1, 2. Ɛbɛ yɔɔ wezuu caɣʋ pɩzɩɣ nɛ pɩwɛɛ kaɖɛ Ɛsɔ sɛyaa sɔnɔ? (Cɔnɩ kiɖe tɛɛ kɩlɛmɩŋ.)

ÐƆKƆTƆNAA sakɩyɛ lakɩ tʋmɩyɛ ɛyaa mba pɛwɛnɩ kʋdɔmɩŋ kɩɖɛɖɛŋ yɔ pɛ-hɛkʋ taa. Ðɔkɔtɔnaa mba, pɔcɔŋnɩ kʋdɔndɩnaa yɔɔ camɩyɛ mbʋ pʋyɔɔ yɔ pɔsɔɔlaa se pasɩnɩ-wɛ. Ɛlɛ paawaɣ kʋdɔndʋ nɔɔyʋ kʋdɔŋ lɛ, pɔcɔnɩ pa-tɩ yɔɔ camɩyɛ ɖɔɖɔ, mbʋ pʋyɔɔ yɔ panawa se ye patɩtɩlɩ labʋ yɔ kʋdɔŋ ŋgʋ kɩpɩzɩɣ nɛ kɩɖɛɛ-wɛ. Mbʋ ɖɔɖɔ pɩwɛ ɖa-taa ɛyaa sakɩyɛ hɔɔlʋʋ taa. Ða nɛ ɛyaa mba ɖɩwɛ lone kʋɖʋmɖɩyɛ taa yaa ɖa nɛ mba ɖɩlakɩ tʋmɩyɛ kʋɖʋmɖɩyɛ yɔ, pɛwɛnɩ wɛtʋ kɩdɛkɛdɩtʋ ndʋ tɩkaɖɩɣnɩ Ɛsɔ sɛyaa ñɩndʋ yɔ. Pʋyɔɔ lɛ, ye ɖɩtɩtɩlɩ labʋ yɔ papɩzɩɣ nɛ pɛɖɛzɩ-ɖʋ wɛtʋ ndʋ.

² Ɛyaa wezuu caɣʋ tɛzɩ wɛɛkʋʋ kpem kɛdɛzaɣ kɩyakɩŋ ɛnɛ ɩ-taa. Apostoloo Pɔɔlɩ maɣaɣ takayaɣ naalɛ ñɩŋga Timootee lɛ, ɛyɔɔdɩ wɛtʋ kɩdɛkɛdɩtʋ ndʋ ɛyaa mba poposi pa-tɩ nɛ Ɛsɔ yɔ pakaɣ wɛnaʋ yɔ tɩ-tɔm. Paa ɖiɖiɣni wɛtʋ ndʋ naʋ sɔnɔ yɔ, pɩɩɖɛɣnɩ ɛsɩndaa lɛ, tɩkaɣ wɛnaʋ ɖoŋ ɛyaa yɔɔ nɛ pɩkpaɖɩ. (Kalɩ 2 Timootee 3:1-5, 13.) Wɛtʋ kɩdɛkɛdɩtʋ wɛɛ nɛ tɩtɔyʋʋ nɛ pɩkpaɣ-ɖʋ sɔɔndʋ; ɛlɛ ye ɖɩtɩtɩlɩ labʋ yɔ, ɛyaa mba pɛwɛnɩ wɛtʋ ndʋ yɔ papɩzɩɣ nɛ pɛwɛɛnɩ ɖoŋ ɖɔ-yɔɔ. (Adu. 13:20)  Tɔm ñʋʋ kʋnɛ kɩ-taa, ɖɩkaɣ naʋ ɛzɩma wɛtʋ ndʋ ɛjaɖɛ yɔɔ ɛyaa wɛnɩ kɛdɛzaɣ kɩyakɩŋ ɛnɛ ɩ-taa yɔ, tɩwɛ ndɩ kpem nɛ Ɛsɔ sɛyaa wɛtʋ yɔ. Ðɩkaɣ naʋ ɖɔɖɔ mbʋ ɖɩpɩzɩɣ ɖɩla nɛ ɖɩkandɩyɩ ɖa-tɩ yɔɔ nɛ ɛjaɖɛ yɔɔ ɛyaa ɩtaaɖɛzɩ-ɖʋ pɛ-wɛtʋ kɩdɛkɛdɩtʋ alɩwaatʋ ndʋ ɖɩɩsɩɣnɩ-wɛ fezuu taa yɔ.

3. Ɛyaa mba wɛtʋ tɔm Pɔɔlɩ yɔɔdɩ 2 Timootee 3:2-5 taa?

³ Apostoloo Pɔɔlɩ mawa se: “Wayɩ wayɩ wɛɛ [yaa kɛdɛzaɣ kɩyakɩŋ] taa lɛ, pɩkaɣ wɛʋ kaɖɛ pɩŋŋ.” Pʋwayɩ lɛ, ɛyɔɔdɩ wɛtʋ kɩdɛkɛdɩtʋ ndɩ ndɩ 19 ndʋ ɛyaa kaɣ wɛnaʋ kɛdɛzaɣ kɩyakɩŋ ɛnɛ ɩ-taa yɔ tɩ-tɔm. Wɛtʋ ndʋ tɩ-tɔm Pɔɔlɩ yɔɔdaa yɔ, tɩnɩɣzɩnɩ ndʋ ɛɛyɔɔdɩ tɩ-tɔm Roma 1:29-31 taa yɔ. Ɛlɛ Grɛɛkɩ Masɩ taa payɩ lɛ, Timootee takayaɣ taa ɖeke ɖɩnaɣ wɛtʋ kɩdɛkɛdɩtʋ ndʋ tɩ-tɔm ɛyɔɔdaa yɔ tɩ-taa lɛɛtʋ. Pɔɔlɩ yɔɔdaɣ wɛtʋ kɩdɛkɛdɩtʋ ndʋ ɛyaa kaɣ wɛnaʋ yɔ tɩ-tɔm lɛ, ɛpaɣzɩnaa se “Ɛyaa kaɣ . . .” Ɛlɛ pɩtɩwɩlɩ se ɛyaa tɩŋa kaɣnɩ wɛnaʋ wɛtʋ ndʋ tɩ-tɔm ɛyɔɔdaa yɔ, mbʋ pʋyɔɔ yɔ Krɩstʋ mba wɛtʋ ñɛwɛ ndɩ.​—Kalɩ Malakiya 3:18.

4. Suwe ŋpɩzɩɣ nɛ ŋyɔɔdɩ ɛyaa mba pɛwɛnɩ tɩ kpazʋʋ yɔ pɔ-yɔɔ?

⁴ Pɔɔlɩ yɔɔdaa se ɛyaa kaɣ nɩnʋʋ pa-tɩ ɖeke nɛ pakaɣ wɛʋ liidiye lazaɣ sɔsɔɔ nɛ pɩtɛ lɛ, ɛyɔɔdɩ ɖɔɖɔ se pakaɣ kɛʋ abɛlɛɛ tɩnaa, pakaɣ pa-tɩ kpazʋʋ. Ɛyaa wɛɣnɩ wɛtʋ tʋnɛ alɩwaatʋ ndʋ pamaɣzɩɣ se pɛ-lɛɣtʋ, pe-keɖeɣa, pɔ-tɔnʋʋ taa alaafɩya yaa lone nɖɩ pɛwɛna yɔ ɖɩ-yɔɔ lɛ, pakɩlɩ ɛyaa lalaa yɔ. Ɛyaa mba pɛwɛnɩ wɛtʋ tʋnɛ yɔ, pañɩnɩɣ se ɛyaa lalaa ɩɖɛyɩɣ-wɛ nɛ pasaŋ-wɛ. Lɔŋsɩnɖʋ nɔɔyʋ yɔɔdaa se ɛyʋ weyi ɛwɛnɩ tɩ kpazʋʋ yɔ, “Altaaru cikpeluu nakʋyʋ wɛ ɛ-laŋɩyɛ taa nɛ eluŋuu kɩ-tɛɛ nɛ ɛsɛɣ ɛ-tɩ.” Nabɛyɛ yɔɔdʋʋ se tɩ kpazʋʋ fɛyɩ ɖeu kpem mbʋ pʋyɔɔ yɔ, ɛyʋ weyi ɛwɛnɩ tɩ kpazʋʋ yɔ, ɛtɩsɔɔlɩ ɛyaa lalaa mba pɛwɛnɩ wɛtʋ ndʋ ɖɔɖɔ yɔ.

5. Ɛzɩma Ɛsɔ sɛyaa siɣsiɣ tɩnaa nabɛyɛ kɔm nɛ pɔtɔlɩ tɩ kpazʋʋ kpaca taa?

⁵ Ðɩɩpɩtɩɣ se Yehowa paɖɩɣ ɛyaa mba pɛwɛnɩ tɩ kpazʋʋ yɔ. Ɛtɩsɔɔlɩ ɛyaa mba ‘pɛpɛŋ lalaa tɛtɛ’ yɔ. (Adu 6:16, 17) Tɩ kpazʋʋ yeki nɛ ɛyʋ posini Ɛsɔ. (Keɣa 9B:4) Tɩkɛnɩ Eleeu wɛtʋ. (1 Tim. 3:6) Ɛlɛ pɩlabɩ pʋtɔdɩyɛ se halɩ Yehowa sɛyaa siɣsiɣ tɩnaa nabɛyɛ kɔm nɛ pɔtɔlɩ tɩ kpazʋʋ kpaca taa. Yuuda wiyaʋ Uziya kaaɖɔm siɣsiɣ Ɛsɔ ɛsɩndaa pɩnzɩ sakɩyɛ. Ɛlɛ Bibl heyiɣ-ɖʋ se ‘ɛkpa ɖoŋ lɛ, ɛkpazɩ ɛ-tɩ nɛ pʋɖʋzɩ-ɩ, ɛsʋ Yehowa templo taa nɛ ɛsɔ sɔzɩŋ pɛɛ miŋ tɩlaaɖɩ altaaru yɔɔ nɛ ɛɖʋ Yehowa ɖɩwɩzɩyɛ.’ Pʋwayɩ ɖɔɖɔ lɛ, Wiyaʋ Ezekiyaasɩ tɔlɩ kpaca kʋɖʋmʋʋ ŋgʋ kɩ-taa, ɛlɛ ñʋʋ leleŋ kɛlɛ se ɛkɔm nɛ eluzi ɛ-tɩ.​—4 Aw. 26:16; 32:25, 26.

6. (a) Ɛbɛ pɩzaɣ se piyele nɛ Daviid kpazɩ ɛ-tɩ? (b) Nɛ ɛbɛ yɔɔ ɛtɩla mbʋ?

⁶ Ɛyaa nabɛyɛ kpazɩɣ pa-tɩ mbʋ pʋyɔɔ yɔ peɖewa, pa-hɩla sɛwa, pasɩm hendu teu camɩyɛ, pɛwɛnɩ tomnaɣ yɔɔ ɖoŋ yaa pɛwɛ lone sɔsɔyɛ naɖɩyɛ taa. Daviid ñaawɛnɩ wala ana a-tɩŋa payɩ, ɛlɛ eeluzi ɛ-tɩ e-wezuu caɣʋ kɩyakɩŋ tɩŋa taa. Daviid kaakʋ Gooliyaatɩ nɛ Wiyaʋ Sɔɔlɩ ha-ɩ ɛ-pɛlɛ lɛ, ɛyɔɔdaa se: “Ma yɔ anɩ nɛ me-wezuu lɛ ŋkʋ, yaa man-caa waʋ kɔyɔ ŋkʋ Izrayɛɛlɩ taa nɛ mɛnkɛɣ wiyaʋ ɛtɩ?” (1 Sam. 18:18) Ɛbɛ kaasɩnɩ Daviid nɛ ɛɖɔkɩ tɩ luzuu kpam? Eeɖiɣzinaa se Ɛsɔ “luzuu ɛ-ɛsa [yaa ‘eluzuu ɛ-tɩ,’ nwt]” nɛ ekeŋni-i, pʋyɔɔ ɛwɛnɩ wɛtʋ kɩbandʋ, lɛɣtʋ nɛ wala wena payɩ ɛɛwɛna yɔ. (Keɣa 112:5-8) Daviid kaanawa se mbʋ payɩ ɛɛwɛna yɔ, Yehowa hanɩ-ɩ pʋ.—Kpaɣ-tʋ ŋmaɣzɩnɩ 1 Kɔrɛntɩ 4:7.

7. Ɛbɛ pɩzɩɣ pɩsɩnɩ-ɖʋ nɛ ɖɩwɛɛnɩ tɩ luzuu?

⁷ Yehowa samaɣ ñakɩ pana sɔnɔ nɛ kawɩlɩɣ tɩ luzuu ɛzɩ Daviid kaalabʋ yɔ. Pɩɖɩɣzɩ-ɖʋ yem se Yehowa weyi ɛkɛ kedeŋa kpeekpe Kɩlɩm yɔ ɛwɛnɩ ‘tɩ luzuu’ wɛtʋ. (Keɣa 18:35, nwt) Ðɩñakɩ pana se ɖɩlabɩnɩ  Bibl lɔŋ tasʋʋ pʋnɛ tʋmɩyɛ: “Ɩkɛnɩ pʋtɔdɩyɛ nayaa, kɩbandʋ tɩnaa, hɛɛɛ tɩnaa [yaa mba poluzuu pa-tɩ yɔ], leleŋ tɩnaa, tɩ ɖɔkɩyaa.” (Kol. 3:12) Bibl heyiɣ-ɖʋ ɖɔɖɔ se sɔɔlɩyʋ “ɛɛkpazɩɣ ɛ-tɩ, ɛɛwɛɣ ajana.” (1 Kɔr. 13:4, ABT) Ye ɖɩwɛnɩ tɩ luzuu kɔyɔ, pɩpɩzɩɣ nɛ pɩhɔ ɛyaa nɛ pɔñɔtɩnɩ Yehowa. Abalaa mba paasɛɣ Ɛsɔ yɔ, pa-halaa tɩ luzuu pɩzɩɣ nɛ piyele nɛ papaɣzɩ-ɩ sɛʋ; mbʋ ɖɔɖɔ tɩ luzuu mbʋ Yehowa sɛyaa wɛna yɔ, pɩpɩzɩɣ nɛ pɩhɔ ɛyaa lalaa.​—1 Pɩy. 3:1.

8. (a) Suwe nabɛyɛ maɣzɩ piya kaañamtʋ yɔɔ sɔnɔ? (b) Paɣtʋ ndʋ Bibl ɖʋ piya?

⁸ Pɔɔlɩ yɔɔdɩ wɛtʋ ndʋ ɛyaa kaɣ ɖama wɩlʋʋ kɛdɛzaɣ kɩyakɩŋ taa yɔ tɩ-tɔm. Ɛmawa se kɛdɛzaɣ kɩyakɩŋ taa lɛ, piya ɩɩkaɣ sɩ-ñɩma ñam. Nabʋyʋ taa takayɩsɩ nasɩyɩ, filimwaa nabɛyɛ nɛ teelee yɔɔ ɖʋtʋ natʋyʋ seɣtiɣ piya se sɩwɛɛnɩ kaañamtʋ, ɛlɛ toovenim taa lɛ kaañamtʋ ndʋ tɩwɛna nɛ tɩwɛɛkɩɣ nɔɔ kʋɖʋmaɣ hɔŋ taa sɔnɔ. Ðooo caanaʋ taa ɛyaa kaasɩma mbʋ se pɩcɛyaa se piya ɩwɛɛnɩ ñamtʋ sɩ-lʋlɩyaa yɔɔ. Halɩ ye ɖɩkpaɣ caanaʋ taa Grɛɛkɩ mba yɔ, ye pɩɣa nakɛyɛ ɛmabɩ ka-lʋlɩyaa yɔ kaatasɩɣ wɛnʋʋ waɖɛ naɖɩyɛ ɛjaɖɛ taa; nɛ mbʋ ɖɔɖɔ Roma mba paɣtʋ taa lɛ, pɩɣa ŋga kamakɩ ka-caa yɔ, kɛwɛ ɖɔɖɔ ɛzɩ weyi ɛkʋ ɛyʋ yɔ. Ebree Masɩ nɛ Grɛɛkɩ Masɩ ɖʋ paɣtʋ piya se sɩɖʋ sɩ-lʋlɩyaa hɩɖɛ.​—Ejl. 20:12; Efɛz. 6:1-3.

9. Ɛbɛ pɩzɩɣ nɛ pɩsɩnɩ piya evelisi nɛ sɩña sɩ-lʋlɩyaa?

⁹ Ye piya ɩmaɣzɩɣ mbʋ mbʋ sɩ-lʋlɩyaa labɩ-sɩ yɔ pɩ-yɔɔ yɔ, pɩsɩɣnɩ-sɩ nɛ sɩkandɩyɩ sɩ-maɣmaɣ sɩ-yɔɔ nɛ kaañamtʋ lɩmaɣza ɩtaawɛɛnɩ ɖoŋ sɩ-yɔɔ. Ye sɩnɩ pɩ-taa se ɖa-tɩŋa ɖa-Caa, Ɛsɔ pɔzʋʋnɩ-sɩ se sɩña sɩ-lʋlɩyaa yɔ, pɩsɩɣnɩ-sɩ nɛ sɩwɛnɩ ɛsɩmɩyɛ mbʋ palabɩ-sɩ yɔ pɩ-yɔɔ. Ye sɩyɔɔdʋʋ tɔm kɩbandʋ sɩ-lʋlɩyaa yɔɔ yɔ, pɩsɩɣnɩ piya evelisi lɛɛsɩ nɛ sɩsɩ ɖɔɖɔ sɩña sɩ-lʋlɩyaa. Toovenim taa lɛ, ye lʋlɩyaa ɩfɛyɩnɩ laŋɩyɛ yɔ, pʋ-tɔbʋʋ se ye patɩsɔɔlɩ pe-piya yɔ, pɩwɛɣ-sɩ kaɖɛ se sɩsɔɔlɩ-wɛ nɛ sɩ-laŋɩyɛ pilim. Ɛlɛ ye piya ɩnaɣ se sɩ-lʋlɩyaa sɔɔlɩ-sɩ siŋŋ yɔ, piseɣtiɣ-sɩ se sɩla pɔ-sɔɔlɩm halɩ pɩkpɛndɩnɩ alɩwaatʋ ndʋ ñamtʋ pɩzɩɣ nɛ pɩlabɩ-sɩ kaɖɛ yɔ. Austin yɔɔdaa se: “Nabʋyʋ taa pɩlakɩ-m ɛzɩ mamaanɩ man-lʋlɩyaa paɣtʋ yɔɔ, ɛlɛ manawa se mbʋ mbʋ man-lʋlɩyaa pɔzʋʋ-m yɔ pɩtɩkɩlɩ-m nɛ paɖʋʋ paɣtʋ natʋyʋ lɛ, peheyiɣ-m mbʋ pʋyɔɔ paɖʋ-m tʋ yɔ. Paa ɛzɩmtaa ɖɔɖɔ lɛ, peyekaɣ se pɩwɛ-m kɛlɛʋ nɛ mɔñɔtɩnɩ-wɛ nɛ ma nɛ wɛ ɖɩyɔɔdɩ. Pɩsɩnɩ-m nɛ mɛwɛnɩ pɔ-yɔɔ ñamtʋ. Manaɣaɣ se pamaɣzɩɣ mɔ-yɔɔ siŋŋ, nɛ mbʋ yebina nɛ mɔnsɔɔlɩ se mala mbʋ pɩkɛdɩnɩ-wɛ yɔ.”

10, 11. (a) Wɛtʋ ndʋ ɛyaa wɛna nɛ pɩwɩlɩɣ se pɛfɛyɩnɩ sɔɔlɩm ɖama yɔɔ? (b) Ɛzɩma toovenim Krɩstʋ mba ñawɩlɩɣ se pɛwɛ ndɩ nɛ ɛyaa mba pɛfɛyɩnɩ sɔɔlɩm yɔ?

¹⁰ Pɔɔlɩ tasɩ wɛtʋ kɩdɛkɛdɩtʋ lɛɛtʋ ndʋ tɩwɩlɩɣ se sɔɔlɩm ɛɛkaɣ wɛʋ ɛyaa hɛkʋ taa yɔ tɩ-tɔm yɔɔdʋʋ. Pɔɔlɩ yɔɔdɩ mba “paakaɣ pa-ñɩma ñam” yɔ pɔ-tɔm nɛ ɛtɛ lɛ, ɛyɔɔdɩ mba paakaɣ sɩm kʋjɔʋ yɔ pɔ-tɔm. Pʋmʋnɩ mbʋ, mbʋ pʋyɔɔ yɔ ɛyaa mba paasɩŋ kʋjɔʋ yɔ, pɛfɛyɩnɩ ɛsɩmɩyɛ kɩbandʋ ndʋ lalaa lakɩ-wɛ yɔ tɩ-yɔɔ. Ɛyaa kaɣ wɛɛkʋʋ wondu kiɖeɖetu ɖɔɖɔ, pʋ-tɔbʋʋ se pakaɣ kɛʋ pɩ-tɛɛ nɛ pɩ-yɔɔ ɛyaa. Paakaɣ kɛʋ pʋtɔdɩyɛ nayaa,  pʋ-tɔbʋʋ se paakaɣ tisuu se pa nɛ nɔɔyʋ pacaɣ nɛ pɔyɔɔdɩ tɔm natʋyʋ nɛ panɩɩnɩ ɖama nɛ pɩla se tɩtɛma. Pakaɣ ɖama kɩdɛkɛdɩm yɔɔ kuluu, pɩwɩlɩɣ se pakaɣ yɔɔdʋʋ tɔm kɩdɛkɛdɩtʋ ɛyaa lalaa yɔɔ nɛ halɩ pakaɣ yɔɔdʋʋ kɩdɛkɛdɩtʋ Ɛsɔ yɔɔ ɖɔɖɔ. Pakaɣ labʋ nɛ lalaa hɩla wɛɛkɩ, pɩwɩlɩɣ ɖɔɖɔ se pakaɣ labʋ kɔlɔmɔtʋ lalaa yɔɔ se pɛwɛɛkɩnɩ pa-hɩla. *

¹¹ Ɛlɛ paa sɔnɔ ɛyaa mba pɛwɛ ɛjaɖɛ yɔɔ yɔ pɛfɛyɩnɩ sɔɔlɩm yɔ, Yehowa sɛyaa ñɔsɔɔlɩ ɛyaa lalaa siŋŋ. Pɩtɩkɛ sɔnɔ papaɣzɩ wɛnʋʋ  sɔɔlɩm mbʋ. Yesu yɔɔdaa se Ɛsɔ sɔɔlʋʋ wayɩ lɛ, paɣtʋ natʋyʋ tɔm tɩcɛyɩ Moyizi paɣtʋ taa nɛ pɩtalɩ ɛyʋ koobu sɔɔlʋʋ, nɛ pɩkɛnɩ sɔɔlɩm agape hɔɔlʋʋ nakʋyʋ. (Mat. 22:38, 39) Yesu yɔɔdaa ɖɔɖɔ se mbʋ pakaɣ tɩlɩnʋʋ toovenim Krɩstʋ mba yɔ, mbʋ lɛ pa-ɖama sɔɔlʋʋ. (Kalɩ Yohanɛɛsɩ 13:34, 35.) Halɩ Krɩstʋ mba sɔɔlʋʋ nɛ pɩkpɛndɩnɩ po-koyindinaa.​—Mat. 5:43, 44.

12. Ɛzɩma Yesu wɩlaa se ɛsɔɔlɩ ɛyaa?

¹² Yesu kaasɔɔlɩ ɛyaa lalaa kpem, pʋyɔɔ ɛɖɔŋaɣ nɛ ewoki tɛtʋ ndɩ ndɩ taa nɛ eheyiɣ-wɛ Ɛsɔ Kewiyaɣ tɔm kɩbandʋ. Ɛwa yʋlʋmaa, kaakalasɩ, canasɩ, ndamaa nɛ efezi sɩɖaa. (Luka 7:22) Paa ɛyaa sakɩyɛ ɩpaɖaɣ-ɩ kɔyɔ, ɛkpaɣ e-wezuu nɛ ɛlaa ɛyaa samaɣ yɔɔ. Yesu kaasɔɔlɩ ɛyaa ɖeyi ɖeyi ɛzɩ ɛ-Caa sɔɔlʋʋ-wɛ yɔ. Yehowa Aseɣɖe Tɩnaa ɖɔɖɔ ñakɩ pana se palɩzɩ sɔɔlɩm mbʋ nɛ pawɩlɩ ɛyaa lalaa tɛtʋ kpeekpe yɔɔ.

13. Ɛzɩma ɖɔ-sɔɔlɩm pɩzɩɣ nɛ pɩsɩnɩ ɛyaa lalaa nɛ pɔñɔtɩnɩ Yehowa?

¹³ Ɛzɩma ɖɩsɔɔlɩ ɛyaa lalaa yɔ, piyeki nɛ pɔñɔtʋʋnɩ ɖa-Caa weyi ɛwɛ ɛsɔdaa yɔ. Kɩɖaʋ nakʋyʋ yɔ: Abalʋ nɔɔyʋ wobi Yehowa Aseɣɖe Tɩnaa kigbeɣluu sɔsɔʋ nakʋyʋ Tayɩlandɩ ɛjaɖɛ taa nɛ ɛna sɔɔlɩm mbʋ pɩwɛ koobiya hɛkʋ taa yɔɔ lɛ, pitukuni ɛ-laŋɩyɛ siŋŋ. Ɛpɩsɩ ɖɩɣa lɛ, ɛpɔzɩ se powoki nɛ pɛkpɛlɩkɩɣnɩ-ɩ Bibl tam nabʋlɛ kpɩtaʋ taa. Pʋwayɩ lɛ, esusi tɔm ɛ-hɔʋ taa mba tɩŋa nɛ pɩlabɩ fenasɩ loɖo lɛ, paha-ɩ ɛ-kajalaɣ Bibl kalʋʋ tʋmɩyɛ Kewiyaɣ Kpaaŋ taa. Pɩsa nɛ ɖɩna se ɖɩsɔɔlɩ ɛyaa lalaa ɛzɩ pɩpɔzʋʋ yɔ yaa ɖɩtɩsɔɔlɩ-wɛ lɛ, pɩcɛyaa se ɖa-taa paa weyi ɛpɔzɩ ɛ-tɩ tɔm tʋnɛ: ‘Mahaɣ man-tɩ faaa nɛ mansɩɣnɩ ɛyaa lalaa mɔ-hɔʋ taa, ɛgbɛyɛ taa nɛ tɔm susuu taa? Mañakɩ pana se mɛwɛɛnɩ lɩmaɣza wena Yehowa wɛnɩ ɛyaa lalaa yɔɔ yɔ?’

14, 15. (a) Tɛtɛ kpɩna wɛtʋ ndʋ ɛyaa sakɩyɛ wɛna? (b) Ɛlɛ lɛɣzɩtʋ kɩbandʋ ndʋ pa-taa nabɛyɛ laba?

¹⁴ Wɛtʋ kɩdɛkɛdɩtʋ lɛɛtʋ ndʋ ɛjaɖɛ yɔɔ mba wɛnɩ kɛdɛzaɣ kɩyakɩŋ ɛnɛ ɩ-taa yɔ tɩ-yɔɔ lɛ, pɩcɛyaa kpem se Krɩstʋ mba ɩkpa pa-tɩ nɛ wɛ. Ɛyaa mba paaseɣ Ɛsɔ sɔɔndʋ yɔ, pakaɣ kɛʋ kɩbandʋ koyindinaa yaa ɛzɩ pɛɖɛzʋʋ tɔm ndʋ Biblwaa lalaa taa yɔ “pakaɣ paɖʋʋ mbʋ pɩkɛ kɩbam yɔ” yaa  “paakaɣ sɔɔlʋʋ camɩyɛ lakasɩ.” Paakaɣ pa-tɩ pɛm pʋyʋ nɛ pɩɩkaɣ sam se papaɣ-wɛ, pʋ-tɔbʋʋ se paakaɣ wɛnaʋ tɩ ɖɔkʋʋ nɛ pakaɣ wɛʋ ñaŋ yaa mʋzʋŋ. Nabɛyɛ kaɣ wɛʋ ñʋʋ taa ɖoŋ nɛ pana; paakaɣ wɛnʋʋ fɛyɛ.

¹⁵ Ɛyaa mba paawɛ ñaŋ ɛzɩ tɛtɛ kpɩna nɛ pɛwɛɛnɩ wɛtʋ kɩdɛkɛdɩtʋ lɛɛtʋ ndʋ tɩ-tɔm ɖɩtɛm yɔɔdʋʋ yɔ, pa-taa sakɩyɛ kɔm nɛ pɛlɛɣzɩ wɛtʋ. Bibl kaatɛm lɛɣzɩtʋ ndʋ tɩ-tɔm yɔɔdʋʋ. (Kalɩ Izaayii 11:6, 7.) Bibl yɔɔdaɣ tɔm ndʋ lɛ, kɩya tɛtɛ kpɩna naayɛ ɛzɩ kpoŋ nɛ mʋʋzɩŋ mbʋ yɔ se a nɛ ɖɩɣa kpɩna ɛzɩ heɣsi nɛ newee mbʋ yɔ pɛwɛ laŋhɛzɩyɛ taa. Ɛlɛ ɛbɛ yeki nɛ kpɩna ana awɛɣ laŋhɛzɩyɛ taa mbʋ? Natʋ tɔm ndʋ tɩlɩzɩ pɩ-taa se “mbʋ pʋyɔɔ yɔ patɩlɩ [Yehowa] tɛtʋ kpeekpe taa camɩyɛ.” (Iza. 11:9) Ɛlɛ ɖɩnawa se kpɩna ɩɩpɩzɩɣ nɛ akpɛlɩkɩ nɛ atɩlɩ Yehowa, ye mbʋ pɩwɩlɩɣ se tɔm tʋnɛ ɛyaa maɣmaɣ titukuuna nɛ tɩwɛɛ tɩkɔŋ pɩ-taa fezuu taa sɔnɔ.

16. Ɛzɩma Bibl sɩnɩ ɛyaa nɛ pɛlɛɣzɩ pɛ-ɛyʋtʋ?

¹⁶ Ɛyaa nabɛyɛ kaawɛ mʋzʋŋ ɛzɩ kpoŋ yɔ, ɛlɛ lɛɛlɛɛyɔ pa nɛ lalaa pɛwɛ laŋhɛzɩyɛ taa. Ŋpɩzɩɣ nɛ ŋkalɩ pa-taa nabɛyɛ yɔɔ tɔm jw.org yɔɔ tɔm ñʋŋ “Bibl lɛɣzɩɣ ɛyaa wezuu caɣʋ” taa. Ɛyaa mba pɛkpɛlɩkaa nɛ patɩlɩ Yehowa nɛ pɛsɛɣ-ɩ yɔ pɛfɛyɩ ɛzɩ mba panaɣ ɛsɩndaa yem se pɛwɛnɩ Ɛsɔ sɔɔlɩm kpeyitaɣ, ɛlɛ pekiziɣ mbʋ pɩkɛ pi-ɖoŋ nɛ pe-wezuu caɣʋ ɛɛlakɩ nɔɔ kʋɖʋmaɣ nɛ tɔm ndʋ pɔyɔɔdʋʋ yɔ. Ɛlɛ ɛyaa mba paawɛ kañatʋ ɖooo yɔ, pɛkpɛlɩkɩ Yehowa tɔm lɛ ‘posuu ɛyʋtʋ kɩfatʋ ndʋ palɩzɩ-tʋ Ɛsɔ lɛzʋʋ siɣsiɣ wɛtʋ taa nɛ toovenim ɖetu taa yɔ.’ (Efɛz. 4:23, 24) Pɛkpɛlɩkaa nɛ patɩlɩ Ɛsɔ lɛ, pana se pɩcɛyaa se peyele nɛ pe-tisuu, pe-wezuu caɣʋ nɛ pɛ-wɛtʋ la nɔɔ kʋɖʋmaɣ nɛ ɛ-paɣtʋ kila. Mbʋ seɣtini-wɛ nɛ pala lɛɣzɩtʋ ndʋ pɩpɔzʋʋ yɔ. Lɛɣzɩtʋ natʋyʋ labʋ wɛ kaɖɛ, ɛlɛ Ɛsɔ fezuu pɩzɩɣ nɛ kɩsɩnɩ mba pañɩnɩɣ kpem se pala Ɛsɔ sɔɔlɩm yɔ nɛ palabɩ-tʋ.

17. Ɛbɛ pɩzɩɣ pɩsɩnɩ-ɖʋ nɛ ɛyaa mba pɛwɛnɩ wɛtʋ kɩdɛkɛdɩtʋ yɔ pataawɛnɩ ɖoŋ ɖɔ-yɔɔ?

¹⁷ Pazɩ pazɩ lɛ, ɖiɖiɣni naʋ kpayɩ kpayɩ tʋkaɣ ŋga kɛwɛ mba pɛsɛɣ Ɛsɔ nɛ mba paasɛɣ-ɩ yɔ pɛ-hɛkʋ taa yɔ. Ða mba ɖɩsɛɣ Ɛsɔ yɔ, pɩcɛyaa se ɖɩkpa ɖa-tɩ nɛ ɛjaɖɛ yɔɔ mba ɩtaaɖɛzɩ-ɖʋ pɛ-wɛtʋ kɩdɛkɛdɩtʋ. Ye ɖɩñakɩ pana nɛ ɖɩɖɔŋ lɔŋ weyi Ɛsɔ tasɩ-ɖʋ 2 Timootee 3:2-5 taa yɔ ɩ-yɔɔ nɛ ɖiseɣ kɩdɛkɛdɩm laɖaa kɔyɔ, ɖɩwɩlɩɣ se ɖɩkɛ lɔŋsɩnɖaa. Ɛlɛ toovenim taa lɛ, nabʋyʋ taa pɩpɩzɩɣ nɛ pɩwɛɛ kaɖɛ se ɖise ɛyaa mba pɛwɛnɩ wɛtʋ kɩdɛkɛdɩtʋ yɔ. Pɩtɩla, ɖa nɛ wɛ ɖɩlakɩnɩ tʋmɩyɛ lone kʋɖʋmɖɩyɛ taa, ɖa nɛ wɛ ɖiwoki sukuli kʋɖʋmʋʋ taa yaa ɖa nɛ wɛ ɖɩwɛnɩ ɖɩɣa kʋɖʋmaɣ taa. Ɛlɛ ye ɖɩtɛm ɖa-taa se ɖɩɩmaɣzɩɣnɩ-wɛ yɔ, ɖɩpɩzɩɣ nɛ ɖikizi pa-maɣzɩm nɛ pa-lakasɩ. Ɛbɛ pɩzɩɣ pɩsɩnɩ-ɖʋ? Bibl kpɛlɩkʋʋ nɛ taabalɩyɛ ɖʋʋ nɛ mba pɛtɛm pa-taa se pɛsɛɣ Yehowa yɔ.

18. Ɛzɩma ɖɩpɩzɩɣ nɛ ɖɩtɩŋnɩ ɖɔ-yɔɔdaɣ nɛ ɖe-wezuu caɣʋ yɔɔ nɛ ɖɩsɩnɩ lalaa fezuu taa?

¹⁸ Pɩcɛyaa se ɖɩñaɣ pana nɛ ɖɩsɩnɩ lalaa fezuu taa. Ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋlɩzɩ aseɣɖe yɔ nɛ ŋtɩmnɩ Yehowa se ɛsɩnɩ-ŋ nɛ ŋyɔɔdɩ tɔm kɩbandʋ, alɩwaatʋ kɩbandʋ yɔɔ. Pɩwɛɛ se ŋyele nɛ ɛyaa lalaa ɖiɣzina se ŋkɛ Yehowa Aseɣɖe Tʋ. Ðɩnɛ ɛlɛ, ɖɔ-ɖɔnɛ kɩbanɖɛ ɛɛhɔŋ ɛyaa lɩmaɣza nɛ pɩkɔnɩ ɖa-maɣmaɣ ɖɔ-yɔɔ ɛlɛ piyeki nɛ paɖʋ Yehowa hɩɖɛ. Ɛsɔ falɩsɩ-ɖʋ nɛ ɛwɩlɩ-ɖʋ “kɩwɛɛkɩm seu nɛ hadɛ cɩnɛ lakasɩ kɩdɛkɛdɩsɩ seu, se ɖɩwɛɛ ɛjaɖɛ ɖɩnɛ ɖɩ-yɔɔ ɛzɩ ɛyaa mba pamaɣzɩɣ camɩyɛ, pɛwɛ siɣsiɣ nɛ pañaŋ Ɛsɔ yɔ.” (Tiiti 2:11-14) Ye ɖɩwɛnɩ wɛtʋ kɩbandʋ ɖe-wezuu caɣʋ taa kɔyɔ ɛyaa lalaa kaɣ naʋ. Halɩ pɩtɩla pa-taa nabɛyɛ kaɣ ‘sɔɔlʋʋ se pɔkɔɔ nɛ pɔsɔzɩ ɖɔ-yɔɔ mbʋ pʋyɔɔ yɔ panawa se toovenim taa lɛ, Ɛsɔ wɛ ɖɔ-cɔlɔ.’​—Zek. 8:23.