1, 2. (a) Ye Krɩstʋ tʋ nɔɔyʋ ɛkatɩ lɛɣzɩtʋ ndʋ ɛtaaɖʋna yɔ e-wezuu caɣʋ taa, ɖoŋ weyi pɩpɩzɩɣ nɛ pɩwɛɛnɩ ɛ-yɔɔ? (Cɔnɩ kiɖe tɛɛ kɩlɛmʋʋ.) (b) Ɛzɩ Keɣa 130 yɔɔdʋʋ yɔ, wɛtʋ ndʋ pɩzɩɣ nɛ tɩsɩnɩ-ɖʋ nɛ ɖitaalesi taa leleŋ weyi ɖɩwɛna yɔ?

KOOBU Lloyd nɛ Alexandra palabɩ tʋmɩyɛ Betɛɛlɩ taa nɛ pɩcɛzɩ pɩnzɩ 25 mbʋ yɔ lɛ, peheyi-wɛ se papɩsɩ nʋmɔʋ lɩzʋʋ tʋmɩyɛ taa. Kajalaɣ taa lɛ, pa-taa taawɛɛ leleŋ. Lloyd yɔɔdaa se: “Pɩlakaɣ-m ɛzɩ Betɛɛlɩ tʋmɩyɛ nɖɩ malakaɣ yɔ, ɖi-ɖeke ɖɩ-yɔɔ palʋlɩ-m yɔ. Man-taa kaawɛ leleŋ nɛ lɩmaɣzɩyɛ nɖɩ ɖɩ-yɔɔ palabɩ lɛɣzɩtʋ ndʋ yɔ, ɛlɛ kpɩtaŋ nɛ fenasɩ wɛɛ nɛ sɩɖɛɣ lɛ, pɩlakaɣ-m ɛzɩ mɛnfɛyɩ wazaɣ yɔ. Ma-lɩmaɣza kaasidaa. Nabʋyʋ taa maawɛnɩ lɩmaɣza kɩbana, ɛlɛ nabʋyʋ taa ɖɔɖɔ lɛ, pɩhaɣaɣ-m ɛsɩñɩŋɩyɛ.”

² Alɩwaatʋ ndʋ ɖɩkatɩɣ lɛɣzɩtʋ ndʋ ɖɩtaaɖʋna yɔ ɖe-wezuu caɣʋ taa yɔ, pɩpɩzɩɣ nɛ pitibi-ɖʋ yɔɔɔ nɛ pɩha-ɖʋ nɩɣzɛ. (Adu. 12:25) Halɩ pɩtɩla pɩwɛɣ-ɖʋ kaɖɛ se ɖɩla lɛɣzɩtʋ ndʋ. Ye pɩtalɩ-ɖʋ mbʋ, ɛzɩma ɖɩpɩzɩɣ nɛ ‘ɖɩɖɔkɩ ɖa-laŋɩyɛ nɛ  ɖɩcaɣ ɖiɣɖiɣ?’ (Kalɩ Keɣa 130:1-3.) Iyele nɛ ɖɩna Bibl taa nɛ ɖa-alɩwaatʋ taa Yehowa sɛyaa nabɛyɛ kɩɖaŋ nɛ mbʋ pɩsɩnɩ-wɛ nɛ patilesi taa leleŋ weyi paawɛna yɔ, paa paakatɩ lɛɣzɩtʋ ndɩ ndɩ pe-wezuu caɣʋ taa yɔ.

3. Ɛbɛ talɩ Yosɛɛfʋ?

³ Yosɛɛfʋ kaawɛnɩ ɛzɩ pɩnzɩ 17 mbʋ yɔ lɛ, ɛ-ɖalaa maɣmaɣ kpa-ɩ nɛ pɛpɛdɩ-ɩ nɛ ɛpɩsɩ yom mbʋ pʋyɔɔ yɔ papaɖaɣ-ɩ. Ɛnʋ pa-caa kaakɩlɩ sɔɔlʋʋ. (Kiɖe 37:2-4, 23-28) Yosɛɛfʋ kaawɛ yomiye taa Ejipiti nɛ pɔtɔ-ɩ salaka peeɖe pɩnzɩ 13 mbʋ yɔ. Eeposini ɛ-caa kʋsɔɔlʋ Yakɔɔb ɖɔɖɔ. Ɛbɛ sɩnɩ Yosɛɛfʋ nɛ ɛtɩkɔ pana nɛ ɛtɩlɔ ɖɔɖɔ lidaʋ?

4. (a) Alɩwaatʋ ndʋ Yosɛɛfʋ kaawɛ salaka taa yɔ, ɛbɛ yɔɔ ɛɛkam ɛ-lɩmaɣza? (b) Ɛzɩma Yehowa cosi Yosɛɛfʋ adɩma yɔɔ?

⁴ Alɩwaatʋ ndʋ Yosɛɛfʋ tɔkaɣ kʋñɔŋ salaka taa yɔ, pɩtʋʋ fɛyɩ se ɛɛkam ɛ-lɩmaɣza ɛzɩma Yehowa wazɩ-ɩ yɔ, pɩ-yɔɔ. (Kiɖe 39:21; Keɣa 104:17-19) Natʋ tɔm ndʋ Yehowa kaawɩlɩ-ɩ alɩwaatʋ ndʋ ɛɛkɛ pɩɣa evelaɣ yɔ, tɩsɩnɩ-ɩ ɖɔɖɔ nɛ ɛ-taa tɛ se ɛ-tɔm kɛdɩnɩ Ɛsɔ. (Kiɖe 37:5-11) Pɩtʋʋ fɛyɩ se ɛtɩmaɣnɩ Yehowa tam sakɩyɛ nɛ eheyiɣ-i wɩzasɩ nzɩ sɩ-taa ɛɛwɛɛ yɔ. (Keɣa 144:18) Yehowa cosi adɩma wena Yosɛɛfʋ labɩnɩ ɛ-laŋɩyɛ pilim yɔ a-yɔɔ nɛ ɛsɩnɩ-ɩ nɛ ɛ-taa tɛ se ‘ɛwɛ ɛ-cɔlɔ’ ɛ-kʋñɔmɩŋ kpeekpe taa.​—Tʋma 7:9, 10. *

5. Ðoŋ weyi “Ɛsɔ tɛ laŋhɛzɩyɛ” pɩzɩɣ nɛ pɩwɛɛnɩ fezuu taa kaɖʋsɩ nzɩ ɖɩɖʋʋ ɖa-tɩ yɔ sɩ-yɔɔ?

⁵ Paa ɖɩkatɩɣ wɛtʋ ndɩ ndɩ yɔ, sɔnɔ ɖa ɖɔɖɔ “Ɛsɔ tɛ laŋhɛzɩyɛ” pɩzɩɣ nɛ ɖɩkandɩyɩ ɖa-maɣzɩm yɔɔ. (Kalɩ Filiipi 4:6, 7.) Pʋyɔɔ lɛ, alɩwaatʋ ndʋ nɩɣzɛ kɩlɩɣ-ɖʋ yɔ, ye ɖɩpam ɛsa nɛ Yehowa yɔ, ɛ-laŋhɛzɩyɛ kaɣ-ɖʋ kpazʋʋ ɖoŋ nɛ ɖɩtalɩ kaɖʋsɩ nzɩ ɖɩɖʋ ɖa-tɩ fezuu taa yɔ nɛ pɩsɩnɩ-ɖʋ ɖɔɖɔ nɛ ɖɩtaalɔ lidaʋ. Iyele nɛ ɖɩna ɖa-alɩwaatʋ taa kɩɖaŋ weyi ɩwɩlɩɣ se ɖɩpɩzɩɣ nɛ ɖɩla mbʋ yɔ ɩ-taa nɩɩyɩ.

6, 7. Ye ɖɩtɩmɩ tɔm natʋyʋ yɔɔ, ɛzɩma pɩpɩzɩɣ nɛ pɩsɩnɩ-ɖʋ se ɖɩɖaɣnɩ hiɣu taa leleŋ? Ha kɩɖaʋ nakʋyʋ.

⁶ Ryan nɛ Juliette panɩwa se nʋmɔʋ lɩzʋʋ kiya tʋmɩyɛ nɖɩ paaha-wɛ waɖɛ se pala alɩwaatʋ natʋyʋ yɔ, ɖɩsɩɣ tɩnaɣ lɛ, pa-taa tɩla leleŋ. Ryan yɔɔdaa se: “Ðiiɖiɣzinaa se pɩkɛnɩ-ɖʋ waɖɛ nɖɩ ɖɩ-yɔɔ pɩwɛɛ se ɖɩtɩŋna nɛ ɖɩwɩlɩ se ɖɩtaɣ Ɛsɔ liu yɔ. Ðɛ-ɛgbɛyɛ taa ñɩma sakɩyɛ kɛ ɛyaa kɩfama toovenim taa, pʋyɔɔ lɛ, ɖɩtɩmnɩ Yehowa se ɛsɩnɩ-ɖʋ nɛ ɖɩkɛnɩ kɩɖaʋ kɩbaŋʋ tisuu nʋmɔʋ taa.”

⁷ Ɛzɩma Yehowa cosi pa-adɩma yɔɔ? Ryan tɔzʋʋ se: “Ðɩtɩɩtɛm tɩmʋʋ lɛ, lɩmaɣza wena ɖɩɩwɛna nɛ atɩmʋna yɔ, amʋʋ! Ɛsɔ tɛ laŋhɛzɩyɛ kandɩyɩ ɖa-maɣzɩm nɛ ɖa-laŋa yɔɔ. Ðiɖiɣzinaa se ye ɖɩwɛnɩ wɛtʋ kɩbandʋ yɔ, Yehowa pɩzɩɣ nɛ ewolo pɩ-yɔɔ nɛ ɛtɩŋnɩ ɖɔ-yɔɔ ɛla ɛ-tʋmɩyɛ.”

8-10. (a) Ɛzɩma Ɛsɔ fezuu sɩɣnɩ-ɖʋ se ɖɩlʋbɩnɩ nɩɣzɛ? (b) Nʋmɔŋ weyi yɔɔ Yehowa pɩzɩɣ ɛtɩŋna nɛ ɛwazɩ pana wena ɖɩñakɩ se ɖɩwɛɛnɩ fezuu taa wɛtʋ yɔ, a-yɔɔ?

⁸ Pɩtasɩnɩ se Ɛsɔ fezuu hɛzɩɣ ɖa-laŋa lɛ, kɩpɩzɩɣ ɖɔɖɔ nɛ kɩsɩnɩ-ɖʋ nɛ ɖɩtɔzɩ Bibl masɩ nzɩ sɩsɩɣnɩ-ɖʋ se ɖɩsɩɩ fezuu taa wondu kajalaɣ lone taa yɔ sɩ-yɔɔ. (Kalɩ Yohanɛɛsɩ 14:26, 27.) Maɣzɩ Philip nɛ Mary pa-kɩɖaʋ yɔɔ nɛ ŋna. Pakpaɣ pɩnzɩ ɛzɩ 25 mbʋ yɔ nɛ palabɩnɩ tʋmɩyɛ Betɛɛlɩ. Fenasɩ naanza taa ɖeke lɛ, pa-naalɛ pelesi po-ɖoonaa, nɛ Philip lesi ɖɔɖɔ ɛ-hɔʋ taa tʋ lɛlʋ. Pɩɩpɔzaa se pɔcɔnɩ Mary caa weyi ɛkpadɩyaa nɛ pɩpɔzʋʋ se paɖʋ-ɩ nesi yɔ, ɛ-yɔɔ.

⁹ Philip tɔzʋʋ se: “Mamaɣzaɣ se mɛwɛɛ nɛ malʋkɩnɩ wɛtʋ ndʋ camɩyɛ, ɛlɛ toovenim taa lɛ, pɩɩkazɩ-m nabʋyʋ. Mɔnkɔm nɛ  mankalɩ Feŋuu Tilimiye nɖɩ pɛkpɛlɩkɩɣ yɔ ɖɩ-taa tɔm ñʋʋ nakʋyʋ taa Koloosi 1:11. Toovenim se maawɛɛ nɛ malʋkɩnɩ kala wena a-taa maawɛɛ yɔ, ɛlɛ pɩɩkazɩ pazɩ. Pɩɩcɛyaa se mɛwɛɛnɩ ‘suuɖu nɛ malʋbɩnɩ-yɛ nɛ taa leleŋ.’ Mayaɣ kanɛ kɔtɔzɩ-m se pɩtɩkɛ wɛtʋ ndʋ tɩ-taa mɛwɛɛ yɔ, ndʋ pɩwɛɛ se tɩha-m taa leleŋ, ɛlɛ ɛzɩma Ɛsɔ fezuu sɩɣnɩ-m yɔ, mbʋ pɩwɛɛ se pɩha-m taa leleŋ.”

¹⁰ Philip nɛ Mary pañaɣ pana nɛ pɛwɛɛnɩ fezuu taa wɛtʋ kaɖɛ alɩwaatʋ kaɖɛ ndʋ tɩ-taa, pʋyɔɔ Yehowa kɔma nɛ ɛwazɩ-wɛ hɔɔlɩŋ sakɩyɛ taa. Peyebi tʋmɩyɛ labʋ Betɛɛlɩ taa nɛ pitileɖi lɛ, pehiɣ Bibl kpɛlɩkɩyaa mba pɛwɛɛ nɛ pɛɖɛɣnɩ ɛsɩndaa fezuu taa yɔ. Mary yɔɔdaɣ Bibl kpɛlɩkɩyaa mba pɔ-tɔm lɛ ɛtɔm se: “Pɛkɛnɩ-ɖʋ taa leleŋ nɛ pɩkɛnɩ ɖɔɖɔ nʋmɔʋ ŋgʋ kɩ-yɔɔ Yehowa tɩŋɩɣna nɛ ɛwɩlɩɣ-ɖʋ se mbʋ ɖɩwɛɛ nɛ ɖɩlakɩ yɔ, ɛwɛɛ nɛ ɛnɩɣ leleŋ pɩ-yɔɔ yɔ.”

11, 12. (a) Ɛzɩma Yosɛɛfʋ ha nabʋyʋ Yehowa se ɛwazɩ pɩ-yɔɔ? (b) Ɛzɩma pawazɩ Yosɛɛfʋ ɛ-tɩ ɖɔkʋʋ yɔɔ?

¹¹ Alɩwaatʋ ndʋ ɖɩkatɩɣ lɛɣzɩtʋ natʋyʋ tuda yɔ, sɔɔndʋ pɩzɩɣ nɛ tɩkpa-ɖʋ nɛ ɖɩmaɣzɩ se ɛzɩ ɛbɛ pɩkaɣ-ɖʋ tɛmnʋʋ; nɛ pɩlakɩ mbʋ lɛ pɩpɩzɩɣ nɛ pitibi-ɖʋ yɔɔɔ. Pɩpɩzaɣ se pɩtalɩ Yosɛɛfʋ mbʋ. Etiyele se pɩtalɩ-ɩ mbʋ, ɛlɛ ɛkpaɣ lɩmaɣzɩyɛ se ɛlakɩ nabʋyʋ wɛtʋ ndʋ tɩ-taa ɛɛwɛ yɔ, nɛ ɛha nabʋyʋ Yehowa se ɛlɛ ɛwazɩ pɩ-yɔɔ. Paa ɛɛwɛ salaka taa yɔ, ɛlabɩ tʋma wena payɩ salaka yɔɔ cɔnɩyʋ ñʋʋdʋ ɖʋwaɣ-ɩ yɔ ɛzɩ ɛɛlabʋ alɩwaatʋ ndʋ ɛɛwɛ Potifaarɩ ɖɩɣa taa yɔ.​—Kiɖe 39:21-23.

¹² Pɔkɔm nɛ paɖʋzɩ Yosɛɛfʋ nesi tɛɛ abalaa naalɛ nabɛyɛ se ɛcɔnɩ pɔ-yɔɔ. Abalaa mba paawɛnɩ lona sɔsɔna Farawɔɔ ɖɩɣa taa. Abalaa panɛ paayʋsaa se Yosɛɛfʋ lakɩ camɩyɛ lakasɩ, pʋyɔɔ pɛkɛdɩ-ɩ pa-nɩɣzɛ nɛ sɔɔndʋ ɖoza wena poɖozi ɖoo taa yɔ. (Kiɖe 40:5-8) Yosɛɛfʋ taaɖiɣzina se kɛdaɣ ŋga ɛ nɛ abalaa panɛ palaba yɔ, kakaɣ-ɩ lʋlʋʋ pee kɩbana pʋwayɩ. Paa pɩɩwɛɛ se ɛtasɩ ɛ-tɩ ɖɔkʋʋ salaka taa pɩnzɩ naalɛ yɔ, pɔkɔm nɛ peyebi-i evemiye nɖɩ yɔ, ɖi-wiye pasɩ-ɩ ñʋʋdʋ naalɛ ñɩnʋ; nɛ Farawɔɔ wayɩ lɛ, ɛnʋ kaakɩlɩnɩ sɔsɔtʋ.​—Kiɖe 41:1, 14-16, 39-41.

13. Ɛzɩma ɖɩpɩzɩɣ nɛ ɖɩha Yehowa nabʋyʋ se ɛwazɩ pɩ-yɔɔ paa wɛtʋ ndʋ tɩ-taa?

¹³ Ɛzɩ Yosɛɛfʋ yɔ, wɛtʋ natʋyʋ pɩzɩɣ nɛ tɩtalɩ-ɖʋ nɛ ɖɩɩsɩŋ se ɛbɛ ɖeyi ɖeyi pɩwɛɛ se ɖɩla. Ɛlɛ ye ɖɩɖʋ suuɖu nɛ ɖɩñaɣ pana nɛ ɖɩla ɖo-ɖoŋ ɖeɖe wɛtʋ ndʋ tɩ-taa yɔ, ɖɩhaɣ nabʋyʋ Yehowa se ɛwazɩ pɩ-yɔɔ. (Keɣa 36:5) Pɩkɛ toovenim se nabʋyʋ taa cɛzɩm yaa takɩm nabʋyʋ pɩzɩɣ nɛ pɩtalɩ-ɖʋ nɛ ɖɩɩnaɣ se ɖɩla ɛzɩma. Ɛlɛ ɛzɩ apostoloo Pɔɔlɩ yɔɔdʋʋ yɔ, paa ɖa-kaɖɛ ɛɛpaɣlɩ ɛzɩma yɔ, ɖɩɩlɔʋ lidaʋ. (1 Kɔr. 10:13) Ye ɖɩkam ñʋʋ nɛ ɖɛ-Ɛsɔ sɛtʋ tʋmɩyɛ yɔ, Pɔɔlɩ tɔm tʋnɛ tɩpɩzɩɣ nɛ tɩkɛ toovenim ɖɔ-hɔɔlʋʋ taa.

14-16. Paa tɔm kɩbandʋ susuyu Filiipu wɛtʋ kaalɛɣzaa yɔ, ɛzɩma ewobi pɩ-yɔɔ nɛ ɛñɔɔnɩ ɛ-Ɛsɔ sɛtʋ tʋmɩyɛ?

¹⁴ Paa tɔm kɩbandʋ susuyu Filiipu ɛɛkatɩ lɛɣzɩtʋ ndɩ ndɩ yɔ, ɛɛkam ñʋʋ nɛ ɛ-Ɛsɔ sɛtʋ tʋmɩyɛ nɛ ɛkɛnɩ-ɖʋ kɩɖaʋ kɩbaŋʋ. Panazaɣ koobiya Yeruzalɛm siŋŋ nɛ halɩ pakʋ Etiyɛɛnɩ. * Alɩwaatʋ ndʋ tɩ-taa lɛ, Filiipu kaawɛnɩ waɖɛ kɩfaɖɛ Ɛsɔ sɛtʋ tʋmɩyɛ taa. (Tʋma 6:1-6) Ɛlɛ alɩwaatʋ ndʋ Krɩstʋ wayɩ tɩŋɩyaa mɩzɩ ɖama yɔ, Filiipu taapɩzɩɣ se esu tamɩyɛ. Ewobi Samaarɩɩ egeetiye sɔsɔyɛ nɖɩ ɖɩ-taa pataasusi tɔm wiɖiyi yɔ se esusi tɔm alɩwaatʋ ndʋ tɩ-taa.​—Mat. 10:5; Tʋma 8:1, 5.

¹⁵ Filiipu kaatisi faaa se paa le Ɛsɔ fezuu ɛwɩlɩ-ɩ yɔ ewoki, pʋyɔɔ Yehowa tɩŋnɩ ɛ-yɔɔ nɛ tɔm kɩbandʋ talɩ ageeta kɩfana taa. Ɛzɩma ɛtaaɖʋ tʋkaɣ ɛyaa taa yɔ, pɩtʋʋ fɛyɩ se pɩɩhɛzɩ Samaarɩɩ ñɩma mba Yuuda ñɩma niŋaɣ yɔ, pa-laŋa. Ðɩɩpɩtɩɣ paa ññɩɩ se samaɣ taa ɛyaa welisini-i nɛ “pa-laŋa pilim.”​—Tʋma 8:6-8.

¹⁶ Pʋwayɩ Ɛsɔ fezuu ɖiyi Filiipu nɛ kiwoni-i Azɔɔtɩ nɛ Sezaaree ajɛɛ wena a-taa sɩɩnaa layaa kaaɖɔ siŋŋ yɔ. (Tʋma 8:39, 40) Filiipu susi tɔm Samaarɩɩ nɛ pɩla pɩnzɩ 20 pʋwayɩ lɛ, ɛ-wɛtʋ ɖaɣnɩ lɛɣzʋʋ. Lɛɛlɛɛyɔ ɛwɛnɩ hɔʋ, pʋyɔɔ ɛcaɣ egeetiye nɖɩ ɖɩ-taa esusaɣ tɔm yɔ. Paa ɛ-wɛtʋ kaalɛɣzaa yɔ, ɛkam ñʋʋ nɛ ɛ-Ɛsɔ sɛtʋ tʋmɩyɛ, pʋyɔɔ Yehowa wazɩ ɛ nɛ ɛ-hɔʋ.​—Tʋma 21:8, 9.

17, 18. Ye ɖɛ-wɛtʋ ɛlɛɣzaa nɛ ɖɩka ñʋʋ nɛ ɖɛ-Ɛsɔ sɛtʋ tʋmɩyɛ yɔ, ɛzɩma pɩsɩɣnɩ-ɖʋ nɛ ɖɩwɛɛ kpekpeka fezuu taa?

¹⁷ Alɩwaatʋ tɩŋa Ɛsɔ sɛtʋ tʋmɩyɛ laɖaa sakɩyɛ ɖiɣzinaa se alɩwaatʋ ndʋ pakaŋ pa-lɩmaɣza pɛ-Ɛsɔ sɛtʋ tʋmɩyɛ yɔɔ yɔ, pɩsɩɣnɩ-wɛ nɛ pɛwɛɛ kpekpeka fezuu taa, paa pɛ-wɛtʋ ɛlɛɣzaa yɔ. Afrika Hadɛ Kiŋ ɛjaɖɛ taa koobu weyi payaɣ se Osborne nɛ ɛ-halʋ Polite peyebi Betɛɛlɩ tʋmɩyɛ lɛ, pamaɣzaɣ se piileɖiɣ lɛ pehikiɣ tʋmɩyɛ nɖɩ ɖɩɩmʋʋ pa-alɩwaatʋ kpeekpe yɔ nɛ ɖɩzʋyɛ. Osborne kɛdaa se: “Ɛlɛ pɩlabɩ kaɖɛ mbʋ pʋyɔɔ yɔ, pɩtɩɖɔ ɛzɩ ɖɩɩmaɣzʋʋ yɔ. Ðitihiɣ tʋmɩyɛ lɔŋ.” Ɛ-halʋ yɔɔdaa se: “Fenasɩ naadozo ɖɛwa ɛlɛ ɖitihiɣ tʋmɩyɛ nɛ ɖɩtaawɛɛnɩ liidiye naɖɩyɛ ɖɔɖɔ. Pɩɩlabɩ kaɖɛ kpem.”

¹⁸ Ɛbɛ sɩnɩ-wɛ nɛ papɩzɩ nɛ palʋbɩnɩ kaɖɛ nɖɩ? Osborne yɔɔdaa se: “Ɛzɩma ɖa nɛ ɛgbɛyɛ taa ñɩma ɖisusaɣ tɔm yɔ, pɩsɩnɩ-ɖʋ kpem nɛ ɖɩwɛɛnɩ lɩmaɣza kɩbana. Ðɩkpaɣ lɩmaɣzɩyɛ se ɖɩɩcakɩ ɖɩɣa nɛ ɖɩwɛɛ  maɣzʋʋ yɔɔ, ɛlɛ ɖɩlakɩ ɖo-ɖoŋ ɖeɖe tɔm susuu tʋmɩyɛ taa nɛ mbʋ hanɩ-ɖʋ taa leleŋ siŋŋ. Ðiwobi pɩ-yɔɔ nɛ ɖɩñɩnɩɣ tʋmɩyɛ nɛ alɩwaatʋ wɛɛ nɛ tɩɖɛɣ lɛ ɖɩkɔɔ nɛ ɖihiɣ naɖɩyɛ.”

19-21. (a) Ɛbɛ pɩzɩɣ nɛ pɩsɩnɩ-ɖʋ nɛ ɖitaalesi taa leleŋ weyi ɖɩwɛna yɔ? (b) Ye ɖɩlabɩ lɛɣzɩtʋ nɛ pɩmʋnɩ wɛtʋ kɩfatʋ ndʋ tɩ-taa ɖɩwɛɛ yɔ, wazasɩ nzɩ ɖɩpɩzɩɣ nɛ ɖihiɣ?

¹⁹ Ɛzɩ kɩɖaŋ ɩnɛ ɩwɩlʋʋ yɔ, ye ɖɩwɛ wɛtʋ natʋyʋ taa nɛ ɖɩlakɩ ɖo-ɖoŋ ɖeɖe nɛ ɖɩɖaŋɩɣ Yehowa nɛ ɖɩtaɣ-ɩ liu yɔ, ɖɩɩkaɣ lesuu taa leleŋ weyi ɖɩwɛna yɔ. (Kalɩ Mikee 7:7.) Halɩ ɖɩpɩzɩɣ nɛ ɖihiɣ fezuu taa wazasɩ sakɩyɛ, mbʋ pʋyɔɔ yɔ ɖɩɖɔkɩ ɖa-tɩ wɛtʋ kɩfatʋ natʋyʋ taa. Polite weyi ɛ-tɔm ɖɩɩyɔɔdaa yɔ, ɛmaɣzɩ mbʋ pɩtalɩ-ɩ yɔ pɩ-yɔɔ lɛ, ɛyɔɔdɩ se: “Ðɩɩtasɩɣ Betɛɛlɩ tʋmɩyɛ labʋ, piyeba nɛ menɖiɣzina mbʋ Yehowa liu taʋ kɛnaa ɖeyi ɖeyi yɔ, halɩ pɩkpɛndɩnɩ alɩwaatʋ ndʋ pɩlakaɣ-m ɛzɩ kɩlabɩm nabʋyʋ fɛyɩ yɔ. Ma nɛ ɩ ɖa-taabalɩyɛ ɖaɣnɩ cɛyɩsʋʋ siŋŋ.”

²⁰ Mary weyi ɖɩɩtɛm ɛ-tɔm yɔɔdʋʋ yɔ, ewobi pɩ-yɔɔ nɛ ɛlakɩ nʋmɔʋ lɩzʋʋ tʋmɩyɛ nɛ ɛcɔŋnɩ ɖɔɖɔ ɛ-caa weyi ɛkpadɩyaa yɔ, ɛ-yɔɔ. Ɛyɔɔdaa se: “Alɩwaatʋ ndʋ mɛwɛɣ nɩɣzɛ taa yɔ, pɩpɔzaa se mansɩŋ nɛ mantɩmɩ nɛ mɔnsɔɔ pɩ-yɔɔ. Lɔŋ weyi mɛnkpɛlɩkaa yɔ, ɛnʋ lɛ se pɩwɛɛ se manɖʋzɩ pɩtɩŋa Yehowa nesi tɛɛ nɛ pɩkaɣ pɔzʋʋ se mala mbʋ nɛ ɛsɩndaa nɛ pɩkpaɖɩ.”

²¹ Lloyd nɛ Alexandra mba pɔ-tɔm ɖɩɩtɛm yɔɔdʋʋ kiɖe tɛɛ yɔ, pɔyɔɔdaa se lɛɣzɩtʋ ndʋ pakataa yɔ, tɩtakɩ pe-tisuu siŋŋ nɛ pataamaɣzɩ pɩ-yɔɔ wiɖiyi. Ɛlɛ pɔyɔɔdaa ɖɔɖɔ se: “Ɛzɩma pɩtakɩ ɖe-tisuu yɔ, pɩsɩnɩ-ɖʋ se ɖɩna se ɛzɩ ɖɩwɛnɩ tisuu siŋŋ mbʋ pɩpɩzɩɣ nɛ pɩkpazɩ-ɖʋ ɖoŋ nɛ pɩsɩnɩ-ɖʋ kaɖɛ alɩwaatʋ taa yɔ yaa we. Mbʋ pɩtalɩ-ɖʋ yɔ, piyeba nɛ ɖiɖe Ɛsɔ ɛsɩndaa nɛ pɩkpaɖɩ.”

22. Ye ɖɩñakɩ pana se ɖɩla ɖo-ɖoŋ ɖeɖe wɛtʋ natʋyʋ taa yɔ, tɔm ndʋ ɖa-taa pɩzɩɣ nɛ pɩtɛmna?

²² Ye ŋkatɩ wɛtʋ ndʋ ŋtaaɖʋna yɔ ñe-wezuu caɣʋ taa, ɛzɩ teokrasɩ tʋmɩyɛ kɩfaɖɛ labʋ, kʋdɔŋ yaa hɔʋ yɔɔ cɔnʋʋ sʋʋtʋ kɩfatʋ mbʋ yɔ yɔ, ña-taa ɛtɛ se Yehowa kaɣ ñɔ-yɔɔ cɔnʋʋ nɛ ɛsɩnɩ-ŋ alɩwaatʋ kɩbandʋ yɔɔ. (Ebr. 4:16; 1 Pɩy. 5:6, 7) Pʋcɔ nɛ ɛsɩnɩ-ŋ lɛ, ñaɣ pana nɛ ŋla ño-ɖoŋ ɖeɖe wɛtʋ ndʋ tɩ-taa. Ñɔtɩnɩ ña-Caa weyi ɛwɛ ɛsɔdaa yɔ adɩma taa nɛ ŋɖʋzɩ ña-tɩ e-nesi tɛɛ. Ye ŋlakɩ mbʋ yɔ, ña ɖɔɖɔ ŋŋkaɣ lesuu taa leleŋ weyi ŋwɛna yɔ, paa lɛɣzɩtʋ ndʋ ŋkatɩ ñe-wezuu caɣʋ taa yɔ.