Na “ɛyaa kpeekpe” pʋtɔdɩyɛ
ALƖWAATƲ ndʋ Yesu wɩlaɣ ɛ-wayɩ tɩŋɩyaa ɛzɩma posusi tɔm kɩbandʋ yɔ, eɖiɣzinaa se ɛyaa ɩɩkaɣ mʋʋ Kewiyaɣ tɔm paa ɛzɩmtaa. (Luka 10:3, 5, 6) Ðiisusuu tɔm lɛ, ɖɩpɩzɩɣ nɛ ɖɩkatɩ ɛyaa mba patɩsɔɔlɩ se pewelisi ɖɔ-tɔm yaa halɩ palakɩ-ɖʋ puuyaɣ lakasɩ yɔ. Toovenim taa lɛ, wɛtʋ tʋnɛ tɩpɩzɩɣ tiyele nɛ pɩwɛɛ-ɖʋ kaɖɛ se ɖɩna mba ɖisusuu-wɛ tɔm yɔ pa-pʋtɔdɩyɛ.
Ɛyʋ weyi ɛkɛ pʋtɔdɩyɛ nayʋ yɔ, eɖiɣziɣni lalaa kɩcɛyɩm nɛ kala wena a-taa pɛwɛɛ yɔ nɛ ɛsɔɔlʋʋ faaa se ɛla nabʋyʋ nɛ ɛsɩnɩ-wɛ. Ye ɖɩɩnaɣ mba ɖɩkatɩɣ tɔm susuu taa yɔ pa-pʋtɔdɩyɛ yɔ, pɩpɩzɩɣ piyele nɛ ɖɩɩtasɩɣ wɛʋ kpekpeka tɔm susuu taa nɛ ɖɩɩpɩzɩɣ ɖɔɖɔ nɛ ɖɩsɩnɩ-wɛ. Ɛlɛ alɩwaatʋ ndʋ ɖiwoki pɩ-yɔɔ nɛ ɖɩnaɣ ɛyaa pʋtɔdɩyɛ yɔ, pɩwɛ ɛzɩ ɛyʋ ɖʋʋ ɖasɩ miŋ taa se ɛmʋ camɩyɛ nɛ pɩkpaɖɩ yɔ, nɛ pɩkaɣ-ɖʋ sɩnʋʋ se ɖiwolo pɩ-yɔɔ nɛ ɖɩwɛɛ kpekpeka tɔm susuu taa!—1 Tes. 5:19.
Ɛzɩma ɖɩpɩzɩɣ nɛ ɖiwolo pɩ-yɔɔ nɛ ɖɩnaɣ ɛyaa lalaa pʋtɔdɩyɛ paa pɩwɛ kaɖɛ yɔ? Iyele nɛ ɖɩtazɩ kɩɖaŋ kɩbaŋ weyi Yehowa, Yesu, nɛ apostoloo Pɔɔlɩ pahawa yɔ ɩ-taa nɛ ɖɩna ɛzɩma ɖɩpɩzɩɣ nɛ ɖɩmaɣzɩnɩ-wɛ yɔ.
MAƔZƖNƖ YEHOWA PƲTƆDƖYƐ NAƲ
Pɩnzɩ kudokiŋ sakɩyɛ yɔ, pepisuu Yehowa hɩɖɛ yɔ. Paa mbʋ yɔ, ɛɖɔkɩ ɛ-tɩ nɛ “ɛlakɩ ɖeu mba paasɩŋ kʋjɔʋ yɔ, nɛ kañatʋ tɩnaa.” (Luka 6:35) Ɛwɩlɩ ɛ-camɩyɛ lakasɩ pɩtɩŋnɩ ɛzɩma ɛɖʋ suuɖu yɔ pɩ-yɔɔ. Yehowa sɔɔlaa se “ɛyaa kpeekpe” ihiɣ ñʋʋ yabʋ. (1 Tim. 2:3, 4) Paa Ɛsɔ ɛpaɖɩɣ kɩdɛkɛdɩm yɔ, ɛyaa mʋ ñɩm ɛ-ɛsɩndaa nɛ ɛtɩsɔɔlɩ se pa-taa nɔɔyʋ elesi e-wezuu.—2 Pɩy. 3:9.
Yehowa nawa se Sataŋ yʋlʋnzɩ ndɛŋgbɛzaɣ tɩnaa ɛsa. (2 Kɔr. 4:3, 4) Ðooo pɩjatʋ taa pawɩlɩ ɛyaa sakɩyɛ cɛtɩm tɔm nɛ wɛtʋ kɩdɛkɛdɩtʋ nɛ pʋyɔɔ lɛ, pɩwɛ-wɛ kaɖɛ se petisi nɛ pamʋ toovenim. Yehowa sɔɔlaa se ɛsɩnɩ-wɛ. Ɛzɩma ɖɩlaba nɛ ɖɩna?
Yʋsɩ lɩmaɣza wena Yehowa kaawɛnɩ caanaʋ taa Niniivi ñɩma yɔɔ yɔ. Paa paalakaɣ kañatʋ lakasɩ yɔ, Yehowa heyi Yoonaa se: “Nɛ ma yɔ mantaakpeɣ ɛjaɖɛ sɔsɔɖɛ Niniivi nɖɩ ɖɩ-taa ɛyaa kpaɖɩ [120000], mba paasɩŋ yʋsaɣ ŋga kɛwɛ nɩwaŋ nɛ nɩmɩyɛ pɛ-hɛkʋ taa yɔ?” (Yon. 4:11) Yehowa ɖiɣzinaa se Niniivi ñɩma kɛ kʋñɔndɩnaa fezuu taa, pʋyɔɔ ɛna pa-pʋtɔdɩyɛ nɛ etiyi Yoonaa se ɛpaɣ-wɛ.
Ɛzɩ Yehowa yɔ, ɛyaa mʋ ñɩm siŋŋ ɖɛ-ɛsɩndaa. Ðɩpɩzɩɣ nɛ ɖɩmaɣzɩnɩ-ɩ ye ɖɩñakɩ pana se ɖɩsɩnɩ mba pewelisiɣni-ɖʋ yɔ paa pɩwɛ ɛzɩ paakaɣ lɛɣzʋʋ yɔ.
MAƔZƖNƖ YESU PƲTƆDƖYƐ NAƲ
Ɛzɩ ɛ-Caa yɔ, alɩwaatʋ ndʋ Yesu naɣaɣ ɛyaa mba pɛwɛ kɛdɛɖaɣ taa fezuu taa lɛ, pɔ-tɔm lakaɣ-ɩ pʋtɔdɩyɛ. Bibl yɔɔdʋʋ se: “Ɛna ɛyaa canɖaŋ lɛ, pɩlabɩ-ɩ pʋtɔdɩyɛ, mbʋ pʋyɔɔ yɔ paawɛɛ nɛ palakɩ kʋñɔŋ nɛ pɔɖɔŋ tɔlʋʋ ɛzɩ wondu ndʋ tɩfɛyɩnɩ ninɖiɣyu yɔ.” (Mat. 9:36) Yesu kaanawa se mba pɔkɔma nɛ pewelisiɣ ɛ-tɔm yɔ, paawɩlɩ-wɛ cɛtɩm tɔm sakɩyɛ nɛ Ɛsɔ sɛtʋ ñʋndɩnaa wɩlaɣ-wɛ ɖɔɖɔ ñaŋ. Paa Yesu eɖiɣzinaa se sakɩyɛ kaɣ yebu nɛ kala wena pakatɩɣ yɔ, aɖɩɣ-wɛ nʋmɔʋ nɛ pekizi ndʋ pɛkpɛlɩkaa yɔ tɩ-yɔɔ ɖɔm yɔ, ewobi pɩ-yɔɔ nɛ ‘ɛwɩlɩ-wɛ tɔm sakɩyɛ.’—Mark. 4:1-9.
Taamʋ pana paa nɔɔyʋ ɛtɩmʋ-ŋ tɔm susuu taa yɔ
Ɛyʋ katɩɣ lɛɣzɩtʋ ndɩ ndɩ e-wezuu caɣʋ taa, nɛ mbʋ ɖɔɖɔ lɩmaɣza wena ɛyʋ kaawɛnɩ toovenim yɔɔ yɔ apɩzɩɣ nɛ alɛɣzɩ
Alɩwaatʋ ndʋ ɛyaa kiziɣ tɔm ndʋ ɖisusuu yɔ, pɩcɛyaa se ɖɩmaɣzɩ nɛ ɖɩna se ɛzɩ ɛbɛ yeba nɛ pɛwɛɛnɩ wɛtʋ ndʋ. Pɩtɩla pa-taa nabɛyɛ wɛnɩ lɩmaɣza wena atɩtʋʋzɩ yɔ Bibl nɛ Krɩstʋ ñɩma yɔɔ mbʋ pʋyɔɔ yɔ, payʋsaa se mba payaɣ pa-tɩ se Krɩstʋ ñɩma yɔ, paahaɣ kɩɖaʋ kɩbaŋʋ. Yaa lalaa ñanɩ cɛtɩm tɔm ndʋ sakɩyɛ yɔɔdʋʋ pɩlɩɩnɩ tisuu mbʋ ɖɩwɛna yɔ pɩ-yɔɔ. Yaa pɩtɩla ɖɔɖɔ yɔ, nabɛyɛ lɛ, ɛzɩma pɔ-hɔʋ taa ñɩma yaa po-kooka taa ñɩma kaɖɩnɩ-wɛ, alɩwaatʋ ndʋ pamʋʋ-ɖʋ yɔ, mbʋ yekina nɛ pekiziɣ.
Mba ɖɩkatɩɣ ɖɔ-tɔm susuu taa yɔ, pa-taa nabɛyɛ iiwelisiɣni-ɖʋ mbʋ pʋyɔɔ yɔ kala sɔsɔna wena pakatɩ pe-wezuu caɣʋ taa yɔ ayeba nɛ pɛwɛɛ laŋwɛɛkɩyɛ taa siŋŋ. Kim weyi ɛkɛ Ɛsɔtɔm tiyiyu yɔ ɛyɔɔdaa se: “Ðɔ-tɔm susuu kookasɩ nasɩyɩ taa lɛ, ɖɩkatɩɣ ɛyaa sakɩyɛ mba you yeba nɛ pelesi pa-ñɩm yɔ. Pɛfɛyɩnɩ lidaʋ kɩbaŋʋ nakʋyʋ cee wayɩ yɔɔ. Pɛwɛ ɛsɩñɩŋɩyɛ nɛ pana taa siŋŋ. Lona ana a-taa lɛ, ɖoŋ ɖoŋ ɖɩkatɩɣ ɛyaa mba pakaɖɩɣnɩ ɖɔ-tɔm susuu yɔ. Kɩyakʋ nakʋyʋ monsusaɣ tɔm lɛ, palabɩ-m puuyaɣ lakasɩ kpem.”
Paa paalabɩ Kim puuyaɣ lakasɩ mbʋ yɔ, ɛzɩma ewobi pɩ-yɔɔ nɛ ɛnaɣ ɛyaa pʋtɔdɩyɛ? Ɛkɛdaa se: “Alɩwaatʋ ndʋ mankatɩɣ kañatʋ lakasɩ nasɩyɩ yɔ, mɔntɔzʋʋ tɔm ndʋ tɩwɛ Aduwa 19:11 taa yɔ tɩ-yɔɔ. Pama peeɖe se: ‘Ɛyʋ lɔŋsɩnɖʋ kʋʋ ɛ-pana.’ Mɔntɔzʋʋ mbʋ pɩtalɩ mon-kooka taa ñɩma nɛ pɩɖɛɛ yɔ pɩ-yɔɔ lɛ, pɩsɩɣnɩ-m se mowolo pɩ-yɔɔ nɛ mana pa-pʋtɔdɩyɛ. Nɛ mba ɖɩkatɩɣ tɔm susuu taa yɔ, pɩtɩkɛ pa-tɩŋa pakaɖɩɣnɩ-ɖʋ. Halɩ ɖɩwɛnɩ pɩsɩ nɛ ŋna-ɩ waa egeetiye nɖɩ ɖɩ-taa.
Pɩwɛɣ ɖeu se ɖa-taa paa anɩ ɛpɔzɩ ɛ-tɩ se: ‘Ye maawɛnɩ mba monsusuu-wɛ tɔm yɔ po-lone taa, ɛzɩma maalaba?’ Ðɩkpaɣ se ɖoŋ ɖoŋ lɛ, ŋnɩɣ pɔyɔɔdʋʋ cɛtɩm tɔm Yehowa Aseɣɖe Tɩnaa yɔɔ, ɛzɩma pɩlakɩ-ŋ? Pɩtɩla, ye ɖɛwɛnɩ wɛtʋ ndʋ tɩ-taa yɔ, ɖɩɩkaɣ tisuu se posusi-ɖʋ tɔm nɛ pʋpɔzʋʋ se lalaa ɩnɩɩ ɖɔ-tɔm taa. Ye ɖɩtɔzʋʋ paɣtʋ ndʋ Yesu ɖʋwa se ɖɩla lalaa mbʋ ɖɩsɔɔlaa se palabɩ-ɖʋ yɔ tɩ-yɔɔ yɔ, piseɣtiɣ-ɖʋ nɛ ɖɩna ɛyaa pʋtɔdɩyɛ paa pɩwɛ kaɖɛ yɔ.—Mat. 7:12.
MAƔZƖNƖ PƆƆLƖ PƲTƆDƖYƐ NAƲ
Apostoloo Pɔɔlɩ na ɛyaa pʋtɔdɩyɛ halɩ pɩkpɛndɩnɩ mba pakaɖaɣnɩ-ɩ siŋŋ yɔ. Ɛbɛ yɔɔ? Mbʋ pʋyɔɔ yɔ ɛtɩsɔɔ mbʋ ɛ-maɣmaɣ ɛɛkɛnaa nɛ pʋcɔ nɛ ɛmʋʋ toovenim yɔ pɩ-yɔɔ. Ɛyɔɔdaa se: “Ma weyi ɖooo lɛ maasɩm man-tɩ kpazʋʋ, kʋñɔŋ wɩlʋʋ nɛ tʋʋ yeke yɔ. Ɛlɛ pekpeɣ-m, mbʋ yɔ malakaɣ kɩɩsɩŋɩyʋ lakasɩ na, mantaafɛyɩnɩ tisuu.” (1 Tim. 1:13) Eɖiɣzinaa se Yehowa nɛ Yesu pana ɛ-pʋtɔdɩyɛ siŋŋ. Pɩtʋʋ fɛyɩ se wɛtʋ ndʋ ɛ-maɣmaɣ ɛɛwɛna yɔ, ɛnaɣaɣ-tʋ mba esusaɣ-wɛ tɔm yɔ pa-taa nabɛyɛ yɔɔ.
Nabʋyʋ taa Pɔɔlɩ kataɣ ɛyaa mba pɔñɔnɩ cɛtɩm wɩlɩtʋ pɩdɩɩfɛyɩ yɔ. Ɛzɩma ɛlakaɣ? Tʋma 17:16 yɔɔdaa Pɔɔlɩ talɩ Atɛɛnɩ tɛtʋ taa lɛ, ɛ-taa wɩɩnɩ “tɛtʋ ndʋ mbʋ pʋyɔɔ yɔ tɩ-taa nɛ agɔlɩma sɩʋ kpelisi sakɩyɛ.” Paa mbʋ yɔ, Pɔɔlɩ tɩŋnɩ mbʋ pɩɖʋ-ɩ ɖɩwɩzɩyɛ yɔ pɩ-yɔɔ nɛ esusi tɔm camɩyɛ. (Tʋma 17:22, 23) Ɛtɩŋnɩ nʋmɔŋ ndɩ ndɩ yɔɔ se ɛ-tɔm susuu ɛla nɔɔ kʋɖʋmaɣ nɛ ɛyaa ndɩ ndɩ mba ɛkataɣ yɔ se ‘paa pɩɩla ɛzɩma yɔ ɛya nabɛyɛ ñʋʋ.’—1 Kɔr. 9:20-23.
Ðɩpɩzɩɣ nɛ ɖɩmaɣzɩnɩ Pɔɔlɩ ye ɖɩtɩlɩ wɛtʋ kɩdɛkɛdɩtʋ ndʋ ɛyaa wɛna nɛ cɛtɩm wɩlɩtʋ ndʋ pɔñɔnaa yɔ nɛ pʋwayɩ lɛ, ‘ɖiheyi-wɛ tɔm kɩbandʋ’ nɛ lɛɣtʋ yɔ. (Iza. 52:7) Koobu halɩñɩnʋ weyi payaɣ se Dorothy yɔ ɛyɔɔdaa se: “Kooka ŋga ka-taa ɖisusuu tɔm yɔ, pawɩlɩ ɛyaa sakɩyɛ se Ɛsɔ wɛ kañatʋ nɛ ɛhʋʋnɩ ɛyaa tɔm. Kajalaɣ taa lɛ, mansaŋ ɛyaa mba pɛwɛnɩ lɩmaɣza ana yɔ tisuu sɔsɔm mbʋ pɛwɛnɩ Ɛsɔ yɔɔ yɔ pɩ-yɔɔ, nɛ pʋwayɩ lɛ, mɔhɔŋ pa-lɩmaɣza nɛ mowokini tɔm ndʋ Bibl yɔɔdaa pɩlɩɩnɩ Yehowa sɔɔlɩm nɛ cee wayɩ tamaɣ ŋga ɛlabɩ ɛyaa yɔ kɔ-yɔɔ.”
“WA KƖDƐKƐDƖM NƐ KƖBANDƲ LABƲ”
Ðɩwɛɣ nɛ ɖɩñɔtʋʋnɩ kɛdɛzaɣ kɩyakɩŋ ɛnɛ ɩ-ɖɩdɛnɖɛ lɛ, ɖɩkaɣ katʋʋ ɛyaa mba “pakpaɣ ɖoŋ tam kɩdɛkɛdɩm labʋ taa” yɔ, ɖɔ-tɔm susuu taa. (2 Tim. 3:1, 13) Ɛlɛ pɩtɩpɔzɩ se ɖiyele nɛ pɛ-wɛtʋ la nɛ ɖikizi ɛyaa pʋtɔdɩyɛ naʋ yaa ɖilesi taa leleŋ weyi ɖɩwɛna yɔ. Yehowa pɩzɩɣ nɛ ɛha-ɖʋ ɖoŋ nɛ ɖiwolo pɩ-yɔɔ nɛ ɖɩwa “kɩdɛkɛdɩm nɛ kɩbandʋ labʋ.” (Roma 12:21) Jessica weyi ɛkɛ nʋmɔʋ lɩzɩyʋ yɔ ɛyɔɔdaa se: “Ðoŋ ɖoŋ lɛ, mankatɩɣ ɛyaa mba pɛfɛyɩnɩ tɩ luzuu nɛ pohoŋuu-ɖʋ tɔm susuu taa yɔ. Wɛtʋ tʋnɛ tɩpɩzɩɣ tiyele nɛ ɛyʋ taa wɩɩ. Ye mankatɩ nɔɔyʋ mbʋ yɔ, pʋcɔ nɛ moncosi-i lɛ, mantɩmɩɣnɩ Yehowa me-liu tɛɛ nɛ mɔnpɔzɩ-ɩ se ɛsɩnɩ-m nɛ mɛwɛɛnɩ lɩmaɣza wena ɛwɛnɩ ɛyʋ ɛnʋ ɛ-yɔɔ yɔ. Piyeki nɛ maakaŋ ma-lɩmaɣza ɛzɩma manɩɣ man-tɩ taa yɔ pɩ-yɔɔ, ɛlɛ ɛzɩma mankpaɣna nɛ mansɩnɩ ɛyʋ ɛnʋ yɔ, pɩ-yɔɔ mamaɣzɩɣ.”
Ðiwoki pɩ-yɔɔ nɛ ɖɩñɩnɩɣ ɛyaa mba pamʋnɩ tam tam wezuu yɔ
Ɛzɩma ɖɩɖʋʋ suuɖu nɛ ɖɩsɩɣnɩ ɛyaa fezuu taa yɔ, piyeki nɛ nabɛyɛ mʋ toovenim
Pɩwɛɛ ɖɔɖɔ se ɖɩkpazɩɣ ɖoŋ koobiya mba ɖa nɛ wɛ ɖisusuu tɔm yɔ. Jessica yɔɔdaa se: “Alɩwaatʋ ndʋ ma nɛ koobu nɔɔyʋ ɖɩwɛɣ nɛ ɖisusuu tɔm nɛ ɛkatɩ kaɖɛ naɖɩyɛ yɔ, mañakɩ pana se mantaakɩlɩ ma-lɩmaɣza kam pɩ-yɔɔ. Ɛlɛ mɔhɔŋ ɛ-lɩmaɣza nɛ mowokini pee kɩbana wena ɖɔ-tɔm susuu tʋmɩyɛ wɛɛ nɛ ɖɩlʋlʋʋ yɔ a-yɔɔ, paa nabɛyɛ iiwelisiɣni-ɖʋ yɔ.”
Yehowa sɩm kala wena ɖɩkatɩɣ tɔm susuu taa yɔ. Ɛ-taa lakɩ leleŋ siŋŋ alɩwaatʋ ndʋ ɖɩmaɣzɩɣnɩ-ɩ nɛ ɖɩnaɣ ɛyaa pʋtɔdɩyɛ yɔ! (Luka 6:36) Ɛlɛ Yehowa pʋtɔdɩyɛ naʋ wɛnɩ kamaɣ. Ða-taa pɩzɩɣ nɛ pɩtɛ se ɛsɩm alɩwaatʋ ndʋ tɩ-yɔɔ ɖeyi ɖeyi ɛjaɖɛ kɩdɛkɛdɩyɛ ɖɩnɛ ɖɩkaɣ tɛm yɔ. Pʋcɔ nɛ pɩtalɩ mbʋ lɛ, pɩcɛyaa se ɖisusi tɔm. (2 Tim. 4:2) Iyele nɛ ɖiwolo pɩ-yɔɔ nɛ ɖisusuu tɔm nɛ kpekpeka nɛ ɖɩnaɣ ɖɔɖɔ “ɛyaa kpeekpe” pʋtɔdɩyɛ.
