TƆM ÑƲƲ ŊGƲ ÐƖKPƐLƖKƖƔ YƆ 36
HENDU 89 Welisi, ña nɛ pɩwazɩ-ŋ
«Ɩpɩsɩ mba pɔɖɔŋ tɔm yɔɔ yɔ»
«Ɩpɩsɩ mba pɔɖɔŋ tɔm yɔɔ yɔ nɛ ɩtaakɛ welisiyaa ɖeke.» —YAK. 1:22.
MBƲ PƖ-YƆƆ PƖWƐƐ SE ŊKA ÑA-LƖMAƔZA YƆ
Tɔm ñʋʋ kʋnɛ kɩkaɣ-ɖʋ sɩnʋʋ nɛ ɖɩcɛyɩsɩ sɔɔlɩm mbʋ ɖɩwɛna se ɖɩkalɩ Ɛsɔtɔm paa evemiye nɖɩ yɔ. Ɛlɛ kɩkaɣ-ɖʋ sɩnʋʋ ɖɔɖɔ nɛ ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ nɛ ɖɩɖɔŋ tɩ-yɔɔ ɖe-wezuu caɣʋ taa nɛ pɩkɩlɩ.
1-2. Ɛbɛ yɔɔ Ɛsɔ sɛyaa wɛ koboyaɣ taa? (Yakubu 1:22-25)
YEHOWA nɛ ɛ-Pɩyalʋ kʋsɔɔlʋ pɔsɔɔlaa se ɖɩwɛɛ koboyaɣ taa. Weyi ɛma Keɣa 119:2 yɔ ɛyɔɔdaa se: «Koboyaɣ tɩnaa kɛlɛ mba pɔɖɔŋ ɛ-tɔm kɩtɔzɩtʋ yɔɔ yɔ, mba pañɩnɩɣ-ɩ nɛ pa-laŋɩyɛ pilim yɔ.» Yesu tasɩ ñɩɣʋ niye tɔm ndʋ tɩ-yɔɔ nɛ ɛyɔɔdɩ se: «Koboyaɣ tɩnaa lɛ mba panɩɣ Ɛsɔ tɔm nɛ pɔɖɔŋ tɩ-yɔɔ yɔ!»—Luka 11:28.
2 Ða Yehowa sɛyaa ɖɩkɛ samaɣ ŋga kɛwɛ koboyaɣ taa yɔ. Ɛbɛ yɔɔ? Lɩmaɣza sakɩyɛ yɔɔ, ɛlɛ a-taa nɖɩ ɖɩ-tɔm kɩlɩ cɛyʋʋ yɔ lɛ se ɖɩkalɩɣ Ɛsɔtɔm nɛ ɖɩñakɩ pana se ɖɩɖɔ tɔm ndʋ ɖɩkpɛlɩkɩɣ yɔ tɩ-yɔɔ.—Kalɩ Yakubu 1:22-25.
3. Ye ɖɩɖɔŋ tɔm ndʋ ɖɩkalɩɣ Ɛsɔtɔm taa yɔ tɩ-yɔɔ yɔ, wazasɩ nzɩ ɖihikiɣ?
3 Alɩwaatʋ ndʋ ɖɩpɩsɩɣ «mba pɔɖɔŋ tɔm yɔɔ yɔ,» ɖihikiɣ wazasɩ hɔɔlɩŋ sakɩyɛ taa. Wazaɣ nakɛyɛ lɛ se ɖɔ-tɔm kɛdɩɣnɩ Yehowa. Nɛ ye ɖiɖiɣzini tɔm ndʋ yɔ, piyeki nɛ ɖɩwɛɛ koboyaɣ taa. (Ekl. 12:13) Pɩtasɩ lɛ, ye ɖɩɖɔŋ tɔm ndʋ ɖɩkalɩɣ Ɛsɔtɔm taa yɔ tɩ-yɔɔ yɔ, koboyaɣ wɛɣ ɖɔ-hɔʋ taa nɛ pɩkɩlɩ nɛ taabalɩyɛ kɩbanɖɛ wɛɣ ɖa nɛ ɖo-koobiya ɖɛ-hɛkʋ taa. Pʋtɔma, ña ɖɔɖɔ ŋhiɣ wazasɩ nzɩ sɩ-taa nasɩyɩ ñe-wezuu caɣʋ taa. Pɩtasɩ lɛ, ɛyaa mba paaɖɔŋ Yehowa paɣtʋ yɔɔ yɔ pakatɩɣ kala ndɩ ndɩ; ye ɖɩɖɔŋ Ɛsɔtɔm yɔɔ yɔ, ɖɩfɛɣ a-taa sakɩyɛ. Tɔm ndʋ ɖeyi ɖeyi Wiyaʋ Daviid yɔɔdaa. Ete hendu nɛ ɛyɔɔdɩ Yehowa paɣtʋ nɛ ɛ-tɔm hʋʋ tɔm nɛ pɩtɛ lɛ, ɛkɔ tɔm ñʋʋ se: «Ɛyʋ ɛɖɔŋ tɩ-yɔɔ yɔ, ehikiɣ kɩhɛyʋʋ sɔsɔʋ.»—Keɣ. 19:7-11.
4. Ɛbɛ yɔɔ pɩfɛyɩ kɛlɛʋ paa ɛzɩmtaa se ɖɩkalɩɣ Ɛsɔtɔm nɛ ɖɩɖɔŋ tɩ-yɔɔ?
4 Toovenim taa lɛ, pɩfɛyɩ kɛlɛʋ paa ɛzɩmtaa se ɖɩkalɩɣ Ɛsɔtɔm nɛ ɖɩɖɔŋ tɩ-yɔɔ. Paa pɩɖɔkɩnɩ-ɖʋ yɔ, pɩwɛɛ se ɖɩlɩzɩ alɩwaatʋ natʋyʋ nɛ ɖɩkalɩɣ Bibl nɛ ɖɩkpɛlɩkɩɣ-kʋ. Piyeki nɛ ɖɩtɩlɩ mbʋ Yehowa sɔɔlaa se ɖɩla yɔ. Iyele nɛ ɖɩna lɔŋ tasʋʋ mbʋ pɩpɩzɩɣ pɩsɩnɩ-ɖʋ nɛ ɖɩkalɩɣ Bibl ɖoŋ ɖoŋ yɔ. Ðɩkaɣ naʋ ɖɔɖɔ mbʋ pɩpɩzɩɣ pɩsɩnɩ-ɖʋ nɛ ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ yɔ nɛ ɛzɩma ɖɩpɩzɩɣ nɛ ɖɩɖɔ tɩ-yɔɔ ɖe-wezuu caɣʋ taa yɔ.
LƖZƖ ALƖWAATƲ NATƲYƲ NƐ ŊKALƖƔ ƐSƆTƆM
5. Tʋma wena labʋ kpakɩɣ-ɖʋ alɩwaatʋ sakɩyɛ?
5 Pɩɖɔkɩnɩ Yehowa sɛyaa hɔɔlʋʋ sɔsɔʋ kpem. Ðɩkpakɩɣ alɩwaatʋ sakɩyɛ nɛ ɖɩlakɩnɩ tʋma wena Bibl yɔɔdʋʋ se a-tɔm cɛyaa yɔ. Kɩɖaŋ nɩɩyɩ yɔ: Ða-taa sakɩyɛ lakɩ tomnaɣ yɔɔ tʋma se papɩzɩ nɛ pɔcɔnɩ pa-maɣmaɣ nɛ pɔ-hɔʋ kɩcɛyɩm ɖeɖe. (1 Tim. 5:8) Koobiya sakɩyɛ cɔŋnɩ pɔ-hɔŋ taa ñɩma mba pɛkɛ kʋdɔndɩnaa yaa akpadɩyaa yɔ pɔ-yɔɔ. Nɛ ɖa-tɩŋa ɖɩcɔŋnɩ ɖa-maɣmaɣ ɖɔ-tɔnʋʋ taa alaafɩya yɔɔ, nɛ pɩ-labʋ kpakɩɣ-ɖʋ alɩwaatʋ. Pɩtasɩnɩ tʋma ana lɛ, ɖɩlakɩ ɖɔɖɔ ɛgbɛyɛ taa tʋma. A-taa kɩcɛyɩyɛ naɖɩyɛ lɛ se pɩwɛɛ se ɖisusi tɔm nɛ kpekpeka. Paa ŋlakɩ tʋma ana a-tɩŋa yɔ, ɛzɩma ŋpɩzɩɣ nɛ ŋhiɣ alɩwaatʋ nɛ ŋkalɩɣ Bibl paa ɖooye, ŋmaɣzɩɣ ndʋ ŋkalɩɣ yɔ tɩ-yɔɔ nɛ ŋɖɔŋ tɩ-yɔɔ?
6. Ɛbɛ ŋpɩzɩɣ ŋla nɛ pɩsa nɛ ŋkalɩɣ Bibl paa evemiye nɖɩ? (Cɔnɩ ɖɔɖɔ kɩlɛmʋʋ.)
6 «Mbʋ pɩ-tɔm kɩlɩ cɛyʋʋ» ɖa Krɩstʋ mba ɖɛ-ɛsɩndaa yɔ pɩ-taa nabʋyʋ lɛ Bibl kalʋʋ; pʋyɔɔ pɩcɛyaa se ɖɩkalɩɣ-kʋ paa evemiye nɖɩ. (Filp. 1:10) Keɣa kajalaɣ ñɩŋga yɔɔdʋʋ ɛyʋ weyi ɛkɛ koboyaɣ tʋ yɔ ɛ-tɔm se: «Ɛnɩɣ leleŋ Yehowa paɣtʋ taa, nɛ ɛkalɩɣ Ɛ-paɣtʋ e-liu tɛɛ wɩsɩ nɛ ɖoo.» (Keɣ. 1:1, 2) Pɩnaɣ kpayɩ kpayɩ se pɩcɛyaa se ɖɩlɩzɩ alɩwaatʋ natʋyʋ nɛ ɖɩkalɩɣ Bibl. Ɛzɩmtaa pɩkɩlɩɣ ɖeu se ɛyʋ ɛkalɩ Bibl? Paa weyi pɩwɛɛ se ɛlɩzɩ alɩwaatʋ ndʋ tɩkɩlɩ-ɩ ɖeu yɔ. Ɛlɛ mbʋ pɩ-tɔm cɛyaa yɔ lɛ se ɖɩlɩzɩ alɩwaatʋ ndʋ tɩ-yɔɔ ɖɩpɩzɩɣ nɛ ɖɩkalɩ Bibl paa evemiye nɖɩ yɔ. Payaɣ koobu abalɩñɩnʋ nɔɔyʋ se Victor, ɛyɔɔdaa se: «Tanaŋ tɛɛ mɔnsɔɔlɩ Bibl kalʋʋ. Mantɩkɛ ɛyʋ weyi ɛsɔɔlɩ kʋyʋʋ tanaŋ tɛɛ cu yɔ, paa mbʋ yɔ pɩkɛ alɩwaatʋ kɩbandʋ mbʋ pʋyɔɔ yɔ mbʋ pɩpɩzɩɣ nɛ pɩkɛzɩ ma-lɩmaɣza alɩwaatʋ ndʋ tɩ-taa yɔ pɩtɩɖɔɔ. Ma-lɩmaɣza wɛ a-ɖeɖe nɛ pɩwɛ-m kɛlɛʋ se mankam-yɛ tɔm ndʋ mankalɩɣ yɔ tɩ-yɔɔ.» Pɩtɩla, mbʋ pɩwɛ ñɔ-hɔɔlʋʋ taa ɖɔɖɔ. Pɔzɩ ña-tɩ se: «Ma yɔ, ɛzɩmtaa pɩkɩlɩɣ ɖeu se mankalɩ Bibl?»
Ɛzɩmtaa pɩkɩlɩɣ ɖeu se ɛyʋ ɛkalɩ Bibl? Alɩwaatʋ ndʋ ŋpɩzɩɣ nɛ ŋkalɩɣ-kʋ ɖoŋ ɖoŋ? (Cɔnɩ tayʋʋ 6)
MAƔZƖ TƆM NDƲ ŊKALƖƔ YƆ TƖ-YƆƆ
7-8. Ɛbɛ pɩzɩɣ piyele nɛ tɔm ndʋ ɖɩkalɩɣ yɔ tɩɩwazɩɣ-ɖʋ siŋŋ? Ha kɩɖaʋ nakʋyʋ.
7 Toovenim taa lɛ, ɖɩpɩzɩɣ nɛ ɖɩkalɩ tɔm sakɩyɛ ɖoŋ ɖoŋ ɛlɛ ɖɩɩmaɣzɩɣ tɔm ndʋ ɖɩkalɩɣ yɔ tɩ-yɔɔ. Wiɖiyi ŋtɛm kalʋʋ tɔm natʋyʋ nɛ alɩwaatʋ pazɩ pʋwayɩ lɛ, ŋsɔɔ tɔm ndʋ ŋkalaa yɔ tɩ-yɔɔ? Pʋtɔma, pɩtɛm ɖa-tɩŋa talʋʋ mbʋ. Pɩlabɩ pʋtɔdɩyɛ se pɩpɩzɩɣ nɛ pɩtalɩ-ɖʋ mbʋ ɖe-Bibl kalʋʋ taa. Pɩtɩla, ɖɩɖʋ ɖa-tɩ kaɖʋwa se pɩwɛɛ se ɖɩkalɩ Bibl ñʋŋ nɩɩyɩ paa evemiye nɖɩ. Pɩkɛnɩ kaɖʋwa kɩbaŋa. Pɩwɛɛ se ɖɩɖʋ ɖa-tɩ kaɖʋsɩ nɛ ɖɩñaɣ pana nɛ ɖɩtalɩ-sɩ. (1 Kɔr. 9:26) Ɛlɛ Bibl kalʋʋ ɖeke tɩmaɣ; ye ɖɩsɔɔlaa se ɖe-Bibl kalʋʋ ɛwazɩ-ɖʋ yɔ, pɩwɛɛ se ɖɩla nɛ pɩkɩlɩ mbʋ.
8 Maɣzɩ kɩɖaʋ kʋnɛ kɩ-yɔɔ nɛ ŋna: Ðoŋ ɖoŋ lɛ pɩcɛyaa se tɛʋ ɛnɩɩ nɛ tɩŋ paɣlɩ. Ɛlɛ ye tɛʋ ɛkɩlɩ nɩʋ alɩwaatʋ pazɩ taa yɔ, tɛtʋ kɩlɩɣ haɣʋ lɩm. Nɛ ye pɩlabɩ mbʋ yɔ, paa tɛʋ ɛtasɩ nɩʋ yɔ, pɩɩkaɣ wazʋʋ pʋyʋ. Ɛlɛ ye tɛʋ ɛnɩɣ pazɩ pazɩ yɔ, pɩkɩlɩɣ ɖeu, mbʋ pʋyɔɔ yɔ lɩm kaɣ sʋʋ tɛtʋ camɩyɛ nɛ pɩsɩnɩ tɩŋ nɛ ɩpaɣlɩ. Mbʋ ɖɔɖɔ pɩfɛyɩ se ɖikpedesiɣ nɛ ɖɩkalɩɣ Bibl ñʋŋ sakɩyɛ ɛlɛ ɖiihikiɣ alɩwaatʋ se ɖɩmaɣzɩ tɔm ndʋ ɖɩkalɩɣ yɔ tɩ-yɔɔ, nɛ ɖɩɩtɔzʋʋ tɩ-yɔɔ se ɖɩlabɩnɩ-tʋ tʋmɩyɛ.—Yak. 1:24.
Ɛzɩ pɩpɔzʋʋ alɩwaatʋ se pɩsa nɛ tɛʋ lɩm sʋʋ tɛtʋ nɛ pɩwazɩ-tʋ yɔ, mbʋ ɖɔɖɔ pɩpɔzʋʋ se ɖɩkpaɣ alɩwaatʋ nɛ ɖɩmaɣzɩ tɔm ndʋ ɖɩkalɩ Ɛsɔtɔm taa yɔ tɩ-yɔɔ nɛ ɖɩɖɔ tɩ-yɔɔ (Cɔnɩ tayʋʋ 8)
9. Ye ɖiɖiɣzinaa se ɖikpedesiɣ ɖe-Bibl kalʋʋ taa yɔ, ɛbɛ pɩwɛɛ se ɖɩla?
9 Ŋɖiɣzinaa se ŋkpedesiɣ ñe-Bibl kalʋʋ taa? Ye mbʋ yɔ ɛbɛ pɩwɛɛ se ŋla? Kpaɣ ña-alɩwaatʋ. Ñaɣ pana nɛ ŋmaɣzɩ tɔm ndʋ ŋwɛɛ nɛ ŋkalɩɣ yɔ yaa ndʋ ŋkalaa yɔ tɩ-yɔɔ. Pɩfɛyɩ se sɔɔndʋ ɛkpa-ŋ. Ŋpɩzɩɣ nɛ ŋsɔzɩ alɩwaatʋ ndʋ ŋkpakɩɣ nɛ ŋkpɛlɩkɩɣna yɔ tɩ-yɔɔ nɛ ŋpɩzɩ nɛ ŋmaɣzɩ tɔm ndʋ ŋkpɛlɩkɩɣ yɔ tɩ-yɔɔ. Yaa ŋpɩzɩɣ nɛ ŋkalɩ masɩ pazɩ nɛ ŋkpaɣ alɩwaatʋ ndʋ tɩkazaa yɔ nɛ ŋmaɣzɩ tɔm ndʋ ŋkalaa yɔ tɩ-yɔɔ. Victor weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: «Men-Bibl kalʋʋ taa, maakalɩɣ tɔm sakɩyɛ. Mankalɩɣ ɛzɩ ñʋʋ kʋɖʋmʋʋ mbʋ yɔ. Mankalɩɣ Bibl tanaŋ tɛɛ nɛ pʋyɔɔ lɛ, manpɩzɩɣ nɛ mamaɣzɩ tɔm ndʋ mankalaa yɔ tɩ-yɔɔ evemiye kpeekpe.» Ñalɩzɩɣnɩ masɩ ɛzɩma ŋpɩzɩɣ nɛ ŋkalɩ yɔ; ɛlɛ mbʋ pɩ-tɔm cɛyaa yɔ lɛ se ŋtaakpedesi alɩwaatʋ ndʋ ŋkalɩɣ Bibl yɔ. Pɩsɩɣnɩ-ŋ nɛ ŋmaɣzɩ tɔm ndʋ ŋwɛɛ nɛ ŋkalɩɣ yɔ tɩ-yɔɔ.—Keɣ. 119:97; kalɩ aɖakaɣ « Tɔm pɔzʋʋ mbʋ pɩ-yɔɔ ŋpɩzɩɣ nɛ ŋmaɣzɩ yɔ.»
10. Ha kɩɖaʋ ŋgʋ kɩwɩlɩɣ ɛzɩma ŋpɩzɩɣ nɛ ŋlabɩnɩ tʋmɩyɛ tɔm ndʋ ŋkalɩɣ yɔ. (1 Tesalooniiki mba 5:17, 18)
10 Alɩwaatʋ ndʋ ŋkalɩɣ masɩ nasɩyɩ yɔ, maɣzɩ ɛzɩma ŋpɩzɩɣ nɛ ŋlabɩnɩ-sɩ tʋmɩyɛ yɔ pɩ-yɔɔ. Ŋwɛɣ nɛ ŋkalɩɣ-sɩ lɛ, pɔzɩ ña-tɩ se: «Ɛzɩma manpɩzɩɣ nɛ malabɩnɩ tɔm ndʋ mankalɩɣ yɔ tʋmɩyɛ sɔnɔ yaa cee wayɩ?» Kpaɣ se ŋwɛɛ nɛ ŋkalɩɣ 1 Tesalooniiki mba 5:17, 18. (Kalɩ 1 Tesalooniiki mba 5:17, 18.) Ŋtɛŋ masɩ nzɩ kalʋʋ lɛ, ŋpɩzɩɣ nɛ ŋsɩŋ pazɩ nɛ ŋmaɣzɩ nɛ ŋna se ŋtɩmɩɣ ɖoŋ ɖoŋ, nɛ ña-adɩma lɩɣnɩ ɖooo ña-laŋɩyɛ taa. Pɩtasɩ lɛ, ŋpɩzɩɣ nɛ ŋmaɣzɩ wondu ndʋ tɩ-yɔɔ pɩwɛɛ se ŋwɛɛnɩ ɛsɩmɩyɛ yɔ tɩ-yɔɔ. Pɩtɩla ŋlɩzɩɣ se ŋsɛɣ Yehowa wondu 3 natʋyʋ yɔɔ. Halɩ paa ŋkpakɩɣ cɛcɛsɩ pazɩ yem na nɛ ŋmaɣzɩɣ lɔŋ weyi ŋkpɛlɩkɩɣ Bibl taa yɔ ɩ-yɔɔ yɔ, pɩkaɣ-ŋ sɩnʋʋ nɛ ŋpɩsɩ weyi ɛnɩɣ Ɛsɔtɔm nɛ ɛɖɔŋ tɩ-yɔɔ yɔ. Ye ŋkalɩɣ Bibl hɔɔlɩŋ lɛɛŋ nɛ ŋlakɩ mbʋ paa evemiye nɖɩ yɔ, maɣzɩ nɛ ŋna ɛzɩma pɩkaɣ-ŋ wazʋʋ yɔ! Toovenim taa lɛ, ŋkaɣ pɩsʋʋ weyi ɛɖɔŋ Ɛsɔtɔm yɔɔ yɔ nɛ pɩkɩlɩ. Ɛlɛ ye pɩlakɩ-ŋ ɛzɩ pɩpɔzʋʋ se ŋla lɛɣzɩtʋ sakɩyɛ yɔ, ɛbɛ pɩwɛɛ se ŋla?
ÐƲ ÑA-TƖ KAÐƲSƖ NZƖ SƖMAƔNAA YƆ
11. Ɛbɛ yɔɔ pɩpɩzɩɣ nɛ pitibi-ŋ yɔɔɔ nabʋyʋ taa? Ha kɩɖaʋ nakʋyʋ.
11 Alɩwaatʋ ndʋ ŋkalɩɣ Bibl yɔ, nabʋyʋ taa pɩpɩzɩɣ nɛ pitibi-ŋ yɔɔɔ, mbʋ pʋyɔɔ yɔ ŋɖiɣzinaa se pɩwɛɛ se ŋla lɛɣzɩtʋ sakɩyɛ. Kɩɖaʋ nakʋyʋ yɔ: Maɣzɩ se kɩyakʋ nakʋyʋ ŋkalɩ Bibl hɔɔlʋʋ ŋgʋ kɩyɔɔdʋʋ se pɩtɩmʋna se ɖɩlakɩ ɛsɩmɩyɛ yɔɔ lakasɩ yɔ. (Yak. 2:1-8) Peeɖe ŋɖiɣzinaa se pɩwɛɛ se ŋla lɛɣzɩtʋ pɩlɩɩnɩ mbʋ ŋlakɩ ɛyaa lalaa yɔ pɩ-hɔɔlʋʋ taa; nɛ ŋkpaɣ lɩmaɣzɩyɛ se ŋlakɩ mbʋ. Pɩkɛnɩ lɩmaɣzɩyɛ kɩbanɖɛ kpem! Tɛʋ fema lɛ, ŋkalɩ Bibl hɔɔlʋʋ ŋgʋ kɩwɩlɩɣ se pɩcɛyaa se ŋkpa ña-tɩ nɛ tɔm ndʋ ŋyɔɔdʋʋ yɔ. (Yak. 3:1-12) Peeɖe ŋɖiɣzinaa se nabʋyʋ taa ŋyɔɔdʋʋ tɔm ndʋ tɩtɩmʋna yɔ. Piyeba nɛ ŋkpaɣ lɩmaɣzɩyɛ se ŋpaɣzɩɣ yɔɔdʋʋ tɔm ndʋ tɩkpazɩɣ ɛyaa lalaa ɖoŋ yɔ. Tɛʋ kifemuu lɛ, ŋkalɩ Bibl hɔɔlʋʋ ŋgʋ kɩpakɩ-ɖʋ se ɖɩtaakɛ ɛjaɖɛ taabalaa yɔ. (Yak. 4:4-12) Peeɖe ŋɖiɣzinaa se pɩcɛyaa se ŋkpa ña-tɩ nɛ tɔm ndʋ ŋkalɩɣ yɔ, mbʋ ŋcɔŋna yɔ, nɛ mbʋ ŋwelisiɣ yɔ. Kɩyakʋ 4 ñɩŋgʋ wiye, pɩpɩzɩɣ nɛ pɩlabɩ-ŋ ɛzɩ lɛɣzɩtʋ ndʋ pɩwɛɛ se ŋla yɔ, tɩkɩlɩ ɖɔʋ yɔ.
12. Ye ŋkalɩ Bibl nɛ ŋɖiɣzina se pɩpɔzʋʋ se ŋla lɛɣzɩtʋ sakɩyɛ yɔ, ɛbɛ yɔɔ pɩfɛyɩ se pitibi-ŋ yɔɔɔ? (Kalɩ ɖɔɖɔ pɩ-tɛɛ tɔm.)
12 Ye pɩpɔzʋʋ se ŋla lɛɣzɩtʋ sakɩyɛ yɔ, pɩfɛyɩ se pitibi-ŋ yɔɔɔ. Pɩwɩlɩɣ kpayɩ kpayɩ se ŋwɛnɩ laŋɩyɛ kɩbanɖɛ. Ɛyʋ weyi ɛwɛnɩ tɩ luzuu nɛ eheyiɣ ɛ-tɩ toovenim yɔ, ɛkalɩɣ Masɩ se sɩsɩnɩ-ɩ nɛ ɛna lɛɣzɩtʋ ndʋ pɩpɔzʋʋ se ɛla yɔ. a Tɔzɩ ɖɔɖɔ se pɩwɛɛ se ɖiwolo pɩ-yɔɔ nɛ ɖisuu «ɛyʋtʋ kɩfatʋ.» (Kol. 3:10) Ɛbɛ kaɣ-ŋ sɩnʋʋ nɛ ŋwolo pɩ-yɔɔ nɛ ŋkɛ weyi ɛɖɔŋ Ɛsɔtɔm yɔɔ yɔ?
13. Ɛzɩma ŋpɩzɩɣ nɛ ŋɖʋ ña-tɩ kaɖʋsɩ nzɩ sɩmaɣnaa yɔ? (Cɔnɩ ɖɔɖɔ kɩlɛmʋʋ.)
13 Ña-kaɖʋwa ɛtaakɛna se ŋñakɩ pana nɛ ŋɖɔ ndʋ payɩ ŋkpɛlɩkɩɣ yɔ tɩ-tɩŋa tɩ-yɔɔ kpaagbaa, ɛlɛ ɖʋ ña-tɩ kaɖʋsɩ nzɩ sɩmaɣnaa yɔ. (Adu. 11:2) Ŋpɩzɩɣ nɛ ŋkpaɣnɩ ɛzʋnɔ: Ma lɛɣzɩtʋ ndʋ payɩ pɩpɔzʋʋ se ŋla yɔ, nɛ pʋwayɩ lɛ, ŋlɩzɩ tɩ-taa kʋɖʋmtʋ yaa naalɛ se ŋpaɣzɩɣnɩ-tʋ; nɛ ŋyele lɛɛtʋ nɛ pʋwayɩ lɛ ŋŋcɔnɩ ti-ɖeɖe. Lɛɣzɩtʋ ndʋ pɩwɛɛ se ŋpaɣzɩna?
Ña-kaɖʋwa ɛtaakɛna se ŋñakɩ pana nɛ ŋɖɔ tɔm ndʋ payɩ ŋkpɛlɩkɩɣ yɔ tɩ-tɩŋa tɩ-yɔɔ kpaagbaa, ɛlɛ ɖʋ ña-tɩ kaɖʋsɩ nzɩ sɩmaɣnaa yɔ. Ŋpɩzɩɣ nɛ ŋɖʋ ña-tɩ kaɖʋwa kʋɖʋmaɣ yaa kaɖʋsɩ naalɛ (Cɔnɩ tayʋʋ 13-14)
14. Lɛɣzɩtʋ ndʋ ŋpɩzɩɣ nɛ ŋlɩzɩ se ŋpaɣzɩɣnɩ labʋ?
14 Ŋpɩzɩɣ nɛ ŋlɩzɩ se ŋpaɣzɩɣnɩ lɛɣzɩtʋ ndʋ tɩ-labʋ wɛ-ŋ kɛlɛʋ yɔ. Yaa ŋpɩzɩɣ nɛ ŋlɩzɩ se ŋlakɩ lɛɣzɩtʋ ndʋ tɩ-tɔm kɩlɩ cɛyʋʋ ñɛ-ɛsɩndaa yɔ. Ŋlɩzɩɣ lɛɣzɩtʋ ndʋ ŋsɔɔlaa se ŋlakɩ yɔ nɛ pɩtɛ lɛ, ŋpɩzɩɣ nɛ ŋlabɩnɩ tʋmɩyɛ tɔm ñɩnʋʋ wondu, ɛzɩ Index des publications des Témoins de Jéhovah nɛ Guide de recherche pour les Témoins de Jéhovah mbʋ yɔ nɛ ŋñɩnɩ tɔm. Tɩmnɩ Yehowa nɛ ŋpɔzɩ-ɩ se ɛsɩnɩ-ŋ nɛ ‘ŋsɔɔlɩ nɛ ŋtɛ ŋwɛɛnɩ ɖoŋ nɛ ŋla mbʋ payɩ ɛsɔɔlaa yɔ.’ (Filp. 2:13) Pʋwayɩ lɛ, ñaɣ pana nɛ ŋɖɔ tɔm ndʋ ŋkpɛlɩkaa yɔ tɩ-yɔɔ. Alɩwaatʋ ndʋ ŋnaɣ se ŋtalɩ ña-kaɖʋwa ŋga yɔ, piseɣtiɣ-ŋ se ŋwolo pɩ-yɔɔ nɛ ŋɖʋ ña-tɩ kaɖʋwa lɛɛka. Toovenim taa lɛ, alɩwaatʋ ndʋ ŋnaɣ se ŋpɩzaa nɛ ŋla lɛɣzɩtʋ natʋyʋ pɩlɩɩnɩ ɛzɩma pɩwɛɛ se Krɩstʋ mba ɩcaɣ wezuu yɔ pɩ-hɔɔlʋʋ taa yɔ, yaa alɩwaatʋ ndʋ ŋnaɣ se ŋñaɣ pana nɛ ŋwɛɛnɩ wɛtʋ kɩbandʋ ndʋ pɩpɔzʋʋ se Krɩstʋ mba ɩwɛɛna yɔ tɩ-taa natʋyʋ yɔ, pɩtʋʋ fɛyɩ se pɩkaɣ-ŋ wɛʋ kɛlɛʋ se ŋwolo pɩ-yɔɔ nɛ ŋla lɛɣzɩtʋ hɔɔlɩŋ lɛɛŋ taa.
YELE NƐ ƐSƆTƆM ‘LA TƲMƖYƐ ÑA-TAA’
15. Ɛzɩma Yehowa sɛyaa wɛ ndɩ nɛ ɛyaa sakɩyɛ mba pakalɩɣ Bibl yɔ? (1 Tesalooniiki mba 2:13)
15 Ɛyaa nabɛyɛ yɔɔdaa se mba kalɩ Bibl tam sakɩyɛ. Ɛlɛ toovenim taa lɛ, petisiɣ ndʋ Bibl wɩlɩɣ yɔ tɩ-yɔɔ? Pɔɖɔŋ kɩ-wɩlɩtʋ yɔɔ yaa peyeki se kɩwɛɛnɩ ɖoŋ pe-wezuu caɣʋ yɔɔ? Ðoŋ ɖoŋ lɛ, pa-taa sakɩyɛ ɩɩlakɩ mbʋ. Ɛlɛ, Yehowa sɛyaa ñɛwɛ ndɩ kpem. Ɛzɩ kajalaɣ pɩnzɩ mɩnʋʋ taa Krɩstʋ mba yɔ, ɖɩkpakɩɣ Bibl taa tɔm «ɛzɩ tɩkɛʋ toovenim taa yɔ, . . . ɛzɩ Ɛsɔ tɔm yɔ.» Pɩtasɩ lɛ, ɖɩlakɩ mbʋ payɩ ɖɩpɩzɩɣ yɔ nɛ ɖɩɖɔŋ Bibl lɔŋ tasʋʋ yɔɔ.—Kalɩ 1 Tesalooniiki mba 2:13.
16. Ɛbɛ pɩzɩɣ pɩsɩnɩ-ɖʋ nɛ ɖɩpɩsɩ mba pɔɖɔŋ Ɛsɔtɔm yɔɔ yɔ?
16 Pɩfɛyɩ kɛlɛʋ paa ɛzɩmtaa se ɛyʋ ɛkalɩ Ɛsɔtɔm nɛ ɛɖɔ tɩ-yɔɔ. Pɩtɩla pɩwɛ-ɖʋ kaɖɛ se ɖihiɣ alɩwaatʋ nɛ ɖɩkalɩ-tʋ. Yaa pɩtɩla ɖɩɩkalɩɣ-tʋ lɛ, ɖikpedesiɣ nɛ ɖɩɩkpakɩɣ alɩwaatʋ nɛ ɖɩmaɣzɩɣ tɔm ndʋ ɖɩkalaa yɔ tɩ-yɔɔ. Yaa pɩtɩla pɩlakɩ-ɖʋ ɛzɩ lɛɣzɩtʋ ndʋ pɩwɛɛ se ɖɩla yɔ, tɩkɩlɩ ɖɔʋ yɔ. Paa kaɖɛ nɖɩ ŋkatɩɣ yɔ, tɩlɩ se ŋpɩzɩɣ nɛ ŋwabɩ-ɖɩ. Yehowa sɩɣnɩ-ŋ nɛ ŋwabɩ-ɖɩ. Tɛtɛ nɛ ɖɩtɛ ɖa-taa nɛ ɖitisi nɛ Yehowa sɩnɩ-ɖʋ nɛ ɖɩkɛ mba pɔɖɔŋ Ɛsɔtɔm yɔɔ yɔ nɛ ɖɩtaakɛ welisiyaa lɩzɔʋ tɩnaa. Pɩtʋʋ fɛyɩ se ye ɖɩkalɩɣ Ɛsɔtɔm nɛ ɖɩɖɔŋ tɩ-yɔɔ ɖe-wezuu caɣʋ taa nɛ pɩkɩlɩɣ yɔ, ɖɩkaɣ hiɣu koboyaɣ nɛ pɩkɩlɩ.—Yak. 1:25.
HENDU 94 Ðɩwɛɛnɩ ɛsɩmɩyɛ Ɛsɔtɔm yɔɔ
a Cɔnɩ video Ndʋ ña-ɖaɣʋnaa yɔɔdʋʋ yɔ—Bibl kalʋʋ; kɩwɛ jw.org yɔɔ.
