Pɩfɛyɩ se ɖɩmaɣzɩ se Yesu tɔmkpɛlɩkɩyaa 70 tɔm taakɛdɩnɩ-ɩ yaa paayebi ɛ-wayɩ tɩŋʋʋ mbʋ pʋyɔɔ yɔ pataawɛɛ ɛ-cɔlɔ alɩwaatʋ ndʋ ɛlakaɣ kajalaɣ Kɩbaɣlʋ ɖanaɣ tɔɔnaɣ sɔnzɩ yɔ. Yesu ñɩnaɣ se ɛ nɛ ɛ-apostoloowaa pe-ɖeke pɛwɛɛnɩ sɔnzɩ nzɩ sɩ-taa.

Apostoloowaa 12 nɛ tɔmkpɛlɩkɩyaa 70 mba, pa-tɩŋa pɔ-tɔm kaakɛdɩnɩ-ɩ. Kiɖe tɛɛ lɛ, Yesu kaalɩzɩ abalaa 12 ɛ-tɔmkpɛlɩkɩyaa taa nɛ ɛyaa-wɛ se apostoloowaa. (Luka 6:​12-16) Ɛɛwɛ Galilee alɩwaatʋ ndʋ ɛɛya «Hiu nɛ Naalɛ» nɛ «etiyi-wɛ se powolo nɛ posusi Ɛsɔ Kewiyaɣ tɔm nɛ pawaa kʋdɔmɩŋ» yɔ. (Luka 9:​1-6) Pʋwayɩ ewobi Yuudee lɛ, ɛlɩzɩ «ɛyaa 70 lalaa nɛ etiyi-wɛ naalɛ naalɛ.» (Luka 9:51; 10:1) Ye mbʋ, Yesu kaawɛnɩ tɔmkpɛlɩkɩyaa lona ndɩ ndɩ taa nɛ posusuu ɛ-tɔm.

Yuuda ñɩma mba paapɩsɩ Yesu wayɩ tɩŋɩyaa yɔ, powokaɣ pɩ-yɔɔ nɛ pɔtɔkɩ Paska paa pɩnaɣ ŋga, nɛ pʋtɔma pa nɛ pɔ-hɔŋ taa mba pɛkpɛndaɣna nɛ pɔtɔkɩ kazandʋ ndʋ. (Ejl. 12:​6-11, 17-20) Yesu sɩm alɩwaatʋ ñɔtaa lɛ, ɛ nɛ ɛ-apostoloowaa powolo Yeruzalɛm. Ɛlɛ ɛtɩyaa ɛ-tɔmkpɛlɩkɩyaa mba payɩ paawɛ Yuudee, Galilee nɛ Peree yɔ se pɔkɔɔ nɛ pɛkpɛndɩ nɛ pɔtɔɔ Paska. Pɩnaɣ kpayɩ kpayɩ se Yesu ñɩnaɣ se ɛ nɛ ɛ-apostoloowaa pe-ɖeke pɛwɛɛnɩ sɔnzɩ nzɩ sɩ-taa. Eheyi-wɛ se: «Me-liu wɛɛ kpem se ma nɛ mɩ ɖɩtɔɔ Paska kʋnɛ pʋcɔ nɛ mɔntɔɔ kʋñɔŋ.»—Luka 22:15.

Lɩmaɣzɩyɛ kɩbanɖɛ naɖɩyɛ yɔɔ ɛlabɩ mbʋ. Pɩɩkazɩ pazɩ se Yesu ɛsɩ ɛzɩ «Ɛsɔ Heɣa ŋga kahɩzɩɣ ɛjaɖɛ kɩwɛɛkɩm yɔ.» (Yoh. 1:29) Pɩɩwɛɛ se ɛsɩ Yeruzalɛm ɖenɖe palaɣaɣ kɩlaŋ Ɛsɔ yɔ. Paska heɣa yekaɣ se Izrayɛɛlɩ mba ɩtɔzɩ se Yehowa kaalɩzɩ-wɛ Ejipiti ɛjaɖɛ taa. Ɛlɛ Yesu ñakaɣ tɩŋnʋʋ ɛ-kɩlaʋ yɔɔ nɛ ɛla nɛ pɩkpaɖɩ mbʋ. Ɛkaɣ lɩzʋʋ ɛyaa tɩŋa kɩwɛɛkɩm nɛ sɩm yomiye taa. (1 Kɔr. 5:​7, 8) Mbʋ Yesu laba yɔ, pɩkaɣ haʋ apostoloowaa 12 waɖɛ se papɩsɩ Krɩstʋ ɛgbɛyɛ tigiɖe taa mba. (Efɛz. 2:​20-22) Mbʋ pɩlabɩ ɖeu yɔ lɛ se tɛtʋ kiɖeɖetu Yeruzalɛm wɛnɩ «tigila pɛɛ 12» nɛ pama a-yɔɔ «Heɣa apostoloowaa 12 mba, pa-hɩla 12.» (Natʋ 21:​10-14) Ye mbʋ, apostoloowaa siɣsiɣ tɩnaa kaɣ labʋ tʋmɩyɛ kɩcɛyɩyɛ naɖɩyɛ se pɩsa nɛ Ɛsɔ tamaɣ la. Ðɩnaɣ mbʋ pʋyɔɔ Yesu kaasɔɔlaa se pɛwɛɛ ɛ-cɔlɔ alɩwaatʋ ndʋ ɛtɔkaɣ kɛdɛzaɣ Paska nɛ alɩwaatʋ ndʋ ɛlabɩ Kɩbaɣlʋ ɖanaɣ tɔɔnaɣ sɔnzɩ yɔ.

Tɔmkpɛlɩkɩyaa 70 nɛ tɔmkpɛlɩkɩyaa lalaa pataawɛɛ Yesu cɔlɔ alɩwaatʋ ndʋ ɛlakaɣ sɔnzɩ nzɩ yɔ. Paa mbʋ yɔ, Kɩbaɣlʋ ɖanaɣ tɔɔnaɣ sɔnzɩ nzɩ Yesu ɖʋwa yɔ, sɩkaɣ wazʋʋ tɔmkpɛlɩkɩyaa mba payɩ pɔɖɔkʋʋ pe-siɣsiɣ wɛtʋ yɔ. Krɩstʋ ñɩma mba payɩ pata-wɛ num pʋwayɩ yɔ, pakaɣ sʋʋ kewiyaɣ ɛgbɛyɛ nɖɩ Yesu ɖʋnɩ ɛ-apostoloowaa ɖoo ana yɔ ɖɩ-taa.—Luka 22:​29, 30.