Pɔɔlɩ yɔɔdɩ 1 Kɔrɛntɩ mba 15:8 taa se: «Kɛdɛzaɣ ɖeɖe lɛ, ɛwɩlɩ-m ɛ-tɩ ɖɔɖɔ, ma weyi mɛwɛ ɛzɩ weyi palʋlɩ-ɩ kɩdɩbɩbɩʋ yɔ.» Ðooo lɛ, ɖɩɩlɩzɩ tɔm ndʋ tɩ-taa se pɩwɛ ɛzɩ Pɔɔlɩ yɔɔdaɣ mbʋ pɩtalɩ-ɩ alɩwaatʋ ndʋ ɛna Yesu natʋ natʋyʋ taa nɛ ɛlɛ kaawɛ ɛ-samtʋ taa ɛsɔdaa yɔ pɩ-tɔm na. Pɩɩwɛ ɛzɩ paɖʋ Pɔɔlɩ hɩɖɛ nɛ palʋlɩ-ɩ, yaa pefezi-i nɛ ɛkɛ fezuu taa ɛyʋ pʋcɔ nɛ alɩwaatʋ ndʋ paaɖʋwa yɔ tɩtalɩ yɔ. Pɩnzɩ mɩnɩŋ sakɩyɛ wayɩ femtu ndʋ tɩpaɣzaa. Ɛlɛ, ɖɩɖaɣnɩ tazʋʋ mayaɣ ŋga ka-taa camɩyɛ nɛ pɩkɩlɩ lɛ, pɩwɛ ɛzɩ ɛzɩma ɖɩɩlɩzɩ mayaɣ ŋga ka-taa yɔ pɩcɛyaa se ɖɩla lɛɣzɩtʋ yɔ.

Pɩkɛ toovenim se mayaɣ ŋga ka-taa, Pɔɔlɩ yɔɔdaɣ mbʋ pɩlaba alɩwaatʋ ndʋ ɛlɛɣzaa nɛ ɛpɩsɩ Krɩstʋ tʋ yɔ pɩ-tɔm na. Ɛlɛ, suwe ɛñɩnaɣ yɔɔdʋʋ alɩwaatʋ ndʋ ɛtɔm se ɛnʋ kɛ weyi «palʋlɩ-ɩ kɩdɩbɩbɩʋ yɔ»? Ðɩpɩzɩɣ nɛ ɖɩnɩɩ tɔm ndʋ tɩ-taa ɛzʋnɔ:

Ɛzɩma Pɔɔlɩ lɛɣzaa nɛ ɛpɩsɩ Krɩstʋ tʋ yɔ, pɩɩlabɩ tuda nɛ piiyeba nɛ ɛnɩɩ siziŋ. Ðoŋ ɖoŋ lɛ, piya nzɩ palʋlʋʋ-sɩ kɩdɩbɩbɩʋ yɔ sɩ-lʋlʋʋ tuduu ɛyʋ. Sɔɔlɩ (weyi pɔkɔm nɛ payaa pʋwayɩ se Pɔɔlɩ yɔ) ewokaɣ Damaasɩ se ɛnazɩ peeɖe Krɩstʋ ñɩma lɛ, ɛtaamaɣzɩ se ɛkaɣ naʋ Yesu weyi pefezi-i yɔ natʋ natʋyʋ taa. Ɛzɩma Pɔɔlɩ lɛɣzaa nɛ ɛpɩsɩ Krɩstʋ tʋ yɔ pɩɩɖɩɣzɩ ɛ-maɣmaɣ, ɛlɛ pɩɩɖɩɣzɩ ɖɔɖɔ Krɩstʋ ñɩma mba ewokaɣ nazʋʋ tɛtʋ ndʋ tɩ-taa yɔ. Pɩtasɩ lɛ, mbʋ pɩɩtalɩ Pɔɔlɩ yɔ, piiyeba nɛ ɛnɩɩ siziŋ siŋŋ nɛ halɩ pɩɩlabɩ alɩwaatʋ natʋyʋ ɛtaapɩzɩɣ se ɛna.—Tʋma 9:1-9, 17-19.

Pɔɔlɩ lɛɣzaa nɛ ɛpɩsɩ Krɩstʋ tʋ «alɩwaatʋ ndʋ tɩtɩmʋna yɔ» tɩ-yɔɔ. Grɛɛkɩ tɔm piye nɖɩ pɛɖɛzaa se «weyi palʋlɩ-ɩ kɩdɩbɩbɩʋ yɔ» papɩzɩɣ nɛ pɛɖɛzɩ-ɖɩ ɖɔɖɔ se «weyi palʋlɩ-ɩ alɩwaatʋ ndʋ tɩtɩmʋna yɔ tɩ-yɔɔ yɔ.» Bible de Jérusalem ɖɛzɩ tɔm ndʋ ɛzʋnɔ: «Pɩɩwɛ ɛzɩ palʋlɩ-m alɩwaatʋ ndʋ nɔɔyʋ taaɖʋna yɔ tɩ-yɔɔ yɔ.» Alɩwaatʋ ndʋ tɩ-yɔɔ Pɔɔlɩ lɛɣzaa nɛ ɛpɩsɩ Krɩstʋ tʋ yɔ, Yesu kaatɛm pɩsʋʋ ɛsɔdaa. Masɩ nzɩ sɩkɔma pʋcɔ nɛ mayaɣ ŋga ka-taa Pɔɔlɩ yɔɔdɩ ɛ-maɣmaɣ ɛ-tɔm yɔ kɔkɔŋ yɔ sɩ-taa, ɛyɔɔdɩ ɛyaa nabɛyɛ tɔm, nɛ ɛyaa mba paana Yesu weyi pefezi-i yɔ pʋcɔ nɛ ɛlɛ kpaɣ ɛsɔdaa, ɛlɛ Pɔɔlɩ ñataana-ɩ. (1 Kɔr. 15:4-8) Yesu lɩzɩ ɛ-tɩ nɛ ɛwɩlɩ Pɔɔlɩ nɛ ɛlɛ taaɖʋna; pɩha Pɔɔlɩ waɖɛ nɛ ɛna Yesu e-femtu wayɩ paa pɩɩwɛ ɛzɩ pɩkɛ «alɩwaatʋ ndʋ tɩtɩmʋna yɔ» tɩ-yɔɔ yɔ.

Tɔm ndʋ Pɔɔlɩ yɔɔdɩ ɛ-maɣmaɣ ɛ-yɔɔ yɔ, tɩwɩlɩɣ se ɛɛsɩm e-ɖoŋ kamaɣ. Bibl taa tazɩyaa nabɛyɛ yɔɔdaa se tɔm loyaɣ ŋga Pɔɔlɩ labɩnɩ tʋmɩyɛ cɩnɛ yɔ, kapɩzɩɣ nɛ kawɩlɩ se pɩwɛ ɛzɩ ɛɛwɛɛ nɛ ɛkʋʋ ɛ-tɩ tɔm yɔ. Ye tɔm ndʋ tɩɩwɛnɩ Pɔɔlɩ lɩmaɣza taa yɔ, ɖɩnɛ pɩwɩlɩɣ se eeɖiɣzinaa se ɛtaamʋna se paha-ɩ waɖɛ nɛ ɛkɛ apostoloo. Toovenim taa lɛ, ɛtasɩ yɔɔdʋʋ se: «Mɛnkɛ apostoloowaa taa cikpelu, nɛ mantɩmʋna se paya-m se apostoloo, mbʋ pʋyɔɔ yɔ manazɩ Ɛsɔ ɛgbɛyɛ. Ɛlɛ pɩtɩŋnɩ Ɛsɔ lootiye yɔɔ lɛ, mɛnkɛ mbʋ mɛnkɛwa yɔ.»—1 Kɔr. 15:9, 10.

Ye mbʋ, pɩwɛ ɛzɩ Pɔɔlɩ yɔɔdaɣ ɛzɩma Yesu lɩzɩ ɛ-tɩ nɛ ɛwɩlɩ-ɩ nɛ ɛtaaɖʋna yɔ nɛ ɛzɩma ɛlɛɣzaa nɛ ɛpɩsɩ Krɩstʋ tʋ alɩwaatʋ ndʋ ɛtɩɖʋna yɔ tɩ-yɔɔ yɔ, yaa ɛzɩma ɛmaɣzaɣ se ɛtɩmʋna se pawɩlɩ-ɩ natʋ ndʋ tɩwɛ piti yɔ pɩ-tɔm na. Paa pɩtɩɩkɛ suwe yɔ, pɩnaɣ kpayɩ kpayɩ se mbʋ pɩtalɩ Pɔɔlɩ yɔ pɩmʋ ñɩm siŋŋ ɛ-ɛsɩndaa. Pɩtʋʋ fɛyɩ se piiyeba nɛ ɛ-taa tɛ se pefezi Yesu nɛ sɩɖaa taa. Pɩɩɖɩɣzɩɣ-ɖʋ se alɩwaatʋ ndʋ esusaɣ ɛyaa lalaa Yesu femtu tɔm yɔ, ɖoŋ ɖoŋ lɛ ɛyɔɔdaɣ mbʋ pɩɩtalɩ-ɩ yɔ pɩ-tɔm.—Tʋma 22:6-11; 26:13-18.