1. (a) Ɛbɛ Yesu kaaya kpakpasɩ kpayaa naanza se pala? (b) Nɛ ɛzɩma palaba?

KPAKPASƖ kpaʋ tʋmɩyɛ tɔmkpɛlɩkɩyaa Pɩyɛɛrɩ, Andree, Yakubu nɛ Yohanɛɛsɩ palakaɣ. Maɣzɩ nɛ ŋna ɛzɩma pɩɩlabɩ-wɛ alɩwaatʋ ndʋ Yesu ya-wɛ yɔ. Eheyi-wɛ se: “Ɩtɩŋ ma-wayɩ, nɛ mankaɣ-mɩ pɩsʋʋ ɛyaa kpayaa.” * Ɛzɩma abalaa mba palaba? Bibl yɔɔdʋʋ se: “Kpaagbaa mbʋ lɛ, peyele pe-piyiŋ nɛ patɩŋ ɛ-wayɩ.” (Mat. 4:18-22) Lɩmaɣzɩyɛ nɖɩ pakpaɣaa yɔ, ɖɩlɛɣzɩ pe-wezuu caɣʋ kpem. Mbʋ ɛzɩ paawobi pɩ-yɔɔ nɛ pakpaɣ kpakpasɩ maɣmaɣ lɛ, paapɩsɩ mba ‘pakpaɣ ɛyaa nɛ pɛ-ɛsa’ yɔ. (Luka 5:10) Sɔnɔ, Yesu yaɣ laŋa kɩbana tɩnaa mba pɔsɔɔlɩ toovenim tɔm yɔ se pala mbʋ ɖɔɖɔ. (Mat. 28:19, 20) Ŋtisi Yesu yatʋ nɛ ŋpɩsɩ ɛyaa kpayʋ na?

2. (a) Lɩmaɣzɩyɛ nɖɩ ɖɩkpakɩɣ se ɖɩpɩsɩɣ ɛyaa kpayaa yɔ, ɛbɛ yɔɔ pɩpɔzʋʋ se ɖɩ-tɔm ɛcɛyɩ ɖɛ-ɛsɩndaa siŋŋ? (b) Nɛ ɛbɛ kaɣ-ɖʋ sɩnʋʋ nɛ ɖɩkpaɣ lɩmaɣzɩyɛ nɖɩ?

² Pɩtɩla ŋɖɛnɩ ɛsɩndaa ñe-Bibl kpɛlɩkʋʋ taa, nɛ ŋcaɣ kpaɣʋ lɩmaɣza se ŋna se ŋpɩsɩ tɔm kɩbandʋ susuyu yaa ŋtaapɩsɩ. Ye pɩwɛ-ŋ kaɖɛ se ŋtisi Yesu yatʋ yɔ, pitaatibi-ŋ yɔɔɔ. Pɩtɩla ɛzɩma pɩwɛ-ŋ kaɖɛ yɔ, pɩwɩlɩɣ se ŋnawa se lɩmaɣzɩyɛ nɖɩ, ɖɩ-tɔm cɛyɩ siŋŋ. Toovenim taa lɛ, Bibl yɔɔdʋʋ se Pɩyɛɛrɩ nɛ ɛ-taabalaa peyebi pe-piyiŋ “kpaagbaa.” Paa mbʋ yɔ, Pɩyɛɛrɩ nɛ ɛ-ɖalʋ pamaɣzaa pʋcɔ nɛ pakpaɣ lɩmaɣzɩyɛ nɖɩ. Pasɩm Yesu nɛ petisi se ɛkɛ Mesiya yɔ, pɩcɛzɩ fenasɩ loɖo yɔɔ. (Yoh. 1:35-42) Mbʋ ɖɔɖɔ, pɩtɩla ŋtɛm kpɛlɩkʋʋ tɔm sakɩyɛ Yehowa nɛ Yesu pɔ-yɔɔ, nɛ ŋsɔɔlaa se ŋwolo pɩ-yɔɔ nɛ ŋɖɛɣnɩ  ɛsɩndaa fezuu taa. Ɛlɛ, pʋcɔ nɛ ŋkpaɣ lɩmaɣzɩyɛ se ŋpɩsɩɣ tɔm susuyu lɛ, pɩpɔzʋʋ se ŋmaɣzɩ camɩyɛ. Ɛbɛ kaasɩnɩ Pɩyɛɛrɩ, Andree nɛ lalaa nɛ pakpaɣ lɩmaɣzɩyɛ nɖɩ?

3. Wɛtʋ ndʋ kaɣ-ŋ seɣtuu nɛ ŋtisi Yesu yatʋ?

³ Yesu tɔmkpɛlɩkɩyaa kaawɛ kpekpeka, paasɩm pa-tʋmɩyɛ camɩyɛ, paawɛ abalɩtʋ nɛ paafalɩsɩ pa-tɩ camɩyɛ. Wɛtʋ ndʋ, pɩtʋʋ fɛyɩ se tɩɩsɩnɩ-wɛ ɖɔɖɔ nɛ pɛkɛ tɔm kɩbandʋ susuyaa kɩbama. Tɔm ñʋʋ kʋnɛ, kɩkaɣ-ŋ sɩnʋʋ nɛ ŋna ɛzɩma ŋpɩzɩɣ ŋla nɛ ŋwɛɛnɩ wɛtʋ ndʋ nɛ pɩsa nɛ ŋpɩsɩ tɔm kɩbandʋ susuyu kɩbanʋ nɛ ŋwɩlɩ lalaa tɔm yɔ.

4. Ɛbɛ kaaseɣti Pɩyɛɛrɩ nɛ ɛkɛ kpakpasɩ kpayʋ?

⁴ Kpakpasɩ kpaʋ tʋmɩyɛ Pɩyɛɛrɩ lakaɣ nɛ ɛcɔŋnɩ ɛ-hɔʋ yɔɔ, ɛlɛ pɩtaakɛnɩ-ɩ tʋmɩyɛ yem. Pɩwɛ ɛzɩ Pɩyɛɛrɩ kaasɔɔlɩ kpakpasɩ kpaʋ yɔ. (Yoh. 21:3, 9-15) Ɛkpɛlɩkɩ ɖɔɖɔ ɛzɩma ɛsɔɔlɩ ɛyaa kpaʋ tʋmɩyɛ yɔ. Nɛ Yehowa sɩnɩ-ɩ nɛ ɛpɩsɩ ɛyaa kpayʋ kɩbanʋ.—Tʋma 2:14, 41.

5. (a) Ɛzɩ Luka 5:8-11 yɔɔdʋʋ yɔ, ɛbɛ yɔɔ sɔɔndʋ kpaɣaɣ Pɩyɛɛrɩ? (b) Nɛ ɛbɛ pɩzɩɣ pɩsɩnɩ-ɖʋ nɛ ɖɩwa sɔɔndʋ ndʋ?

⁵ Ðisusuu tɔm mbʋ pʋyɔɔ yɔ, ɖɩsɔɔlɩ Yehowa; mbʋ kɛnɩ lɩmaɣzɩyɛ kajalaɣ ñɩnɖɛ nɖɩ ɖiseɣtiɣ-ɖʋ se ɖɩla tʋmɩyɛ nɖɩ yɔ. Sɔɔlɩm mbʋ ɖɩwɛnɩ Yehowa yɔɔ yɔ, pɩpɩzɩɣ pɩsɩnɩ-ɖʋ nɛ ɖiheyi lalaa ɛ-yɔɔ tɔm paa pɩlakɩ-ɖʋ ɛzɩ ɖɩtɩmʋna yɔ. Alɩwaatʋ ndʋ Yesu ya Pɩyɛɛrɩ se ɛpɩsɩ ɛyaa kpayʋ yɔ, eheyi-i se: “Yele sɔɔndʋ seu.” (Kalɩ Luka 5:8-11.) Sɔɔndʋ taakpaɣ Pɩyɛɛrɩ nɛ mbʋ pɩpɩzɩɣ nɛ pɩla, ye ɛpɩsɩ tɔmkpɛlɩkɩyʋ yɔ. Ɛlɛ, ɛzɩma Yesu sɩnɩ-wɛ nɛ pakpa kpakpasɩ sakɩyɛ yɔ, pɩɩɖɩɣzɩ-ɩ. Ɛɛnawa se Yesu labɩ maamaaci lakasɩ nɛ pɩlakaɣ-ɩ ɛzɩ ɛtaamʋna se ɛ nɛ Yesu pala tʋmɩyɛ yɔ. Ɛzɩ Pɩyɛɛrɩ yɔ, sɔɔndʋ pɩzɩɣ  nɛ pɩkpa-ŋ. Pɩtɩla, ŋnɩɣzɩɣ mbʋ payɩ pɩkaɣ pɔzʋʋ se ŋla nɛ ŋkɛ Krɩstʋ tɔmkpɛlɩkɩyʋ yɔ pɩ-yɔɔ. Ye mbʋ yɔ, kpazɩ sɔɔlɩm mbʋ ŋwɛnɩ Yehowa, Yesu nɛ ño-koobu yɔɔ yɔ ɖoŋ, nɛ pɩkaɣ-ŋ seɣtuu nɛ ŋtisi Yesu yatʋ nɛ ŋpɩsɩ ɛyaa kpayʋ.—Mat. 22:37, 39; Yoh. 14:15.

6. Ɛbɛ ɖɔɖɔ seɣtiɣ-ɖʋ se ɖisusi tɔm?

⁶ Yele nɛ ɖɩna lɩmaɣza lɛɛna wena aseɣtiɣ-ɖʋ se ɖisusi tɔm yɔ. Ðɩsɔɔlaa se ɖɩña Yesu paɣtʋ tʋnɛ: “Iwolo nɛ ɩla . . . tɔmkpɛlɩkɩyaa.” (Mat. 28:19, 20) Ðisusuu tɔm ɖɔɖɔ mbʋ pʋyɔɔ yɔ, ‘pawɩlɩ ɛyaa ñaŋ nɛ poyotuu’ nɛ pɩpɔzʋʋ siŋŋ se pɛkpɛlɩkɩ Kewiyaɣ yɔɔ toovenim tɔm. (Mat. 9:36) Yehowa sɔɔlaa se ɛyaa ndɩ ndɩ ɩwɛɛnɩ toovenim tɛ sɩmtʋ siŋŋ nɛ pehiɣ ñʋʋ yabʋ.—1 Tim. 2:4.

7. Ɛzɩma Roma mba 10:13-15 wɩlɩɣ se tɔm susuu tʋmɩyɛ tɔm cɛyaa?

⁷ Ye ɖɩmaɣzɩɣ ɛzɩma tɔm susuu pɩzɩɣ nɛ pɩsɩnɩ ɛyaa nɛ pɩya pa-ñʋʋ yɔ pɩ-yɔɔ yɔ, ɖɩkaɣ sɔɔlʋʋ se ɖisusi tɔm. Kpakpasɩ kpayʋ pɛdɩɣ kpakpasɩ nzɩ ɛkpaɣ yɔ yaa ɛtɔkɩ-sɩ. Ɛlɛ ɖa lɛ, ‘ɖɩkpaɣ’ ɛyaa, pʋ-tɔbʋʋ se ɖɩlakɩ tɔmkpɛlɩkɩyaa se pɩsa nɛ ɖɩya pa-ñʋʋ.—Kalɩ Roma mba 10:13-15; 1 Tim. 4:16.

8-9. (a) Ɛbɛ pɩpɔzʋʋ se kpakpasɩ kpayʋ ɛtɩlɩ? (b) Nɛ ɛbɛ yɔɔ?

⁸ Yesu alɩwaatʋ taa, pɩɩpɔzaa se Izrayɛɛlɩ tʋ weyi ɛkɛ kpakpasɩ kpayʋ yɔ, ɛtɩlɩ kpakpasɩ nzɩ pɩwɛɛ se ɛkpa yɔ. (Lev. 11:9-12) Pɩɩpɔzaa ɖɔɖɔ se ɛtɩlɩ ɖenɖe ɛpɩzɩɣ nɛ ehiɣ kpakpasɩ yɔ. Ðoŋ ɖoŋ lɛ, kpakpasɩ cakɩ lone nɖɩ ɖɩ-taa lɩm wɛ-sɩ ɖeu nɛ tɔɔnaɣ tɔyɩ yɔ. Ɛlɛ, ɛzɩ alɩwaatʋ ndʋ kpakpasɩ kpayʋ lakɩ ɛ-tʋmɩyɛ yɔ tɩ-tɔm cɛyaa? Ɛsɔtɔm tiyiyu nɔɔyʋ wɛ Pasiifiki lɩm hɛkʋ taa tɛtʋ natʋyʋ taa, nɛ ɛnawa se alɩwaatʋ natʋyʋ wɛɛ nɛ tɩ-yɔɔ ɖeyi ɖeyi pɩmʋnaa se kpakpasɩ kpayʋ ɛla tʋmɩyɛ. Tɛtʋ ndʋ tɩ-taa Aseɣɖe Tʋ nɔɔyʋ ya-ɩ se powolo nɛ pakpa kpakpasɩ. Ɛsɔtɔm tiyiyu ɛnʋ ɛyɔɔdaa se: “Mankaɣ-ŋ katʋʋ cee tanaŋ tɛɛ ñɩɣtʋ nakʋ yɔɔ ɖeyi ɖeyi.” Peeɖe koobu ɛnʋ ecosi-i se: “Ŋtɩnɩɩ pɩ-taa. Alɩwaatʋ ndʋ pɩmʋnaa se pakpa kpakpasɩ yɔ, tɩ-yɔɔ ɖiwoki, ɛlɛ pɩtɩkɛ alɩwaatʋ ndʋ tɩkɛdɩnɩ-ɖʋ yɔ tɩ-yɔɔ ɖiwoki.”

⁹ Mbʋ ɖɔɖɔ Yesu tɔmkpɛlɩkɩyaa mba papɩsɩ ɛyaa kpayaa yɔ, powokaɣ lona wena a-taa ɛyaa wɛɛ yɔ. Nɛ alɩwaatʋ ndʋ tɩ-yɔɔ ɛyaa pɩzɩɣ nɛ pɛwɛɛ lona ana a-taa yɔ, tɩ-yɔɔ powokaɣ. Kɩɖaŋ nɩɩyɩ yɔ: Yesu wayɩ tɩŋɩyaa susi tɔm Templo taa nɛ Sinaagɔɔgɩwaa taa, kpaɣ ɖɩɣa nɛ ŋwolo ɖɩɣa nɛ kɩyakɩŋ taa. (Tʋma 5:42; 17:17; 18:4) Ða ɖɔɖɔ, pɩpɔzʋʋ se ɖɩtɩlɩ lone nɖɩ ɖɩ-taa ɖisusuu tɔm yɔ ɖɩ-taa ɛyaa wɛtʋ. Pɩpɔzʋʋ se ɖɩsɔɔlɩ faaa se ɖɩlɛɣzɩ ɖa-ɖʋtʋ nɛ pɩsa nɛ ɖisusi tɔm lona wena a-taa ɖɩpɩzɩɣ nɛ ɖɩna ɛyaa, nɛ alɩwaatʋ ndʋ tɩ-yɔɔ ɖɩpɩzɩɣ nɛ ɖɩna-wɛ yɔ.—1 Kɔr. 9:19-23.

10. Wondu ndʋ Yehowa ɛgbɛyɛ haɣ-ɖʋ?

¹⁰ Pɩpɔzʋʋ se kpakpasɩ kpayʋ ɛwɛɛnɩ wondu ndʋ tɩmʋnaa yɔ, nɛ pɩpɔzʋʋ se ɛtɩlɩ ɛzɩma pɩwɛɛ se ɛlabɩnɩ-tʋ tʋmɩyɛ yɔ. Ða ɖɔɖɔ, pɩpɔzʋʋ se ɖɩwɛɛnɩ tɔm susuu wondu ndʋ tɩmʋnaa yɔ. Nɛ pɩpɔzʋʋ se ɖɩtɩlɩ ɛzɩma pɩwɛɛ se ɖɩlabɩnɩ-tʋ tʋmɩyɛ yɔ. Yesu kaaheyi ɛ-tɔmkpɛlɩkɩyaa ɛzɩma pɩwɛɛ se posusi tɔm kɩbandʋ yɔ. Eheyi-wɛ mbʋ pɩwɛɛ se pɔɖɔkɩ yɔ, ɖenɖe pɩwɛɛ se posusi tɔm yɔ, nɛ tɔm ndʋ pɩwɛɛ se pɔyɔɔdɩ yɔ. (Mat. 10:5-7; Luka 10:1-11) Sɔnɔ, Yehowa ɛgbɛyɛ haɣ-ɖʋ Tɔm wɩlʋʋ wondu ndʋ tɩwɛ wazaɣ siŋŋ yɔ. * Nɛ pawɩlɩɣ-ɖʋ ɛzɩma pɩwɛɛ se ɖɩlabɩnɩ wondu ndʋ tʋmɩyɛ yɔ. Falɩsʋʋ mbʋ, pɩsɩɣnɩ-ɖʋ se ɖisusi tɔm kaalɛyɩtʋ nɛ ɖɩkpɛlɩkɩ ɛzɩma ɖɩkɛ wɩlɩyaa kɩbama yɔ.—2 Tim. 2:15.

11. Ɛbɛ yɔɔ pɩpɔzʋʋ se ɛyaa kpayaa ɩwɛɛ abalɩtʋ?

¹¹ Pɩpɔzʋʋ se mba palakɩ kpakpasɩ kpaʋ tʋmɩyɛ yɔ, pɛwɛɛ abalɩtʋ. Nabʋyʋ taa pakatɩɣ wɛtʋ ndʋ tɩ-yɔɔ pataamaɣzɩ yɔ teŋgu taa. Ðoŋ ɖoŋ lɛ, palakɩ tʋmɩyɛ ɖoo taa, nɛ helim pɩzɩɣ nɛ pɩpaɣzɩ mabʋ tuda lɩm mbʋ pɩ-yɔɔ palakɩ tʋmɩyɛ yɔ pɩ-yɔɔ. Pɩpɔzʋʋ ɖɔɖɔ se ɛyaa kpayaa ɩwɛɛ abalɩtʋ. Alɩwaatʋ ndʋ ɖɩpaɣzɩɣ tɔm susuu nɛ ɖiheyiɣ lalaa se ɖɩkɛ Yehowa Aseɣɖe tɩnaa yɔ, ɖɔ-hɔʋ taa ñɩma pɩzɩɣ nɛ pakaɖɩnɩ-ɖʋ, ɖa-taabalaa pɩzɩɣ nɛ pohoŋ-ɖʋ nɛ ɛyaa nabɛyɛ pɩzɩɣ nɛ pekizi se paawelisiɣ tɔm ndʋ ɖiheyiɣ-wɛ yɔ. Ɛlɛ, pɩɩɖɩɣzɩɣ-ɖʋ. Yesu kaayɔɔdaa se ɛkaɣ tiyuu ɛ-wayɩ tɩŋɩyaa se posusi tɔm ɛyaa mba yɔ, paba kaɣ-wɛ kaɖɩnʋʋ.—Mat. 10:16.

12. Ɛzɩ Yozuwee 1:7-9 yɔɔdʋʋ yɔ, ɛbɛ pɩzɩɣ pɩsɩnɩ-ŋ nɛ ŋwɛɛ abalɩtʋ?

¹² Ɛbɛ pɩzɩɣ pɩsɩnɩ-ŋ nɛ ŋwɛɛ abalɩtʋ? Kajalaɣ lɛ, pɩwɛɛ se ña-taa ɛtɛ se Yesu wɛɛ ewoki pɩ-yɔɔ nɛ eɖiyiɣ tʋmɩyɛ nɖɩ nɛ ɖooo ɛsɔdaa. (Yoh. 16:33; Natʋ 14:14-16) Pʋwayɩ lɛ, pɩwɛɛ se ŋkpazɩ ɖoŋ tisuu mbʋ ŋwɛnɩ tamaɣ ŋga Yehowa laba se ɛcɔŋnɩ ñɔ-yɔɔ yɔ kɔ-yɔɔ. (Mat. 6:32-34) Ñe-tisuu wɛɣ nɛ pɩkpaɣ ɖoŋ lɛ, ŋkaɣ wɛʋ abalɩtʋ nɛ pɩkɩlɩ. Pɩyɛɛrɩ nɛ ɛ-taabalaa pawɩlaa se pɛwɛnɩ tisuu sɔsɔm, alɩwaatʋ ndʋ peyebi kpakpasɩ kpaʋ tʋmɩyɛ nɖɩ palakaɣ yɔ nɛ patɩŋ Yesu yɔ. Mbʋ ɖɔɖɔ ŋwɩlaa se ŋwɛnɩ tisuu sɔsɔm, alɩwaatʋ ndʋ ŋheyi ña-taabalaa nɛ ñɔ-hɔʋ taa ñɩma se ña nɛ Yehowa Aseɣɖe Tɩnaa ɩpaɣzɩ Bibl kpɛlɩkʋʋ nɛ ŋwoki pe-kediɣzisi yɔ. Pɩtʋʋ fɛyɩ se  ŋlabɩ lɛɣzɩtʋ sɔsɔtʋ ñɛ-wɛtʋ nɛ ñe-wezuu caɣʋ taa se pɩsa nɛ ŋcaɣ wezuu ɛzɩ Yehowa paɣtʋ pɔzʋʋ yɔ. Pɩɩpɔzɩ-ŋ tisuu nɛ abalɩtʋ ɖɔɖɔ pʋcɔ nɛ ŋpɩzɩ ŋla mbʋ. Ŋwɛɣ nɛ ŋwoki pɩ-yɔɔ nɛ ŋwɛɣ abalɩtʋ lɛ, ña-taa pɩzɩɣ nɛ pɩtɛ se ‘Yehowa ñɛ-Ɛsɔ wɛ ñɔ-cɔlɔ mbʋ mbʋ ŋlakɩ yɔ pɩtɩŋa pɩ-taa.’—Kalɩ Yozuwee 1:7-9.

13. Ɛzɩma tɔm yɔɔ maɣzʋʋ nɛ adɩma papɩzɩɣ pasɩnɩ-ŋ se ŋwɛɛ abalɩtʋ?

¹³ Ɛbɛ ɖɔɖɔ pɩzɩɣ pɩsɩnɩ-ŋ nɛ ŋwɛɛ abalɩtʋ? Tɩmɩ nɛ ŋpɔzɩ Ɛsɔ se ɛsɩnɩ-ŋ nɛ ŋwɛɛ abalɩtʋ. (Tʋma 4:29, 31) Yehowa kaɣ cosuu ña-adɩma yɔɔ nɛ ɛɛkaɣ-ŋ lɔʋ kpa. Ɛwɛ ñɔ-cɔlɔ paa ɛzɩmtaa se ɛsɩnɩ-ŋ. Pɩtasɩ lɛ, ŋpɩzɩɣ nɛ ŋmaɣzɩ ɛzɩma Yehowa yabɩ lalaa ñʋʋ nɛ pɩɖɛɛ yɔ pɩ-yɔɔ. Maɣzɩ ɖɔɖɔ ɛzɩma ɛsɩnɩ-ŋ nɛ ŋwa kala nɛ ɛha-ŋ ɖoŋ nɛ ŋla lɛɣzɩtʋ ñe-wezuu caɣʋ taa yɔ pɩ-yɔɔ. Pɩtʋʋ fɛyɩ se Weyi eɖiyi ɛ-samaɣ nɛ kalɩɩ Teŋgu Kɩsɛɛmʋʋ taa yɔ, ɛpɩzɩɣ ɛsɩnɩ-ŋ nɛ ŋkɛ Krɩstʋ tɔmkpɛlɩkɩyʋ. (Ejl. 14:13) Ŋpɩzɩɣ nɛ ŋwɛɛnɩ tisuu mbʋ keɣa maɖʋ nɔɔyʋ kaawɛna yɔ. Ɛyɔɔdaa se: “[Yehowa] tɩnɩɣ mɔ-yɔɔ, sɔɔndʋ ɛɛtasɩɣ-m kpaʋ; ɛyʋ kaalabɩ-m we?”—Keɣa 117:6.

14. Ɛbɛ Masae nɛ Tomoyo pa-kɩɖaŋ kpɛlɩkɩ-ŋ?

¹⁴ Nʋmɔʋ lɛɛkʋ ŋgʋ kɩ-yɔɔ ŋpɩzɩɣ ŋtɩŋna nɛ ŋwɛɛ abalɩtʋ yɔ, ŋgʋ lɛ se ŋkpɛlɩkɩ nɛ ŋna ɛzɩma Yehowa sɩnɩ ɛyaa mba paawɛ fɛyɛ yɔ nɛ pɛwɛɛ abalɩtʋ yɔ. Payaɣ koobu halɩñɩnʋ nɔɔyʋ se Masae, yele nɛ ɖɩyɔɔdɩ ɛ-kɩɖaʋ tɔm. Ɛɛwɛ fɛyɛ nɛ pɩlakaɣ-ɩ ɛzɩ ɛɛkaɣ pɩzʋʋ kpa nɛ esusi tɔm yɔ. Pɩlakaɣ-ɩ ɛzɩ ɛyaa mba ɛɛsɩŋ yɔ pɔ-yɔɔdɩnʋʋ wɛ kaɖɛ siŋŋ ɛzɩ ɛyʋ ñakʋʋ pana se ɛkpa koloŋa sɔsɔɔ nakɛyɛ yɔ; nɛ ɛmaɣzaɣ se ɛɛkaɣ pɩzʋʋ kpa nɛ ɛla mbʋ. Pʋyɔɔ lɛ, ɛñaɣ pana siŋŋ se ɛkpazɩ ɖoŋ sɔɔlɩm mbʋ ɛwɛnɩ Ɛsɔ nɛ ɛ-cɔlɔ ñɩma yɔɔ yɔ. Ɛmaɣzɩ ɛzɩma pɩcɛyɩ siŋŋ se ɖisusi tɔm kpɛdɛyɛ lɛɛlɛɛyɔ yɔ pɩ-yɔɔ, nɛ ɛtɩmnɩ Ɛsɔ se ɛsɩnɩ-ɩ nɛ ɛkpazɩ ɖoŋ sɔɔlɩm mbʋ ɛwɛna se esusi tɔm yɔ. Pɩsɩnɩ-ɩ nɛ ɛwa sɔɔndʋ ndʋ ɛɛwɛna yɔ, nɛ halɩ ɛla paa ɖooye nʋmɔʋ lɩzʋʋ tʋmɩyɛ. Yehowa pɩzɩɣ ɖɔɖɔ nɛ ɛsɩnɩ tɔm susuyaa kɩfama nɛ ‘pɛwɛɛ abalɩtʋ.’ Payaɣ koobu halɩñɩnʋ nɔɔyʋ se Tomoyo, na mbʋ pɩtalɩ-ɩ yɔ. Alɩwaatʋ ndʋ ɛpaɣzɩ tɔm susuu kpaɣ ɖɩɣa nɛ ŋwolo ɖɩɣa yɔ, ɖɩɣdʋ kajalaɣ ñɩnʋ weyi ɛkataa yɔ, eholi ɛ-yɔɔ nɛ ɛyɔɔdɩ se: “Mantɩsɔɔlɩ se ma nɛ Yehowa Aseɣɖe tɩnaa ɖɩɖʋ ɛgbɛyɛ naɖɩyɛ!” nɛ ɛɖɩɣ pɔɔyʋʋ. Peeɖe Tomoyo heyi ɛ nɛ koobu halɩñɩnʋ weyi palɩwa yɔ nɛ abalɩtʋ se: “Ŋnɩ ndʋ ɛyɔɔdaa yɔ? Mantɩyɔɔdɩ natʋyʋ, ɛlɛ ɛɛnawa se mɛnkɛ Yehowa Aseɣɖe Tʋ. Man-taa wɛ leleŋ siŋŋ!” Lɛɛlɛɛyɔ, Tomoyo kɛ paa ɖooye nʋmɔʋ lɩzɩyʋ.

15. (a) Ye pɔtɔm se ɛyʋ ɛfalɩsɩ ɛ-tɩ yɔ, pʋ-tɔbʋʋ lɛ suwe? (b) Nɛ ɛbɛ yɔɔ pɩ-tɔm cɛyɩ Krɩstʋ ñɩma ɛsɩndaa?

¹⁵ Kpakpasɩ kpayaa kɩbama falɩsɩɣ pa-tɩ. Ye pɔtɔm se ɛyʋ falɩsɩɣ ɛ-tɩ yɔ, pʋ-tɔbʋʋ lɛ se ɛñakɩ pana se ɛla mbʋ pɩpɔzʋʋ se ɛla yɔ. Mba palakɩ kpakpasɩ kpaʋ tʋmɩyɛ yɔ, pɩpɔzʋʋ se pafalɩsɩ pa-tɩ nɛ pakʋyʋʋ tanaŋ tɛɛ cu, pacakɩnɩ pɛ-ɛsa pɩkɔɔ pɩsɩɩnɩ alɩwaatʋ ndʋ pɛtɛm tʋmɩyɛ yɔ, nɛ powoki tʋmɩyɛ yɔɔ paa ɛsɔdaa wɛtʋ ɛfɛyɩ camɩyɛ yɔ. Ða ɖɔɖɔ, ye ɖɩsɔɔlaa se ɖɩɖɔkɩ ɖa-tɩ nɛ ɖɩtɛzɩ ɖa-tʋmɩyɛ yɔ, pɩpɔzʋʋ se ɖɩfalɩsɩ ɖa-tɩ.—Mat. 10:22.

16. Ɛbɛ pɩzɩɣ pɩsɩnɩ-ɖʋ nɛ ɖɩla mbʋ pɩ-labʋ pɩzɩɣ nɛ pɩwɛɛ-ɖʋ kaɖɛ yɔ?

¹⁶ Sakɩyɛ taa lɛ, ɖɩsɔɔlaa se ɖɩtɩŋnɩ nʋmɔʋ ŋgʋ kɩkɩlɩ kɛlɛʋ yɔ kɩ-yɔɔ nɛ ɖɩla nabʋyʋ. Paa mbʋ yɔ, nabʋyʋ taa mbʋ pɩ-tɔm kɩlɩ cɛyʋʋ nɛ pɩpɔzʋʋ se ɖɩlabɩ-pʋ yɔ, pɩ-labʋ fɛyɩ kɛlɛʋ. Ye mbʋ, pɩpɔzʋʋ se ɖɩkpɛlɩkɩ tɩ ɖɔkʋʋ. Pʋyɔɔ lɛ, pɩpɔzʋʋ se pasɩnɩ-ɖʋ nɛ  ɖɩfalɩsɩ ɖa-tɩ nɛ ɖɩla mbʋ pɩ-labʋ pɩzɩɣ nɛ pɩwɛɛ-ɖʋ kaɖɛ yɔ. Yehowa tɩŋɩɣnɩ e-fezuu kiɖeɖeu yɔɔ nɛ ɛsɩɣnɩ-ɖʋ.—Gal. 5:22, 23.

17. Ɛzɩ Pɔɔlɩ yɔɔdʋʋ 1 Kɔrɛntɩ mba 9:25-27 taa yɔ, ɛbɛ pɩɩpɔzaa se ɛla nɛ pɩsa nɛ ɛfalɩsɩ ɛ-tɩ?

¹⁷ Apostoloo Pɔɔlɩ kaafalɩsɩ ɛ-tɩ. Ɛlɛ, ɛyɔɔdaa se pɩɩpɔzaa se ‘ɛma’ e-tomnaɣ nɛ pɩsa nɛ ɛla mbʋ pɩtʋʋzaa yɔ. (Kalɩ 1 Kɔrɛntɩ mba 9:25-27.) Eseɣti lalaa se pafalɩsɩ pa-tɩ nɛ pala nɛ pɩtɩŋa “pɩɖɔ camɩyɛ nɛ pɩtʋʋzɩ cɔlɩɩɩ.” (1 Kɔr. 14:40) Pɩpɔzʋʋ se ɖɩñaɣ pana siŋŋ nɛ ɖiwolo pɩ-yɔɔ nɛ ɖɩsɛɣ Yehowa, pɩwɛɛ se ɖisusuu tɔm ɖoŋ ɖoŋ nɛ ɖɩwɩlɩɣ tɔm kɩbandʋ.—Tʋma 2:46.

18. Ɛbɛ kaɣ yebu nɛ Yehowa maɣzɩ se ɖɩwɛɛ nɛ ɖɩlʋlʋʋ pee?

¹⁸ Ye kpakpasɩ kpayʋ ɛkpaɣ kpakpasɩ sakɩyɛ yɔ, pɩwɩlɩɣ se ɛ-tʋmɩyɛ lʋlʋʋ pee. Ɛlɛ, tɔm susuu tʋmɩyɛ wɛ ndɩ. Pɩtɩkɛ ɛyaa ɛzɩma ɖɩsɩnaa nɛ papɩsɩ Yehowa Aseɣɖe Tɩnaa yɔ, mbʋ wɩlɩɣna se ɖɩlʋlʋʋ pee yaa ɖɩɩlʋlʋʋ. (Luka 8:11-15) Ye ɖiwoki pɩ-yɔɔ nɛ ɖisusuu tɔm kɩbandʋ nɛ ɖɩwɩlɩɣ lalaa tɔm yɔ, Yehowa ɛsɩndaa lɛ, ɖɩwɛɛ nɛ ɖɩlʋlʋʋ pee. Ɛbɛ yɔɔ? Mbʋ pʋyɔɔ yɔ, ɖɩwɛɛ nɛ ɖɩlakɩ mbʋ Yehowa nɛ ɛ-Pɩyalʋ pɔsɔɔlaa se ɖɩla yɔ.—Mark. 13:10; Tʋma 5:28, 29.

19-20. Lɩmaɣzɩyɛ sɔsɔɖɛ nɖɩ yɔɔ pɩpɔzʋʋ se ɖisusi tɔm lɛɛlɛɛyɔ?

¹⁹ Ajɛɛ naayɛ taa lɛ, fenasɩ nasɩyɩ taa ɖeke pahaɣ kpakpasɩ kpayaa nʋmɔʋ se pakpa kpakpasɩ. Ajɛɛ ana a-taa, kpakpasɩ kpayʋ nɔɔyʋ pɩzɩɣ nɛ ɛmaɣzɩ se pɩcɛyɩ siŋŋ se ɛkpa kpakpasɩ alɩwaatʋ ndʋ pɩkazɩɣ ññɩɩ se kpakpasɩ kpaʋ alɩwaatʋ ɛtɛ yɔ. Ða ɛyaa kpayaa lɛ, lɩmaɣzɩyɛ ɖɩnɛ ɖɩ-yɔɔ pɩcɛyaa se ɖisusi tɔm lɛɛlɛɛyɔ: Ɛjaɖɛ ɖɩnɛ ɖɩ-tɛm wɛɛ nɛ pɩñɔtʋʋ lɛɛ lɛɛ! Alɩwaatʋ ndʋ pɩkazaa se ɖɩla ñʋʋ yabɩtʋ tʋmɩyɛ ɖɩnɛ yɔ, tɩtɩɖɔɔ. Taaɖaŋ yaa taamaɣzɩ se pɩpɔzʋʋ se ŋɖaŋ nɛ wɛtʋ kɩbandʋ natʋyʋ talɩ pʋcɔ nɛ ŋɖʋ nesi tʋmɩyɛ kɩcɛyɩyɛ nɖɩ.—Ekl. 11:4.

²⁰ Ñaɣ pana lɛɛlɛɛyɔ nɛ ŋwɛɛ kpekpeka nɛ pɩkpaɖɩ, ŋkpɛlɩkɩ Bibl taa tɔm nɛ pɩkpaɖɩ, ŋwɛɛ abalɩtʋ nɛ pɩkɩkɩ, nɛ ŋfalɩsɩ ña-tɩ. Kpɛndɩ ɛyaa kpayaa mba pɛcɛzɩ miiliyɔɔwaa lutozo yɔ pɔ-yɔɔ, nɛ ŋkaɣ hiɣu Yehowa taa leleŋ. (Neh. 8:10) Tɛ ña-taa se ŋlakɩ ño-ɖoŋ ɖeɖe tɔm susuu tʋmɩyɛ taa. Tɛ ña-taa ɖɔɖɔ se ŋwɛɣ ɖɩ-labʋ yɔɔ nɛ pɩkɔɔ pɩsɩɩnɩ alɩwaatʋ ndʋ Yehowa yɔɔdʋʋ se tʋmɩyɛ nɖɩ ɖɩtɛma yɔ. Tɔm ñʋʋ ŋgʋ kɩkɔŋ yɔ, kɩkaɣ tazʋʋ nʋmɔŋ naadozo weyi ɩ-yɔɔ ɖɩpɩzɩɣ ɖɩtɩŋna nɛ ɖɩtɛ ɖa-taa se ɖiwoki pɩ-yɔɔ nɛ ɖisusuu Kewiyaɣ tɔm kɩbandʋ yɔ ɩ-taa.