1. Alɩwaatʋ ndʋ pɩpɩzɩɣ nɛ pɩwɛɛ kaɖɛ se ɛyʋ ɛsɛɛ Yehowa?

ALƖWAATƲ ndʋ pɩpɩzɩɣ nɛ pɩwɛɛ kaɖɛ nɛ pɩkɩlɩ se ŋsɛɛ Yehowa? Alɩwaatʋ ndʋ ŋkatɩɣ kala sakɩyɛ yɔ, yaa alɩwaatʋ ndʋ ŋŋkatɩɣ kala sakɩyɛ yɔ? Alɩwaatʋ ndʋ ɖɩkatɩɣ kala yɔ, pɩwɛ-ɖʋ kɛlɛʋ se ɖɩtaa Yehowa liu. Ɛlɛ alɩwaatʋ ndʋ ɖɩwɛɣ laŋhɛzɩyɛ taa yɔ, ɛzɩma ɖɩlakɩ? Ɛzɩ nabʋyʋ taa ɖɩsɔʋ se pɩcɛyaa se ɖɩsɛɛ Ɛsɔ? Yehowa kaapaɣ Izrayɛɛlɩ piya se wɛtʋ ndʋ tɩpɩzɩɣ nɛ tɩtalɩ-sɩ.—Wp. 6:10-12.

2. Kɩɖaʋ ŋgʋ Wiyaʋ Aazaa hawa?

² Wiyaʋ Aazaa kaata Yehowa liu nɛ ɛ-laŋɩyɛ pilim nɛ pɩɩwɩlaa se ɛwɛ lɛɣtʋ. Ɛkɛnɩ kɩɖaʋ kɩbaŋʋ siŋŋ. Pɩtɩkɛ alɩwaatʋ kaɖɛ ñɩndʋ taa ɖeke ɛɛsɛ Yehowa, ɛlɛ ɛsɛ-ɩ laŋhɛzɩyɛ alɩwaatʋ taa ɖɔɖɔ. “Aazaa laŋɩyɛ taa keɖeni pɩŋŋ [Yehowa]” kpaɣnɩ ɖooo ɛ-pɩjatʋ taa. (1 Aw. 15:14) Nʋmɔŋ weyi ɩ-yɔɔ Aazaa kaatɩŋnaa nɛ ɛwɩlɩ se ɛñɔnɩ Ɛsɔ yɔ, ɩ-taa lɛɛkʋ lɛ se ɛɖɩzɩ cɛtɩm Ɛsɔ sɛtʋ Yuuda tɛtʋ taa. Bibl yɔɔdʋʋ se: “Etuzi ɛgɔm kilizaɣ tɛ altaarunaa nɛ kookasɩ nɛ ɛlɔ nɛ ɛyɔkɩ sɩɩnaa pɛɛ nɛ ɛsɔ miŋ apandama.” (4 Aw. 14:1, 2, 4) Halɩ ɛɖɔɔnɩ e-neze Maaka lone sɔsɔɖɛ nɖɩ ɖɩ-taa ɛlɛ kaawɛ Kewiyaɣ taa yɔ ɖɩ-taa. Ɛbɛ yɔɔ? Mbʋ pʋyɔɔ yɔ, ɛlɛ seɣtaɣ ɛyaa se pɛsɛɛ sɩʋ kpeliɣa nakɛyɛ.—1 Aw. 15:11-13.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Pɩtasɩna se Aazaa ɖɩzɩ cɛtɩm Ɛsɔ sɛtʋ lɛ, ɛlabɩ nabʋyʋ ɖɔɖɔ. Ɛsɩnɩ Yuuda samaɣ se kaɖaɣnɩ paɣzʋʋ Yehowa sɛʋ. Yehowa wazɩ Aazaa nɛ Izrayɛɛlɩ piya nɛ eyele nɛ pɛwɛɛ laŋhɛzɩyɛ * taa alɩwaatʋ natʋyʋ. Alɩwaatʋ ndʋ Aazaa tɔkaɣ  Kewiyitu yɔ, ‘tɛtʋ hɛzɩ’ pɩnzɩ hiu. (4 Aw. 13:23; 14:3, 5) Tɔm ñʋʋ kʋnɛ kɩ-taa, ɖɩkaɣ naʋ ɛzɩma Aazaa labɩnɩ tʋmɩyɛ laŋhɛzɩyɛ alɩwaatʋ ndʋ yɔ. Pʋwayɩ lɛ, ɖɩkaɣ naʋ kajalaɣ pɩnzɩ mɩnʋʋ taa Krɩstʋ ñɩma kɩɖaʋ. Ɛzɩ Aazaa yɔ, paba ɖɔɖɔ paalabɩnɩ laŋhɛzɩyɛ alɩwaatʋ natʋyʋ tʋmɩyɛ camɩyɛ. Kɛdɛzaɣ ɖeɖe lɛ, ɖɩkaɣ cosuu tɔm pɔzʋʋ pʋnɛ pɩ-yɔɔ: Ye ŋwɛ ɛjaɖɛ nɖɩ ɖɩ-taa komina haɣ Yehowa Aseɣɖe Tɩnaa waɖɛ se pala pɛ-Ɛsɔ sɛtʋ tʋma faaa yɔ, ɛzɩma ŋpɩzɩɣ nɛ ŋlabɩnɩ tʋmɩyɛ laŋhɛzɩyɛ alɩwaatʋ ndʋ nɛ lɛɣtʋ?

4. Ɛzɩ 4 Awiya 14:1, 5, 6 yɔɔdʋʋ yɔ, ɛzɩma Aazaa labɩnɩ tʋmɩyɛ laŋhɛzɩyɛ alɩwaatʋ natʋyʋ?

⁴ Kalɩ 4 Awiya 14:1, 5, 6. Aazaa kaaheyi samaɣ se Yehowa hanɩ mba “laŋhɛzɩyɛ nɛ pɩcɔɔ pɩta.” Aazaa taamaɣzɩ se laŋhɛzɩyɛ alɩwaatʋ ndʋ tɩkɛ helim mʋʋ alɩwaatʋ. Ɛlɛ ɛɛpaɣzɩ maʋ tɛtʋ, kolonzi, tilima nɛ nɔnɔsɩ. Eeheyi Yuuda samaɣ se: “Pɩtɩŋa pɩcaɣ ɖiɣ ɖiɣ” yaa ɛjaɖɛ wɛ ɖe-nesi tɛɛ mbʋ. Suwe Aazaa ñɩnaɣ yɔɔdʋʋ? Ɛñɩnaɣ yɔɔdʋʋ se samaɣ pɩzɩɣ nɛ kɛyɛlɩ tɛtʋ ndʋ Ɛsɔ ha-kɛ yɔ tɩ-taa faaa, nɛ kapɩzɩɣ nɛ kama kuduyuŋ nɛ koyindinaa ɩɩkaɖɩɣnɩ-kɛ. Eeseɣti samaɣ se kalabɩnɩ tʋmɩyɛ laŋhɛzɩyɛ alɩwaatʋ ndʋ camɩyɛ.

5. Ɛbɛ yɔɔ Aazaa kaakpazɩ ɖoŋ ɛ-sɔɔjanaa?

⁵ Aazaa labɩnɩ tʋmɩyɛ laŋhɛzɩyɛ alɩwaatʋ ndʋ ɖɔɖɔ nɛ ɛkpazɩnɩ ɖoŋ ɛ-sɔɔjanaa. (4 Aw. 14:7) Ɛzɩ pɩwɩlɩɣ se ɛtɩtaa Yehowa liu na? Aayɩ. Ɛlɛ, Aazaa kaaɖiɣzinaa se ɛkɛ wiyaʋ nɛ pʋyɔɔ lɛ, ɛ-tʋmɩyɛ pɩkɛnaa se ɛñɔɔzɩ samaɣ nɛ kapɩzɩ kalʋbɩnɩ kala wena kapɩzɩɣ nɛ kakatɩ nɛ ɛsɩndaa yɔ. Aazaa kaaɖiɣzinaa ɖɔɖɔ se laŋhɛzɩyɛ alɩwaatʋ ndʋ tɩ-taa Yuuda ñɩma kaawɛɛ yɔ, tɩɩkaɣ wɛʋ tam, nɛ tɔm ndʋ tɩɩkɛ toovenim.

6. Ɛzɩma kajalaɣ pɩnzɩ mɩnʋʋ taa Krɩstʋ ñɩma labɩnɩ tʋmɩyɛ laŋhɛzɩyɛ alɩwaatʋ natʋyʋ?

⁶ Paa panazaɣ kajalaɣ pɩnzɩ mɩnʋʋ taa Krɩstʋ ñɩma ɖoŋ ɖoŋ yɔ, paahiɣ laŋhɛzɩyɛ alɩwaatʋ ndɩ ndɩ taa ɖɔɖɔ. Ɛbɛ tɔmkpɛlɩkɩyaa mba, palabɩ alɩwaatʋ ndɩ ndɩ ndʋ tɩ-taa? Abalaa nɛ halaa siɣsiɣ ñɩma mba, paawobi pɩ-yɔɔ nɛ posusuu tɔm kɩbandʋ kaahɛzaɣ. Kɛdaɣ ŋga kɛwɛ Tʋma Labʋ takayaɣ taa yɔ, kɔyɔɔdʋʋ se ‘pañaŋaɣ Yehowa.’ Powobi pɩ-yɔɔ nɛ posusuu tɔm kɩbandʋ, nɛ mbʋ pɩlɩ pɩ-taa yɔ lɛ se ‘pɛwɛɛ nɛ pɛtɛzɩɣ huuu.’ Pɩwɩlɩɣ kpayɩ kpayɩ se Yehowa kaawazɩ ɛzɩma posusi tɔm nɛ kpekpeka laŋhɛzɩyɛ alɩwaatʋ ndɩ ndɩ ndʋ tɩ-taa yɔ.—Tʋma 9:26-31.

7-8. Ɛbɛ Pɔɔlɩ nɛ lalaa palaba alɩwaatʋ ndʋ pehiɣ waɖɛ naɖɩyɛ yɔ? Lɩzɩ pɩ-taa.

⁷ Kajalaɣ pɩnzɩ mɩnʋʋ taa Krɩstʋ ñɩma kaatɩŋnɩ wala wena payɩ paawɛna yɔ a-yɔɔ nɛ posusi tɔm kɩbandʋ. Kɩɖaʋ nakʋyʋ yɔ: Alɩwaatʋ ndʋ Pɔɔlɩ ɖiɣzinaa se ɛpɩzɩɣ nɛ esusi ɛyaa sakɩyɛ tɔm Efɛɛzɩ tɛtʋ taa yɔ, ɛcaɣ tɛtʋ ndʋ tɩ-taa nɛ esusi tɔm.—1 Kɔr. 16:8, 9.

⁸ Pɔɔlɩ nɛ Krɩstʋ ñɩma lalaa papɩzaa ɖɔɖɔ nɛ posusi tɔm ɛyaa sakɩyɛ pɩnaɣ 49 taa, alɩwaatʋ ndʋ apostoloowaa nɛ Yeruzalɛm ɛzʋtʋyaa pɔcɔnɩ pɛlɩtʋ tɔm ɖeɖe yɔ. (Tʋma 15:23-29) Pɔɔlɩ nɛ lalaa peheyi agbaa lɩmaɣzɩyɛ nɖɩ pakpaɣaa yɔ nɛ pɩtɛ lɛ, pa-tɩŋa pañaɣ pana siŋŋ nɛ posusi “Yehowa tɔm kɩbandʋ.” (Tʋma 15:30-35) Ɛbɛ lɩ pɩ-taa? Bibl yɔɔdʋʋ se “agbaa wɛɛ nɛ akpaɣ ɖoŋ tisuu taa nɛ ahukuu paa ɖooye.”—Tʋma 16:4, 5.

9. (a) Wɛtʋ ndʋ wɛ ajɛɛ sakɩyɛ taa sɔnɔ? (b) Nɛ tɔm ndʋ ɖɩpɩzɩɣ nɛ ɖɩpɔzɩ ɖa-tɩ?

⁹ Sɔnɔ, ɖɩpɩzɩɣ nɛ ɖisusi tɔm faaa ajɛɛ sakɩyɛ taa. Ŋwɛ ajɛɛ ana a-taa naɖɩyɛ taa? Ye ɛɛɛ yɔ, pɔzɩ ña-tɩ se: ‘Ɛzɩma mɛwɛɛ nɛ malakɩnɩ tʋmɩyɛ laŋhɛzɩyɛ alɩwaatʋ ndʋ?’ Kɛdɛzaɣ kɩyakɩŋ wɛ ŋgee Yehowa samaɣ ɛsɩndaa mbʋ pʋyɔɔ yɔ, kɛ-ɛsɩyɛ sɛnɩ tɔm susuu nɛ tɔm wɩlʋʋ tʋmɩyɛ. Patɩlabɩtɩ tʋmɩyɛ sɔsɔyɛ nɖɩ ɛjaɖɛ yɔɔ wiɖiyi nɛ pana. (Mark. 13:10) Tʋma sakɩyɛ wɛɛ se ɖɩpɩzɩɣ nɛ ɖɩla tɔm susuu tʋmɩyɛ nɖɩ ɖɩ-taa.

10. Ɛbɛ 2 Timootee 4:2 seɣtiɣ-ɖʋ se ɖɩla?

¹⁰ Ɛzɩma ŋpɩzɩɣ nɛ ŋlabɩnɩ tʋmɩyɛ laŋhɛzɩyɛ alɩwaatʋ natʋyʋ camɩyɛ? (Kalɩ 2 Timootee 4:2.) Maɣzɩ nɛ ŋna se ña-maɣmaɣ yaa ñɔ-hɔʋ taa tʋ nɔɔyʋ pɩzɩɣ nɛ ɛla lɛɣzɩtʋ nɛ pɩsa nɛ esusi tɔm nɛ pɩkpaɖɩ, halɩ pɩtɩla ɛkɛ nʋmɔʋ lɩzɩyʋ na? Pɩtɩpɔzɩ se ɖɩñaɣ pana se ɖɩkɛ ñɩm tɩnaa lɛɛlɛɛyɔ mbʋ pʋyɔɔ yɔ, ɖɩɩkaɣ kpɛndɩnʋʋ mbʋ ɖɩwɛna yɔ nɛ ɖɩtɛzɩ kʋñɔŋ sɔsɔʋ.—Adu. 11:4; Mat. 6:31-33; 1 Yoh. 2:15-17.

11. Ɛbɛ ɛyaa nabɛyɛ laba se pɩsa nɛ pasɩnɩ ɛyaa sakɩyɛ nɛ panɩɩ tɔm kɩbandʋ?

¹¹ Tɔm susuyaa sakɩyɛ kpɛlɩkɩ kʋnʋŋ kɩfalʋʋ nakʋyʋ se pɩsa nɛ pasɩnɩ lalaa nɛ pɛkpɛlɩkɩ Yehowa yɔɔ tɔm. Ɛsɔ ɛgbɛyɛ wɛɛ nɛ ɖɩɖʋʋ nesi ɛyaa mba. Ðɩlɩzɩɣ Bibl kpɛlɩkʋʋ wondu kʋnʋmɩŋ weyi ɩ-taa yɔ, ɩwɛɛ nɛ ɩɖɔʋ ɖɔʋ yɔɔ. Kɩɖaʋ nakʋyʋ yɔ: Pɩnaɣ 2010 taa, ɖa-takayɩsɩ kaawɛ kʋnʋmɩŋ ɛzɩ 500 taa mbʋ yɔ. Sɔnɔ, sɩwɛ kʋnʋmɩŋ weyi ɩ-taa yɔ, ɩcɛzɩ 1 000!

12. Alɩwaatʋ ndʋ ɛyaa welisiɣ Kewiyaɣ tɔm pa-maɣmaɣ pa-kʋnʋŋ taa yɔ, ɛzɩma pɩwazɩɣ-wɛ? Ha kɩɖaʋ nakʋyʋ.

¹² Alɩwaatʋ ndʋ ɛyaa nɩɣ Yehowa yɔɔ tɔm pa-maɣmaɣ pa-kʋnʋŋ taa yɔ, ɛzɩma pɩlakɩ-wɛ? Iyele nɛ ɖɩna koobu halɩñɩnʋ nɔɔyʋ kɩɖaʋ. Paalabɩ kigbeɣluu sɔsɔʋ nakʋyʋ Mɛmfiis, Teeniisii tɛtʋ taa Etaazuunii ɛjaɖɛ taa, nɛ kɩɩwazɩ-ɩ. Kinyarwanda kʋnʋŋ taa paalabɩ kigbeɣluu ŋgʋ, nɛ kʋnʋŋ ŋgʋ pakɩlɩɣ yɔɔdʋʋ Ruwandaa, Kɔŋgoo (Kinsaasaa) nɛ  Ugandaa ajɛɛ taa. Kigbeɣluu tɛma lɛ, koobu halɩñɩnʋ ɛnʋ ɛyɔɔdɩ se: “Mankʋyʋʋ nɛ mowolo Etaazuunii ɛjaɖɛ taa yɔ, pɩlakɩ pɩnzɩ 17 yɔ; nɛ kajalaɣ ɖeɖe yɔ manɩʋ fezuu taa ɖʋtʋ taa camɩyɛ yɔ.” Pɩwɩlɩɣ kpayɩ kpayɩ se alɩwaatʋ ndʋ koobu halɩñɩnʋ ɛnʋ ewelisi ɖʋtʋ ndʋ ɛ-kʋnʋŋ taa yɔ, pitukuni-i siŋŋ. Ye ñɛ-wɛtʋ ɛhaɣ-ŋ nʋmɔʋ yɔ, ŋpɩzɩɣ nɛ ŋkpɛlɩkɩ kʋnʋŋ lɛɛkʋ nɛ pɩsa nɛ ŋsɩnɩ nabɛyɛ ño-kooka taa? Ye ŋsusuu tɔm ñɛ-ɛgbɛyɛ kooka taa ɛyaa nabɛyɛ pa-maɣmaɣ pa-kʋnʋŋ taa yɔ, pakaɣ-ŋ welisinuu camɩyɛ nɛ pɩkɩlɩ? Ña-pana ñaɣʋ kaɣ-ŋ haʋ taa leleŋ siŋŋ.

13. Ɛzɩma ɖo-koobiya mba pɛwɛ Rusii ɛjaɖɛ taa yɔ, palabɩnɩ tʋmɩyɛ laŋhɛzɩyɛ alɩwaatʋ natʋyʋ?

¹³ Pɩtɩkɛ ɖo-koobiya tɩŋa wɛnɩnɩ waɖɛ se posusi tɔm kaɣlaa. Ajɛɛ naayɛ taa, ɖo-koobiya ɩɩpɩzɩɣ nɛ posusi tɔm faaa mbʋ pʋyɔɔ yɔ, komina ɖɩɣ nʋmɔʋ ɖɔ-tɔm susuu tʋmɩyɛ. Maɣzɩ ɖo-koobiya mba pɛwɛ Rusii ɛjaɖɛ taa yɔ pɔ-yɔɔ nɛ ŋna. Panazɩ-wɛ pɩnzɩ sakɩyɛ, ɛlɛ pʋwayɩ mars 1991 taa, komina ha-wɛ nʋmɔʋ se pala pɛ-Ɛsɔ sɛtʋ tʋma. Alɩwaatʋ ndʋ tɩ-taa lɛ, Kewiyaɣ tɔm susuyaa 16 000 mbʋ yɔ kaawɛnɩ Rusii ɛjaɖɛ taa. Pɩlabɩ pɩnzɩ nɛɛlɛ pʋwayɩ lɛ, tɔm susuyaa huwaa nɛ pɛcɛzɩ 160 000! Pɩnaɣ kpayɩ kpayɩ se ɖo-koobiya wɩlaa se pɛwɛ lɛɣtʋ alɩwaatʋ ndʋ pehiɣ waɖɛ se posusi tɔm faaa yɔ. Laŋhɛzɩyɛ alɩwaatʋ ndʋ, tɩkɔm nɛ tɩsɩɩ tɩnaɣ. Ɛlɛ paa lɛɣzɩtʋ kaakɔm ɛjaɖɛ nɖɩ ɖɩ-taa yɔ, powobi pɩ-yɔɔ nɛ pɛwɛɛ kpekpeka siŋŋ Yehowa tʋmɩyɛ taa. Powobi pɩ-yɔɔ nɛ palakɩ mbʋ payɩ papɩzɩɣ yɔ se pɛsɛɛ Yehowa.

14-15. Ɛzɩma Yehowa labɩnɩ e-ɖoŋ tʋmɩyɛ nɛ ɛsɩnɩ Aazaa?

¹⁴ Aazaa alɩwaatʋ taa, laŋhɛzɩyɛ alɩwaatʋ kɔm nɛ tɩsɩɩ tɩnaɣ. Sɔɔjanaa mba pɛcɛzɩ  miiliyɔɔ kʋɖʋmʋʋ yɔ, palɩnɩ Etiyoopii nɛ pɔkɔɔ. Pa-ñʋʋdʋ Zeraa taa kaatɛma se ɛ nɛ ɛ-sɔɔjanaa papɩzɩɣ nɛ pawa Yuuda ñɩma. Ɛlɛ Aazaa kaata liu Yehowa. Aazaa tɩmaa se: “Sɩnɩ-ɖʋ [Yehowa] ɖɛ-Ɛsɔ. Ðɩtaɣ liu ño-ɖoŋ nɛ ña-hɩɖɛ, mbʋ ɖiwoki katɩnʋʋ ɛyaa sakɩyɛ mba yɔ.”—4 Aw. 14:10.

¹⁵ Paa Etiyoopii sɔɔjanaa kaakpaɖɩ Aazaa ñɩma tam nabʋlɛ mbʋ yɔ yɔ, Aazaa kaaɖiɣzinaa se Yehowa wɛ ɖoŋ nɛ ɛpɩzɩɣ nɛ ɛya ɛ-samaɣ ñʋʋ. Nɛ Yehowa sɩnɩ ɛ-samaɣ nɛ kawa Etiyoopii sɔɔjanaa.—4 Aw. 14:7-12.

16. Ɛzɩma ɖɩlaba nɛ ɖɩna se laŋhɛzɩyɛ alɩwaatʋ kaɣ sɩʋ tɩnaɣ?

¹⁶ Ðɩɩsɩŋ mbʋ ɖeyi ɖeyi pɩkaɣ talʋʋ ɖa-taa paa anɩ nɛ ɛsɩndaa yɔ, ɛlɛ ɖɩnawa se laŋhɛzɩyɛ nɖɩ ɖɩ-taa Yehowa sɛyaa wɛ lɛɛlɛɛyɔ yɔ, ɖɩɩkaɣ wɛʋ tam. Tɔzɩ se Yesu kaayɔɔdaa se kɛdɛzaɣ kɩyakɩŋ taa lɛ, ‘ajɛɛ tɩŋa kaɣ paɖʋʋ’ ɛ-tɔmkpɛlɩkɩyaa. (Mat. 24:9) Mbʋ ɖɔɖɔ apostoloo Pɔɔlɩ yɔɔdaa se: “Mba payɩ pɔsɔɔlaa se pɔñɔɔnɩ Ɛsɔ pe-wezuu caɣʋ taa pa nɛ Krɩstʋ Yesu pɔ-nɔɔ kʋɖʋmaɣ labʋ taa yɔ, pakaɣ-wɛ nazʋʋ ɖɔɖɔ.” (2 Tim. 3:12) Sataŋ ‘kɔ pana siŋŋ’ nɛ ye ɖɩmaɣzɩɣ se ɖɩpɩzɩɣ nɛ ɖɩtɩŋnɩ nʋmɔʋ nakʋyʋ yɔɔ nɛ ɖɩfɛɛ ɛ-pana yɔ, ɖipeɣziɣ ɖa-tɩ kipeɣzu.—Natʋ 12:12.

17. Ɛzɩma tɩyɛ pɩpɩzɩɣ nɛ pɩtakɩ ɖe-tisuu?

¹⁷ Piileɖiɣ lɛ, pɩkaɣ takʋʋ ɖa-tɩŋa ɖa-cɩŋgɩlɩm wɛtʋ. Pɩkazɩ pazɩ “kʋñɔŋ sɔsɔʋ nakʋyʋ kaɣ lɩʋ nɛ nakʋyʋ taalɩɩ mbʋ kpaɣnɩ ɛjaɖɛ ɖɩbazɩyɛ nɛ pɩkɔɔ pɩtalɩ lɛɛlɛɛyɔ.” (Mat. 24:21) Alɩwaatʋ ndʋ tɩ-taa, ɖɔ-hɔʋ taa ñɩma pɩzɩɣ nɛ pakaɖɩnɩ-ɖʋ nɛ papɩzɩɣ paɖɩɣ nʋmɔʋ ɖɔ-tɔm susuu tʋmɩyɛ. (Mat. 10:35, 36) Ða-taa paa anɩ kaɣ labʋ ɛzɩ Aazaa yɔ nɛ ɛtaa Yehowa liu se ɛsɩɣnɩ-ɩ nɛ ɛkandɩyɩ ɛ-yɔɔ?

18. Ɛzɩ Ebree mba 10:38, 39 yɔɔdʋʋ yɔ, ɛbɛ kaɣ-ɖʋ sɩnʋʋ se ɖɩñɔɔzɩ ɖa-tɩ nɛ ɖɩɖaŋ alɩwaatʋ ndʋ laŋhɛzɩyɛ tɛŋ yɔ?

¹⁸ Yehowa wɛɛ nɛ ɛñɔɔzʋʋ-ɖʋ fezuu taa se pɩsa nɛ ɖɩɖaŋ mbʋ pɩwɛnɩ ɛsɩndaa yɔ. Ɛwɛɛ nɛ ɛtɩŋɩɣnɩ “yom siɣsiɣ tʋ nɛ lɔŋsɩnɖʋ” yɔɔ nɛ ɛhaɣ-ɖʋ “tɔɔnaɣ alɩwaatʋ ndʋ tɩmʋnaa yɔ tɩ-yɔɔ” se pɩsa nɛ ɖɩwɛɛnɩ mbʋ payɩ pɩpɔzʋʋ-ɖʋ se ɖɩwɛɛ ɖoŋ tam yɔ. (Mat. 24:45) Ɛlɛ, pɩwɛɛ se ɖa-taa paa anɩ ɛla mbʋ payɩ ɛpɩzɩɣ yɔ nɛ ɛwɛɛnɩ tisuu sɔsɔm Yehowa yɔɔ.—Kalɩ Ebree mba 10:38, 39.

19-20. (a) Ðɩkalɩɣ 3 Awiya 28:9 nɛ pɩtɛ lɛ, tɔm ndʋ pɩwɛɛ se ɖɩpɔzɩ ɖa-tɩ? (b) Nɛ ɛbɛ yɔɔ pɩwɛɛ se ɖɩpɔzɩ ɖa-tɩ tɔm ndʋ?

 ¹⁹ Ɛzɩ Aazaa yɔ, pɩwɛɛ se ‘ɖɩñɩnɩ Yehowa.’ (4 Aw. 14:3; 15:1, 2) Ðɩpaɣzɩ Yehowa ñɩnʋʋ alɩwaatʋ ndʋ ɖɩkpɛlɩkɩ ɛ-yɔɔ tɔm nɛ ɖɩha ɖa-tɩ nɛ ɖitisi nɛ pamɩyɩsɩ-ɖʋ lɩm yɔ. Ðɩlakɩ mbʋ payɩ ɖɩpɩzɩɣ yɔ se ɖɩkpazɩ ɖoŋ sɔɔlɩm mbʋ ɖɩwɛnɩ Yehowa yɔɔ yɔ. Ye mbʋ, ɖɩpɩzɩɣ nɛ ɖɩpɔzɩ ɖa-tɩ se: ‘Mowoki ɛgbɛyɛ taa kediɣzisi ɖoŋ ɖoŋ?’ Alɩwaatʋ ndʋ ɖiwoki kediɣzisi yɔ, ɖihikiɣ ɖoŋ se pɩsa nɛ ɖiwolo pɩ-yɔɔ nɛ ɖɩsɛɣ Yehowa, nɛ ɖo-koobiya kpazɩɣ-ɖʋ ɖoŋ. (Mat. 11:28) Ðɩpɩzɩɣ ɖɔɖɔ nɛ ɖɩpɔzɩ ɖa-tɩ se: ‘Mɛnkpɛlɩkɩɣ Bibl ɖoŋ ɖoŋ?’ Ye ña nɛ ñɔ-hɔʋ ɩwɛna yɔ, ɩlakɩ hɔʋ taa Ɛsɔ sɛtʋ paa kpɩtaʋ ŋgʋ? Ye ŋwɛ ñe-ɖeke yɔ, ŋkpakɩɣ alɩwaatʋ natʋyʋ nɛ ŋkpɛlɩkɩɣ, ɛzɩ ŋwɛ hɔʋ nakʋyʋ taa yɔ? Pɩtasɩ lɛ, ŋlakɩ ño-ɖoŋ ɖeɖe tɔm susuu nɛ kpɛlɩkɩyaa labʋ tʋmɩyɛ taa?

²⁰ Ɛbɛ yɔɔ pɩwɛɛ se ɖɩpɔzɩ ɖa-tɩ tɔm ndʋ? Bibl heyiɣ-ɖʋ se Yehowa tazɩɣ ɖa-maɣzɩm nɛ ɖa-laŋa taa, pʋyɔɔ lɛ, pɩwɛɛ se ɖa ɖɔɖɔ ɖɩla mbʋ. (Kalɩ 3 Awiya 28:9.) Ye ɖɩnawa se pɩpɔzʋʋ se ɖɩla lɛɣzɩtʋ natʋyʋ ɖa-kaɖʋsɩ, ɖɛ-wɛtʋ yaa ɖa-maɣzɩm taa yɔ, pɩwɛɛ se ɖɩpɔzɩ Yehowa se ɛsɩnɩ-ɖʋ nɛ ɖɩla lɛɣzɩtʋ ndʋ. Lɛɛlɛɛyɔ pɩpɔzʋʋ se ɖɩñɔɔzɩ ɖa-tɩ nɛ ɖɩɖaŋ takɩm mbʋ pɩwɛnɩ ɛsɩndaa yɔ. Ðitaayele nɛ nabʋyʋ ɖɩɣ-ɖʋ nʋmɔʋ se ɖɩtaalabɩnɩ laŋhɛzɩyɛ alɩwaatʋ natʋyʋ tʋmɩyɛ nɛ lɛɣtʋ!