1. (a) Ɛbɛ pɩzɩɣ pɩsɩnɩ-ɖʋ nɛ ɖɩwɛɛnɩ lɔŋsɩnɖɛ? (b) Nɛ ye ɖɩwɛnɩ-ɖɩ, wazasɩ nzɩ ɖihikiɣ?

YEHOWA cɔlɔ lɔŋsɩnɖɛ lɩɣna, nɛ ɛsɔɔlɩ faaa se ɛha lɔŋsɩnɖɛ nɖɩ paa anɩ. Yakubu 1:5 yɔɔdʋʋ se: “Ye mɩ-taa nɔɔyʋ ɛfɛyɩnɩ lɔŋ kɔyɔ, ɛpɔzɩ-ɩ Ɛsɔ, ɛhaɣ-ɩ ɛyaa kpeekpe yem, eemidiɣ ɛ-mɔɔŋ tɛɛ nɛ pɩkaɣ-ɩ lɔŋ ɛnɩ haʋ.” Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩmʋ Ɛsɔ lɔŋsɩnɖɛ yɔ, ɩ-taa lɛɛkʋ lɛ se ɖitisi faaa nɛ ɛsɩɣzɩ-ɖʋ lɔŋ. Nɛ lɔŋsɩnɖɛ nɖɩ ɖɩsɩɣnɩ-ɖʋ se ɖɩcaɣ wezuu kɩbaŋʋ nɛ taabalɩyɛ kɩbanɖɛ wɛɛ ɖa nɛ Ɛsɔ ɖɛ-hɛkʋ taa. (Adu. 2:10-12) Mbʋ kaɣnɩ yebu nɛ ‘ɖɩɖɔkɩ ɖa-tɩ kpam Ɛsɔ sɔɔlɩm taa . . . nɛ ɖihiɣ tamtam wezuu.”—Yud. 21.

2. Ɛbɛ pɩzɩɣ pɩsɩnɩ-ɖʋ nɛ ɖɩwɛɛnɩ ɛsɩmɩyɛ lɔŋ weyi Ɛsɔ sɩɣzɩɣ-ɖʋ yɔ ɩ-yɔɔ?

² Paa mbʋ yɔ, ɖɛ-tɛ mantɩtalɩ pilim wɛtʋ, falɩsʋʋ mbʋ ɖɩmʋwa nɛ wɛtʋ lɛɛtʋ peyeki nɛ nabʋyʋ taa pɩwɛɣ kaɖɛ se ɖɩmʋ lɔŋ sɩɣzʋʋ camɩyɛ. Ɛlɛ alɩwaatʋ ndʋ pasɩɣzɩɣ-ɖʋ lɔŋ nɛ ɖɩnaɣ wazasɩ nzɩ pɩkɔŋna yɔ lɛ, ɖa-taa lakɩ leleŋ nɛ pɩsɩɣnɩ-ɖʋ nɛ ɖɩnaɣ se Ɛsɔ sɔɔlɩ-ɖʋ. Aduwa 3:11, 12 yɔɔdʋʋ se “Taalɔ, man-pɩyalʋ, lɔŋ weyi [Yehowa] sɩɣzɩɣ-ŋ yɔ, . . . [mbʋ pʋyɔɔ yɔ Yehowa] hɔŋ ɛsɔɔlɩ weyi yɔ, ɛ-nɩŋgbaaŋ.” Ðɩtaasɔɔ kaaʋ se Yehowa sɔɔlaa se piɖeni-ɖʋ. (Kalɩ Ebree 12:5-11.) Yehowa sɩm-ɖʋ camɩyɛ, pʋyɔɔ lɛ ɛsɩɣzɩɣ-ɖʋ lɔŋ ɛzɩ pɩmʋnaʋ yɔ paa ɛzɩmtaa, nɛ ɛɛɖɛlɛsɩɣ  niye. Lɛɛlɛɛyɔ iyele nɛ ɖɩtazɩ lɔŋ sɩɣzʋʋ nʋmɔŋ naanza taa: (1) Tɩ falɩsʋʋ, (2) lɔŋ sɩɣzʋʋ mbʋ pɩlɩɣnɩ lʋlɩyaa cɔlɔ yɔ, (3) Krɩstʋ ɛgbɛyɛ taa lɔŋ sɩɣzʋʋ nɛ (4) mbʋ pɩpɩzɩɣ nɛ pɩha ɛyʋ wɩzasɩ nɛ pɩkpaɖɩ wɩzasɩ nzɩ nɩŋgbaŋʋʋ hɔm kɔŋna yɔ.

3. Ɛzɩma pɩɣa nakɛyɛ pɩzɩɣ nɛ kɛkpɛlɩkɩ tɩ falɩsʋʋ? Ha kɩɖaʋ nakʋyʋ.

³ Tɩ falɩsʋʋ hɔɔlʋʋ nakʋyʋ lɛ se ɛyʋ ɛɖɔkɩ ɛ-tɩ nɛ pɩsa nɛ ɛwɛɛnɩ wɛtʋ kɩbandʋ nɛ lɩmaɣza kɩbana. Paalʋlʋʋ ɛyʋ nɛ wɛtʋ ndʋ. Pɩwɛɛ se ɖɩkpɛlɩkɩ tɩ falɩsʋʋ. Ðɩkpaɣ kɩɖaʋ kʋnɛ: Alɩwaatʋ ndʋ pɩɣa paɣzɩɣ kpɛlɩkʋʋ cɛɛcɛ saʋ yɔ, ɖoŋ ɖoŋ lɛ ka-lʋlɩyʋ ɖɔkʋʋ cɛɛcɛ se kataatɔlɩ. Ɛlɛ pɩkɔŋ nɛ pɩpaɣzɩ-kɛ malɩnʋʋ lɛ, lʋlɩyʋ ɛɛtasɩɣ ɖɔkʋʋ cɛɛcɛ paa ɛzɩmtaa. Kɔkɔŋ nɛ katɩlɩ saʋ camɩyɛ lɛ, eyeki ke-ɖeke. Mbʋ ɖɔɖɔ ye lʋlɩyaa ɩwɛ suuɖu nɛ pasɩɣzɩɣ pe-piya lɔŋ ɖoŋ ɖoŋ nɛ maɣzɩm mbʋ pɩlɩnɩ Yehowa cɔlɔ yɔ, pasɩɣnɩ-sɩ nɛ sɩtɩlɩ sɩ-tɩ falɩsʋʋ nɛ sɩwɛɛ lɛɣtʋ.—Efɛz. 6:4.

4, 5. (a) Ɛbɛ yɔɔ tɩ falɩsʋʋ kɛ ‘ɛyʋtʋ kɩfatʋ’ hɔɔlʋʋ ŋgʋ kɩ-tɔm cɛyaa yɔ? (b) Paa picoɖi-ɖʋ tam sakɩyɛ yɔ, ɛbɛ yɔɔ pɩtɩpɔzɩ se pitibi-ɖʋ yɔɔɔ?

⁴ Mbʋ ɖɔɖɔ pɩwɛ mba palabɩ ɛyaa sɔsaa pʋcɔ nɛ patɩlɩ Yehowa yɔ pɔ-hɔɔlʋʋ taa. Pɩtɩla pɛtɛm kpɛlɩkʋʋ ɛzɩma pafalɩsɩ pa-tɩ hɔɔlɩŋ nɩɩyɩ taa yɔ. Paa mbʋ yɔ, patɩtɩɩpɩtɩ fezuu taa. Ɛlɛ alɩwaatʋ ndʋ papaɣzɩɣ pana ñaɣʋ se pamaɣzɩnɩ Krɩstʋ nɛ pɛwɛɛnɩ ‘ɛyʋtʋ kɩfatʋ’ lɛ, papɩɣ fezuu taa pazɩ pazɩ. (Efɛz. 4:23, 24) Pʋcɔ nɛ ɛyʋ pɩɩ fezuu taa lɛ, pɩcɛyaa se ɛkpɛlɩkɩ ɛ-tɩ falɩsʋʋ. Ye ɖɩlakɩ mbʋ yɔ, pɩsɩɣnɩ-ɖʋ nɛ ɖɩkpɛlɩkɩ “kɩwɛɛkɩm seu nɛ hadɛ cɩnɛ lakasɩ kɩdɛkɛdɩsɩ seu, se ɖɩwɛɛ ɛjaɖɛ ɖɩnɛ ɖɩ-yɔɔ ɛzɩ ɛyaa mba pamaɣzɩɣ camɩyɛ, pɛwɛ siɣsiɣ nɛ pañaŋ Ɛsɔ yɔ.”—Tiiti 2:12.

⁵ Paa mbʋ yɔ, ɖa-tɩŋa ɖɩkɛ kɩwɛɛkɩm laɖaa. (Ekl. 7:20) Pʋyɔɔ lɛ, ye picoɖi nɔɔyʋ yɔ, pɩtɩwɩlɩ se ɛ-tɔm tɛma yaa ɛɛsɩŋ ɛ-tɩ ɖɔkʋʋ. Aduwa 24:16 yɔɔdaa se: “Ɛyʋ siɣsiɣ tʋ kaɣ tɔlʋʋ tam lʋbɛ nɛ ɛkaɣ kʋyʋʋ.” Ɛbɛ pɩzɩɣ pɩsɩnɩ-ɩ nɛ ɛɖɛɛnɩ ɛsɩndaa? Pɩtɩkɛ ɛ-maɣmaɣ e-ɖoŋ, ɛlɛ Ɛsɔ fezuu kiɖeɖeu pɩzɩɣna nɛ kɩsɩnɩ-ɩ. (Kalɩ Filiipi 4:13.) Fezuu ŋgʋ ki-piye hɔɔlʋʋ nakʋyʋ lɛ tɩ ɖɔkʋʋ nɛ nɔɔ kʋɖʋmaɣ wɛ tɩ ɖɔkʋʋ nɛ tɩ falɩsʋʋ pɛ-hɛkʋ taa.

6. Ɛbɛ pɩzɩɣ pɩsɩnɩ-ɖʋ nɛ ɖɩkɛ Ɛsɔtɔm kpɛlɩkɩyaa kɩbama? (Cɔnɩ kiɖe tɛɛ kɩlɛmʋʋ.)

⁶ Pɩsa nɛ ɖɩfalɩsɩ ɖa-tɩ lɛ, pɩcɛyaa ɖɔɖɔ se ɖɩtɩmɩɣnɩ Ɛsɔ nɛ ɖa-laŋɩyɛ pilim, ɖɩkpɛlɩkɩɣ Bibl nɛ ɖɩmaɣzɩɣ ndʋ ɖɩkpɛlɩkɩɣ yɔ tɩ-yɔɔ. Ɛlɛ ye Ɛsɔtɔm kpɛlɩkʋʋ ɛtɩmalɩnɩ-ŋ yaa pɩwɛ-ŋ kaɖɛ yɔ, ɛbɛ ŋpɩzɩɣ nɛ ŋla? Tɔzɩ se ye ŋsɔɔlaa yɔ, Yehowa pɩzɩɣ nɛ ɛsɩnɩ-ŋ. Ɛpɩzɩɣ nɛ ɛsɩnɩ-ŋ nɛ ‘ŋsɔɔlɩ’ ɛ-Tɔm. (1 Pɩy. 2:2) Kajalaɣ lɛ, tɩmnɩ Yehowa nɛ ŋpɔzɩ-ɩ se ɛsɩnɩ-ŋ nɛ ŋmalɩsɩ ña-tɩ nɛ ɛ-Tɔm kpɛlɩkʋʋ. Pʋwayɩ lɛ, yele nɛ ña-lakasɩ la nɔɔ kʋɖʋmaɣ nɛ ña-adɩma. Pɩtɩla kajalaɣ taa lɛ, ŋpɩzɩɣ nɛ ŋkpakɩɣ alɩwaatʋ pazɩ pazɩ nɛ ŋkpɛlɩkɩɣna. Alɩwaatʋ wɛɣ nɛ tɩɖɛɣ lɛ, kpɛlɩkʋʋ kaɣ-ŋ kɛdɩnʋʋ nɛ pɩkɩlɩ! Alɩwaatʋ ndʋ ŋɖʋwa se ŋkpɛlɩkɩɣ nɛ ŋmaɣzɩɣ Yehowa wɩlɩtʋ yɔɔ yɔ, tɩkaɣ-ŋ kɛʋ taa leleŋ alɩwaatʋ siŋŋ.—1 Tim. 4:15.

7. Ɛzɩma tɩ falɩsʋʋ pɩzɩɣ pɩsɩnɩ-ɖʋ nɛ ɖɩtalɩ fezuu taa kaɖʋsɩ?

⁷ Tɩ falɩsʋʋ sɩɣnɩ-ɖʋ se ɖɩtalɩ fezuu taa kaɖʋsɩ. Maɣzɩ kɩɖaʋ kʋnɛ kɩ-yɔɔ nɛ ŋna! Hɔʋ ñʋʋdʋ nɔɔyʋ paɣzɩ ɖiɣzinuu se ɛtɩtasɩ wɛʋ kpekpeka fezuu taa ɛzɩ ɖooo lɛ yɔ. Peeɖe ɛɖʋ ɛ-tɩ kaɖʋwa se ɛpɩsɩɣ paa ɖooye nʋmɔʋ lɩzɩyʋ. Nɛ ɖoŋ ɖoŋ lɛ, ɛkalaɣ ɛgbɛyɛ takayɩsɩ taa tɔm ñʋŋ weyi ɩyɔɔdʋʋ nʋmɔʋ lɩzʋʋ tʋmɩyɛ tɔm yɔ nɛ ɩtɩmɩɣ pɩ-yɔɔ ɖɔɖɔ. Ɛlabɩ mbʋ lɛ, pɩkpazɩ-ɩ ɖoŋ fezuu taa nɛ piseɣti-i se ɛñaɣ pana nɛ ɛtalɩ ɛ-kaɖʋwa. Pɩtasɩ lɛ, ehikiɣ waɖɛ naɖɩyɛ lɛ, ɛlakɩ ɖʋtʋ nɛ ɛlakɩ nʋmɔʋ lɩzʋʋ sɩnɩyʋ tʋmɩyɛ. Ɛbɛ lɩ  pɩ-taa? Paa ɛɛkatɩ kala yɔ, ɛɛkam ɛ-lɩmaɣza paa ɖooye nʋmɔʋ lɩzʋʋ tʋmɩyɛ yɔɔ nɛ ɛñaɣ pana nɛ ɛtalɩ kaɖʋwa ŋga.

8-10. Ɛbɛ pɩzɩɣ nɛ pɩsɩnɩ lʋlɩyaa mba pɛkɛ Krɩstʋ ñɩma yɔ nɛ pafalɩsɩ pe-piya camɩyɛ nɛ sɩsɛɛ Yehowa? Ha kɩɖaʋ nakʋyʋ.

⁸ Waɖɛ sɔsɔɖɛ pɩkɛnɩ lʋlɩyaa Krɩstʋ mba se pasɩɣzɩ lɔŋ pe-piya nɛ “maɣzɩm mbʋ pɩlɩɣnɩ [Yehowa] cɔlɔ yɔ.” (Efɛz. 6:4) Tʋmɩyɛ nɖɩ ɖɩfɛyɩ kɛlɛʋ, kɔzɩ kɔzɩ ɖa-alɩwaatʋ tʋnɛ tɩ-taa. (2 Tim. 3:1-5) Toovenim taa lɛ, paalʋlʋʋ piya lɛ, sɩɩtɩlɩɣ kɩbam nɛ kɩdɛkɛdɩm kpaagbaa. Paa pɩɣa ŋga lɛ, palʋlʋʋ-kɛ nɛ ɛhʋyɛ kpaagbaa, ɛlɛ pɩcɛyaa se pafalɩsɩ-ɖɩ pʋcɔ nɛ ɖɩpɩzɩ nɛ ɖɩwazɩ-kɛ. (Roma 2:14, 15) Bibl tɔm taa tazɩyʋ nɔɔyʋ yɔɔdaa se Grɛɛkɩ tɔm piye nɖɩ pɛɖɛzaa se “lɔŋ sɩɣzʋʋ” yɔ, papɩzɩɣ nɛ pɛɖɛzɩ-ɖɩ ɖɔɖɔ se “pɩɣa paɣlɩka.”

⁹ Piya nzɩ pasɩɣzɩɣ-sɩ lɔŋ nɛ sɔɔlɩm yɔ, pɩkandɩyɩɣ sɩ-yɔɔ. Pɩsɩɣnɩ-sɩ nɛ sɩtɩlɩɣ se tɩ-yɔɔ wɛʋ wɛnɩ kamaɣ nɛ lɩmaɣza wena sɩkpakɩɣ nɛ wezuu ŋgʋ sɩcakɩ yɔ, pɩkaɣ lʋlʋʋ pee kɩbana yaa kɩdɛkɛda. Pʋyɔɔ pɩcɛyaa se lʋlɩyaa Krɩstʋ mba iyele nɛ Yehowa ɖiyi-wɛ. Lʋlɩyaa, ɩtaasɔɔ se nʋmɔŋ weyi ɩ-yɔɔ ɛyaa tɩŋɩɣna nɛ pasɩɣzɩɣ pe-piya lɔŋ yɔ, alɩwaatʋ kaaɖɛɣ lɛ ɩlɛɣzɩɣ. Pɩtasɩ lɛ, nʋmɔʋ ŋgʋ lʋlɩyaa lakɩnɩ tʋmɩyɛ ɛjaɖɛ naɖɩyɛ taa yɔ, kɩpɩzɩɣ nɛ kɩwɛɛ ndɩ nɛ ŋgʋ ajɛɛ lɛɛna taa mba lakɩnɩ tʋmɩyɛ yɔ. Ye lʋlɩyaa iwelisiɣni Ɛsɔ yɔ, pɩsɩɣnɩ-wɛ nɛ peɖiyi pe-piya camɩyɛ nɛ paakpekiɣ nʋmɔŋ weyi ɩ-yɔɔ pɩwɛɛ se patɩŋna nɛ pala mbʋ yɔ kikpeu yaa paatɩŋɩɣnɩ ɖɔɖɔ ɛyaa lɔŋsɩnɖɛ yɔɔ se pasɩɣzɩ pe-piya lɔŋ.

¹⁰ Iyele nɛ ɖɩkpaɣ Noowa kɩɖaʋ: Alɩwaatʋ ndʋ Yehowa heyi Noowa se ɛsaɣ aɖakaɣ yɔ, ɛtaapɩzɩɣ se ɛtaa liu ɛ-maɣmaɣ ɛ-lɔŋsɩnɖɛ. Wiɖiyi ɛtaasaɣ aɖakaɣ nɛ ɛna. Ye mbʋ, pɩɩpɔzaa se ɛtaa liu Yehowa nɛ ‘ɛla mbʋ Ɛsɔ pɔzɩ-ɩ yɔ.’ (Kiɖe 6:22) Ɛbɛ lɩ pɩ-taa? Noowa pɩzaa nɛ ɛla tʋmɩyɛ nɖɩ camɩyɛ nɛ pɩya ɛ nɛ ɛ-hɔʋ pa-ñʋʋ. Noowa kaakɛ ɖɔɖɔ hɔʋ ñʋʋdʋ kɩbanʋ, mbʋ pʋyɔɔ yɔ ɛɛta Yehowa lɔŋsɩnɖɛ liu. Paa ɛɛkatɩ kala sɔsɔna ɛyaa kɩdɛkɛdaa mba paawɛɛ nɛ pʋcɔ nɛ Tɛʋ Sɔsɔʋ nɩɣ yɔ pɛ-hɛkʋ taa yɔ, ɛpɩzaa nɛ ɛsɩɣzɩ e-piya lɔŋ camɩyɛ nɛ ɛha-sɩ kɩɖaʋ kɩbaŋʋ.—Kiɖe 6:5.

11. Lʋlɩyaa kaasɩɣzɩɣ pe-piya lɔŋ lɛ, ɛbɛ yɔɔ pɩcɛyaa se paha kɩɖaʋ kɩbaŋʋ?

¹¹ Lʋlɩyaa, ɛzɩma ɩpɩzɩɣ ‘ɩla mbʋ Ɛsɔ pɔzʋʋ-mɩ yɔ?’ Pɩwɛɛ se iwelisini Yehowa. Iyele nɛ Yehowa tɩŋnɩ ɛ-Tɔm nɛ ɛ-ɛgbɛyɛ pɔ-yɔɔ nɛ eɖiyi-mɩ mi-piya falɩsʋʋ nʋmɔʋ taa. Alɩwaatʋ wɛɣ nɛ tɩɖɛɣ lɛ, pɩtʋʋ fɛyɩ se mi-piya taa kaɣ labʋ leleŋ nɛ sɩsɛɛ-mɩ pʋyɔɔ. Koobu abalɩñɩnʋ nɔɔyʋ yɔɔdaa se: “Mɛnsɛɣ ma-lʋlɩyaa kpem ɛzɩma pafalɩsɩ-m yɔ pʋyɔɔ. Palabɩ mbʋ payɩ papɩzɩɣ yɔ se potukuni ma-laŋɩyɛ. Mba sɩnɩnɩ-m nɛ manpɩzɩ mɛnɖɛɛnɩ ɛsɩndaa fezuu taa.” Ɛlɛ  paa lʋlɩyaa nabɛyɛ ɩñaɣ pana kpem yɔ, piya nasɩyɩ kiziɣ Yehowa sɛʋ. Paa mbʋ yɔ, ye lʋlɩyaa mba palabɩ po-ɖoŋ ɖeɖe nɛ pawɩlɩ pa-pɩɣa toovenim tɔm yɔ, pɛwɛɣnɩ ɛhʋyɛ kɩbanɖɛ. Papɩzɩɣ nɛ pataa liu se wiɖiyi pa-pɩɣa ŋga kekizi Yehowa yɔ, kapɩsɩɣ nɛ kɔkɔɔ Yehowa ɖɩɣa taa.

12, 13. (a) Ɛzɩma lʋlɩyaa Krɩstʋ mba pɩzɩɣ nɛ pawɩlɩ se pañaŋ Yehowa alɩwaatʋ ndʋ palɩzɩɣ pa-pɩɣa nakɛyɛ ɛgbɛyɛ taa yɔ? (b) Wazasɩ nzɩ hɔʋ nakʋyʋ hiɣ alɩwaatʋ ndʋ lʋlɩyaa ñɔnɩ Yehowa yɔ?

¹² Alɩwaatʋ ndʋ palɩzɩɣ lʋlɩyaa nabɛyɛ pɩɣa ɛgbɛyɛ taa yɔ, pɩtakɩɣ ñamtʋ ndʋ pɛwɛnɩ Yehowa yɔɔ yɔ siŋŋ. Maɣzɩ koobu halɩñɩnʋ ɛnɛ ɛ-kɩɖaʋ yɔɔ nɛ ŋna. Paalɩzɩ ɛ-pɛlɛ ɛgbɛyɛ taa nɛ ɛlɛ lɩɩ ɖɩɣa. Koobu ɛnʋ ɛyɔɔdaa se: “Mañɩnaɣ kawanaɣ ɛgbɛyɛ takayɩsɩ taa se pɩsa nɛ mɔñɔtɩnɩ mɛn-pɛlɛ nɛ man-sayɩ. Ɛlɛ ma-walʋ ñaɣ pana nɛ ɛsɩnɩ-m nɛ sɔɔlɩm se mana se lɛɛlɛɛyɔ lɛ, ɖɛ-pɛlɛ tɩtasɩ wɛʋ ɖɔ-hɔʋ taa nɛ pʋyɔɔ lɛ, pɩtɩpɔzɩ se ɖɩtasɩ-ɩ ñɔtɩnʋʋ yaa ɖɩɖʋ ɖɔ-nɔɔ ɛ-tɔm taa.”

¹³ Pɩlabɩ pɩnzɩ cabɩ pʋwayɩ lɛ, papɩsɩnɩ pɛlɛ ɛnʋ ɛgbɛyɛ taa. E-ɖoo yɔɔdaa se: “Lɛɛlɛɛyɔ ɛyaɣ-m pɔrtaabɩlɩ yɔɔ yaa etiyiɣni-m message waa paa evemiye nɖɩ. Ɛñaŋ ma nɛ ma-walʋ siŋŋ mbʋ pʋyɔɔ yɔ, eɖiɣzinaa se alɩwaatʋ ndʋ paalɩzɩ-ɩ ɛgbɛyɛ taa yɔ ɖɩɩñɔnɩ Ɛsɔ paɣtʋ kpam. Lɛɛlɛɛyɔ taabalɩyɛ kɩbanɖɛ wɛ ɖa nɛ ɩ ɖɛ-hɛkʋ taa.” Ye palɩzɩ ña-pɩɣa nakɛyɛ ɛgbɛyɛ taa yɔ, ŋkaɣ wobu pɩ-yɔɔ nɛ ‘ŋtaa Yehowa liu nɛ ña-laŋɩyɛ pilim nɛ ŋkizi ña-maɣmaɣ ñɔ-lɔŋ liu taʋ na?’ (Adu. 3:5, 6) Tɔzɩ se ɛzɩma Yehowa sɩɣzɩɣ-ɖʋ lɔŋ yɔ, pɩwɩlɩɣ se ɛ-lɔŋsɩnɖɛ nɛ ɛ-sɔɔlɩm wayɩ fɛyɩ. Taasɔɔ se ɛha ɛ-Pɩyalʋ ɖa-tɩŋa ɖɔ-yɔɔ. Ña-pɩɣa wɛ pɩ-taa ɖɔɖɔ. Ɛsɔ tɩsɔɔlɩ se nɔɔyʋ ele. (Kalɩ 2 Pɩyɛɛrɩ 3:9.) Pʋyɔɔ lɛ, taa liu Yehowa lɔŋ sɩɣzʋʋ nɛ nʋmɔʋ ŋgʋ ɛwɩlɩɣ-ŋ yɔ. La mbʋ Yehowa pɔzʋʋ-ŋ yɔ, paa pɩɩwɛ kaɖɛ yɔ. Labɩnɩ tʋmɩyɛ Ɛsɔ lɔŋ sɩɣzʋʋ nɛ taakaɖɩnɩ-pʋ.

14. Ɛzɩma ɖɩpɩzɩɣ nɛ ɖiyele nɛ lɔŋ weyi Yehowa tɩŋɩɣnɩ yom siɣsiɣ tʋ yɔɔ ɛsɩɣzɩɣ-ɖʋ yɔ ɛwazɩ-ɖʋ?

¹⁴ Yehowa yɔɔdaa se ɛcɔŋna Krɩstʋ ɛgbɛyɛ yɔɔ nɛ ɛkandɩyɩ ɖɩ-yɔɔ nɛ ɛwɩlɩ-ɖɩ nʋmɔʋ. Ɛtɩŋɩɣnɩ nʋmɔŋ sakɩyɛ yɔɔ nɛ ɛlakɩ mbʋ. Ɛlɩzɩ ɛ-Pɩyalʋ se ɛcɔnɩ Krɩstʋ ɛgbɛyɛ yɔɔ. Nɛ ɛlɛ lɩzɩ yom siɣsiɣ tʋ se ɛha ɛgbɛyɛ taa mba fezuu taa tɔɔnaɣ alɩwaatʋ kɩbandʋ yɔɔ. (Luka 12:42) Fezuu taa tɔɔnasɩ nzɩ ɖɩmʋʋ pɩtɩŋnɩ nʋmɔŋ ndɩ ndɩ yɔɔ yɔ, sɩsɩɣzɩɣ-ɖʋ lɔŋ camɩyɛ. Pɔzɩ ña-tɩ se: ‘Tam ɛzɩma samaɣ taa tɔm yɔɔdʋʋ yaa ɖa-takayɩsɩ taa tɔm ñʋʋ nakʋyʋ sɩnɩ-m nɛ mana se pɩwɛɛ se mɔñɔɔzɩ ma-lɩmaɣza yaa me-wezuu caɣʋ? Ye ŋpɩzaa nɛ ŋla mbʋ yɔ, nɩɩ pɩ-yɔɔ leleŋ siŋŋ! Nɛ pɩwɩlɩɣ se ŋwɛɛ nɛ ŋyeki se Yehowa ɛñɔɔzɩ-ŋ yaa ɛsɩɣzɩ-ŋ lɔŋ nɛ pɩwazɩ-ŋ.—Adu. 2:1-5.

15, 16. (a) Ɛbɛ ɖɩpɩzɩɣ ɖɩla nɛ ɛgbɛyɛ taa “ɛyaa kʋjɔŋ” wazɩ-ɖʋ? (b) Ɛbɛ ɖɩpɩzɩɣ ɖɩla nɛ ɛgbɛyɛ taa ɛzʋtʋyaa tʋmɩyɛ wɛɛ-wɛ kɛlɛʋ?

¹⁵ Krɩstʋ ha ɛgbɛyɛ ɖɔɖɔ “ɛyaa kʋjɔŋ” pɩ-tɔbʋʋ se ɛzʋtʋyaa, se peɖiyi Ɛsɔ wondu. (Efɛz. 4:8, 11-13) Ɛbɛ ɖɩpɩzɩɣ ɖɩla nɛ kʋjɔŋ kɩbaŋ ɛnɩ ɩwazɩ-ɖʋ? Nʋmɔŋ weyi ɩ-yɔɔ ɖɩpɩzɩɣ nɛ ɖɩtɩŋna yɔ, ɩ-taa nakʋyʋ lɛ se ɖɩmaɣzɩna tisuu mbʋ ɛzʋtʋyaa wɛna yɔ nɛ kɩɖaŋ kɩbaŋ weyi pahaɣ yɔ. Nʋmɔʋ lɛɛkʋ lɛ se ɖiwelisi lɔŋ weyi patɩŋɩɣnɩ Masɩ yɔɔ nɛ patasɩɣ-ɖʋ yɔ. (Kalɩ Ebree 13:7, 17.) Tɔzɩ se ɛzʋtʋyaa sɔɔlɩ-ɖʋ nɛ pañɩnɩɣ se ɖɩɖɛɛnɩ ɛsɩndaa fezuu taa. Pʋyɔɔ alɩwaatʋ ndʋ payʋsʋʋ se ɖɩɩtasɩɣ kediɣzisi kɔm ɖoŋ ɖoŋ yaa ɖɩtɩtasɩ wɛʋ kpekpeka yɔ, pɩtʋʋ fɛyɩ se pakʋyʋʋ kpaka se pasɩnɩ-ɖʋ. Pewelisiɣni-ɖʋ camɩyɛ nɛ pʋwayɩ lɛ, patɩŋnɩ Masɩ nɛ tɔm pee kɩbana yɔɔ nɛ pakpazɩ-ɖʋ ɖoŋ. Ŋmʋʋ lɔŋ tasʋʋ mbʋ se pɩkɛnɩ nʋmɔʋ ŋgʋ Yehowa tɩŋɩɣnɩ kɩ-yɔɔ nɛ ɛwɩlɩɣ-ŋ ɛ-sɔɔlɩm yɔ?

¹⁶ Taasɔɔ se nabʋyʋ taa pɩfɛyɩ ɛzʋtʋyaa  kɛlɛʋ se pɔñɔtɩnɩ-ɖʋ nɛ patasɩ-ɖʋ lɔŋ. Maɣzɩ ɛzɩma pɩtaawɛɛ kɛlɛʋ nayʋ Naataanɩ se ɛyɔɔdɩnɩ Wiyaʋ Daviid alɩwaatʋ ndʋ ɛlɛ ñakaɣ pana se ehuuzi kɩwɛɛkɩm sɔsɔm mbʋ ɛɛlaba yɔ pɩ-yɔɔ nɛ ŋna! (2 Sam. 12:1-14) Pɩtʋʋ fɛyɩ se pɩɩpɔzɩ apostoloo Pɔɔlɩ ɖɔɖɔ abalɩtʋ pʋcɔ nɛ ɛpɩzɩ nɛ ɛsɩnɩ Pɩyɛɛrɩ weyi ɛɛkɛ apostoloowaa 12 taa lɛlʋ yɔ, alɩwaatʋ ndʋ ɛlɛ ɖʋwaɣ tʋkaɣ koobiya Yuuda mba nɛ mba patɩkɛ Yuuda mba yɔ pɛ-hɛkʋ taa yɔ. (Gal. 2:11-14) Ye mbʋ ɛbɛ ŋpɩzɩɣ ŋla nɛ ɛgbɛyɛ taa ɛzʋtʋyaa tʋmɩyɛ wɛɛ-wɛ kɛlɛʋ? Wɛɛnɩ tɩ luzuu, kɛ weyi papɩzɩɣ nɛ pɔñɔtɩna kɛlɛʋ yɔ, nɛ ŋwɩlɩ-wɛ ɖɔɖɔ ñɛ-ɛsɩmɩyɛ. Kpaɣ lɔŋ weyi patasɩɣ-ŋ yɔ ɛzɩ Ɛsɔ wɛna nɛ ɛwɩlɩɣ-ŋ ɛ-sɔɔlɩm yɔ. Ye ŋlakɩ mbʋ yɔ, ŋkaɣ hiɣu wazasɩ nɛ ŋkaɣ yebu nɛ ɛzʋtʋyaa la pa-tʋmɩyɛ nɛ taa leleŋ.

17. Alɩwaatʋ ndʋ ɛgbɛyɛ taa ɛzʋtʋyaa sɩnɩ koobu halɩñɩnʋ nɔɔyʋ nɛ sɔɔlɩm yɔ, wazasɩ nzɩ ehiɣaa?

¹⁷ Mbʋ pɩɩtalɩ koobu halɩñɩnʋ nɔɔyʋ e-wezuu caɣʋ taa yɔ pɩ-yɔɔ lɛ, pɩɩwɛ-ɩ kaɖɛ se ɛsɔɔlɩ Yehowa. Ɛyɔɔdaa se: “Alɩwaatʋ ndʋ mɔntɔzʋʋ mbʋ pɩtalɩ-m me-wezuu caɣʋ taa nɛ kala lɛɛna yɔɔ nɛ mon-toma taa tiki yɔɔɔ lɛ, mɔyɔɔdʋʋnɩ ɛgbɛyɛ taa ɛzʋtʋyaa. Pataakʋʋ mɔn-tɔm nɛ pataahɔŋnɩ-m nɛ tɔm ɖɔɖɔ, ɛlɛ pɛhɛzaɣ ma-laŋɩyɛ nɛ pakpazɩɣ-m ɖoŋ. Paa kediɣzaɣ ŋga kɛtɛŋ lɛ, paa pɩɩɖɔkɩnɩ-wɛ ɛzɩma yɔ, pa-taa nɔɔyʋ ñɔtʋʋnɩ-m se ɛna se ɛzɩma pɩwɛ-m. Mbʋ pɩtalɩ-m me-wezuu caɣʋ taa yɔ pɩ-yɔɔ lɛ, pɩɩwɛ-m kaɖɛ se mamaɣzɩ se mamʋnaa se Ɛsɔ ɛsɔɔlɩ-m. Ɛlɛ Yehowa tɩŋnɩ ɛgbɛyɛ nɛ ɛzʋtʋyaa pɔ-yɔɔ tam sakɩyɛ nɛ ɛwɩlɩ-m se ɛsɔɔlɩ-m. Mantɩmɩɣ se ma nɛ ɩ ɖa-taabalɩyɛ ɛtaacɛ kaaʋ.”

18, 19. Ɛbɛ haɣ wɩzasɩ nɛ pɩkpaɖɩ nɩŋgbaŋʋʋ hɔm? Ha kɩɖaʋ nakʋyʋ.

¹⁸ Paa nɩŋgbaŋʋʋ hɔm ɛhaɣ wɩzasɩ yɔ, nabʋyʋ haɣ wɩzasɩ nɛ pɩkpaɖɩ. Mbʋ lɛ ɛyʋ kizuu nɩŋgbaŋʋʋ hɔm yɔ. (Ebr. 12:11) Yele nɛ ɖɩyɔɔdɩ Kayɩnɩ nɛ Wiyaʋ Zidikiya pɔ-tɔm. Alɩwaatʋ ndʋ Kayɩnɩ taa paɣzɩ wɩnaʋ Aabɛɛlɩ yɔ, Ɛsɔ pɔzɩ-ɩ se: “Pɩlabɩ ɛzɩma nɛ pɩwɩzɩ-ŋ nɛ ñɛ-ɛsɩndaa ñɩŋ? Ye ña-taa ɛwɛ ɖeu, ŋŋkʋsʋʋ ña-ñʋʋ? Ɛlɛ ye ña-taa ɛfɛyɩ ɖeu kɔyɔ, kɩwɛɛkɩm wɛ ñɔ-nɔnɔɔ taa, pi-liu tɛɛ kɔtʋʋnɩ-ŋ, nɛ pɩwɛnɩ-ŋ se ŋñazɩ-pʋ.” (Kiɖe 4:6, 7) Ɛlɛ Kayɩnɩ tiwelisini Ɛsɔ. Eyeba nɛ kɩdɛkɛdɩm wabɩ-ɩ. Ɛkɔnɩ ɛ-tɩ kʋñɔŋ nɛ wɩzasɩ falaa. (Kiɖe 4:11, 12) Ye ɛɛmʋ lɔŋ weyi Yehowa tasɩ-ɩ yɔ, wɩzasɩ nzɩ ɛɛnɩwa yɔ sɩtaatalɩ nzɩ ñʋʋ taa ɖoŋ kɔnɩ-ɩ yɔ.

¹⁹ Wiyaʋ kɩdɛkɛdʋ Zidikiya tɔɔ kewiyitu alɩwaatʋ ndʋ Yeruzalɛm kaawɛ kaɖɛ sɔsɔɖɛ naɖɩyɛ taa yɔ. Nayʋ Yereemii kaatasɩ lɔŋ wiyaʋ Zidikiya tam sakɩyɛ se eyele ɛ-nʋmɔʋ kɩdɛkɛdʋʋ, ɛlɛ ɛtɩmʋ lɔŋ tasʋʋ mbʋ. Asɛyʋʋ ɖɔɖɔ pɩtɛmnɩ-ɩ. (Yer. 52:8-11) Yehowa tɩsɔɔlɩ se kʋñɔmɩŋ ɛnɩ ɩtalɩ-ɖʋ kaaʋ.—Kalɩ Izaayii 48:17, 18.

20. Mba pamʋʋ Ɛsɔ lɔŋ sɩɣzʋʋ yɔ ɛbɛ pakaɣ hiɣu, nɛ ɛbɛ ñakaɣ talʋʋ mba pekiziɣ-pʋ yɔ?

²⁰ Sɔnɔ ɛjaɖɛ ɖɩnɛ ɖɩ-taa ɛyaa niŋ lɔŋ sɩɣzʋʋ. Ɛlɛ piileɖiɣ lɛ, mba pɛwɛnɩ wɛtʋ ndʋ yɔ, pɩkaɣ-wɛ kɔnʋʋ kaɖɛ siŋŋ. (Adu. 1:24-31) Pʋyɔɔ lɛ, pɩwɛɣ ɖeu se ɖa-taa paa anɩ ‘ewelisi tɔm kɩwɩlɩtʋ yaa lɔŋ sɩɣzʋʋ nɛ ɛwɛɛ lɔŋ.’ Ye mbʋ ɛzɩ Aduwa 4:13 yɔɔdʋʋ yɔ, “ɖɔkɩ ñamtʋ, taayele; ɖɔkɩ-tʋ, mbʋ yɔ tɩkɛ ñe-wezuu.”