ɛlɛ kɩ-ɛsɔnaa tɩpɩzɩ nɛ paya kɩ-ñʋʋ “tɛtɛgbɩnɛ” nɛ ‘ɖɩ-hɩŋ hiu’ pe-nesi tɛɛ. (Natʋ 17:16) Pʋyɔɔ lɛ, Gɔɔgɩ kaɣ maɣzʋʋ se ɛpɩzɩɣ nɛ ɛwabɩ-ɖʋ kɛlɛʋ yem. Ɛkaɣ kʋyʋʋ Yehowa samaɣ yɔɔ ‘ɛzɩ mɩndʋ huuzuu tɛtʋ yɔɔ yɔ.’ (Ezek. 38:16) Ɛlɛ piileɖiɣ lɛ, Gɔɔgɩ kaɣ ɖiɣzinuu se ɛtɔlɩ kpaca sɔsɔʋ nakʋyʋ taa. Ɛzɩ pɩɩlabʋ Farawɔɔ teŋgu kɩsɛɛmʋʋ taa yɔ, Gɔɔgɩ kaɣ ɖiɣzinuu se Yehowa maɣmaɣ ɛwɛɛ nɛ ɛkaɖɩɣna.—Ejl. 14:1-4; Ezek. 38:3, 4, 18, 21-23.

15. Ɛbɛ Yesu kaɣ labʋ Armaagedɔɔ you taa?

¹⁵ Krɩstʋ nɛ ɛ-sɔɔjanaa mba pɛwɛ ɛsɔdaa yɔ, pakaɣ lʋbʋ Ɛsɔ samaɣ yɔɔ nɛ paɖɩzɩ ajɛɛ nɛ a-sɔɔjanaa cɩɖɩ cɩɖɩ. (Natʋ 19:11, 14, 15) Ɛlɛ, ɛbɛ kaɣ talʋʋ Yehowa koyindu sɔsɔ Sataŋ weyi ɛcɛtɩ ajɛɛ nɛ etuzi-yɛ se akʋyɩ Ɛsɔ samaɣ yɔɔ Armaagedɔɔ you taa yɔ? Yesu kaɣ ɛ nɛ ɛ-aleewaa tuzuu nɛ ɛpɛɖɩ pɔʋ sɔsɔʋ nakʋyʋ taa nɛ ɛkaɖɩ pɔ-yɔɔ pɩnzɩ kudoku.—Natʋ 20:1-3.

16. (a) Ɛzɩma ɖɩwɩlɩɣ se ‘ɖɩsɩm Ɛsɔ’? (b) Ɛbɛ kaɣ talʋʋ ɛyaa mba pasɩm Yehowa yɔ Armaagedɔɔ you taa?

¹⁶ Ðɩtɩlʋʋ toovenim yɔ, paa pileɖaa yaa pitileɖi yɔ, pɩsa nɛ ɖihiɣ ñʋʋ yabʋ Armaagedɔɔ you taa lɛ, pɩpɔzʋʋ se ɖɩwɩlɩ se ‘ɖɩsɩm Ɛsɔ’ nɛ ‘ɖɩñaŋ ɖa-Kɩbaɣlʋ Yesu yɔɔ tɔm kɩbandʋ.’ (2 Tes. 1:7-9) Ye ‘ɖɩsɩm Ɛsɔ’ yɔ, pɩwɩlɩɣ se ɖɩsɩm mbʋ ɛsɔɔlaa yɔ, mbʋ ɛtɩsɔɔlɩ yɔ nɛ ɛ-paɣtʋ. Ðɩwɩlɩɣ ɖɔɖɔ se ɖɩsɩm Ɛsɔ, alɩwaatʋ ndʋ ɖɩsɔɔlʋʋ-ɩ, ɖɩñaŋɩ-ɩ nɛ ɖɩsɛɣ e-ɖeke koŋ yɔ. (1 Yoh. 2:3-5; 5:3) Alɩwaatʋ ndʋ ɖɩwɩlɩɣ se ɖɩsɩm Ɛsɔ yɔ, pɩkɛnɩ-ɖʋ hɩɖɛ ɖʋʋ se ɛnʋ ɖɔɖɔ ‘ɛsɩŋ-ɖʋ’ nɛ mbʋ kaɣnɩ yabʋ ɖa-ñʋʋ Armaagedɔɔ you taa. (1 Kɔr. 8:3) Ɛzɩma tɩyɛ? Mbʋ pʋyɔɔ yɔ, ye pɔtɔm se ‘Ɛsɔ sɩm-ɖʋ’ yɔ, pɩpɩzɩɣ nɛ pɩwɩlɩ se ɖɔ-tɔm kɛdɩnɩ-ɩ.

17. Ye pɔtɔm se ‘ɖɩña ɖa-Kɩbaɣlʋ Yesu yɔɔ tɔm kɩbandʋ’ yɔ, pʋ-tɔbʋʋ lɛ suwe?

¹⁷ “Ða-Kɩbaɣlʋ Yesu yɔɔ tɔm kɩbandʋ” taa natʋyʋ lɛ toovenim tɔm ndʋ payɩ Yesu wɩlaa  nɛ tɩwɛɛ Bibl taa yɔ. Ðɩñaŋ tɔm kɩbandʋ alɩwaatʋ ndʋ ɖɩɖɔŋ tɩ-yɔɔ ɖe-wezuu caɣʋ taa yɔ. Ñamtʋ ndʋ, tɩ-tɔbʋʋ ɖɔɖɔ lɛ se ɖɩsɩɩ Kewiyaɣ tʋma kajalaɣ lone taa, ɖɩcaɣ wezuu ŋgʋ kɩlakɩ nɔɔ kʋɖʋmaɣ nɛ Ɛsɔ paɣtʋ yɔ nɛ ɖisusi Ɛsɔ Kewiyaɣ tɔm. (Mat. 6:33; 24:14) Pɩwɛɛ ɖɔɖɔ se ɖɩɖʋ nesi Krɩstʋ koobiya patam numwaa, tʋmɩyɛ sɔsɔɖɛ nɖɩ pɛwɛɛ nɛ palakɩ yɔ ɖɩ-taa.—Mat. 25:31-40.

18. Ɛzɩma tɩyɛ Krɩstʋ ñɩma patam numwaa kaɣ wazʋʋ heŋ lɛɛŋ taa ñɩma ɛzɩma paba kaasɩnɩ-wɛ yɔ pɩ-yɔɔ?

¹⁸ Piileɖiɣ lɛ, Ɛsɔ sɛyaa patam numwaa kaɣ wazʋʋ “heŋ lɛɛŋ” taa ñɩma ɛzɩma paba kaasɩnɩ-wɛ yɔ pɩ-yɔɔ. (Yoh. 10:16) Ɛzɩma tɩyɛ? Pʋcɔ nɛ Armaagedɔɔ you paɣzɩ lɛ, patam numwaa mba pɛkpɛndɩ 144000 yɔ, pa-tɩŋa pakaɣ kpaʋ ɛsɔdaa nɛ papɩsɩ feziŋ weyi ɩwɛnɩ maasɩkɩ maasɩkɩ wɛtʋ yɔ. Alɩwaatʋ ndʋ tɩ-taa lɛ, pakaɣ pɩsʋʋ yoyaa ɛsɔdaa nɛ pakaɣ ɖɩzʋʋ Gɔɔgɩ nɛ pakandɩyɩ Yehowa sɛyaa yaa “samaɣ sɔsɔɔ” yɔɔ. (Natʋ 2:26, 27; 7:9, 10) Ɛɛɛ, waɖɛ sɔsɔɖɛ pɩkɛnɩ samaɣ sɔsɔɔ taa ñɩma se paɖʋ nesi Yehowa sɛyaa patam numwaa, alɩwaatʋ ndʋ patɩkpatɩ ɛsɔdaa yɔ!

19-20. Armaagedɔɔ ñɔtɩ kpam; ye mbʋ paa ɖɩkatɩɣ kala yɔ, ɛbɛ ɖɩpɩzɩɣ ɖɩla nɛ pɩsɩnɩ-ɖʋ nɛ ɖɩɖɔkɩ ɖe-siɣsiɣ wɛtʋ?

¹⁹ Kɛdɛzaɣ kaɖɛ kɩyakɩŋ ɩnɛ ɩ-taa, Yehowa sɛyaa sakɩyɛ wɛɛ nɛ pakatɩɣ kala. Paa mbʋ yɔ, ɖɩpɩzɩɣ ɖɩɖɔkɩ ɖa-tɩ nɛ taa leleŋ. (Yak. 1:2-4) Mbʋ pɩpɩzɩɣ nɛ pɩsɩnɩ-ɖʋ nɛ pɩkɩlɩ yɔ, pɩ-taa nabʋyʋ lɛ se ɖɩtɩmɩɣ nɛ ɖa-laŋɩyɛ pilim paa ɛzɩmtaa. (Luka 21:36) Pɩtasɩnɩ adɩma lɛ, pɩwɛɛ se ɖɩkpɛlɩkɩɣ Ɛsɔtɔm paa ɖooye nɛ ɖɩmaɣzɩɣ tɩ-yɔɔ, pɩkpɛndɩnɩ tɩ-taa natʋ tɔm ndʋ tɩwɛɛ nɛ tɩlakɩ ɖa-alɩwaatʋ taa yɔ. (Keɣa 76:13) Ye ɖɩlakɩ mbʋ, nɛ ɖɩlakɩ ɖɔɖɔ ɖo-ɖoŋ ɖeɖe tɔm susuu taa yɔ, pɩkaɣ kpazʋʋ ɖe-tisuu nɛ ɖe-lidaʋ ɖoŋ!

²⁰ Maɣzɩ se Babilɔɔnɩ sɔsɔʋ tɩtasɩ wɛʋ nɛ Armaagedɔɔ you tɛma. Maɣzɩ ɛzɩma ña-taa kaɣ labʋ leleŋ siŋŋ alɩwaatʋ ndʋ tɩ-taa yɔ! Kɔzɩ kɔzɩ lɛ, maɣzɩ ɖɔɖɔ ɛzɩma ña-taa kaɣ labʋ leleŋ siŋŋ alɩwaatʋ ndʋ ɛyaa kpeekpe wɛɣnɩ ñamtʋ Ɛsɔ hɩɖɛ yɔɔ, nɛ petisiɣ se ɛnʋ mʋnɩna se ɛtɔɔ Kewiyitu yɔ pɩ-yɔɔ nɛ ŋna! (Ezek. 38:23) Ɛɛɛ, Armaagedɔɔ kɛ taa leleŋ tɔm mba pasɩm Ɛsɔ, pañaŋ ɛ-Pɩyalʋ nɛ pɔɖɔkʋʋ pa-tɩ kpam se pɩkɔɔ pɩtɛ yɔ.—Mat. 24:13.