1. (a) Ɛbɛ Aɖam nɛ Ɛva pelesaa? (b) Nɛ ɛbɛ lɩ pɩ-taa?

ÑA-NAƲ taa lɛ, anɩ pɩwɛɛ se ɛɖʋ paɣtʋ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-yɔɔ? Alɩwaatʋ ndʋ Aɖam nɛ Ɛva pɔtɔɔ kɩbam nɛ kɩdɛkɛdɩm pa-sɩmtʋ tɩʋ piye yɔ, pawɩlɩ kpayɩ kpayɩ se paataɣ Yehowa nɛ ɛ-paɣtʋ liu. Palɩzaa se pa-maɣmaɣ paɖʋʋ pa-tɩ paɣtʋ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-yɔɔ. (Kiɖe 3:22) Ɛlɛ maɣzɩ mbʋ pelesaa yɔ pɩ-yɔɔ yɔ nɛ ŋna. Pelesi taabalɩyɛ nɖɩ ɖɩɩwɛ pa nɛ Yehowa pɛ-hɛkʋ taa yɔ. Pɩtasɩ lɛ, pelesi waɖɛ nɖɩ paawɛna se pacaɣ wezuu tam tam yɔ, nɛ pɛɖɛzɩ ɖɔɖɔ kɩwɛɛkɩm nɛ sɩm pe-piya. (Roma 5:12) Lɩmaɣza wena Aɖam nɛ Ɛva pakpaɣaa yɔ, akɔnɩ asɛyʋʋ siŋŋ.

2-3. (a) Alɩwaatʋ ndʋ Filiipu susi eliŋgiye Etiyoopii tʋ tɔm yɔ, ɛbɛ ɛlɛ laba? (b) Ye ɖɩha ɖa-tɩ nɛ pamɩyɩsɩ-ɖʋ lɩm, wazasɩ nzɩ ɖihikiɣ? (c) Nɛ tɔm pɔzʋʋ mbʋ yɔɔ ɖɩkaɣ cosuu?

² Kpaɣ Aɖam nɛ Ɛva pa-lakasɩ nɛ ŋmaɣzɩnɩ mbʋ Etiyoopii eliŋgiye labɩ alɩwaatʋ ndʋ Filiipu susi-i tɔm yɔ nɛ ŋna. Eliŋgiye Etiyoopii tʋ ɛnʋ, ɛnɩ leleŋ mbʋ Yehowa nɛ Yesu palabɩ-ɩ yɔ pɩ-yɔɔ siŋŋ nɛ eyele nɛ pamɩyɩsɩ-ɩ lɩm kpaagbaa. (Tʋma 8:34-38) Ɛzɩ eliŋgiye nɖɩ yɔ, alɩwaatʋ ndʋ ɖɩhaɣ ɖa-tɩ Ɛsɔ nɛ ɖiyele nɛ pamɩyɩsɩ-ɖʋ lɩm yɔ, ɖɩwɩlɩɣ se mbʋ Yehowa nɛ Yesu palabɩ-ɖʋ yɔ, ɖɩnɩɣ leleŋ pɩ-yɔɔ siŋŋ. Ðɩwɩlɩɣ ɖɔɖɔ se ɖɩtaɣ Yehowa liu nɛ ɖitisaa se ɛnʋ pɩmʋnaa se ɛɖʋ paɣtʋ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-yɔɔ.

³ Maɣzɩ wazasɩ nzɩ ɖihikiɣ alɩwaatʋ ndʋ ɖɩsɛɣ Yehowa yɔ sɩ-yɔɔ nɛ ŋna. Sɩ-taa nasɩyɩ lɛ se ɖɩwɛnɩ lidaʋ se wiɖiyi ɖɩkaɣ wɛnʋʋ mbʋ payɩ Aɖam nɛ Ɛva pelesaa yɔ, pɩkpɛndɩnɩ tamtam wezuu caɣʋ waɖɛ. Ðitisi Yesu Krɩstʋ yɔɔ, pʋyɔɔ lɛ  Yehowa kpeɣu-ɖʋ ɖa-kɩwɛɛkɩm nɛ eyeki se ɖɩwɛɛnɩ ɛhʋyɛ kɩbanɖɛ. (Mat. 20:28; Tʋma 10:43) Pɩhaɣ-ɖʋ waɖɛ ɖɔɖɔ se ɖɩsʋʋ Yehowa sɛyaa hɔʋ taa nɛ ɖihiɣ cee wayɩ kɩbaŋʋ. (Yoh. 10:14-16; Roma 8:20, 21) Paa mbʋ yɔ, pɩwɛ kaɖɛ mba pɛkpɛlɩkaa nɛ patɩlɩ Yehowa yɔ, pa-taa nabɛyɛ se pamaɣzɩnɩ eliŋgiye Etiyoopii tʋ kɩɖaʋ. Ɛbɛ pɩzɩɣ nɛ piyele nɛ papɩsɩɣnɩ wayɩ se pataamɩyɩsɩ-wɛ lɩm? Nɛ ɛzɩma papɩzɩɣ nɛ pawa kala ana?

4-5. Kala wena evebu weyi payaɣ se Avery nɛ pɛlɛ weyi payaɣ se Hannah yɔ pakataa?

⁴ Sɔɔndʋ. Avery lʋlɩyaa kɛ Yehowa Aseɣɖe Tɩnaa. Ɛ-caa kɛ caja weyi ɛcɔŋnɩ ɛ-hɔʋ yɔɔ camɩyɛ nɛ ɛkɛ ɖɔɖɔ ɛgbɛyɛ taa ɛzʋtʋyʋ weyi ɛlakɩ ɛ-tʋmɩyɛ camɩyɛ yɔ. Paa mbʋ yɔ, sɔɔndʋ wɛɛ nɛ pɩkpaɣ Avery se ɛha ɛ-tɩ nɛ pamɩyɩsɩ-ɩ lɩm. Ɛbɛ yɔɔ? Ɛyɔɔdaa se: “Maawɛɛ nɛ mamaɣzɩɣ se pɩtɩla, maakaɣ pɩzʋʋ nɛ mancaɣ wezuu kɩbaŋʋ ɛzɩ man-caa yɔ.” Pɩtasɩ lɛ, sɔɔndʋ kpaɣaɣ-ɩ se pɩtɩla yɔ, ɛɛkaɣ pɩzʋʋ nɛ ɛla ɛgbɛyɛ taa tʋma wena pakaɣ-ɩ haʋ yɔ camɩyɛ. Ɛtasɩ yɔɔdʋʋ se: “Sɔɔndʋ kpaɣaɣ-m se paapɔzɩ-m wiɖiyi se mala adɩma samaɣ ɛsɩndaa, mɔyɔɔdɩ samaɣ taa tɔm, yaa mɛnɖɛɛ nɔɔ tɔm susuu kooka nakɛyɛ taa.”

⁵ Hannah kaawɛnɩ pɩnzɩ 18 nɛ ɛɛkɛ weyi ɛɛwɛ sɔɔndʋ siŋŋ yɔ. Ɛ-lʋlɩyaa kaakɛ Yehowa Aseɣɖe Tɩnaa. Paa mbʋ yɔ, sɔɔndʋ kpaɣaɣ-ɩ se ɛɛkaɣ pɩzʋʋ nɛ ɛɖɔ Yehowa paɣtʋ yɔɔ. Ɛbɛ yɔɔ? Hannah maɣzaɣ se ɛtɩlɩɩ pʋyʋ. Halɩ nabʋyʋ taa, lɩmaɣza ana a-yɔɔ lɛ, ɛɖʋwaɣ ɛ-tɩ heŋ. Ɛyɔɔdaa se: “Mentiheyi mbʋ malakaɣ man-tɩ yɔ nɔɔyʋ kaaʋ, halɩ pɩkpɛndɩnɩ ma-lʋlɩyaa. Nɛ mamaɣzaɣ se mbʋ mɛwɛɛ nɛ malakɩ man-tɩ yɔ pʋyɔɔ lɛ, mɔn-tɔm ɛɛkaɣ kɛdɩnʋʋ Yehowa kpa.”

6. Ɛbɛ pɩsaɣnɩ Vanessa wayɩ se ɛtaaha ɛ-tɩ nɛ pamɩyɩsɩ-ɩ lɩm?

⁶ Ðoŋ weyi taabalaa wɛna yɔ. Vanessa wɛnɩ pɩnzɩ 22, ɛyɔɔdaa se: “Maawɛnɩ taabalʋ kɩbanʋ nɔɔyʋ; mansɩmʋʋ-ɩ yɔ pɩlakɩ pɩnzɩ ɛzɩ 10 mbʋ yɔ.” Paa mbʋ yɔ, taabalʋ ɛnʋ etaaseɣtiɣ Vanesaa se ɛha ɛ-tɩ nɛ pamɩyɩsɩ-ɩ lɩm. Pɩɩcɛyɩ Vanessa siŋŋ nɛ ɛyɔɔdɩ se: “Pɩwɛ-m kaɖɛ se mɛwɛɛnɩ taabalaa, nɛ sɔɔndʋ kpaɣaɣ-m se ye mɛncɛbɩ taabalɩyɛ nɖɩ yɔ, pɩtɩla maakaɣ tasʋʋ hiɣu taabalʋ kɩbanʋ nɔɔyʋ ɛzɩ ɛnʋ yɔ.”

7. (a) Sɔɔndʋ ndʋ kpaɣaɣ Makayla? (b) Nɛ ɛbɛ yɔɔ?

⁷ Piicoɖi-m wiɖiyi sɔɔndʋ. Makayla kaawɛnɩ pɩnzɩ kagbanzɩ alɩwaatʋ ndʋ palɩzɩ ɛ-ɖalʋ ɛgbɛyɛ taa yɔ. Ɛwɛɛ nɛ ɛpaɣlɩɣ lɛ, ɛna se ɛ-ɖalʋ lakasɩ nzɩ sɩcɛyɩ ɛ-lʋlɩyaa siŋŋ. Makayla yɔɔdaa se: “Sɔɔndʋ kpaɣaɣ-m se ye pamɩyɩsɩ-m lɩm yɔ, pɩtɩla mankaɣ labʋ  kɩwɛɛkɩm sɔsɔm nɛ palɩzɩ-m ɛgbɛyɛ taa nɛ manɖʋ ma-lʋlɩyaa wɩzasɩ nɛ pɩkpaɖɩ.”

8. Sɔɔndʋ ndʋ kpaɣaɣ evebu weyi payaɣ se Miles yɔ?

⁸ Kaɖɩnʋʋ. Miles caa nɛ e-ɖoo cikpelu pɛkɛ Yehowa sɛyaa, ɛlɛ e-ɖoo maɣmaɣ tɩkɛ Aseɣɖe Tʋ. Miles yɔɔdaa se: “Mancaɣ mon-ɖoo cɔlɔ pɩnzɩ 18, nɛ sɔɔndʋ kpaɣaɣ-m se meheyi-i se mancaɣ se maha man-tɩ nɛ pamɩyɩsɩ-m lɩm. Mana ɛzɩma ɛɛlaba alɩwaatʋ ndʋ man-caa pɩsɩ Yehowa Aseɣɖe Tʋ yɔ. Sɔɔndʋ kpaɣaɣ-m se ɛtaakɔɔ nɛ ɛla mbʋ ɖɔɖɔ alɩwaatʋ ndʋ manpɩsɩɣ Aseɣɖe Tʋ yɔ.”

9. Ŋwɛɣ nɛ ŋkpɛlɩkɩɣ nɛ ŋtɩlɩɣ suuɖu nɛ sɔɔlɩm mbʋ Yehowa wɛna yɔ lɛ, piseɣtiɣ-ŋ se ŋla we?

⁹ Aɖam nɛ Ɛva palɩzaa se paasɛɣ Yehowa, mbʋ pʋyɔɔ yɔ sɔɔlɩm mbʋ paasɔɔlɩnɩ-ɩ yɔ, pataacɛyɩsɩ-pʋ. Paa mbʋ yɔ, Yehowa ha-wɛ waɖɛ se pacaɣ wezuu nɛ pileɖi nɛ papɩzɩ pɛwɛɛnɩ piya nɛ peɖiyi-sɩ ɛzɩ pa-maɣmaɣ pɔsɔɔlʋʋ yɔ. Mbʋ pɩlɩ lɩmaɣza wena Aɖam nɛ Ɛva pakpaɣaa se Ɛsɔ etaaɖiyi-wɛ yɔ pɩ-taa yɔ, pɩwɩlɩ kpayɩ kpayɩ se kɩmɛlɛndʋ palaba. Pa-pɩɣa kajalaɣ ñɩŋga kʋ ke-neu ɖulum, nɛ alɩwaatʋ wɛɛ nɛ tɩɖɛɣ lɛ, puuyaɣ nɛ piɖeni men-ɖeke lakasɩ kɔɔ nɛ pɩtɔyɩ ɛjaɖɛ yɔɔ. (Kiɖe 4:8; 6:11-13) Paa mbʋ yɔ, Yehowa tɩŋnɩ nʋmɔʋ nakʋyʋ yɔɔ se ɛya Aɖam nɛ Ɛva pe-piya nzɩ sɩsɔɔlaa se sɩsɛɛ-ɩ yɔ sɩ-ñʋʋ. (Yoh. 6:38-40, 57, 58) Ŋwɛɣ nɛ ŋkpɛlɩkɩɣ nɛ ŋtɩlɩɣ suuɖu nɛ sɔɔlɩm mbʋ Yehowa wɛna yɔ lɛ, pɩtʋʋ fɛyɩ se pɩkaɣ-ŋ seɣtuu se ŋsɔɔlɩ-ɩ nɛ pɩkpaɖɩ. Pɩkaɣ-ŋ seɣtuu ɖɔɖɔ se ŋkpaɣ lɩmaɣzɩyɛ se ŋŋmaɣzɩɣnɩ Aɖam nɛ Ɛva, ɛlɛ ŋkpakɩɣ ña-tɩ nɛ ŋha Yehowa.

10. Ɛzɩma Keɣa 18:8 yɔɔ maɣzʋʋ pɩzɩɣ nɛ pɩsɩnɩ-ŋ nɛ ŋsɛɛ Yehowa?

¹⁰ Wolo pɩ-yɔɔ nɛ ŋkpɛlɩkɩɣ Yehowa yɔɔ tɔm. Ye ŋkpɛlɩkaa nɛ ŋtɩlɩ Yehowa camɩyɛ yɔ, pɩsɩɣnɩ-ŋ nɛ ŋna se ŋpɩzɩɣ nɛ ŋsɛɛ-ɩ ɛzɩ ɛsɔɔlʋʋ yɔ. Avery weyi ɖɩɩtɛm ɛ-tɔm yɔɔdʋʋ yɔ, ɛtɔm se: “Mankalɩ lidaʋ tɔm ndʋ tɩwɛ Keɣa 18:8 taa yɔ nɛ mankpaɣ alɩwaatʋ nɛ mamaɣzɩ tɩ-yɔɔ lɛ, piyeba nɛ mawa sɔɔndʋ ndʋ maawɛna yɔ.” (Kalɩ Keɣa 18:8.) Alɩwaatʋ ndʋ Avery nawa se toovenim lɛ, Yehowa ɖɔŋ ɛ-tɔm yɔɔ, pʋ-tɔbʋʋ se eyeki nɛ  “ɛyʋ yem [yaa ɛyʋ weyi ɛɛsɩŋ lɛɣtʋ yɔ]” ɛwɛɛ lɛɣtʋ lɛ, sɔɔlɩm mbʋ ɛsɔɔlɩnɩ Ɛsɔ yɔ, pɩɖaɣnɩ paɣlʋʋ. Pɩtasɩna se sɔɔlɩm sɩɣnɩ-ɖʋ se ɖɩwa sɔɔndʋ lɛ, pɩsɩɣnɩ-ɖʋ ɖɔɖɔ se ɖɩka ɖa-lɩmaɣza Yehowa nɛ ɛ-sɔɔlɩm labʋ yɔɔ nɛ pɩkpaɖɩ. Hannah weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: “Bibl kalʋʋ nɛ tɩ-yɔɔ kpɛlɩkʋʋ sɩnɩ-m nɛ mana se alɩwaatʋ ndʋ manɖʋʋ man-tɩ heŋ yɔ, mɛwɛɛ nɛ manɖʋʋ heŋ Yehowa ɖɔɖɔ.” (1 Pɩy. 5:7) Hannah kɔm nɛ ɛpɩsɩ weyi ‘ɛɖɔŋ Ɛsɔ tɔm yɔɔ yɔ.’ (Yak. 1:22) Ɛbɛ lɩ pɩ-taa? Ɛyɔɔdaa se: “Alɩwaatʋ ndʋ mana ɛzɩma Yehowa ñam wazɩ-m yɔ lɛ, sɔɔlɩm mbʋ mɔnsɔɔlɩnɩ-ɩ yɔ pɩpaɣlɩ siŋŋ. Lɛɛlɛɛyɔ, maapɩtɩɣ se Yehowa kaɣ-m ɖiyuu alɩwaatʋ ndʋ pɩpɔzʋʋ yɔ tɩ-yɔɔ ɖeyi ɖeyi.” Hannah kɔm nɛ ɛwa lɩmaɣza wena ayekaɣ nɛ ɛɖʋʋ ɛ-tɩ heŋ yɔ. Ɛkpaɣ ɛ-tɩ nɛ ɛha Yehowa nɛ pamɩyɩsɩ-ɩ lɩm.

11. (a) Ɛbɛ Vanesaa laba nɛ ɛwɛɛnɩ taabalaa kɩbama? (b) Nɛ lɔŋ weyi pɩkpɛlɩkɩɣ-ɖʋ?

¹¹ Lɩzɩ ña-taabalaa nɛ lɛɣtʋ. Vanessa weyi ɛ-tɔm ɖɩtɛm yɔɔdʋʋ yɔ, ɛkɔm nɛ ɛna se ɛ-taabalʋ wɛɛ nɛ ɛpɩsɩɣnɩ-ɩ nɛ wayɩ se ɛtaasɛɛ Yehowa. Peeɖe ɛcɛbɩ taabalɩyɛ nɖɩ. Ɛlɛ ɛtɩsɩɩnɩ peeɖe. Ɛñaɣ pana se ɛwɛɛnɩ taabalaa kɩfama ɛgbɛyɛ taa. Ɛyɔɔdaa se Noowa nɛ ɛ-hɔʋ pa-kɩɖaʋ sɩnɩ-ɩ. Ɛtɔm se: “Powobi pɩ-yɔɔ nɛ paɖʋ ɖama nɛ taabalɩyɛ paa ɛyaa mba paacɔ-wɛ nɛ pata yɔ, pataasɔɔlɩ Yehowa yɔ.” Pamɩyɩsɩ Vanessa lɩm nɛ pɩtɛ lɛ, ɛpɩsɩ nʋmɔʋ lɩzɩyʋ. Ɛtasɩ yɔɔdʋʋ se: “Pɩsɩnɩ-m nɛ mɛwɛɛnɩ taabalaa kɩbama mɛ-ɛgbɛyɛ maɣmaɣ taa, nɛ agbaa lɛɛna taa ɖɔɖɔ.” Ye ŋlakɩ tʋmɩyɛ nɖɩ Yehowa ɖʋ-ɖʋ se ɖɩla yɔ nɛ ño-ɖoŋ kpeekpe yɔ, ña ɖɔɖɔ ŋkaɣ wɛnʋʋ taabalaa kɩbama.​—Mat. 24:14.

12. (a) Sɔɔndʋ ndʋ Aɖam nɛ Ɛva pataawɛɛna? (b) Nɛ ɛbɛ lɩ pɩ-taa?

¹² Wɛɛnɩ sɔɔndʋ ndʋ tɩmʋnaa yɔ. Sɔɔndʋ natʋyʋ wɛɛ lɛ, tɩwazɩɣ-ɖʋ. Tɩ-taa natʋyʋ lɛ sɔɔndʋ ndʋ tɩkpaɣ-ɖʋ nɛ se ɖɩtaala mbʋ Yehowa tɩsɔɔlɩ yɔ. (Keɣa 110:10) Ye Aɖam nɛ Ɛva paawɛnɩ sɔɔndʋ ndʋ yɔ, pataakaɖɩnɩ Yehowa. Ɛlɛ, pataawɛɛnɩ-tʋ. Pakaɖɩnɩ Yehowa nɛ pɩtɛ lɛ, pɛ-ɛsa kuli, pʋ-tɔbʋʋ se papaɣzɩ naʋ kpayɩ kpayɩ se palabɩ kɩwɛɛkɩm. Pɛɖɛzɩ pe-piya kɩwɛɛkɩm nɛ sɩm. Ɛzɩma pɛ-ɛsa kulaa yaa pana kpayɩ kpayɩ wɛtʋ ndʋ tɩ-taa pɛwɛɛ yɔ, piyeba nɛ fɛyɛ  paɣzɩ-wɛ kpaʋ se pɛwɛ ndaakpeɖe nɛ papaɣzɩ pɔ-yɔɔ huuzuu.​—Kiɖe 3:7, 21.

13-14. (a) Ɛzɩ 1 Pɩyɛɛrɩ 3:21 yɔɔdʋʋ yɔ, ɛbɛ yɔɔ pɩfɛyɩ se ɖise sɩm sɔɔndʋ kadadayaɣ? (b) Lɩmaɣza wena yɔɔ pɩwɛɛ se ɖɩsɔɔlɩ Yehowa?

¹³ Paa pɩwɛɛ se sɔɔndʋ ɛkpa-ɖʋ nɛ mbʋ Yehowa tɩsɔɔlɩ yɔ pɩ-labʋ yɔ, pɩfɛyɩ se ɖise sɩm sɔɔndʋ kadadayaɣ. Yehowa ñɔɔzɩ-ɖʋ nʋmɔʋ ŋgʋ kɩ-yɔɔ pɩwɛɛ se ɖɩtɩŋna nɛ ɖihiɣ wezuu maatɛŋ yɔ. Ye ɖɩlabɩ kɩwɛɛkɩm nɛ ɖikpiɖi pɩ-yɔɔ siŋŋ yɔ, Yehowa kpeɣu-ɖʋ pʋ. Pɩtɩŋnɩ tisuu mbʋ ɖɩwɛnɩ ɛ-Pɩyalʋ kɩlaʋ yɔɔ yɔ pɩ-yɔɔ lɛ, ɛkaɣ-ɖʋ kpeɣu ɖa-kɩwɛɛkɩm. Nɛ mbʋ ɖɩcalɩɣnɩ wɩlʋʋ se ɖɩwɛnɩ tisuu yɔ lɛ se ɖɩkpaɣ ɖe-wezuu nɛ ɖɩha Ɛsɔ nɛ pamɩyɩsɩ-ɖʋ lɩm.​—Kalɩ 1 Pɩyɛɛrɩ 3:21.

¹⁴ Lɩmaɣza wena a-yɔɔ pɩwɛɛ se ɖɩsɔɔlɩ Yehowa yɔ, aɖɔ sakɩyɛ. Pɩtasɩnɩ se ɛhaɣ-ɖʋ mbʋ payɩ pɩwazɩɣ-ɖʋ paa evemiye nɖɩ yɔ lɛ, ɛwɩlɩɣ-ɖʋ ɛ-yɔɔ toovenim tɔm nɛ ɛ-kaɖʋsɩ tɔm ɖɔɖɔ. (Yoh. 8:31, 32) Ɛha-ɖʋ Krɩstʋ ɛgbɛyɛ se ɖiɖiyiɣ-ɖʋ nɛ ɖɩkpazɩɣ-ɖʋ ɖoŋ. Ɛmaɣzɩɣ ɖɔ-yɔɔ yaa ɛsɩɣnɩ-ɖʋ se ɖɩpɩzɩ nɛ ɖɩsɩɣlɩ ɖa-sʋʋtʋ sɔnɔ; nɛ ɛhaɣ-ɖʋ lidaʋ se ɖɩkaɣ caɣʋ wezuu tam tam wɛtʋ ndʋ tɩtalɩ pilim yɔ tɩ-taa. (Keɣa 67:20; Natʋ 21:3, 4) Ye ɖɩkpakɩɣ alɩwaatʋ nɛ ɖɩmaɣzɩɣ mbʋ payɩ Yehowa tɛm labʋ nɛ ɛwɩlɩ-ɖʋ se ɛsɔɔlɩ-ɖʋ yɔ pɩ-yɔɔ yɔ, piseɣtiɣ-ɖʋ nɛ ɖɩsɔɔlɩ-ɩ ɖɔɖɔ. Nɛ alɩwaatʋ ndʋ ɖɩsɔɔlʋʋ Yehowa yɔ, piyeki nɛ ɖɩwɛɛnɩ sɔɔndʋ ndʋ tɩmʋnaa yɔ. Sɔɔndʋ kpaɣ-ɖʋ se ɖɩtaala mbʋ pɩɩkɛdɩɣnɩ Weyi ɖɩsɔɔlɩ-ɩ siŋŋ yɔ.

15. Ɛzɩma Makayla laba nɛ ɛwa sɔɔndʋ ndʋ ɛɛwɛna se piicoɖi-i nɛ ɛla kɩwɛɛkɩm yɔ?

¹⁵ Makayla weyi ɖɩyɔɔdɩ ɛ-tɔm nɛ pɩɖɛɛ yɔ, ɛwabɩ sɔɔndʋ ndʋ ɛɛwɛna se piicoɖi-i nɛ ɛla kɩwɛɛkɩm yɔ alɩwaatʋ ndʋ ɛtɩlaa se Yehowa kɛ weyi ekpeɣu siŋŋ yɔ. Ɛyɔɔdaa se: “Manɩ pɩ-taa se ɖa-tɩŋa payɩ ɖɩtɩtalɩ pilim, nɛ picoɖuu-ɖʋ. Manɩ pɩ-taa ɖɔɖɔ se Yehowa sɔɔlɩ-ɖʋ nɛ ɛkaɣ tɩŋnʋʋ kɩhɛyʋʋ pʋ-ñʋʋ taa yɔɔ nɛ ekpeɣ-ɖʋ ɖa-kɩwɛɛkɩm.” Sɔɔlɩm mbʋ Makayla sɔɔlɩnɩ Yehowa yɔ, piseɣti-i nɛ ɛha-ɩ ɛ-tɩ nɛ pamɩyɩsɩ-ɩ lɩm.

16. Pakaɖɩnɩ Miles lɛ, ɛbɛ sɩnɩ-ɩ nɛ ɛwa?

¹⁶ Miles weyi sɔɔndʋ kpaɣaɣ-ɩ se ye ɛha ɛ-tɩ nɛ pamɩyɩsɩ-ɩ lɩm yɔ, e-ɖoo ɛɛkaɣ tisuu yɔ, ɛpɔzɩ egeetiye yɔɔ cɔnɩyʋ se ɛsɩnɩ-ɩ. Miles yɔɔdaa se: “Ɛnʋ ɖɔɖɔ, ɛ-lʋlɩyaa taakpɛndɩ tisuu nɛ mba kaacɔnɩnɩ ɛ-yɔɔ nɛ ɛpaɣlɩ. Ɛsɩnɩ-m nɛ mantɩlɩ tɔm ndʋ manpɩzɩɣ nɛ mɔyɔɔdɩ nɛ mon-ɖoo nɩɩ pɩ-taa se ma-maɣmaɣ mankpaɣnɩ lɩmaɣzɩyɛ se mahaɣ man-tɩ nɛ pamɩyɩsɩ-m lɩm; ɛlɛ pɩtɩkɛ man-caa tuzini-m se mala mbʋ.” Miles ɖoo taa tɩla leleŋ nɛ lɩmaɣzɩyɛ nɖɩ. Pʋwayɩ, pɩɩlabɩ kaɖɛ siŋŋ nɛ pɩpɔzɩ se ɛlɩɩ e-ɖoo ɖɩɣa taa; paa mbʋ yɔ, ɛñɔnɩ lɩmaɣzɩyɛ nɖɩ ɛkpaɣaa yɔ kpam. Ɛyɔɔdaa se: “Mantɩlɩ kɩbam mbʋ Yehowa labɩ-m yɔ lɛ, pɩla mɔ-yɔɔ tʋmɩyɛ siŋŋ. Mamaɣzɩ kɩhɛyʋʋ pʋ-ñʋʋ taa kɩlaʋ ŋgʋ Yesu laba yɔ kɩ-yɔɔ siŋŋ lɛ, piyele nɛ manɩɩ pɩ-taa se Yehowa sɔɔlɩ-m. Lɩmaɣza  ana aseɣti-m nɛ maha man-tɩ Yehowa nɛ pamɩyɩsɩ-ɩ lɩm.”

17. Waɖɛ nɖɩ ɖɩwɛna?

¹⁷ Alɩwaatʋ ndʋ Ɛva tɔɔ tɩʋ piye Edɛɛnɩ kaɖaɣ taa yɔ, ɛwɩlaa se ekizi ɛ-Caa. Alɩwaatʋ ndʋ Aɖam tɩŋ ɛ-wayɩ nɛ ɛtɔɔ tɩʋ piye yɔ, ɛlɛ lɩzaa nɛ ɛwɩlɩ kpayɩ kpayɩ se ɛfɛyɩnɩ ɛsɩmɩyɛ naɖɩyɛ kɩbam mbʋ payɩ Yehowa labɩ-ɩ yɔ pɩ-yɔɔ. Ða-tɩŋa ɖɩwɛnɩ waɖɛ se ɖɩwɩlɩ se ɖa-taa fɛyɩ leleŋ nɛ lɩmaɣza wena Aɖam nɛ Ɛva pakpaɣaa yɔ. Ye ɖɩha ɖa-tɩ nɛ pamɩyɩsɩ-ɖʋ lɩm yɔ, pɩwɩlɩɣ se ɖitisaa se Yehowa wɛnɩ waɖɛ se ɛɖʋ-ɖʋ paɣtʋ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-yɔɔ. Ye ɖɩlabɩ mbʋ yɔ, ɖɩwɩlɩɣ se ɖɩsɔɔlɩ ɖa-Caa nɛ ɖɩtaɣ-ɩ liu.

18. Ɛbɛ pɩwɛɛ se ŋla nɛ piɖeni-ŋ Yehowa sɛtʋ taa?

¹⁸ Pɛtɛŋ-ɖʋ lɩm mɩyɩsʋʋ lɛ, pɩwɛɛ se ɖɩñaɣ pana paa evemiye nɖɩ nɛ ɖɩɖɔŋ Yehowa paɣtʋ yɔɔ nɛ pɩtaakɛ ɖa-ñɩndʋ yɔɔ. Paa pɩnaɣ ŋga lɛ, ɛyaa miiliyɔɔwaa sakɩyɛ wɛɛ nɛ palakɩ mbʋ. Ye ŋwobi pɩ-yɔɔ nɛ ŋkpɛlɩkɩɣ Ɛsɔtɔm se ŋnɩɩ tɩ-taa camɩyɛ, ŋwobi pɩ-yɔɔ nɛ ña nɛ ño-koobiya ikpeɣliɣ ɖoŋ ɖoŋ nɛ ŋsusuu ɖɔɖɔ tɔm ndʋ ŋkpɛlɩkɩ ña-Caa kʋsɔɔlʋ yɔɔ yɔ nɛ kpekpeka yɔ, ña ɖɔɖɔ ŋpɩzɩɣ nɛ ŋla mbʋ. (Ebr. 10:24, 25) Alɩwaatʋ ndʋ ŋkpakɩɣ lɩmaɣza yɔ, welisi lɔŋ weyi Yehowa tɩŋɩɣnɩ ɛ-Tɔm nɛ ɛ-ɛgbɛyɛ pɔ-yɔɔ nɛ ɛtasɩɣ-ŋ yɔ. (Iza. 30:21) Ye ŋlabɩ pɩtɩŋa payɩ mbʋ yɔ, pɩkaɣ-ŋ ɖenuu ña-nʋmɔŋ kpeekpe taa.​—Adu. 16:3, 20.

19. (a) Ɛbɛ yɔɔ pɩwɛɛ se ŋwɛɛ nɛ ŋtɔzʋʋ? (b) Nɛ ɛbɛ yɔɔ?

¹⁹ Ye ŋwɛɛ nɛ ŋtɔzʋʋ ɛzɩma Yehowa paɣtʋ wazɩɣ-ŋ siŋŋ yɔ, pɩsɩɣnɩ-ŋ nɛ ŋsɔɔlɩ-ɩ nɛ ŋsɔɔlɩ ɖɔɖɔ ɛ-paɣtʋ nɛ pɩkpaɖɩ. Ye ŋlabɩ mbʋ yɔ, Sataŋ ɛɛkaɣ pɩzʋʋ nɛ ɛtɩŋnɩ nabʋyʋ yɔɔ nɛ eyele nɛ ŋkizi Yehowa sɛʋ. Pɩnzɩ kudoku wayɩ, ŋkaɣ ɖiɣzinuu se lɩmaɣzɩyɛ nɖɩ ŋkpaɣaa se pamɩyɩsɩ-ŋ lɩm yɔ, nɖɩ kpaɖɩnɩ ɖeu lɩmaɣza wena ŋkpaɣ ñe-wezuu caɣʋ kpeekpe taa yɔ a-taa.