TƆM ÑƲƲ ŊGƲ ÐƖKPƐLƖKƖƔ YƆ 40
«Pawɩlɩ sakɩyɛ siɣsiɣ nʋmɔʋ»
«Mba pawɩlɩ sakɩyɛ siɣsiɣ nʋmɔʋ yɔ, pakaɣ ñɩlɩsʋʋ ɛzɩ tɩɩnzɩ yɔ pɩnzɩ nɛ pɩnzɩ.»—DAN. 12:3.
HENDU 151 Ɛkaɣ yaʋ
LƖMAƔZA SƆSƆNA *
1. Pɩnzɩ Kudoku Kewiyitu Tɔɔʋ alɩwaatʋ taa, ɛbɛ kaɣ labʋ nɛ pɩwɛ ɖeu kpem?
KRƖSTƲ Pɩnzɩ Kudoku Kewiyitu Tɔɔʋ alɩwaatʋ taa, alɩwaatʋ ndʋ pakaɣ paɣzʋʋ ɛyaa fezuu tɛtʋ yɔɔ cɩnɛ yɔ, pɩkaɣ kɛʋ alɩwaatʋ kɩbandʋ kpem. Ɛyaa mba payɩ pelesi pɛ-ɛyaa kʋsɔɔlaa yɔ, paɖaŋ kpam se patasɩ-wɛ naʋ. Yehowa ɖɔɖɔ ɖaŋ kpam se ɛtasɩ-wɛ naʋ. (Yɔɔb 14:15) Maɣzɩ nɛ ŋna ɛzɩma mba payɩ pakaɣ wɛʋ tɛtʋ yɔɔ yɔ pa-taa kaɣ labʋ leleŋ siŋŋ alɩwaatʋ ndʋ pefeziɣ pɛ-ɛyaa kʋsɔɔlaa yɔ. Tɔm ñʋʋ ŋgʋ kɩɖɛwa yɔ kɩ-taa, ɖɩkpɛlɩkaa se pama «ɛyaa siɣsiɣ tɩnaa» hɩla wezuu takayaɣ taa nɛ pakaɣ ‘fem se pehiɣ wezuu.’ (Tʋma 24:15; Yoh. 5:29) Armaagedɔɔ you tɛŋ lɛ, ɛyaa mba pacalɩɣ fezuu se pacaɣ wezuu tɛtʋ yɔɔ yɔ, pɩtɩla ɖɛ-ɛyaa kʋsɔɔlaa sakɩyɛ kaɣ wɛʋ pa-taa. * Pɩtasɩ lɛ, ɛyaa «mba pɛfɛyɩ siɣsiɣ yɔ» pʋ-tɔbʋʋ lɛ se ɛyaa mba pataahiɣ waɖɛ siŋŋ se pɛkpɛlɩkɩ nɛ patɩlɩ Yehowa yaa se pɛsɛɛ-ɩ siɣsiɣ pʋcɔ nɛ pasɩ yɔ, pakaɣ ‘fem se pahʋʋnɩ-wɛ tɔm.’
2-3. (a) Ɛzɩ Izaayii 11:9, 10 yɔɔdʋʋ yɔ, tɔm wɩlʋʋ tʋmɩyɛ sɔsɔɖɛ nɖɩ pakaɣ labʋ nɛ wiɖiyi patɩlabɩtɩ-ɖɩ ɛyaa wezuu caɣʋ taa mbʋ nɛ pana? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?
2 Ɛyaa mba payɩ pakaɣ-wɛ fezuu yɔ, pɩkaɣ pɔzʋʋ se pawɩlɩ-wɛ tɔm. (Iza. 26:9; 61:11) Ye mbʋ, pɩkaɣ pɔzʋʋ se pala tɔm wɩlʋʋ tʋmɩyɛ sɔsɔɖɛ naɖɩyɛ, nɛ tʋmɩyɛ nɖɩ wiɖiyi patɩtɩɩlabɩtɩ-ɖɩ mbʋ ɛyaa wezuu caɣʋ taa nɛ pana. (Kalɩ Izaayii 11:9, 10.) Ɛbɛ yɔɔ? Lɩmaɣza wena a-yɔɔ pɩkaɣ pɔzʋʋ se pala tɔm wɩlʋʋ tʋmɩyɛ nɖɩ yɔ a-taa naɖɩyɛ lɛ se alɩwaatʋ ndʋ pefeziɣ ɛyaa mba pɛfɛyɩ siɣsiɣ yɔ, pɩkaɣ pɔzʋʋ se pɛkpɛlɩkɩ Yesu Krɩstʋ, Ɛsɔ Kewiyaɣ, Yesu kɩhɛyʋʋ pʋ-ñʋʋ taa kɩlaʋ nɛ ɛzɩma Yehowa hɩɖɛ tɔm cɛyaa nɛ mbʋ pʋyɔɔ e-ɖeke ɛmʋnɩna se ɛtɔɔ Kewiyitu yɔ pɩ-tɔm. Halɩ ɛyaa siɣsiɣ tɩnaa mba pakaɣ fezuu yɔ, pɩkaɣ pɔzʋʋ se pɛkpɛlɩkɩ nɛ patɩlɩ tɔm ndʋ Yehowa wɩlɩ ɛ-samaɣ pazɩ pazɩ pɩlɩɩnɩ tamaɣ ŋga ɛwɛnɩ tɛtʋ yɔɔ yɔ kɔ-yɔɔ yɔ. Ɛyaa siɣsiɣ tɩnaa mba, pa-taa nabɛyɛ sɩba nɛ pɩla alɩwaatʋ sakɩyɛ pʋcɔ nɛ pɛtɛzɩɣ maʋ Bibl taa tɔm. Ɛyaa siɣsiɣ tɩnaa nɛ mba pɛfɛyɩ siɣsiɣ yɔ, tɔm sakɩyɛ wɛɛ se pakaɣ kpɛlɩkʋʋ.
3 Tɔm ñʋʋ kʋnɛ kɩ-taa, ɖɩkaɣ tazʋʋ tɔm pɔzʋʋ mbʋ pɩkɔŋ yɔ pɩ-taa: Ɛzɩma pakaɣ labʋ tɔm wɩlʋʋ tʋmɩyɛ sɔsɔɖɛ nɖɩ? Ɛzɩma tɔm wɩlʋʋ tʋmɩyɛ nɖɩ ɖɩkaɣ sɩnʋʋ se pana se nɔɔyʋ mʋnaa se pama ɛ-hɩɖɛ wezuu takayaɣ taa tam yaa ɛtɩmʋna? Pɩcɛyaa se ɖɩtɩlɩ tɔm pɔzʋʋ mbʋ pɩ-yɔɔ cosuu sɔnɔ. Ɛzɩ ɖɩkɔŋʋʋ naʋ yɔ, natʋ tɔm kɩbandʋ natʋyʋ wɛ Danɩyɛɛlɩ takayaɣ nɛ Natʋ takayaɣ taa, nɛ tɩkaɣ-ɖʋ sɩnʋʋ nɛ ɖɩnɩɩ mbʋ pɩkaɣ labʋ alɩwaatʋ ndʋ pefeziɣ sɩɖaa yɔ pɩ-taa camɩyɛ nɛ pɩkɩlɩ. Kajalaɣ lɛ, iyele nɛ ɖɩtazɩ natʋ tɔm kɩbandʋ ndʋ tɩwɛ Danɩyɛɛlɩ 12:1, 2 taa yɔ tɩ-taa.
«MBA POÐOU PUUYUU TƐTƲ TƐƐ YƆ, PAKAƔ FEM»
4-5. Tɔm ndʋ Danɩyɛɛlɩ 12:1 yɔɔdʋʋ pɩlɩɩnɩ kɛdɛzaɣ alɩwaatʋ yɔɔ?
4 Danɩyɛɛlɩ 12:1 yɔɔdʋʋ se: «Alɩwaatʋ ndʋ tɩ-taa lɛ, Mikayɛɛlɩ, awumbu sɔsɔ weyi ɛsɩŋɩɣ nɛ ɛlʋkɩ ña-samaɣ yɔɔ yɔ, ɛkaɣ kʋyʋʋ. Nɛ kʋñɔŋ alɩwaatʋ natʋyʋ kaɣ lɩʋ, nɛ natʋyʋ tɩlɩɩ mbʋ wiɖiyi nɛ tɩna kpaɣnɩ alɩwaatʋ ndʋ ɛjaɖɛ naɖɩyɛ ñɔwa nɛ pɩkɔɔ nɛ pɩtalɩ alɩwaatʋ ndʋ yɔ. Nɛ alɩwaatʋ ndʋ tɩ-taa lɛ, ña-samaɣ kaɣ hiɣu ñʋʋ yabʋ, mba payɩ pama pa-hɩla takayaɣ taa yɔ pakaɣ hiɣu ñʋʋ yabʋ.» (Traduction du monde nouveau) Lakasɩ kɩbanzɩ nzɩ sɩkaɣ labʋ kɛdɛzaɣ alɩwaatʋ taa yɔ, Danɩyɛɛlɩ takayaɣ yɔɔdʋʋ ɛzɩma ɖeyi ɖeyi sɩkaɣ labʋ yɔ pɩ-tɔm. Danɩyɛɛlɩ 12:1 wɩlɩɣ se Mikayɛɛlɩ, pʋ-tɔbʋʋ se Yesu Krɩstʋ «sɩŋɩɣ nɛ ɛlʋkɩ [Ɛsɔ] samaɣ yɔɔ.» Natʋ tɔm ndʋ tɩ-hɔɔlʋʋ kʋnɛ kɩpaɣzɩ labʋ pɩnaɣ 1914 taa alɩwaatʋ ndʋ pasɩ Yesu Ɛsɔ Kewiyaɣ Wiyaʋ ɛsɔdaa yɔ.
5 Ɛlɛ, patasɩ heyuu Danɩyɛɛlɩ se «kʋñɔŋ alɩwaatʋ natʋyʋ kaɣ lɩʋ, nɛ natʋyʋ tɩlɩɩ mbʋ wiɖiyi nɛ tɩna kpaɣnɩ alɩwaatʋ ndʋ ɛjaɖɛ naɖɩyɛ ñɔwa nɛ pɩkɔɔ nɛ pɩtalɩ alɩwaatʋ ndʋ yɔ» nɛ pʋbʋ taa lɛ, Yesu ‘kaɣ kʋyʋʋ.’ «Kʋñɔŋ alɩwaatʋ» ndʋ lɛ «kʋñɔŋ sɔsɔʋ» ŋgʋ kɩ-tɔm pɔyɔɔdɩ Maatiyee 24:21 taa yɔ. Yesu sɩŋɩɣ yaa ɛlʋkɩ Ɛsɔ samaɣ yɔɔ kʋñɔŋ alɩwaatʋ ndʋ tɩ-ɖɩdɛnɖɛ, pʋ-tɔbʋʋ lɛ se Armaagedɔɔ you taa. Natʋ takayaɣ yaɣ Ɛsɔ samaɣ ŋga se ‘samaɣ sɔsɔɔ ŋga kalɩnɩ kʋñɔŋ sɔsɔʋ taa yɔ.’—Natʋ 7:9, 14.
6. Samaɣ sɔsɔɔ taa mba hikiɣ ñʋʋ yabʋ kʋñɔŋ sɔsɔʋ taa nɛ pɩtɛ lɛ, ɛbɛ lakɩ? Lɩzɩ pɩ-taa. (Kalɩ ɖɔɖɔ takayaɣ kanɛ ka-taa tɔm ñʋʋ «Tɔm ndʋ ɖa-takayɩsɩ kalɩyaa pɔzʋʋ yɔ» kɩyɔɔdʋʋ ɛyaa mba pakaɣ fezuu se pacaɣ wezuu tɛtʋ yɔɔ yɔ pɔ-tɔm.)
6 Kalɩ Danɩyɛɛlɩ 12:2. Samaɣ sɔsɔɔ taa mba hikiɣ ñʋʋ yabʋ kʋñɔŋ alɩwaatʋ ndʋ tɩ-taa nɛ pɩtɛ lɛ, ɛbɛ lakɩ? Natʋ tɔm ndʋ, pɩtɩkɛ ɛzɩma Ɛsɔ fezi ɛ-sɛyaa fezuu taa kɛdɛzaɣ kɩyakɩŋ taa yɔ pɩ-tɔm tɩyɔɔdʋʋ ɛzɩ ɖɩɩnɩʋ pɩ-taa nɛ pɩɖɛɛ yɔ. Ɛlɛ, ɛyaa mba pakaɣ fezuu ɛjaɖɛ kɩfaɖɛ nɖɩ ɖiɖiɣni kɔm yɔ ɖɩ-taa yɔ, pe-femtu tɔm natʋ tɔm ndʋ tɩyɔɔdʋʋ. * Ɛbɛ yɔɔ ɖɩyɔɔdʋʋ mbʋ? Tɔm piye «puuyuu» nɖɩ palabɩnɩ tʋmɩyɛ natʋ ndʋ tɩ-taa yɔ, palabɩnɩ-ɖɩ tʋmɩyɛ ɖɔɖɔ Yɔɔb 17:16 taa, nɛ ɖɩ-tɔbʋʋ nɩʋ labɩ nɔɔ kʋɖʋmaɣ nɛ tɔm piye «pɔʋ» yaa Pɩlaʋ. Toovenim tɔm ndʋ, tɩwɩlɩɣ se Danɩyɛɛlɩ 12:2 yɔɔdʋʋ ɛyaa mba pakaɣ fezuu kɛdɛzaɣ kɩyakɩŋ nɛ Armaagedɔɔ you wayɩ yɔ pe-femtu tɔm na.
7. (a) Pɔtɔm se pakaɣ nabɛyɛ fezuu se «pehiɣ wezuu maatɛŋ» yɔ, pʋ-tɔbʋʋ lɛ suwe? (b) Ɛbɛ yɔɔ femtu ndʋ tɩkaɣ kɛʋ «femtu ndʋ tɩkɩlɩ ɖeu yɔ»?
7 Ye mbʋ, Danɩyɛɛlɩ 12:2 yɔɔdʋʋ se pakaɣ nabɛyɛ fezuu se powolo «tamtam koboyaɣ taa» [yaa se pehiɣ wezuu maatɛŋ] yɔ, pʋ-tɔbʋʋ lɛ suwe? Pʋ-tɔbʋʋ lɛ se Pɩnzɩ Kudoku Kewiyitu Tɔɔʋ alɩwaatʋ taa, ɛyaa mba pakaɣ-wɛ fezuu nɛ pɛkpɛlɩkɩ, yaa powolo pɩ-yɔɔ nɛ pɛkpɛlɩkɩɣ nɛ patɩlɩɣ Yehowa nɛ Yesu nɛ pañaŋ-wɛ yɔ, pakaɣ hiɣu wezuu maatɛŋ. (Yoh. 17:3) Ye pakpaɣ femtu ndʋ nɛ pamaɣzɩnɩ ɛyaa mba paafezi caanaʋ taa yɔ pe-femtu yɔ, femtu ndʋ tɩkaɣ kɛʋ «femtu ndʋ tɩkɩlɩ ɖeu yɔ.» (Ebr. 11:35) Ɛbɛ yɔɔ? Mbʋ pʋyɔɔ yɔ, ɛyaa mba paafezi caanaʋ taa yɔ, alɩwaatʋ wɛɛ nɛ tɩɖɛɣ lɛ paɖaɣnɩ sɩbʋ.
8. Pɔtɔm se pakaɣ ɛyaa lalaa fezuu se pehiɣ «fɛyɛ nɛ tamtam nimtu» yɔ, pʋ-tɔbʋʋ lɛ suwe?
8 Ɛlɛ, ɛyaa mba pakaɣ fezuu yɔ, pɩtɩkɛ pa-tɩŋa pakaɣnɩ tisuu se Yehowa ɛwɩlɩ-wɛ tɔm. Natʋ ndʋ Danɩyɛɛlɩ nawa yɔ tɩyɔɔdʋʋ se pakaɣ nabɛyɛ fezuu se powolo «tam tam kʋñɔŋ taa [yaa se pehiɣ fɛyɛ nɛ tamtam nimtu.]» Ɛyaa mba, pakaɣ kaɖɩnʋʋ wɩlɩtʋ ndʋ, pʋyɔɔ lɛ paakaɣ maʋ pa-hɩla wezuu takayaɣ taa nɛ paakaɣ hiɣu wezuu maatɛŋ. Ɛlɛ, pakaɣ hiɣu «tamtam nimtu» yaa ɖɩzʋʋ. Ye mbʋ, Danɩyɛɛlɩ 12:2 yɔɔdʋʋ mbʋ pɩkaɣ tɛmnʋʋ ɛyaa mba payɩ pakaɣ fezuu yɔ pɩ-tɔm na. Pefeziɣ ɛyaa mba nɛ pɩtɛ lɛ, mbʋ pakaɣ labʋ yɔ mbʋ kaɣnɩ wɩlʋʋ mbʋ pɩtɛŋnɩ-wɛ yɔ. * (Natʋ 20:12) Nabɛyɛ kaɣ hiɣu wezuu maatɛŋ; ɛlɛ lalaa ñaakaɣ-kʋ hiɣu.
«PAWƖLƖ SAKƖYƐ SIƔSIƔ NƲMƆƲ»
9-10. (a) Ɛzɩ Danɩyɛɛlɩ 12:3 yɔɔdʋʋ yɔ, ɛbɛ ɖɔɖɔ kaɣ labʋ kʋñɔŋ sɔsɔʋ wayɩ? (b) Nɛ mba kaɣ «ñɩlɩsʋʋ ɛzɩ ɛsɔdaa ɛwaɣ yɔ»?
9 Kalɩ Danɩyɛɛlɩ 12:3. «Kʋñɔŋ alɩwaatʋ» ndʋ tɩwɛnɩ ɛsɩndaa yɔ tɩ-wayɩ lɛ, ɛbɛ ɖɔɖɔ kaɣ labʋ? Pɩtasɩna se Danɩyɛɛlɩ 12:2 yɔɔdʋʋ mbʋ pɩkaɣ labʋ kʋñɔŋ sɔsɔʋ wayɩ yɔ pɩ-tɔm lɛ, kalɩtʋ 3 yɔɔdʋʋ ɖɔɖɔ nabʋyʋ tɔm se pɩkaɣ labʋ kʋñɔŋ sɔsɔʋ wayɩ.
10 Mba kaɣ «ñɩlɩsʋʋ ɛzɩ ɛsɔdaa ɛwaɣ yɔ»? Tɔm ndʋ Yesu yɔɔdaa nɛ pama-tʋ Maatiyee 13:43 taa yɔ, tɩsɩɣnɩ-ɖʋ se ɖɩtɩlɩ ɛyaa mba. Ɛyɔɔdaa se: «Alɩwaatʋ ndʋ tɩ-taa lɛ, ɛyaa siɣsiɣ tɩnaa kaɣ ñɩlɩsʋʋ ɛzɩ wɩsɩ yɔ pa-Caa Kewiyaɣ taa.» Hɔɔlʋʋ kʋnɛ kɩ-taa lɛ, Yesu wɛɛ nɛ ɛyɔɔdʋʋ «Kewiyaɣ pɩyalaa» tɔm na, pʋ-tɔbʋʋ lɛ se e-koobiya patam numwaa; ɛ nɛ wɛ pakaɣnɩ kewiyitu tɔɔʋ ɛsɔdaa Kewiyaɣ taa. (Mat. 13:38) Ye mbʋ, Danɩyɛɛlɩ 12:3 yɔɔdʋʋ patam numwaa nɛ tʋmɩyɛ nɖɩ pakaɣ labʋ Pɩnzɩ Kudoku Kewiyitu Tɔɔʋ alɩwaatʋ taa yɔ pɩ-tɔm na.
Ɛyaa 144000 waa nɛ Yesu Krɩstʋ pakaɣ kpɛndʋʋ nɛ peɖiyi tɔm wɩlʋʋ tʋmɩyɛ nɖɩ pakaɣ labʋ Pɩnzɩ Kudoku Kewiyitu Tɔɔʋ alɩwaatʋ taa yɔ (Cɔnɩ tayʋʋ 11)
11-12. Pɩnzɩ Kudoku Kewiyitu Tɔɔʋ alɩwaatʋ taa, tʋmɩyɛ nɖɩ ɛyaa 144000 waa kaɣ labʋ?
11 Ɛzɩma tɩyɛ patam numwaa kaɣ wɩlʋʋ ɛyaa «sakɩyɛ siɣsiɣ nʋmɔʋ»? Patam numwaa nɛ Yesu Krɩstʋ pakaɣ kpɛndʋʋ nɛ peɖiyi tɔm wɩlʋʋ tʋmɩyɛ sɔsɔɖɛ nɖɩ pakaɣ labʋ tɛtʋ yɔɔ cɩnɛ Pɩnzɩ Kudoku Kewiyitu Tɔɔʋ alɩwaatʋ taa yɔ. Ɛyaa 144000 waa kaɣ kɛʋ awiya, ɛlɛ pakaɣ kɛʋ cɔjɔnaa ɖɔɖɔ. (Natʋ 1:6; 5:10; 20:6) Ye mbʋ, pakaɣ ɖʋʋ nesi se «ajɛɛ yɔɔ ɩcɛ.» Pʋ-tɔbʋʋ lɛ se pakaɣ sɩnʋʋ ɛyaa pazɩ pazɩ se paɖaɣnɩ talʋʋ pilim. (Natʋ 22:1, 2; Ezek. 47:12) Pɩkaɣ yebu nɛ patam numwaa taa la leleŋ siŋŋ!
12 Ɛyaa «sakɩyɛ» mba pakaɣ wɩlʋʋ siɣsiɣ nʋmɔʋ yɔ, mba kaɣ wɛʋ pa-taa? Ɛyaa mba pakaɣ fezuu yɔ nɛ ɛyaa mba pakaɣ hiɣu ñʋʋ yabʋ Armaagedɔɔ you taa yɔ nɛ pɩkpɛndɩ piya nzɩ pɩtɩla pakaɣ-sɩ lʋlʋʋ ɛjaɖɛ kɩfaɖɛ taa yɔ, pakaɣ wɛʋ ɛyaa mba pa-taa. Pɩnzɩ Kudoku Kewiyitu Tɔɔʋ kaatɛŋ lɛ, ɛyaa mba payɩ pakaɣ wɛʋ wezuu tɛtʋ yɔɔ yɔ, pakaɣ talʋʋ pilim. Ye mbʋ, ɛzɩmtaa pakaɣ maʋ pa-hɩla nɛ tɔlɩm wezuu takayaɣ taa nɛ awɛɛ tam nɛ paatasɩɣ-yɛ maʋ nɛ kɩɖɩñɔɔ na?
KƐDƐZAƔ TAKƖM
13-14. Alɩwaatʋ ndʋ ɛyaa mba payɩ pɛwɛɣ tɛtʋ yɔɔ yɔ patalɩɣ pilim yɔ, ɛbɛ pɩkaɣ pɔzʋʋ se pala pʋcɔ nɛ pehiɣ wezuu maatɛŋ?
13 Pɩwɛɛ se ɖɩtɔzɩ se ye pɔ-tɔm se nɔɔyʋ talɩ pilim yɔ, pɩɩwɩlɩɣ se paa pɩɩkpawa nɛ pitii yɔ ɛyʋ ɛnʋ ɛkaɣ hiɣu wezuu maatɛŋ. Maɣzɩ Aɖam nɛ Ɛva pɔ-yɔɔ nɛ ŋna. Paatalɩ pilim, ɛlɛ pʋcɔ nɛ papɩzɩ nɛ powolo pɩ-yɔɔ nɛ pacaɣ wezuu maatɛŋ lɛ, pɩɩcɛyaa se pawɩlɩ se pañaŋ Yehowa Ɛsɔ. Ɛlɛ, pɩlabɩ pʋtɔdɩyɛ se patɩñamɩ-ɩ.—Roma 5:12.
14 Pɩnzɩ Kudoku Kewiyitu Tɔɔʋ kaatɛŋ lɛ, mba pakaɣ wɛʋ tɛtʋ yɔɔ yɔ, wɛtʋ ndʋ taa pakaɣ wɛʋ? Patɩŋa pakaɣ talʋʋ pilim. Ɛzɩ pɩwɩlɩɣ se ɛzɩma pakaɣ talʋʋ pilim yɔ pʋyɔɔ lɛ, pa-tɩŋa pakaɣ tɩnʋʋ Yehowa kewiyitu tɔɔʋ yɔɔ kiya tam? Yaa nabɛyɛ kaɣ labʋ ɛzɩ Aɖam nɛ Ɛva, mba paatalɩ pilim ɛlɛ patiwolo pɩ-yɔɔ nɛ pɛwɛɛ siɣsiɣ yɔ? Pɩkaɣ pɔzʋʋ se ɖicosi tɔm pɔzʋʋ mbʋ pɩ-yɔɔ, ɛlɛ ɛzɩma tɩyɛ?
15-16. (a) Ɛzɩmtaa ɛyaa tɩŋa kaɣ wɛnʋʋ waɖɛ se pawɩlɩ se pɔñɔnɩ Yehowa? (b) Ɛbɛ kaɣ lɩʋ kɛdɛzaɣ takɩm mbʋ pɩ-taa?
15 Pakaɣ ɖʋʋ Sataŋ salaka taa nɛ ɛwɛɛ peeɖe pɩnzɩ 1000. Alɩwaatʋ ndʋ tɩ-taa lɛ, ɛɛkaɣ tasʋʋ pɩzʋʋ se epeɣzi nɔɔyʋ. Ɛlɛ, Pɩnzɩ Kudoku Kewiyitu Tɔɔʋ ɖɩdɛnɖɛ lɛ, pakaɣ lɩzʋʋ Sataŋ salaka taa. Ɛyaa tɩŋa kaɣ talʋʋ pilim nɛ ɛkaɣ ñaɣʋ pana se epeɣzi-wɛ. Takɩm alɩwaatʋ ndʋ tɩ-taa lɛ, tɛtʋ yɔɔ ɛyaa tɩŋa kaɣ wɛnʋʋ waɖɛ se pawɩlɩ kpayɩ kpayɩ se pañaŋ Ɛsɔ hɩɖɛ nɛ paɖʋʋ nesi e-kewiyitu tɔɔʋ yaa paalakɩ mbʋ. (Natʋ 20:7-10) Alɩwaatʋ ndʋ Sataŋ kaɣ ñaɣʋ pana se epeɣzi-wɛ yɔ, ɛzɩma pa-taa paa anɩ kaɣ labʋ yɔ, mbʋ kaɣnɩ yebu nɛ pana se ɛmʋnaa se pama ɛ-hɩɖɛ wezuu takayaɣ taa nɛ ɖɩwɛɛ tam yaa ɛtɩmʋna.
16 Ɛyaa nabɛyɛ kaɣ labʋ ɛzɩ Aɖam nɛ Ɛva paalabʋ yɔ, pʋ-tɔbʋʋ lɛ se pakaɣ kizuu Yehowa kewiyitu tɔɔʋ. Ɛlɛ, ɖɩɩsɩŋ ɛyaa mba pa-ñʋʋ ɖeyi ɖeyi. Ɛbɛ kaɣ-wɛ talʋʋ? Natʋ 20:15 heyiɣ-ɖʋ se: «Weyi patɩna ɛ-hɩɖɛ wezuu takayaɣ taa yɔ, pɔlɔ-ɩ miŋ lɩyɛ taa.» Ɛɛɛ, pakaɣ ɖɩzʋʋ kaañamtʋ tɩnaa mba caɣ caɣ nɛ pɩla pɩtɛma. Ɛlɛ, ɛyaa mba pakaɣ talʋʋ pilim yɔ, pa-taa hɔɔlʋʋ sɔsɔʋ kaɣ ɖɔkʋʋ pe-siɣsiɣ wɛtʋ kɛdɛzaɣ takɩm mbʋ pɩ-taa. Ðɩnɛ ɛlɛ pakaɣ maʋ pa-hɩla wezuu takayaɣ taa nɛ awɛɛ peeɖe tam.
«KƐDƐZAƔ ALƖWAATƲ TAA»
17. Tiyiyu heyi Danɩyɛɛlɩ se ɛbɛ kaɣ labʋ ɖa-alɩwaatʋ taa? (Danɩyɛɛlɩ 12:4, 8-10)
17 Ðɩna mbʋ mbʋ pɩkaɣ labʋ cee wayɩ yɔ, nɛ pɩwɛ ɖeu kpem se ɛyʋ ɛkpaɣ alɩwaatʋ nɛ ɛmaɣzɩ pɩ-yɔɔ. Ɛlɛ, tiyiyu nɔɔyʋ tasɩ heyuu Danɩyɛɛlɩ tɔm kɩcɛyɩtʋ natʋyʋ. Nɛ tɔm kɩcɛyɩtʋ ndʋ titukuuni ɖa-alɩwaatʋ, pʋ-tɔbʋʋ lɛ se «kɛdɛzaɣ alɩwaatʋ.» (Kalɩ Danɩyɛɛlɩ 12:4, 8-10; 2 Tim. 3:1-5) Tiyiyu heyi Danɩyɛɛlɩ se: «Lɔŋ sɩmtʋ [yaa toovenim sɩmtʋ] kaɣ tɔyʋʋ.» Ɛɛɛ, natʋ tɔm ndʋ tɩwɛ Danɩyɛɛlɩ takayaɣ taa yɔ, Ɛsɔ samaɣ kaɣ tɩ-taa nɩʋ camɩyɛ nɛ pɩkɩlɩ. Tiyiyu yɔɔdaa ɖɔɖɔ se alɩwaatʋ ndʋ tɩ-taa lɛ, «[kañatʋ tɩnaa kaɣ labʋ kañatʋ lakasɩ] nɛ kañatʋ tɩnaa kpeekpe ɩɩkaɣ pʋ-tɔbʋʋ nɩʋ.»
18. Pɩkazɩ pazɩ lɛ, ɛbɛ kaɣ talʋʋ kañatʋ tɩnaa?
18 Sɔnɔ, pɩpɩzɩɣ nɛ pɩwɛɛ ɛzɩ paahɔŋ kañatʋ tɩnaa nɩŋgbaŋʋʋ pa-lakasɩ kɩdɛkɛdɩsɩ yɔɔ yɔ. (Mal. 3:14, 15) Ɛlɛ, pɩkazɩ pazɩ lɛ, Yesu kaɣ tɔm hʋnʋʋ mba ɛkpaɣ-wɛ nɛ ɛmaɣzɩnɩ pʋŋ yɔ, nɛ ɛkaɣ tayʋʋ pa nɛ ɛyaa mba ɛkpaɣaa nɛ ɛmaɣzɩnɩ heŋ yɔ pɛ-hɛkʋ taa. (Mat. 25:31-33) Ɛyaa kɩdɛkɛdaa mba, paakaɣ hiɣu ñʋʋ yabʋ kʋñɔŋ sɔsɔʋ taa, nɛ paakaɣ-wɛ fezuu ɖɔɖɔ se pacaɣ wezuu ɛjaɖɛ kɩfaɖɛ taa. Paakaɣ maʋ pa-hɩla «camɩyɛ lakasɩ takayaɣ» [yaa tɔzʋʋ takayaɣ] ŋga kɔ-tɔm pɔyɔɔdɩ Malakiya 3:16 taa yɔ ka-taa.
19. Ɛbɛ pɩpɔzʋʋ se ɖɩla lɛɛlɛɛyɔ, nɛ ɛbɛ yɔɔ? (Malakiya 3:16-18)
19 Lɛɛlɛɛyɔ pɩpɔzʋʋ se ɖɩtɩŋnɩ ɖa-lakasɩ yɔɔ nɛ ɖɩwɩlɩ se ɖɩfɛyɩ kañatʋ tɩnaa hɛkʋ taa. (Kalɩ Malakiya 3:16-18.) Yehowa wɛɛ nɛ ekpeliɣ ɛyaa mba ɛkpakɩɣ se pɛkɛ ‘e-yeke ɛ-pʋyʋ’ yɔ, pʋ-tɔbʋʋ lɛ se ɛyaa mba pamʋ ñɩm ɛ-ɛsɩndaa. Pɩtʋʋ fɛyɩ se ɖɩsɔɔlaa se ɖɩwɛɛ ɛyaa mba pa-taa.
Alɩwaatʋ ndʋ ɖɩnaɣ Danɩyɛɛlɩ, ɖɛ-ɛyaa kɩsɔɔlaa nɛ ɛyaa lalaa sakɩyɛ ‘pakʋyʋʋ’se pamʋ pe-ɖeɖe ɛjaɖɛ kɩfaɖɛ taa yɔ, ɖa-taa kaɣ labʋ leleŋ kpem! (Cɔnɩ tayʋʋ 20)
20. (a) Tamaɣ ŋga palabɩ Danɩyɛɛlɩ kɛdɛzaɣ ɖeɖe? (b) Nɛ ɛbɛ yɔɔ ŋɖaŋ kpam se ŋna ɛzɩma tamaɣ ŋga kakaɣ labʋ yɔ?
20 Toovenim taa lɛ, ɖɩwɛ alɩwaatʋ kɩbandʋ natʋyʋ taa. Ɛlɛ pɩkazɩ pazɩ lɛ, lakasɩ nasɩyɩ kaɣ labʋ nɛ sɩkaɣ wɛʋ piti kpem nɛ pɩkɩlɩ. Pɩkazɩ pazɩ, pakaɣ ɖɩzʋʋ kañatʋ lakasɩ tɩŋa nɛ alɩwaatʋ ndʋ pɩlakɩ mbʋ yɔ, ɖɩkaɣ naʋ. Pʋwayɩ lɛ, tamaɣ ŋga Yehowa labɩ Danɩyɛɛlɩ yɔ kakaɣ labʋ nɛ ɖɩna. Ɛlabɩ-ɩ tamaɣ se: «Ŋkaɣ sɩŋʋʋ ñe-ɖeɖe [yaa ŋkaɣ kʋyʋʋ nɛ ŋmʋ ñe-ɖeɖe] kɩyakɩŋ tɛmtʋ wiye.» (Dan. 12:13) Ŋɖaŋ kɩyakʋ ŋgʋ Danɩyɛɛlɩ nɛ ñɛ-ɛyaa kʋsɔɔlaa pakaɣ ɖaɣnʋʋ «kʋyʋʋ» yɔ kpam na? Ye ɛɛɛ yɔ, la mbʋ payɩ ŋpɩzɩɣ yɔ lɛɛlɛɛyɔ nɛ ŋwɛɛ siɣsiɣ. Nɛ ye ŋlabɩ mbʋ yɔ, ña-taa pɩzɩɣ nɛ pɩtɛ se pakaɣ maʋ ña-hɩɖɛ Yehowa wezuu takayaɣ taa nɛ ɖɩwɛɛ peeɖe tam.
HENDU 80 ‘Ɩɖɩŋ nɛ ɩna ɛzɩma Yehowa wɛ ɖeu yɔ!’
^ Pɔyɔɔdɩ tɔm wɩlʋʋ tʋmɩyɛ sɔsɔɖɛ naɖɩyɛ tɔm Danɩyɛɛlɩ 12:2, 3 taa. Tɔm ñʋʋ kʋnɛ kɩyɔɔdʋʋ lɛɣzɩtʋ ndʋ ɖɩlaba pɩlɩɩnɩ ɛzɩma ɖɩnɩɣaɣ tɔm ndʋ tɩ-taa yɔ pɩ-tɔm. Ðɩkaɣ tazʋʋ nɛ ɖɩna alɩwaatʋ ndʋ pakaɣ tʋmɩyɛ nɖɩ labʋ yɔ, nɛ ɖɩna ɖɔɖɔ mba pakaɣ-ɖɩ labʋ yɔ. Ðɩkaɣ naʋ ɖɔɖɔ ɛzɩma tɔm wɩlʋʋ tʋmɩyɛ nɖɩ ɖɩkaɣ sɩnʋʋ ɛyaa nɛ pɔñɔɔzɩ pa-tɩ nɛ paɖaŋ kɛdɛzaɣ takɩm mbʋ pakaɣ katʋʋ Krɩstʋ Pɩnzɩ Kudoku Kewiyitu Tɔɔʋ ɖɩdɛnɖɛ yɔ.
^ Pɩtɩla, kɛdɛzaɣ kɩyakɩŋ taa ɛyaa mba pɔɖɔkɩ pe-siɣsiɣ wɛtʋ nɛ pɩkɔɔ pɩsɩɩnɩ pa-sɩm wiye yɔ, mba pakaɣ calʋʋ fezuu, nɛ pʋwayɩ lɛ pefezi mba paasɩba pʋcɔ nɛ pɩtalɩɣnɩ-wɛ yɔ. Pʋ-tɔbʋʋ lɛ se pɩtɩla pefeziɣ kpaɖʋʋ nakʋyʋ nɛ pɩtɛ lɛ, pefezi lɛɛkʋ. Ye mbʋ pɩkaɣ labʋ yɔ, ɖɩnɛ paa kpaɖʋʋ ŋgʋ lɛ kɩ-taa mba kaɣ wɛnʋʋ waɖɛ se pamʋ ɛyaa mba pa-maɣmaɣ paasɩma yɔ. Paa pɩtɩɩkɛ suwe yɔ, Masɩ yɔɔdʋʋ mba pakaɣ-wɛ fezuu se pakpa ɛsɔdaa yɔ pɔ-tɔm se pakaɣ fezuu pa-taa paa anɩ lɛ «ɛ-alɩwaatʋ yɔɔ.» Pʋyɔɔ lɛ, ɖɩpɩzɩɣ nɛ ɖɩyɔɔdɩ se mba pakaɣ-wɛ fezuu se pacaɣ wezuu tɛtʋ yɔɔ yɔ, pe-femtu ɛɛkaɣ siduu yem yem.—1 Kɔr. 14:33; 15:23.
^ Tɔm taa lɩzʋʋ pʋnɛ pɩlɛɣzɩɣ ɛzɩma ɖɩɩlɩzɩ tɔm ndʋ tɩ-taa Prêtons attention à la prophétie de Daniel! takayaɣ ñʋʋ 17 taa nɛ 1er juillet 1987 tɛ Feŋuu Tilimiye, hɔɔlʋʋ 21-25 taa yɔ pi-lone taa.
^ Tʋkaɣ ŋga kɛwɛɛ yɔ, ŋga lɛ se Tʋma Labʋ 24:15 taa tɔm loyisi «ɛyaa siɣsiɣ tɩnaa» nɛ «mba pɛfɛyɩ siɣsiɣ yɔ» nɛ Yohanɛɛsɩ 5:29 taa tɔm loyisi «mba palabɩ lakasɩ kɩbanzɩ yɔ» nɛ «mba palabɩ lakasɩ kɩdɛkɛdɩsɩ yɔ» yɔɔdʋʋ lakasɩ nzɩ ɛyaa mba pakaɣ fezuu yɔ palaba pʋcɔ nɛ pasɩkɩ yɔ sɩ-tɔm na.
