Iyele nɛ ɖɩna ɛzɩma Bibl cosuu tɔm pɔzʋʋ mbʋ pɩ-yɔɔ yɔ.

Tʋma Labʋ 24:15 heyiɣ-ɖʋ se pakaɣ «fezuu ɛyaa siɣsiɣ tɩnaa nɛ mba pɛfɛyɩ siɣsiɣ yɔ.» Ɛyaa siɣsiɣ tɩnaa lɛ mba paañam Ɛsɔ pʋcɔ nɛ pasɩ yɔ; pʋyɔɔ lɛ pama pa-hɩla wezuu takayaɣ taa. (Mal. 3:16) Mba pɛfɛyɩ siɣsiɣ yɔ mba lɛ mba pataawɛɛnɩ waɖɛ siŋŋ se pɛkpɛlɩkɩ nɛ patɩlɩ Yehowa pʋcɔ nɛ pasɩ yɔ; pʋyɔɔ lɛ, patɩma pa-hɩla wezuu takayaɣ taa.

Tʋma Labʋ 24:15 yɔɔdʋʋ ɛyaa tindima naalɛ wena a-tɔm yɔ, a-tɔm ɖɔɖɔ Yohanɛɛsɩ 5:28, 29 yɔɔdʋʋ. Yesu yɔɔdaa se «mba palabɩ lakasɩ kɩbanzɩ yɔ, pefeŋ se pehiɣ wezuu; nɛ mba palabɩ lakasɩ kɩdɛkɛdɩsɩ yɔ, pefeŋ se pahʋʋnɩ-wɛ tɔm.» Mba pɛwɛ siɣsiɣ yɔ, paalabɩ lakasɩ kɩbanzɩ pʋcɔ nɛ pasɩkɩ. Pakaɣ fem se pehiɣ wezuu mbʋ pʋyɔɔ yɔ, pa-hɩla kpɛndɩ awɛ wezuu takayaɣ taa. Ɛlɛ mba pɛfɛyɩ siɣsiɣ yɔ, paalabɩ lakasɩ kɩdɛkɛdɩsɩ pʋcɔ nɛ pasɩkɩ. Pakaɣ fem se pahʋʋnɩ-wɛ tɔm. Patɩmatɩ pa-hɩla wezuu takayaɣ taa, nɛ pɩkaɣ pɔzʋʋ alɩwaatʋ natʋyʋ nɛ pahʋʋnɩ-wɛ tɔm yaa patakɩ-wɛ. Alɩwaatʋ ndʋ tɩ-taa lɛ, pakaɣ wɛnʋʋ waɖɛ se pɛkpɛlɩkɩ Yehowa yɔɔ tɔm nɛ piyele nɛ pama pa-hɩla wezuu takayaɣ taa.

Natʋ 20:12, 13 lɩzɩɣ pɩ-taa se ɛyaa mba payɩ pefeziɣ-wɛ yɔ, pɩkaɣ pɔzʋʋ se pɔɖɔ «tɔm ndʋ pama takayɩsɩ kikpiyisi taa yɔ» tɩ-yɔɔ, pʋ-tɔbʋʋ se paɣtʋ kɩfatʋ ndʋ Ɛsɔ kaɣ-ɖʋ ɖʋʋ ɛjaɖɛ kɩfaɖɛ taa yɔ tɩ-yɔɔ. Yehowa kaɣ ɖɩzʋʋ mba paaɖɔŋ paɣtʋ ndʋ tɩ-yɔɔ yɔ.—Iza. 65:20.

Danɩyɛɛlɩ 12:2 yɔɔdʋʋ se mba pɛwɛɛ nɛ poɖou sɩm taa yɔ pakaɣ fem; pa-taa nabɛyɛ kaɣ wobu «tamtam koboyaɣ taa [yaa wezuu maatɛŋ]» taa, nɛ lalaa ñowolo «tamtam kʋñɔŋ taa [yaa fɛyɛ nɛ tamtam nimtu]» taa. Mayaɣ kanɛ kɔyɔɔdʋʋ mbʋ pɩkaɣ tɛmnʋʋ mba pefeziɣ-wɛ yɔ pɩ-tɔm na, pʋ-tɔbʋʋ se pakaɣ hiɣu «wezuu maatɛŋ» yaa «tamtam nimtu.» Ye mbʋ, Pɩnzɩ Kudoku Kewiyitu Tɔɔʋ tɛŋ lɛ, nabɛyɛ kaɣ hiɣu wezuu maatɛŋ; lalaa lɛ pakaɣ-wɛ ɖɩzʋʋ tam tam.—Natʋ 20:15; 21:3, 4.

Ðɩpɩzɩɣ nɛ ɖɩkpaɣ ɛyaa tindima naalɛ wena pefeziɣ yɔ a-wɛtʋ nɛ ɖɩmaɣzɩnɩ agɔma mba pɔsɔɔlaa se pacaɣ ɛjaɖɛ lɛɛɖɛ taa yɔ pɛ-wɛtʋ. Ɛyaa siɣsiɣ tɩnaa wɛ ɛzɩ agɔma mba pahaɣ-wɛ takayaɣ nakɛyɛ ŋga kahaɣ-wɛ waɖɛ se pala tʋmɩyɛ yaa se pacaɣ ɛjaɖɛ naɖɩyɛ taa yɔ. Kawɩlɩɣ se pasɩm-wɛ nɛ kahaɣ-wɛ waɖɛ se pɛwɛɛ pa-tɩ yɔɔ pazɩ. Ɛlɛ mba pɛfɛyɩ siɣsiɣ yɔ, paba wɛ ɛzɩ agɔma mba papɩzɩɣ nɛ paha-wɛ takayaɣ nakɛyɛ ŋga kahaɣ-wɛ waɖɛ se pacaɣ ɛjaɖɛ naɖɩyɛ taa alɩwaatʋ natʋyʋ pazɩ yaa se pekilimi ɖɩ-taa yɔ. Pʋcɔ nɛ paha agɔma mba waɖɛ se powolo pɩ-yɔɔ nɛ pacaɣ ɛjaɖɛ nɖɩ ɖɩ-taa lɛ, pɩkaɣ pɔzʋʋ se pawɩlɩ se pamʋnaa. Mbʋ ɖɔɖɔ mba pɛfɛyɩ siɣsiɣ ɛlɛ pakaɣ-wɛ fezuu yɔ, pɩkaɣ pɔzʋʋ se paña Yehowa paɣtʋ nɛ pala mbʋ pɩwɛ siɣsiɣ yɔ nɛ pɩsa nɛ pɛwɛɛ paradisuu taa tam. Paa pɩtɩɩkɛ takayaɣ ŋga paha agɔma kiɖe tɛɛ yɔ, pɩtɩla alɩwaatʋ kaaɖɛɣ lɛ, pahaɣ pa-taa nabɛyɛ waɖɛ se pɛkɛ ɛjaɖɛ nɖɩ ɖɩ-taa mba; ɛlɛ lalaa lɛ pɩtɩla paahaɣ-wɛ waɖɛ nɖɩ. Pɛ-wɛtʋ nɛ pa-lakasɩ yekina se paha-wɛ waɖɛ nɛ pacaɣ ɛjaɖɛ nɖɩ ɖɩ-taa yaa paahaɣ-wɛ. Mbʋ ɖɔɖɔ mba payɩ pakaɣ-wɛ fezuu yɔ, mbʋ pɩkaɣ-wɛ tɛmnʋʋ yɔ, pɩlɩɣnɩ pe-siɣsiɣ wɛtʋ nɛ wezuu ŋgʋ pacakɩ ɛjaɖɛ kɩfaɖɛ taa yɔ pɩ-cɔlɔ.

Yehowa kɛ pʋtɔdɩyɛ naʋ tɛ Ɛsɔ, ɛlɛ ɛkɛ ɖɔɖɔ Ɛsɔ weyi ɛwɛ siɣsiɣ yɔ. (Wp. 32:4; Keɣa 32:5) Ɛkaɣ wɩlʋʋ ɛ-sɔɔlɩm nɛ efezi mba pɛwɛ siɣsiɣ nɛ mba pɛfɛyɩ siɣsiɣ yɔ. Alɩwaatʋ kʋɖʋmtʋ ndʋ tɩ-taa lɛ, ɛkaɣ wobu pɩ-yɔɔ nɛ ɛñɔɔnɩ wezuu kɩbaŋʋ caɣʋ paɣtʋ ndʋ ɛɖʋwa yɔ. Mba pɔsɔɔlɩ-ɩ nɛ pañaŋ ɛ-paɣtʋ nɛ ɛ-paɣtʋ kila yɔ, pe-ɖeke ɛkaɣ haʋ waɖɛ se pacaɣ wezuu ɛjaɖɛ kɩfaɖɛ taa tam.