1-2. Nɔɔ kʋɖʋmaɣ ŋga wɛ Eklesɩyastɩ 11:6 nɛ Kewiyaɣ tɔm kɩbandʋ susuu tʋmɩyɛ pɛ-hɛkʋ taa?

AJƐƐ naayɛ taa lɛ, alɩwaatʋ ndʋ ɛyaa nɩɣ tɔm kɩbandʋ yɔ, petisiɣ faaa nɛ pewelisiɣ-tʋ. Tɔm ndʋ paaɖaŋaa! Ajɛɛ lɛɛna taa lɛ, ɖoŋ ɖoŋ ɛyaa tɩsɔɔlɩ siŋŋ se pewelisi Ɛsɔ nɛ Bibl pɔ-yɔɔ tɔm. Ðenɖe ŋwɛɛ yɔ, ɛzɩma ɛyaa sakɩyɛ lakɩ? Paa ɛzɩma ɛyaa ɩlakɩ yɔ, Yehowa sɔɔlaa se ɖiwolo pɩ-yɔɔ nɛ ɖisusuu tɔm nɛ pɩkɔɔ pɩsɩɩnɩ alɩwaatʋ ndʋ ɛtɔŋ se pɩmaɣaa yɔ.

² Yehowa tɛm ɖʋʋ alɩwaatʋ ndʋ tɩ-yɔɔ tɔm susuu tʋmɩyɛ kaɣ sɩʋ tɩnaɣ yɔ. Ðɩnɛ ɛlɛ, “ɛjaɖɛ tɛm kaɣ kɔm.” (Mat. 24:14, 36) Pʋcɔ nɛ pɩtalɩ mbʋ lɛ, ɛzɩma ɖɩpɩzɩɣ nɛ ɖɩɖɔ tɔm tʋnɛ tɩ-yɔɔ? Tɩtɔŋ se: “Ñe-nee ɩtaahɛzɩ.” *—Kalɩ Eklesɩyastɩ 11:6.

3. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Tɔm ñʋʋ ŋgʋ kɩɖɛwa yɔ kɩ-taa, ɖɩna nɩŋgbanzɩ naanza nzɩ pɩwɛɛ se ɖɩkpɛzɩ nɛ pɩsa nɛ ɖɩpɩsɩ “ɛyaa kpayaa” mba pɛwɛ niye yɔ, pʋ-tɔbʋʋ se tɔm kɩbandʋ susuyaa mba pɛwɛ niye yɔ. (Mat. 4:19) Tɔm ñʋʋ kʋnɛ kɩ-taa, ɖɩkaɣ naʋ nʋmɔŋ naadozo weyi ɩ-yɔɔ ɖɩpɩzɩɣ ɖɩtɩŋna nɛ ɖɩkpazɩ ɖoŋ ɛzɩma ɖɩtɛm ɖa-taa se ɖisusuu tɔm, paa wɛtʋ ndʋ ɖɩkatɩɣ yɔ. Ðɩkaɣ naʋ mbʋ pʋyɔɔ pɩcɛyaa se (1) ɖiwolo pɩ-yɔɔ nɛ ɖɩsɩɣ tɔm susuu tʋmɩyɛ kajalaɣ lone taa ɖe-wezuu caɣʋ taa yɔ, (2) ɖɩwɛɛ suuɖu, nɛ (3) ɖɩɖɔkɩ tisuu sɔsɔm mbʋ ɖɩwɛna yɔ kpam yɔ.

4. Ɛbɛ yɔɔ pɩpɔzʋʋ se ɖɩka ɖa-lɩmaɣza tʋmɩyɛ nɖɩ Yehowa ɖʋ-ɖʋ se ɖɩla yɔ ɖɩ-yɔɔ?

⁴ Yesu kaaheyi ɛ-tɔmkpɛlɩkɩyaa wɛtʋ ndʋ ɛyaa kaɣ wɛnʋʋ nɛ mbʋ pɩkaɣ labʋ kɛdɛzaɣ kɩyakɩŋ taa yɔ pɩ-tɔm. Ɛɛnawa se  pɩpɩzɩɣ piyele nɛ ɛ-wayɩ tɩŋɩyaa yele pa-lɩmaɣza kam tɔm susuu tʋmɩyɛ yɔɔ. Eheyi ɛ-tɔmkpɛlɩkɩyaa se: “Ɩwɛɛ feŋuu yɔɔ.” (Mat. 24:42) Noowa alɩwaatʋ taa, wondu sakɩyɛ kaayeba nɛ ɛyaa taakaŋ pa-lɩmaɣza tɔm ndʋ ɛpakaɣ-wɛ yɔ tɩ-yɔɔ. Wondu ndʋ tɩpɩzɩɣ nɛ tɩkɛzɩ ɖa-lɩmaɣza sɔnɔ ɖɔɖɔ. (Mat. 24:37-39; 2 Pɩy. 2:5) Pʋyɔɔ lɛ, ɖɩsɔɔlaa se ɖɩka ɖa-lɩmaɣza tʋmɩyɛ nɖɩ Yehowa ɖʋ-ɖʋ se ɖɩla yɔ ɖɩ-yɔɔ.

5. Tʋma Labʋ 1:6-8 wɩlɩɣ se ɛzɩma tɔm kɩbandʋ susuu kaɣ ɖɛnʋʋ ɛsɩndaa?

⁵ Sɔnɔ, pɩcɛyɩ siŋŋ se ɖɩka ɖa-lɩmaɣza Kewiyaɣ tɔm kɩbandʋ susuu yɔɔ. Yesu kaayɔɔdaa se ɛ-wayɩ tɩŋɩyaa kaɣ wobu pɩ-yɔɔ nɛ posusuu tɔm ɛ-sɩm wayɩ, nɛ pakaɣ susuu tɔm nɛ pɩkpaɖɩ ɛzɩma eesusi tɔm alɩwaatʋ ndʋ ɛɛwɛ wezuu yɔ. (Yoh. 14:12) Yesu sɩm wayɩ lɛ, ɛ-tɔmkpɛlɩkɩyaa nabɛyɛ pɩsɩ kpakpasɩ kpaʋ tʋmɩyɛ taa. E-femtu wayɩ lɛ, ɛtɩŋnɩ maamaaci lakasɩ nasɩyɩ yɔɔ nɛ ɛsɩnɩ ɛ-tɔmkpɛlɩkɩyaa nabɛyɛ nɛ pakpa kpakpasɩ. Yesu labɩ maamaaci lakasɩ nzɩ nɛ pɩtɛ lɛ, ɛñɩɣ niye se tɔm susuu nɛ kpɛlɩkɩyaa labʋ tɔm cɛyaa nɛ pɩkpaɖɩ tʋma lɛɛna tɩŋa. (Yoh. 21:15-17) Pɩkazɩ pazɩ se Yesu ɛkpa ɛsɔdaa lɛ, eheyi ɛ-tɔmkpɛlɩkɩyaa se aseɣɖe lɩzʋʋ tʋmɩyɛ nɖɩ ɛɛpaɣzaa yɔ, pakaɣ-ɖɩ labʋ nɛ pɩcɛzɩ Izrayɛɛlɩ tɛtʋ kamasɩ yɔɔ. (Kalɩ Tʋma Labʋ 1:6-8.) Pɩnzɩ sakɩyɛ wayɩ, Yesu tɩŋnɩ natʋ natʋyʋ yɔɔ nɛ ɛwɩlɩ apostoloo Yohanɛɛsɩ mbʋ pɩkaɣ labʋ “Kɩbaɣlʋ kɩyakʋ wiye” * yɔ. Mbʋ Yohanɛɛsɩ nawa yɔ, pɩ-taa nabʋyʋ yɔ: Ɛna natʋ natʋyʋ, tɩwɛ piti nɛ tɩ-taa lɛ, Ɛsɔ tiyiyu nɔɔyʋ wɛnɩ “tamtam tɔm kɩbandʋ se esusi-tʋ ajɛɛ kpeekpe nɛ cejewe kpeekpe nɛ kʋnʋmɩŋ kpeekpe nɛ samasɩ kpeekpe.” (Natʋ 1:10; 14:6) Pɩwɩlɩɣ kpayɩ kpayɩ se sɔnɔ Yehowa sɔɔlaa se ɖɩɖʋ nesi aseɣɖe lɩzʋʋ tʋmɩyɛ sɔsɔɖɛ nɖɩ, nɛ pɩkɔɔ pɩsɩɩnɩ alɩwaatʋ ndʋ ɖɩsɩɣ tɩnaɣ yɔ.

6. Ɛbɛ pɩzɩɣ pɩsɩnɩ-ɖʋ nɛ ɖɩka ɖa-lɩmaɣza tɔm susuu tʋmɩyɛ yɔɔ?

 ⁶ Ye ɖɩmaɣzɩɣ mbʋ payɩ Yehowa wɛɛ nɛ ɛlakɩ se ɛsɩnɩ-ɖʋ yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩka ɖa-lɩmaɣza tɔm susuu tʋmɩyɛ yɔɔ. Kɩɖaŋ nɩɩyɩ yɔ: Ɛwɛɛ nɛ ɛhaɣ-ɖʋ fezuu taa tɔɔnasɩ sakɩyɛ. Sɩ-taa nasɩyɩ lɛ takayɩsɩ nzɩ ɛgbɛyɛ lɩzɩɣ yɔ, takayɩsɩ nzɩ papɩzɩɣ nɛ pakpaɣ pɔrtaabɩlɩwaa, taabɩlɛɛtɩwaa nɛ ordinatɛɛrɩwaa yɔɔ yɔ; tɔm ndʋ pakalɩ tatasɩ yɔɔ yɔ, videowaa nɛ JW Tɔm Ðɩyɔɔdɩyɛ yɔɔ ɖʋtʋ. Maɣzɩ tɔm tʋnɛ tɩ-yɔɔ nɛ ŋna: Tɔm ndʋ tɩwɛ ɖɛ-tɛ intɛrnɛɛtɩ lone yɔɔ yɔ, tɩwɛ kʋnʋmɩŋ weyi ɩcɛzɩ 1 000 yɔ ɩ-taa. (Mat. 24:45-47) Nɔɔ kʋɖʋmaɣ fɛyɩ ɛyaa hɛkʋ taa ɛjaɖɛ yɔɔ mbʋ pʋyɔɔ yɔ, paɖʋʋ nesi politiki agbaa ndɩ ndɩ nɛ pɛwɛ Ɛsɔ sɛtʋ agbaa ndɩ ndɩ taa, nɛ pɩtasɩ lɛ, nɔɔ kʋɖʋmaɣ fɛyɩ mbʋ pʋyɔɔ yɔ nabɛyɛ kɛ ñɩm tɩnaa nɛ lalaa ñɛkɛ kʋñɔndɩnaa. Ɛlɛ Ɛsɔ sɛyaa mba pɛcɛzɩ miiliyɔɔwaa lutozo yɔ, pɛwɛ ɛjaɖɛ kpeekpe yɔɔ koobiya hɔʋ nakʋyʋ taa, nɛ nɔɔ kʋɖʋmaɣ wɛ pɛ-hɛkʋ taa siŋŋ. Kɩɖaʋ nakʋyʋ yɔ: Kemeɣa 19 avril 2019 wiye, ɛjaɖɛ kpeekpe yɔɔ Aseɣɖe Tɩnaa kaawɛ nɔɔ kʋɖʋmaɣ taa mbʋ pʋyɔɔ yɔ, pa-tɩŋa papɩzaa nɛ pɔcɔnɩ video nakʋyʋ nɛ kɩ-taa lɛ, patazɩ evemiye mayaɣ taa. Puwiye ɖanaɣ yɔɔ, ɛyaa 20 919 041 kpeɣlaa nɛ pala Yesu sɩm yɔɔ tɔzʋʋ sɔnzɩ. Alɩwaatʋ ndʋ ɖɩmaɣzɩɣ waɖɛ nɖɩ ɖɩwɛna se ɖɩna piti lakasɩ nzɩ nɛ ɖɩɖʋʋ-sɩ nesi sɔnɔ yɔ pɩ-yɔɔ yɔ, piseɣtiɣ-ɖʋ se ɖɩka ɖa-lɩmaɣza Kewiyaɣ tʋma yɔɔ.

7. Ɛzɩma Yesu kɩɖaʋ sɩɣnɩ-ɖʋ se nabʋyʋ ɛtaakɛzɩ ɖa-lɩmaɣza?

⁷ Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩka ɖa-lɩmaɣza tɔm susuu yɔɔ yɔ, ŋgʋ lɛ se pɩwɛɛ se ɖɩmaɣzɩnɩ Yesu kɩɖaʋ. Etaayele nɛ nabʋyʋ kɛzɩ ɛ-lɩmaɣza se ɛtaalɩzɩ aseɣɖe toovenim tɔm yɔɔ. (Yoh. 18:37) Etiyele nɛ pɩtakɩ-ɩ alɩwaatʋ ndʋ Sataŋ heyi-i se ɛcɛlɩɣ-ɩ “ɛjaɖɛ yɔɔ kewiyisi tɩŋa nɛ si-ɖoŋ” yɔ. Etiyele nɛ pɩtakɩ-ɩ ɖɔɖɔ alɩwaatʋ ndʋ ɛyaa lalaa kaasɔɔlaa se pasɩɩ-ɩ wiyaʋ yɔ. (Mat. 4:8, 9; Yoh. 6:15) Etaayele nɛ tomnaɣ yɔɔ ñɩm lɩmaɣza wɛɛnɩ ɖoŋ ɛ-yɔɔ, nɛ sɔɔndʋ taakpa-ɩ alɩwaatʋ ndʋ pakaɖɩnɩ-ɩ siŋŋ yɔ. (Luka 9:58; Yoh. 8:59) Alɩwaatʋ ndʋ pɩtakɩɣ ɖe-tisuu yɔ, ye ɖɩtɔzʋʋ lɔŋ weyi apostoloo Pɔɔlɩ tasaa yɔ ɩ-yɔɔ yɔ, nabʋyʋ ɛɛkɛzɩɣ ɖa-lɩmaɣza. Eseɣti Krɩstʋ ñɩma se pamaɣzɩnɩ Yesu kɩɖaʋ nɛ pɩsa nɛ ‘pɩtaanɩɩ-wɛ nɛ pɔlɔ nɛ pese’!—Ebr. 12:3.

8. (a) Ɛbɛ suuɖu kɛnaa? (b) Nɛ ɛbɛ yɔɔ pɩcɛyaa se ɖɩwɛɛ suuɖu kɔzɩ kɔzɩ lɛɛlɛɛyɔ?

⁸ Suuɖu kɛnɩ pana wena ɛyʋ ñakɩ se ɛcaɣ ɖiɣ ɖiɣ nɛ ɛɖaŋ se wɛtʋ natʋyʋ ɛlɛɣzɩ yɔ. Pɩpɔzʋʋ se ɖɩwɛɛ suuɖu wɛtʋ ndɩ ndɩ taa: Pɩtɩla ɖɩsɔɔlaa se kaɖɛ naɖɩyɛ ɛsɩɩ tɩnaɣ yaa pɩtɩla ɖɩɖaŋ pʋyʋ kɩbam nabʋyʋ nɛ pɩlakɩ alɩwaatʋ sakɩyɛ yɔ. Nayʋ Habakuuki kaasɔɔlɩ siŋŋ se puuyaɣ lakasɩ nzɩ sɩɩwɛ Yuuda yɔ, sɩsɩɩ tɩnaɣ. (Hab. 1:2) Yesu tɔmkpɛlɩkɩyaa kaamaɣzaa se Kewiyaɣ “kaɣ kɔm kpaagbaa” nɛ koholi-wɛ Roma mba nesi tɛɛ. (Luka 19:11) Ðɩɖaŋ evemiye nɖɩ Ɛsɔ Kewiyaɣ kaɣ yebu nɛ kañatʋ lakasɩ sɩɩ tɩnaɣ nɛ kɔkɔnɩ ɛjaɖɛ kɩfaɖɛ nɖɩ ɖɩ-taa siɣsiɣ wɛtʋ kaɣ wɛʋ yɔ kpam. (2 Pɩy. 3:13) Ɛlɛ, pɩwɛɛ se ɖɩɖʋ suuɖu nɛ ɖɩɖaŋ alɩwaatʋ ndʋ Yehowa ɖʋwa yɔ. Iyele nɛ ɖɩna nʋmɔŋ weyi ɩ-yɔɔ Yehowa tɩŋɩɣna nɛ ɛwɩlɩɣ-ɖʋ se ɖɩwɛɛ suuɖu yɔ ɩ-taa nɩɩyɩ.

9. Kɩɖaŋ weyi wɩlɩɣ se Yehowa wɛ suuɖu?

⁹ Yehowa hanɩ kɩɖaʋ ŋgʋ kɩtalɩ pilim yɔ suuɖu ɖʋʋ hɔɔlʋʋ taa. Ɛɛha Noowa alɩwaatʋ sakɩyɛ se ɛlɛ ɛsaɣ aɖakaɣ nɛ ɛkɛ “siɣsiɣ wɛtʋ tɔm susuyu.” (2 Pɩy. 2:5; 1 Pɩy. 3:20) Yehowa welisini Abraham alɩwaatʋ ndʋ ɛlɛ pɔzaɣ-ɩ tɔm sakɩyɛ pɩlɩɩnɩ lɩmaɣzɩyɛ nɖɩ ɛkpaɣaa yɔ ɖɩ-yɔɔ yɔ. Yehowa kaakpaɣ lɩmaɣzɩyɛ se ɛɖɩzɩɣ ɛyaa kɩdɛkɛdaa mba paawɛ Sodom nɛ Gomɔɔrɩ tɛtʋ taa yɔ. (Kiɖe 18:20-33) Yehowa kaawɩlɩ suuɖu siŋŋ Izrayɛɛlɩ ɛjaɖɛ nɖɩ ɖɩtaawɛɛ siɣsiɣ yɔ pɩnzɩ mɩnɩŋ sakɩyɛ.  (Neh. 9:30, 31) Ðɩnaɣ kpayɩ kpayɩ se Yehowa wɛ suuɖu sɔnɔ, mbʋ pʋyɔɔ yɔ ɛhaɣ ɛyaa mba payɩ ɛsɔɔlaa se pɛkɛ ɛ-taabalaa yɔ alɩwaatʋ sakɩyɛ se ‘pekpiɖi pa-kɩwɛɛkɩm yɔɔ.’ (2 Pɩy. 3:9; Yoh. 6:44; 1 Tim. 2:3, 4) Yehowa kɩɖaʋ sɩɣnɩ-ɖʋ se ɖɩna lɩmaɣzɩyɛ kɩbanɖɛ nɖɩ ɖɩ-yɔɔ pɩwɛɛ se ɖɩwɛɛ suuɖu alɩwaatʋ ndʋ ɖiwoki pɩ-yɔɔ nɛ ɖisusuu nɛ ɖɩwɩlɩɣ ɛyaa tɔm yɔ. Pɩtasɩ lɛ, ɛtɩŋɩɣnɩ Bibl taa kɩɖaʋ nakʋyʋ yɔɔ nɛ ɛwɩlɩɣ-ɖʋ se ɖɩwɛɛ suuɖu.

10. Haɖʋ kɩɖaʋ ŋgʋ kɩwɛ Yakubu 5:7, 8 taa yɔ, ɛbɛ kɩkpɛlɩkɩɣ-ɖʋ?

¹⁰ Kalɩ Yakubu 5:7, 8. Haɖʋ weyi ɛhayɩɣ tɔɔnaɣ yɔ, ɛ-kɩɖaʋ kpɛlɩkɩɣ-ɖʋ ɛzɩma ɖɩwɛɛ suuɖu yɔ. Toovenim taa lɛ, tɩŋ nɩɩyɩ paɣlɩɣ lɛɛ lɛɛ. Ɛlɛ, tɩŋ sakɩyɛ kɔzɩ kɔzɩ tɩŋ weyi ɩlʋlʋʋ pee yɔ, ɩkpakɩɣ alɩwaatʋ sakɩyɛ pʋcɔ nɛ ɩpaɣlɩ. Izrayɛɛlɩ taa lɛ, fenasɩ loɖo mbʋ yɔ tɩŋ paɣlɩɣna. Tɛʋ kajalaɣ ñɩŋgʋ nɩɣ lɛ haɖʋ ɖuu e-ɖomaɣ nɛ ɛkʋŋ tɔɔnaɣ wayɩ wayɩ tɛʋ wayɩ. (Mark. 4:28) Ye ɖɩmaɣzɩɣnɩ haɖʋ suuɖu yɔ, ɖɩkaɣ wɛʋ lɔŋ. Ɛlɛ, pɩtɩla pɩɩwɛɣ kɛlɛʋ.

11. Ye ɖɩwɛ suuɖu yɔ, ɛzɩma pɩkaɣ-ɖʋ sɩnʋʋ ɖɔ-tɔm susuu taa?

¹¹ Ɛyaa mantɩtalɩ pilimwaa sɔɔlaa se pa-pana ñaɣʋ ɛlʋlɩ pee kpaagbaa. Ɛlɛ, ye ɖɩsɔɔlaa se tɩŋ ɩpaɣlɩ nɛ ɩlʋlɩ pee yɔ, pɩwɛɛ se ɖɩcɔŋnɩ ɩ-yɔɔ paa ɛzɩmtaa. Pɩwɛɛ se ɖihuyi pɔŋ, ɖɩsɔ, ɖɩkpɛzɩ ñɩtʋ nɛ ɖɩmɩzɩ-ɩ lɩm. Kpɛlɩkɩyaa labʋ tʋmɩyɛ pɔzʋʋ ɖɔɖɔ se ɖiwolo pɩ-yɔɔ nɛ ɖɩñakɩ pana. Pʋcɔ nɛ ɖɩpɩzɩ ɖɩsɩnɩ ɖe-Bibl kpɛlɩkɩyaa nɛ pataaɖʋ tʋkaɣ ɛyaa hɛkʋ taa nɛ pɛwɛɛnɩ ɖɔɖɔ sɔɔlɩm lɛ, pɩkpakɩɣ alɩwaatʋ. Ye ɖɩwɛnɩ suuɖu yɔ, pɩkaɣ-ɖʋ sɩnʋʋ se pitaatibi-ɖʋ yɔɔɔ alɩwaatʋ ndʋ ɖɩkatɩɣ kala yɔ. Alɩwaatʋ ndʋ ɛyaa nabɛyɛ tisiɣ faaa se pewelisini-ɖʋ nɛ pɛkpɛlɩkɩ tɔm yɔ, pɩpɔzʋʋ ɖɔɖɔ se ɖɩwɛɛ suuɖu. Ðɩɩpɩzɩɣ nɛ ɖɩñɩɣ Bibl kpɛlɩkɩyʋ nɔɔyʋ yɔɔ se ɛwɛɛnɩ tisuu. Nabʋyʋ taa, halɩ Yesu tɔmkpɛlɩkɩyaa taanɩɣ ɛ-wɩlɩtʋ taa kpaagbaa. (Yoh. 14:9) Pɩwɛɛ se ɖɩtɔzɩ se ɖɩpɩzɩɣ nɛ ɖiɖuu nɛ ɖɩmɩzɩ lɩm, ɛlɛ Ɛsɔ yekina nɛ pɩpaɣlɩɣ.—1 Kɔr. 3:6.

12. Alɩwaatʋ ndʋ ɖisusuu tɔm ɖɔ-hɔʋ taa ñɩma mba patɩkɛ Aseɣɖe Tɩnaa yɔ, ɛzɩma ɖɩpɩzɩɣ nɛ ɖɩwɩlɩ se ɖɩwɛ suuɖu?

 ¹² Pɩpɩzɩɣ nɛ pɩwɛɛ-ɖʋ kaɖɛ se ɖɩwɛɛ suuɖu alɩwaatʋ ndʋ ɖisusuu tɔm ɖɔ-hɔʋ taa ñɩma mba patɩkɛ Aseɣɖe Tɩnaa yɔ. Paɣtʋ kiɖe nɖɩ ɖɩwɛ Eklesɩyastɩ 3:1, 7 taa yɔ, ɖɩpɩzɩɣ nɛ ɖɩsɩnɩ-ɖʋ. Ðɩtɔŋ se: “Wɩyɛ wɛɛ se posu, nɛ wɩyɛ wɛɛ se pɔyɔɔdɩ.” Wezuu kɩbaŋʋ ŋgʋ ɖɩcakɩ yɔ, kɩpɩzɩɣ nɛ kɩsɩnɩ ɖɔ-hɔʋ taa ñɩma nɛ pɔsɔɔlɩ se pewelisi tɔm ndʋ ɖisusuu yɔ. Alɩwaatʋ kʋɖʋmtʋ ndʋ tɩ-taa lɛ, pɩwɛɛ se ɖɩñɔɔzɩ ɖa-tɩ paa ɛzɩmtaa se pɩsa nɛ ɖiheyi-wɛ Yehowa yɔɔ tɔm. (1 Pɩy. 3:1, 2) Pɩwɛɛ se ɖisusi tɔm nɛ ɖɩwɩlɩ tɔm nɛ kpekpeka, ɛlɛ pɩwɛɛ se paa ɛzɩmtaa lɛ, ɖɩwɩlɩ paa weyi suuɖu, pɩkpɛndɩnɩ ɖɔ-hɔʋ taa mba.

13-14. Ɛyaa mba paɖʋ suuɖu nɛ ɖɩpɩzɩɣ nɛ ɖɩmaɣzɩnɩ-wɛ yɔ, pa-taa nabɛyɛ lɛ mba?

¹³ Ðɩpɩzɩɣ nɛ ɖɩkpɛlɩkɩ ɛzɩma ɖɩwɛɛ suuɖu yɔ Bibl taa ɛyaa siɣsiɣ ñɩma nɛ ɖa-alɩwaatʋ taa ɛyaa siɣsiɣ ñɩma kɩɖaŋ taa. Habakuuki kaasɔɔlɩ siŋŋ se kañatʋ lakasɩ ɛsɩɩ tɩnaɣ, ɛlɛ ɛwɩlaa se ɛwɛ suuɖu alɩwaatʋ ndʋ ɛyɔɔdaa se: “Mankaɣ sɩŋʋʋ men-ɖifeŋiye taa mbʋ” yɔ. (Hab. 2:1) Apostoloo Pɔɔlɩ yɔɔdaa se ɛɛsɔɔlaa se ‘ɛtɛ’ ɛ-Ɛsɔ sɛtʋ tʋmɩyɛ. Paa mbʋ yɔ, ɛɖʋ suuɖu nɛ ewolo pɩ-yɔɔ nɛ ‘ɛlɩzɩ aseɣɖe piye piye tɔm kɩbandʋ yɔɔ.’—Tʋma 20:24.

¹⁴ Iyele nɛ ɖɩna koobu nɔɔyʋ nɛ ɛ-halʋ pa-kɩɖaʋ. Powobi Galaadɩ sukuli nɛ paha-wɛ takayɩsɩ lɛ, petiyini-wɛ ɛjaɖɛ naɖɩyɛ taa. Aseɣɖe Tɩnaa pazɩ yem kaawɛnɩ peeɖe, nɛ ɛyaa sakɩyɛ taakɛ Krɩstʋ ñɩma. Ɛyaa pazɩ yem kaasɔɔlɩna se pɛkpɛlɩkɩ Bibl. Ɛlɛ, pa nɛ mba paalabɩ Galaadɩ sukuli ɖaŋ kʋɖʋmʋʋ nɛ petiyini paba ajɛɛ lɛɛna taa yɔ, paba heyi-wɛ ɛyaa mba payɩ pɛwɛɛ nɛ pɛkpɛlɩkɩɣnɩ Bibl nɛ pasɩɣnɩ-wɛ se papɩsɩ Aseɣɖe Tɩnaa yɔ pɔ-tɔm. Paa egeetiye nɖɩ ɖɩ-taa koobu ɛnʋ nɛ ɛ-halʋ paawɛɛ yɔ, ɖɩtaalʋlʋʋ pee lɛɛ lɛɛ yɔ, paɖʋ suuɖu nɛ posusuu tɔm. Posusi tɔm egeetiye nɖɩ ɖɩ-taa ɛyaa pazɩ yem welisaɣ tɔm yɔ; nɛ pɩnzɩ lutozo wayɩ lɛ, pa-taa kaalabɩ leleŋ se pe-Bibl kpɛlɩkɩyaa taa kʋɖʋm ha ɛ-tɩ nɛ pamɩyɩsɩ-ɩ lɩm. Lɔŋ weyi caanaʋ taa nɛ ɖa-alɩwaatʋ taa kɩɖaŋ ɩnɛ ɩkpɛlɩkɩɣ-ɖʋ? Ɛyaa siɣsiɣ tɩnaa mba, patilesi kpekpeka ŋga paawɛna yɔ yaa pe-nee tɩhɛzɩ, nɛ Yehowa wazɩ-wɛ ɛzɩma paɖʋ suuɖu yɔ pɩ-yɔɔ. Tɛtɛ nɛ ɖɩkɛ “mba pamaɣzɩɣnɩ ɛyaa mba pɩtɩŋnɩ tisuu nɛ suuɖu ɖʋʋ yɔɔ lɛ, pehikiɣ mbʋ pɩ-tɔm paayɔɔdaa se pɛcɛlɩɣ-wɛ yɔ.”—Ebr. 6:10-12.

15. Hɔɔlɩŋ weyi ɩ-taa tisuu kpazɩɣ ɖoŋ ɛzɩma ɖɩtɛm ɖa-taa se ɖisusuu tɔm yɔ, ɩ-taa nakʋyʋ lɛ ŋgʋ?

¹⁵ Ðɩwɛnɩ tisuu tɔm ndʋ ɖisusuu yɔ tɩ-yɔɔ; pʋyɔɔ lɛ, ɖɩsɔɔlaa se ɖisusi-tʋ ɛyaa sakɩyɛ ɛzɩma ɖɩpɩzɩɣ yɔ. Ðɩtaɣ liu tamasɩ nzɩ sɩwɛ Ɛsɔtɔm taa yɔ. (Keɣa 118:42; Iza. 40:8) Ðɩna Bibl taa natʋ ndɩ ndɩ labɩ ɖa-alɩwaatʋ taa. Ðɩna ɛzɩma ɛyaa wezuu caɣʋ ñɔɔzʋʋ alɩwaatʋ ndʋ papaɣzɩɣ ɖɔm Bibl lɔŋ tasʋʋ yɔɔ yɔ. Piyeki nɛ ɖa-taa tɛzɩɣ tɛm se Kewiyaɣ tɔm kɩbandʋ kɛnɩ tɔm ndʋ pɩpɔzʋʋ se paa weyi ɛnɩɩ yɔ.

16. Ɛzɩ Keɣa 45:2-4 yɔɔdʋʋ yɔ, ɛzɩma tisuu mbʋ ɖɩwɛnɩ Yehowa nɛ Yesu pɔ-yɔɔ yɔ, pɩkpazɩɣ ɖoŋ ɛzɩma ɖɩtɛm ɖa-taa se ɖisusuu tɔm yɔ?

¹⁶ Pɩtasɩ lɛ, ɖɩwɛnɩ tisuu Yehowa, weyi ɛ-cɔlɔ tɔm ndʋ ɖisusuu yɔ tɩlɩnaa yɔ ɛ-yɔɔ, nɛ ɖɩwɛnɩ tisuu ɖɔɖɔ Yesu weyi ɛlɩzaa se ɛkɛ Kewiyaɣ Wiyaʋ yɔ ɛ-yɔɔ. (Yoh. 14:1) Paa wɛtʋ ndʋ ɖɩkatɩɣ yɔ, paa ɛzɩmtaa lɛ, Yehowa kaɣ kɛʋ ɖo-ɖoŋ nɛ ɖa-kʋyʋʋ. (Kalɩ Keɣa 45:2-4.) Pɩtasɩ lɛ, ɖa-taa tɛma se Yesu wɛɛ nɛ ɛlakɩnɩ tʋmɩyɛ ɖoŋ nɛ waɖɛ nɖɩ Yehowa ha-ɩ yɔ nɛ eɖiyiɣ tɔm susuu tʋmɩyɛ nɛ ɖooo ɛsɔdaa.—Mat. 28:18-20.

17. Ha kɩɖaʋ ŋgʋ kɩwɩlɩɣ mbʋ pʋyɔɔ pɩwɛɛ se ɖiwolo pɩ-yɔɔ nɛ ɖisusuu tɔm yɔ.

¹⁷ Tisuu yeki se ɖa-taa ɛtɛ nɛ pɩkpaɖɩ se Yehowa kaɣ wazʋʋ ɖa-pana ñaɣʋ yɔɔ, nɛ nabʋyʋ taa ɛtɩŋɩɣnɩ nʋmɔŋ weyi ɩ-yɔɔ ɖɩtɩmaɣzɩ yɔ  ɩ-yɔɔ nɛ ɛwazɩɣ-ɖʋ. (Ekl. 11:6) Kɩɖaʋ nakʋyʋ yɔ: Paa ɖooye ɛyaa kudokiŋ sakɩyɛ naɣ se ɖɩsɩ ɖa-takayɩsɩ taabɩlɩnaa yaa présentoir waa yɔɔ. Ɛzɩ pɩkɛ tɔm susuu nʋmɔʋ kɩbaŋʋ na? Ɛɛɛ! Novembre 2014 tɛ Kewiyaɣ Ɛsɔ Sɛtʋ Tʋmɩyɛ takayaɣ yɔɔdɩ pɩɣa peleɣa nakɛyɛ tɔm. Kalakaɣ sukuli kɩtɛzʋʋ nɛ kaasɔɔlaa se kama tɔm natʋyʋ Yehowa Aseɣɖe Tɩnaa yɔɔ. Kataapɩzɩɣ se katɩlɩ ɖenɖe Kewiyaɣ Kpaaŋ nakʋyʋ wɛɛ yɔ, ɛlɛ kapɩzaa nɛ kana sukuli kɩtɛzʋʋ ŋgʋ kɩ-taa taabɩlɩ nakʋyʋ, pasɩ kɩ-yɔɔ ɖa-takayɩsɩ, nɛ kehiɣ ɖɔɖɔ wondu ndʋ tɩsɩɣnɩ-kɛ se kama kɔ-tɔm yɔ. Alɩwaatʋ wɛɛ nɛ tɩɖɛɣ lɛ, kaha ka-tɩ nɛ pamɩyɩsɩ-kɛ lɩm nɛ kapɩsɩ Yehowa Aseɣɖe Tʋ, nɛ lɛɛlɛɛyɔ kɛkɛ paa ɖooye nʋmɔʋ lɩzɩyʋ. Kɩɖaʋ kʋnɛ nɛ kɩɖaŋ lɛɛŋ seɣtiɣ-ɖʋ se ɖiwolo pɩ-yɔɔ nɛ ɖisusuu tɔm mbʋ pʋyɔɔ yɔ, ɩwɩlɩɣ se ɛyaa nabɛyɛ wɛɛ nɛ pɩpɔzʋʋ se panɩɩ Kewiyaɣ tɔm.

18. Ɛbɛ yɔɔ ɖa-taa tɛma se Kewiyaɣ tɔm susuu tʋmɩyɛ kaɣ sɩʋ tɩnaɣ ɛzɩ Yehowa sɔɔlʋʋ yɔ?

¹⁸ Ða-taa pɩzɩɣ nɛ pɩtɛ se Kewiyaɣ tɔm susuu tʋmɩyɛ kaɣ tɛm alɩwaatʋ kɩbandʋ yɔɔ. Na mbʋ pɩlabɩ Noowa alɩwaatʋ taa yɔ. Yehowa kaawɩlaa se paa ɛzɩmtaa lɛ, ɛlakɩ pɩtɩŋa alɩwaatʋ kɩbandʋ yɔɔ. Pɩnzɩ 120 mbʋ yɔ pʋcɔ nɛ Tɛʋ Sɔsɔʋ nɩɣ lɛ, Yehowa kaatɛm ɖʋʋ alɩwaatʋ ndʋ tɩ-yɔɔ kɩpaɣzɩɣ nɩʋ yɔ. Pɩnzɩ sakɩyɛ pʋwayɩ, Yehowa heyi Noowa se ɛsaɣ aɖakaɣ. Pɩtɩla, pɩnzɩ 40 yaa 50 pʋcɔ nɛ Tɛʋ Sɔsɔʋ nɩɣ lɛ, Noowa kaawobi pɩ-yɔɔ nɛ ɛlakɩ tʋmɩyɛ nɛ kpekpeka. Paa ɛyaa etaawelisiɣni-i yɔ, eewobi pɩ-yɔɔ nɛ ɛpakɩ-wɛ pɩkɔɔ pɩsɩɩnɩ alɩwaatʋ ndʋ Yehowa yɔɔdaa se alɩwaatʋ talaa se pasʋnɩ kpɩna aɖakaɣ taa yɔ. Nɛ alɩwaatʋ kɩbandʋ yɔɔ lɛ, ‘Yehowa ɖɩɣ taya.’—Kiɖe 6:3; 7:1, 2, 16.

19. Ye ɖitiyele nɛ ɖe-nee hɛzɩ yɔ, ɛbɛ ɖɩpɩzɩɣ nɛ ɖɩɖaŋ kpam?

¹⁹ Piileɖiɣ lɛ, Yehowa kaɣ yebu nɛ ɖɩtɩlɩ se ɖɩtɛm Kewiyaɣ tɔm kɩbandʋ susuu. Nɛ ɛkaɣ ɖɩzʋʋ Sataŋ ɛjaɖɛ kɩdɛkɛdɩyɛ nɛ ɛkɔnɩ ɛjaɖɛ kɩfaɖɛ. Ɛjaɖɛ nɖɩ ɖɩ-taa, ɛyaa mba pañaŋ Ɛsɔ yɔ pe-ɖeke pakaɣnɩ wɛʋ. Pʋcɔ nɛ pɩtalɩ mbʋ lɛ, tɛtɛ nɛ ɖɩmaɣzɩnɩ Noowa, Habakuuki nɛ ɛyaa lalaa mba patiyele nɛ pe-nee hɛzɩ yɔ. Tɛtɛ nɛ ɖɩka ɖa-lɩmaɣza tɔm susuu tʋmɩyɛ yɔɔ, ɖɩwɛɛ suuɖu, nɛ ɖɩɖɔkɩ tisuu sɔsɔm mbʋ ɖɩwɛnɩ Yehowa nɛ ɛ-tamasɩ yɔɔ yɔ kpam.