1. Pɩkazɩ pazɩ lɛ, ɛbɛ Yesu kaɣ labʋ?

 ALƖWAATƲ ndʋ tɩ-taa ɖɩwɛɛ yɔ, lɛɣzɩtʋ sɔsɔtʋ kaɣ kɔm tɩ-taa. Pɩkazɩ pazɩ lɛ, Yesu kaɣ hʋnʋʋ ɛyaa mba payɩ pɛwɛ tɛtʋ yɔɔ yɔ tɔm. Yesu yeba nɛ ɖɩtɩlɩ mbʋ pɩkaɣ labʋ ɛjaɖɛ yɔɔ pʋcɔ nɛ ɛhʋʋnɩ ɛyaa tɔm yɔ. Ɛcɛlɩ ɛ-wayɩ tɩŋɩyaa ɛ-wɛʋ alɩwaatʋ nɛ «ɛjaɖɛ tɛm alɩwaatʋ yʋsaɣ.» (Mat. 24:3) Pɔyɔɔdɩ yʋsaɣ ŋga kɔ-tɔm Maatiyee ñʋŋ 24 nɛ 25 taa, Maarɩkɩ ñʋʋ 13 taa nɛ Luka ñʋʋ 21 taa.

2. (a) Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa? (b) Nɛ ɛzɩma pɩkaɣ-ɖʋ wazʋʋ?

² Yesu tɩŋnɩ aduwa 3 yɔɔ nɛ ɛpaɣ-ɖʋ. Aduwa ana yɔ: Heŋ nɛ pʋŋ eduuye, pɛlaa lɔŋsɩnɖaa nɛ pɛlaa kɩmɛlɛmɩŋ eduuye nɛ talaŋwaa eduuye. Paa eduuye nɖɩ lɛ, ɖɩkaɣ-ɖʋ sɩnʋʋ nɛ ɖɩna se ɛyʋ lakasɩ Yesu kaɣ cɔnʋʋ nɛ ɛhʋʋnɩ-ɩ tɔm. Ðɩɩtazɩɣ aduwa ana a-taa lɛ, ɖɩkaɣ naʋ lɔŋ weyi akpɛlɩkɩɣ-ɖʋ yɔ nɛ ɛzɩma ɖɩpɩzɩɣ nɛ ɖɩɖɔ ɩ-yɔɔ yɔ. Kajalaɣ eduuye nɖɩ ɖɩ-taa ɖɩkaɣ tazʋʋ yɔ, nɖɩ lɛ heŋ nɛ pʋŋ eduuye.

HEŊ NƐ PƲŊ

3. Ɛzɩmtaa Yesu kaɣ ɛyaa tɔm hʋnʋʋ?

³ Heŋ nɛ pʋŋ eduuye taa, Yesu yɔɔdaa se ɛkaɣ cɔnʋʋ  ɛzɩma ɛyaa mʋʋ tɔm kɩbandʋ nɛ ɛzɩma paɖʋʋ nesi e-koobiya patam numwaa yɔ nɛ ɛhʋʋnɩ-wɛ tɔm. (Mat. 25:​31-46) Ɛkaɣ-wɛ tɔm hʋnʋʋ «kʋñɔŋ sɔsɔʋ» alɩwaatʋ taa, pɩkazɩɣ pazɩ se Armaagedɔɔ ɛpaɣzɩ lɛ. (Mat. 24:21) Ɛzɩ ninɖiɣyu tayʋʋ heŋ nɛ pʋŋ pɛ-hɛkʋ taa yɔ, Yesu kaɣ tayʋʋ ɛyaa mba paɖʋ nesi patam numwaa nɛ pa-laŋɩyɛ pilim nɛ mba patɩɖʋ-wɛ nesi yɔ pɛ-hɛkʋ taa.

4. Ɛzɩ Pɔyɔɔdʋʋ Izaayii 11:​3, 4 taa yɔ, ɛbɛ yɔɔ ɖa-taa pɩzɩɣ nɛ pɩtɛ se Yesu kaɣ ɛyaa tɔm hʋnʋʋ siɣsiɣ? (Cɔnɩ ɖɔɖɔ yɔɔ kɩlɛmʋʋ.)

⁴ Bibl yɔɔdʋʋ se Yesu Yehowa lɩzaa se ɛhʋʋ tɔm, nɛ ɛkaɣ wɛʋ siɣsiɣ ɛ-tɔm hʋʋ taa. (Kalɩ Izaayii 11:​3, 4.) Ɛcɔŋnɩ ɛyaa lakasɩ, pɛ-wɛtʋ nɛ pɔ-yɔɔdaɣ pɩkpɛndɩnɩ wɛtʋ ndʋ pɛwɛnɩ e-koobiya patam numwaa yɔɔ yɔ. (Mat. 12:​36, 37; 25:40) Yesu kaɣ tɩlʋʋ mba paɖʋ nesi patam numwaa nɛ pa-tʋmɩyɛ yɔ. a Nʋmɔʋ sɔsɔʋ ŋgʋ kɩ-yɔɔ ɛyaa mba pɛwɛ ɛzɩ heŋ yɔ papɩzɩɣ patɩŋna nɛ pɩwɩlɩ se paɖʋʋ nesi Krɩstʋ koobiya yɔ, ŋgʋ lɛ tɔm susuu. Mba posusuu tɔm se paɖʋ nesi patam numwaa yɔ, Yesu kaɣ-wɛ kpaɣʋ se pɛkɛ ɛyaa «siɣsiɣ tɩnaa» nɛ pakaɣ wɛnʋʋ lidaʋ se pacakɩ «wezuu maatɛŋ» tɛtʋ yɔɔ. (Mat. 25:46; Natʋ 7:​16, 17) Pɩkɛɣnɩ kɩhɛyʋʋ kɩbaŋʋ mba pɔɖɔkʋʋ pa-cɩŋgɩlɩm wɛtʋ yɔ. Pa-hɩla kaɣ wɛʋ «wezuu takayaɣ taa,» mbʋ pʋyɔɔ yɔ pakaɣ ɖɔkʋʋ pe-siɣsiɣ wɛtʋ kʋñɔŋ sɔsɔʋ alɩwaatʋ taa nɛ kɩ-wayɩ.—Natʋ 20:15.

5. (a) Lɔŋ weyi heŋ nɛ pʋŋ eduuye kpɛlɩkɩɣ-ɖʋ? (b) Mba lɔŋ ɛnɩ itukuuna?

⁵ Wɛɛ siɣsiɣ. Eduuye nɖɩ Yesu tuu heŋ nɛ pʋŋ yɔɔ yɔ, kajalaɣ lɛ ɖitukuuni mba pɛwɛnɩ lidaʋ se pacakɩ tɛtʋ yɔɔ yɔ. Pasɩɣnɩ Yesu koobiya tɔm susuu tʋmɩyɛ taa, nɛ pɔɖɔŋ yom siɣsiɣ tʋ nɛ lɔŋsɩnɖʋ weyi Yesu lɩzaa yɔ ɛ-lɔŋ tasʋʋ yɔɔ nɛ pa-laŋɩyɛ pilim; palakɩ mbʋ nɛ pawɩlɩɣ se pɛwɛnɩ tisuu. (Mat. 24:45) Ɛlɛ mba pɛwɛnɩ lidaʋ se pakpaɣ ɛsɔdaa yɔ, pɩcɛyaa se paba ɖɔɖɔ pɔɖɔ lɔŋ weyi eduuye ɖɩnɛ ɖɩkpɛlɩkɩɣ-ɖʋ yɔ ɩ-yɔɔ. Ɛbɛ yɔɔ? Mbʋ pʋyɔɔ yɔ Yesu sɩm pa-lakasɩ, pɛ-wɛtʋ nɛ pɔ-yɔɔdaɣ. Pɩwɛɛ se paba ɖɔɖɔ pawɩlɩ se pɛwɛ siɣsiɣ. Halɩ Yesu tuu aduwa 2 lɛɛna nɛ ɛpaɣnɩ patam numwaa. Aduwa ana awɛ ɖɔɖɔ Maatiyee ñʋʋ 25 taa. Lɛɛlɛɛyɔ, iyele nɛ ɖɩtazɩ pɛlaa lɔŋsɩnɖaa nɛ pɛlaa kɩmɛlɛmɩŋ eduuye taa.

PƐLAA LƆŊSƖNÐAA NƐ PƐLAA KƖMƐLƐMƖŊ

6. Ɛzɩma pɛlaa 5 wɩlaa se pɛkɛ lɔŋsɩnɖaa? (Maatiyee 25:​6-10)

⁶ Pɛlaa 10 eduuye taa, Yesu yɔɔdaa se pɛlaa nabɛyɛ 10 lɩwa se pakatɩ asɛyʋ walʋ. (Mat. 25:​1-4) Pa-tɩŋa paasɔɔlaa se pasɩɩ asɛyʋ walʋ e-nesi ɖɔkʋʋ kazandʋ taa. Yesu yɔɔdaa se pa-taa 5 kɛ «lɔŋsɩnɖaa» nɛ 5 kɛ «kɩmɛlɛmɩŋ.» Pɛlaa lɔŋsɩnɖaa kaañɔɔzɩ pa-tɩ nɛ pacaɣnɩ pɛ-ɛsa. Paañɔɔzɩ pa-tɩ se paɖaŋ asɛyʋ walʋ paa pɩkpakaɣ alɩwaatʋ ɛzɩma yɔ, halɩ paa ɛtalɩ ɖoo cɩjɩka taa yɔ. Pʋyɔɔ pɔɖɔkɩ kanɖʋnaa se pɩñandɩ-wɛ cɩkpɛndʋʋ taa. Halɩ paɖʋ num po-kokola taa nɛ pɔɖɔkɩ se ye asɛyʋ walʋ ɛtɩkɔɔ lɔŋ yɔ pɩɩwazɩ-wɛ. Ye mbʋ, paañɔɔzɩ pa-tɩ se pɩsa nɛ pa-kanɖʋnaa wɛɛ mʋʋ yɔɔ. (Kalɩ Maatiyee 25:​6-10.) Asɛyʋ walʋ talaa lɛ, ɛ nɛ pɛlaa lɔŋsɩnɖaa pasʋʋ nesi ɖɔkʋʋ kazandʋ taa. Mbʋ ɖɔɖɔ Krɩstʋ ñɩma patam numwaa mba pacakɩnɩ pɛ-ɛsa nɛ pɔɖɔkɩ pe-siɣsiɣ wɛtʋ nɛ pɩkɔɔ pɩtalɩ alɩwaatʋ ndʋ Krɩstʋ kɔŋ yɔ, pakaɣ-wɛ  kpaɣʋ se pamʋnaa se powolo asɛyʋ walʋ Yesu cɔlɔ ɛsɔdaa Kewiyaɣ taa. b (Natʋ 7:​1-3) Piyele nɛ pɛlaa kɩmɛlɛmɩŋ 5 yɔ, ɛbɛ paba laba?

7. Ɛbɛ talɩ pɛlaa kɩmɛlɛmɩŋ 5, nɛ ɛbɛ yɔɔ?

⁷ Pɛlaa kɩmɛlɛmɩŋ 5 tɩla ɛzɩ pɛlaa lɔŋsɩnɖaa yɔ, patɩñɔɔzɩ pa-tɩ nɛ paɖaŋ asɛyʋ walʋ. Pa-kanɖʋnaa caɣaɣ ɖɩm nɛ patɩɖɔkɩ num kokola taa. Alɩwaatʋ ndʋ panɩwa se asɛyʋ walʋ wɩzɩ talʋʋ lɛ, pɛɖɛɛ num cɛbʋ. Patɩpɩsɩ pʋcɔ nɛ asɛyʋ walʋ talɩ. Ɛtalaa lɛ, «pɛlaa mba paañɔɔzɩ pa-tɩ nɛ paɖaŋ yɔ, pa nɛ ɩ pasʋʋ nesi ɖɔkʋʋ kazandʋ taa, nɛ paɖɩɣ nɔnɔɔ.» (Mat. 25:10) Pʋwayɩ pɛlaa kɩmɛlɛmɩŋ pɩsaa nɛ pañɩnaɣ se pasʋʋ lɛ, asɛyʋ walʋ heyi-wɛ se: «Maasɩŋ-mɩ.» (Mat. 25:​11, 12) Pɛlaa mba, pataañɔɔzɩ pa-tɩ se paɖaŋ asɛyʋ walʋ paa pɩkpakɩɣ alɩwaatʋ ɛzɩma se pʋcɔ nɛ ɛtalɩ yɔ. Lɔŋ weyi pɩkpɛlɩkɩɣ patam numwaa?

8-9. Lɔŋ weyi patam numwaa pɩzɩɣ nɛ pɛkpɛlɩkɩ pɛlaa 10 eduuye taa? (Cɔnɩ ɖɔɖɔ kɩlɛmʋʋ.)

⁸ Ñɔɔzɩ ña-tɩ nɛ ŋcaɣnɩ ñɛ-ɛsa. Yesu taañɩnɩɣ yɔɔdʋʋ se patam numwaa tindima 2 kaɣnɩ wɛʋ, pʋ-tɔbʋʋ se mba pɔñɔɔzɩ pa-tɩ se paɖaŋ nɛ pɩkɔɔ pɩtalɩ ɛjaɖɛ ɖɩnɛ ɖɩ-tɛm yɔ nɛ mba patɩñɔɔzɩ pa-tɩ yɔ. Ɛlɛ, ɛñɩnaɣ se ɛwɩlɩ mbʋ pɩkaɣ talʋʋ patam numwaa ye patɩñɔɔzɩ pa-tɩ se pɔɖɔkɩ pe-siɣsiɣ wɛtʋ nɛ pɩkɔɔ pɩtalɩ tɩnaɣ yɔɔ yɔ. Ye patɩñɔɔzɩ pa-tɩ yɔ, paakaɣ mʋʋ pa-kɩhɛyʋʋ. (Yoh. 14:​3, 4) Pɩkɛnɩ kaɖɛ tɔm kpem. Paa ɖɩwɛnɩ lidaʋ se ɖɩkpaɣ ɛsɔdaa yaa ɖɩwɛnɩ lidaʋ se ɖɩcakɩ tɛtʋ yɔɔ yɔ, pɩpɔzʋʋ se ɖa-tɩŋa payɩ ɖɩkpaɣ lɔŋ weyi pɛlaa 10 eduuye kpɛlɩkɩɣ-ɖʋ yɔ nɛ ɖɩlabɩnɩ tʋmɩyɛ. Pɩpɔzʋʋ se ɖa-taa paa weyi ɛcaɣnɩ ɛ-ɛsa nɛ ɛñɔɔzɩ ɛ-tɩ nɛ ɛɖɔkɩ ɛ-laŋɩyɛ nɛ pɩkɔɔ pɩtalɩ tɩnaɣ yɔɔ.—Mat. 24:13.

⁹ Yesu tuu pɛlaa 10 eduuye nɛ ɛwɩlɩ se pɩcɛyaa se patam numwaa ɩñɔɔzɩ pa-tɩ nɛ pacaɣnɩ pɛ-ɛsa nɛ pɩtɛ lɛ, etuu talaŋwaa  eduuye. Eduuye nɖɩ, ɖɩwɩlɩɣ se pɩcɛyaa se ɖɩla tʋmɩyɛ nɛ kpekpeka.

TALAŊWAA

10. Ɛzɩma yomaa 2 wɩlaa se pɛwɛ siɣsiɣ? (Maatiyee 25:​19-23)

¹⁰ Yesu yɔɔdɩ talaŋwaa eduuye taa se yomaa 2 labɩ mbʋ pɩwɛ siɣsiɣ yɔ pa-caa ɛsɩndaa nɛ kʋɖʋm ñatɩla mbʋ. (Mat. 25:​14-18) Yomaa 2 wɩlaa se pɛwɛ siɣsiɣ mbʋ pʋyɔɔ yɔ palabɩ tʋmɩyɛ nɛ kpekpeka se pa-caa ñɩm ehuu. Pʋcɔ nɛ ɛɖɛɣ nʋmɔʋ lɛ, ɛcɛlɩ-wɛ talaŋwaa. Talaŋwaa mba, paakɛ liidiye sɔsɔɖɛ naɖɩyɛ. Yomaa 2 mba pɛwɛ siɣsiɣ yɔ, paawɛ kpekpeka nɛ palabɩnɩ tʋmɩyɛ liidiye nɖɩ nɛ lɔŋsɩnɖɛ. Ɛbɛ lɩ pɩ-taa? Alɩwaatʋ ndʋ pa-caa pɩsaa yɔ, palabɩ tʋmɩyɛ nɛ pehiɣ mbʋ paacɛlɩ-wɛ yɔ pɩ-nabʋlɛ. Pa-caa sam-wɛ nɛ eheyi-wɛ se ‘pasʋʋ e-leleŋ taa.’ (Kalɩ Maatiyee 25:​19-23.) Piyele nɛ yom naadozo ñɩnʋ yɔ, ɛbɛ ɛlabɩnɩ liidiye nɖɩ ɛ-caa cɛlɩ-ɩ yɔ?

11. Ɛbɛ talɩ yom «feendu tʋ,» nɛ ɛbɛ yɔɔ?

¹¹ Pɛcɛlɩ yom naadozo ñɩnʋ talaŋ kʋɖʋmʋʋ, ɛlɛ ɛɛkɛ «feendu tʋ.» Ɛ-caa kaasɔɔlaa se yom ɛnʋ ɛlabɩnɩ tʋmɩyɛ talaŋ ŋgʋ nɛ lɔŋsɩnɖɛ. Ɛlɛ ewoni-kʋ nɛ epi tɛtɛɛ. Alɩwaatʋ ndʋ ɛ-caa pɩsaa yɔ, nabʋyʋ tɩsɔzɩ talaŋ ŋgʋ kɩ-yɔɔ. Yom ɛnʋ ɛtaawɛɛnɩ wɛtʋ kɩbandʋ. Mbʋ ɛzɩ eetendi ɛ-caa se ɛtɩpɩzɩ nɛ ɛla tʋmɩyɛ se ɛ-ñɩm ehuu lɛ, eyeba nɛ ɛkʋʋ ɛ-caa tɔm kɩkʋʋ se ɛkɛ «ɛyʋ weyi ɛ-tɔm wɛ kaɖɛ yɔ.» Piyeba nɛ yom ɛnʋ ɛ-tɔm tɩkɛdɩnɩ ɛ-caa paa ññɩɩ. Halɩ pamʋ talaŋ ŋgʋ paacɛlɩ-ɩ yɔ ɛ-cɔlɔ nɛ palɩzɩ-ɩ ɛ-caa ɖɩɣa taa nɛ pɔlɔ-ɩ awayɩ.—Mat. 25:​24, 26-30.

12. Mba yomaa 2 mba paawɛ siɣsiɣ yɔ pasɩŋnɩ sɔnɔ?

¹² Yomaa 2 mba paawɛ siɣsiɣ yɔ, pasɩŋnɩ Krɩstʋ ñɩma patam numwaa mba pɛwɛ siɣsiɣ yɔ. Pa-Caa Yesu yaɣ-wɛ se pasʋʋ ‘e-leleŋ taa.’ Pamʋʋ pa-kɩhɛyʋʋ ɛsɔdaa, pʋ-tɔbʋʋ se kajalaɣ femtu. (Mat. 25:​21, 23; Natʋ 20:5b) Ɛlɛ yom feendu tʋ kɩɖaʋ kɩdɛkɛdʋʋ kɛnɩ paɣʋ patam numwaa. Ɛzɩma tɩyɛ?

13-14. Lɔŋ weyi talaŋwaa eduuye kpɛlɩkɩɣ patam numwaa? (Cɔnɩ ɖɔɖɔ kɩlɛmʋʋ.)

¹³ Wɛɛ kpekpeka. Ɛzɩ ɖɩɩnaʋ pɛlaa 10  eduuye taa yɔ, Yesu taañɩnɩɣ yɔɔdʋʋ talaŋwaa eduuye taa se patam numwaa kaɣ pɩsʋʋ feendu tɩnaa. Ɛlɛ, ɛwɩlaɣ mbʋ pɩpɩzɩɣ nɛ pɩtalɩ-wɛ ye pelesi kpekpeka ŋga pɛwɛna yɔ. Paapɩzɩɣ nɛ ‘pɔɖɔkɩ pa-yatʋ nɛ pa-lɩzʋʋ kpam,’ nɛ paakaɣ hiɣu waɖɛ nɛ pasʋʋ ɛsɔdaa Kewiyaɣ taa.—2 Pɩy. 1:10.

¹⁴ Pɛlaa 10 nɛ talaŋwaa aduwa wena Yesu tuwaa yɔ, awɩlɩɣ kpayɩ kpayɩ se pɩpɔzʋʋ se Krɩstʋ ñɩma patam numwaa tɩŋa ɩñɔɔzɩ pa-tɩ nɛ pacaɣnɩ pɛ-ɛsa nɛ pɛtɛ pɛwɛɛ kpekpeka. Ɛlɛ ɛzɩ Yesu tasɩ natʋyʋ yɔɔdʋʋ nɛ ɛpaɣnɩ patam numwaa yaa we? Ɛɛɛ. Ðɩpɩzɩɣ nɛ ɖɩna tɔm ndʋ ɛtasɩ yɔɔdʋʋ nɛ ɛpaɣnɩ-wɛ yɔ Maatiyee 24:​40, 41 taa.

ANƖ «PAKAƔ KPAƔƲ»?

15-16. Ɛzɩma tɩyɛ tɔm ndʋ tɩwɛ Maatiyee 24:​40, 41 taa yɔ, tɩsɩɣnɩ patam numwaa se pana se pɩcɛyaa se pacaɣnɩ pɛ-ɛsa?

¹⁵ Pʋcɔ nɛ Yesu tuu aduwa ana a-naadozo lɛ, ɛyɔɔdaa se pakaɣ hʋnʋʋ patam numwaa tɔm kɛdɛzaɣ ɖeɖe nɛ pana weyi ɛ-tɔm kɛdɩnɩ Yehowa yɔ. Ɛyɔɔdaa se abalaa 2 kaɣ wɛʋ hayɩm taa nɛ palakɩ tʋmɩyɛ, nɛ halaa 2 ñakaɣ wɛʋ nɛ panaŋɩɣ namɩyɛ yɔɔ. Pɩwɛ ɛzɩ abalaa mba, pakaɣ wɛʋ nɛ palakɩ tʋmɩyɛ kʋɖʋmɖɩyɛ yɔ, nɛ halaa ɖɔɖɔ ñakaɣ wɛʋ nɛ palakɩ tʋmɩyɛ kʋɖʋmɖɩyɛ yɔ. Ɛlɛ Yesu yɔɔdaa se «pakaɣ kpaɣʋ kʋɖʋm nɛ peyele lɛlʋ.» (Kalɩ Maatiyee 24:​40, 41.) Pʋwayɩ lɛ, eheyi ɛ-wayɩ tɩŋɩyaa tɔm tʋnɛ: «Pʋyɔɔ lɛ, ɩwɛɛ feŋuu yɔɔ, mbʋ pʋyɔɔ yɔ ɩɩsɩŋ kɩyakʋ ŋgʋ mɩ-Kɩbaɣlʋ kaɣ kɔm yɔ.» (Mat. 24:42) Yesu tuu pɛlaa 10 eduuye nɛ pɩtɛ lɛ, ɛyɔɔdɩ tɔm ndʋ tɩ-ɖɔndɩ. (Mat. 25:13) Ɛzɩ nɔɔ kʋɖʋmaɣ nakɛyɛ wɛ tɔm ndʋ tɩ-hɛkʋ taa? Pɩwɛ ɛzɩ mbʋ yɔ. Mba pɛkɛ patam numwaa keekee nɛ pɛwɛ siɣsiɣ yɔ, pe-ɖeke Yesu ‘kaɣ kpaɣʋ’ nɛ ewoni ɛsɔdaa Kewiyaɣ taa.—Yoh. 14:3.

¹⁶ Wɛɛ feŋuu yɔɔ. Ye patam num nɔɔyʋ ɛtɩcaɣnɩ ɛ-ɛsa fezuu taa yɔ, pɔkɔŋ se pekpeɣliɣ ‘ɛyaa mba palɩzaa yɔ’ lɛ, ɛɛkaɣ wɛʋ pa-taa. (Mat. 24:31) Mbʋ ɖɔɖɔ, pɩwɛɛ se Yehowa sɛyaa mba payɩ pɛwɛnɩ lidaʋ se pacakɩ tɛtʋ yɔɔ yɔ palabɩnɩ tʋmɩyɛ Yesu paɣʋ nɛ pacaɣnɩ pɛ-ɛsa nɛ pɔɖɔkɩ pe-siɣsiɣ wɛtʋ.

17. Paa pɩtɩɩkɛ alɩwaatʋ ndʋ Yehowa ɛlɩzaa se ɛtaɣ nɔɔyʋ num yɔ, ɛbɛ yɔɔ pɩfɛyɩ se ɖɩnɩɣzɩ?

¹⁷ Ðɩkpɛlɩkaa nɛ ɖɩtɩlɩ Yehowa camɩyɛ, pʋyɔɔ lɛ ɖɩtaɣ liu ɛ-tɔm hʋʋ. Ye mbʋ, ye Yehowa ɛlɩzaa se ɛtaɣ ɛ-sɛyaa siɣsiɣ tɩnaa nabɛyɛ num ɖa-alɩwaatʋ taa yɔ, ɖɩɩnɩɣzɩɣ. c Ðɩtɔzʋʋ tɔm ndʋ Yesu yɔɔdɩ viiñi hayɩm eduuye taa yɔ tɩ-yɔɔ. Ɛyɔɔdaa se tʋmlaɖaa nabɛyɛ talɩ hayɩm taa ɖanaɣ yɔɔ ñɩɣtʋ 5 yɔɔ mbʋ yɔ. (Mat. 20:​1-16) Mba paaya-wɛ ɖanaɣ yɔɔ se powolo nɛ pala tʋmɩyɛ hayɩm taa yɔ nɛ mba paaya-wɛ tanaŋ tɛɛ yɔ, paahɛyɩ-wɛ liidiye kʋɖʋmɖɩyɛ. Mbʋ ɖɔɖɔ paa pɩtɩɩkɛ alɩwaatʋ ndʋ palɩzɩ nabɛyɛ se pɛkɛ patam numwaa yɔ, ye pɔɖɔkɩ pe-siɣsiɣ wɛtʋ yɔ, pakaɣ mʋʋ pa-kɩhɛyʋʋ ɛsɔdaa.

KPAƔ PAƔƲ MBƲ PAPAKƖ-Ŋ YƆ NƐ ŊLABƖNƖ TƲMƖYƐ

18-19. Lɔŋ weyi ɖɩkpɛlɩkɩ Yesu aduwa taa?

¹⁸ Suwe ɖɩkpɛlɩkaa? Ðɩkpɛlɩkaa se mba pɛwɛnɩ lidaʋ se pacakɩ tɛtʋ yɔɔ tam yɔ, heŋ nɛ pʋŋ eduuye wɩlɩɣ-wɛ se pɩcɛyaa se pɔɖɔkɩ pe-siɣsiɣ wɛtʋ Yehowa ɛsɩndaa sɔnɔ sɔnɔ nɛ kʋñɔŋ sɔsɔʋ alɩwaatʋ taa. Kʋñɔŋ sɔsɔʋ alɩwaatʋ ndʋ tɩ-taa, Yesu kaɣ tɔm hʋnʋʋ ɛyaa siɣsiɣ tɩnaa nɛ ɛkpaɣ-wɛ se pamʋnaa se pehiɣ «wezuu maatɛŋ.»—Mat. 25:46.

¹⁹ Ðɩna ɖɔɖɔ aduwa 2 wena apakɩ patam numwaa yɔ. Pɛlaa lɔŋsɩnɖaa nɛ pɛlaa  kɩmɛlɛmɩŋ eduuye nɖɩ Yesu tuwaa yɔ ɖɩ-taa, pa-taa 5 wɩlaa se pɛwɛ lɛɣtʋ. Paañɔɔzɩ pa-tɩ nɛ pacaɣnɩ pɛ-ɛsa. Paañɔɔzɩ pa-tɩ se paɖaŋ asɛyʋ walʋ paa pɩkpakaɣ alɩwaatʋ ɛzɩma yɔ. Ɛlɛ pɛlaa kɩmɛlɛmɩŋ taañɔɔzɩ pa-tɩ. Pʋyɔɔ asɛyʋ walʋ kizaa se pataasʋʋ e-nesi ɖɔkʋʋ kazandʋ taa. Ða ɖɔɖɔ pɩwɛɛ se ɖɩñɔɔzɩ ɖa-tɩ nɛ ɖɩɖaŋ paa pɩkpakɩɣ alɩwaatʋ ɛzɩma pʋcɔ nɛ Yesu ɖɩzɩ ɛjaɖɛ kɩdɛkɛdɩyɛ ɖɩnɛ yɔ. Pɩtasɩ lɛ, talaŋwaa eduuye taa, ɖɩnawa se yomaa siɣsiɣ tɩnaa 2 kaawɛ kpekpeka. Palabɩ pa-caa tʋmɩyɛ nɛ po-ɖoŋ kpeekpe nɛ piyele nɛ pɔ-tɔm kɛdɩnɩ-ɩ. Ɛlɛ ɛlɔ yom feendu tʋ. Ɛbɛ pɩkpɛlɩkɩɣ-ɖʋ? Pɩwɛɛ se ɖɩwɛɛ kpekpeka Yehowa tʋmɩyɛ taa nɛ piwolo pɩtalɩ tɩnaɣ yɔɔ. Kɛdɛzaɣ ɖeɖe lɛ, ɖɩnawa se pɩwɛɛ se patam numwaa ɩwɛɛ feŋuu yɔɔ nɛ Yesu ‘kpaɣ-wɛ’ nɛ ewoni-wɛ ɛsɔdaa Kewiyaɣ taa nɛ pamʋ pa-kɩhɛyʋʋ. Armaagedɔɔ you wayɩ, pakaɣ kɛʋ Yesu asɛyʋ, Heɣa nesi ɖɔkʋʋ taa.—2 Tes. 2:1; Natʋ 19:9.

20. Ɛbɛ Yehowa kaɣ labʋ mba pakpakɩɣ paɣʋ mbʋ ɛpakɩ-wɛ yɔ nɛ palakɩnɩ tʋmɩyɛ yɔ?

²⁰ Paa tɔm hʋʋ alɩwaatʋ ɛñɔtɩ kpam yɔ, pɩfɛyɩ se sɔɔndʋ ɛkpa-ɖʋ. Ye ɖiwobi pɩ-yɔɔ nɛ ɖɩwɛɛ siɣsiɣ yɔ, ɖa-Caa weyi ɛwɛ ɛsɔdaa yɔ, ɛkaɣ-ɖʋ haʋ «ɖoŋ weyi ɩcɛzɩ ɛyʋ ɖoŋ yɔ» nɛ ‘ɖɩpɩzɩ ɖɩsɩŋ ɛyʋ Pɩyalʋ ɛsɩndaa.’ (2 Kɔr. 4:7; Luka 21:36) Paa ɖɩwɛnɩ lidaʋ se ɖɩkpaɣ ɛsɔdaa yaa ɖɩwɛnɩ lidaʋ se ɖɩcakɩ tɛtʋ yɔɔ yɔ, ye ɖɩkpakɩɣ paɣʋ mbʋ pɩwɛ Yesu aduwa ana a-taa yɔ nɛ ɖɩlakɩnɩ tʋmɩyɛ yɔ, ɖɔ-tɔm kaɣ kɛdɩnʋʋ ɖa-Caa. Yehowa kaɣ-ɖʋ labʋ lootiye nɛ ‘ɛma ɖa-hɩla wezuu takayaɣ taa.’—Dan. 12:1; Natʋ 3:5.