Bibl kɛ takayaɣ ŋga kɔyɔɔdʋʋ toovenim yɔ
Kpaɣnɩ ɖooo caanaʋ taa nɛ sɔnɔ, ɛyaa ndɩ ndɩ mba palɩnɩ ajɛɛ ndɩ ndɩ taa yɔ, pawɩlaa se pataɣ Bibl liu se kɩkɛ takayaɣ ŋga kɔyɔɔdʋʋ toovenim yɔ. Sɔnɔ, ɛyaa sakɩyɛ lakɩnɩ tʋmɩyɛ Bibl wɩlɩtʋ. Ɛlɛ lalaa ñamaɣzɩɣ se Bibl kɛ ɖimɖimnaa nɛ mʋya takayaɣ. Suwe ñamaɣzɩɣ? Ŋpɩzɩɣ nɛ ŋhiɣ toovenim Bibl taa?
MBƲ PƲYƆƆ ŊPƖZƖƔ NƐ ŊTAA LIU BIBL TƆM YƆ
Ɛbɛ pɩzɩɣ pɩsɩnɩ-ŋ nɛ ŋna se pʋmʋnaa yaa pɩtɩmʋna se ŋtaa liu Bibl wɩlɩtʋ? Maɣzɩ Kɩɖaʋ kʋnɛ kɩ-yɔɔ: Ye ña-taabalʋ nɔɔyʋ eheyiɣ-ŋ toovenim paa ɛzɩmtaa, nɛ ña nɛ ɩ ɩwɛɣ yɔ pɩlakɩ pɩnzɩ sakɩyɛ yɔ, pɩtʋʋ fɛyɩ se ŋkpakɩɣ-ɩ se ɛkɛ weyi ɛmʋnaa se pataɣ-ɩ liu yɔ. Ðɩpɩzɩɣ ɖɩkpaɣ Bibl nɛ ɖɩmaɣzɩnɩ taabalʋ weyi ɛyɔɔdʋʋ toovenim paa ɛzɩmtaa nɛ ɛmʋnaa se pataa-ɩ liu yɔ? Ðɩtazɩ kɩɖaŋ nɩɩyɩ taa nɛ ɖɩna.
Kɩ-mayaa wɛ toovenim
Bibl mayaa kɛdɩ tɔm ɛzɩ tɩlabʋ ɖeyi ɖeyi yɔ, halɩ pɩkpɛndɩnɩ alɩwaatʋ ndʋ pɔyɔɔdaɣ pa-maɣmaɣ pɛ-ɛjandʋ nɛ pa-kɩwɛɛkɩm yɔɔ tɔm yɔ. Ðɩkpaɣ ɛzɩ nayʋ Yoonaa mbʋ yɔ, ɛ-maɣmaɣ ɛyɔɔdɩnɩ ɛ-kaañamtʋ tɔm. (Yoonaa 1:1-3) Ɛkɔwaɣ ɛ-takayaɣ ñʋʋ lɛ, ɛyɔɔdɩ ɛzɩma Ɛsɔ hɔm ɛ-nɩŋgbaŋʋʋ yɔ pɩ-tɔm, ɛlɛ ɛtɩyɔɔdɩ ɛzɩma ɛ-maɣmaɣ ɛñɔɔzɩ ɛ-wɛtʋ yɔ pɩ-tɔm. (Yoonaa 4:1, 4, 10, 11) Ɛzɩma Bibl mayaa kɛdɩ tɔm ɖeyi ɖeyi ɛzɩ tɩlabʋ yɔ, pɩwɩlɩɣ se pɛkɛ ɛyaa mba pɛwɛ toovenim nɛ pamʋnaa se pataa-wɛ liu yɔ.
Toovenim tɔm ndʋ tɩwazɩɣ yɔ
Bibl lɔŋ tasʋʋ wazɩɣ paa ɛzɩmtaa? Pɩtʋʋ fɛyɩ se ɛɛɛ. Maɣzɩ tɔm ndʋ Bibl yɔɔdaa pɩlɩɩnɩ mbʋ pɩwɛɛ se ɖɩla nɛ taabalɩyɛ kɩbanɖɛ wɛɛ ɖa nɛ lalaa ɖɛ-hɛkʋ taa yɔ tɩ-yɔɔ nɛ ŋna: “Pʋyɔɔ lɛ, mbʋ payɩ ɩsɔɔlaa se ɛyaa ɩlabɩ-mɩ yɔ, pɩwɛɛ se mɩ ɖɔɖɔ ɩlabɩ-wɛ pʋ.” (Maatiyee 7:12) “Tɔm cosuu nɛ nɔɔ kɩbaŋa ɖeziɣ pana, tɔm ɖoŋ ndʋ sekiɣ pana.” (Aduwa 15:1) Toovenim, Bibl lɔŋ tasʋʋ wɛ wazaɣ sɔnɔ ɛzɩ tɩɩwɛʋ wazaɣ alɩwaatʋ ndʋ tɩ-taa paama-tʋ yɔ.
Caanaʋ taa tɔm ndʋ kɩyɔɔdʋʋ yɔ tɩkɛ toovenim
Tɛtɛɛ ñɩm ñɩnɩyaa lɩ wondu ndɩ ndɩ yɔɔ nɛ pɩwɩlɩɣ se ɛyaa mba pɔ-tɔm pɔyɔɔdɩ Bibl taa yɔ, paakɛ ɛyaa mba paacaɣ wezuu toovenim yɔ, nɛ lona wena a-tɔm pɔyɔɔdaa yɔ, aakɛ ɖɔɖɔ lona wena aawɛ toovenim yɔ. Ðɩmaɣzɩ kɩɖaʋ kʋnɛ kɩ-yɔɔ nɛ ɖɩna: Bibl yɔɔdaa se Nehemiya alɩwaatʋ taa, “Tiiri mba mba pɛwɛ Yeruzalɛm yɔ, pɔkɔŋnaɣ kpakpasɩ nɛ tadɩyɛ wondu kpeekpe.”—Nehemiya 13:16.
Palɩ nabʋyʋ yɔɔ nɛ pɩwɩlɩɣ se Bibl tɔm ndʋ tɩkɛ toovenim na? Ɛɛɛ, tɛtɛɛ ñɩm ñɩnɩyaa kɔm nɛ palɩɩ wondu natʋyʋ yɔɔ Izrayɛɛlɩ ɛjaɖɛ taa nɛ pɩwɩlɩɣ se Tiiri mba nɛ Izrayɛɛlɩ mba palakaɣ tadɩyɛ. Pɩtasɩ lɛ, pɔkɔm nɛ pohuyi tɛtʋ Yeruzalɛm tɛtʋ taa lɛ, palɩɩ Méditerranée teŋgu taa kpakpasɩ nasɩyɩ mɔɔ yɔɔ. Tɛtɛɛ ñɩm ñɩnɩyaa maɣzɩɣ se tadɩyɛ laɖaa nabɛyɛ kaalɩɣaɣnɩ ɖooo poliŋ nɛ pɔkɔŋnɩ kpakpasɩ nzɩ peeɖe. Bibl yɔɔ lɔŋsɩnɖʋ nɔɔyʋ tazɩ tɔm taa nɛ pɩtɛ lɛ, ɛyɔɔdɩ se: “Tɔm ndʋ pɔyɔɔdɩ Nehemiya 13:16 taa se Tiiri mba pɛdaɣ kpakpasɩ Yeruzalɛm yɔ, pɩtʋʋ fɛyɩ se tɩkɛ toovenim.”
Tɔm ndʋ kɩyɔɔdɩ lɛɣtʋ ñɩnʋʋ yɔɔ yɔ tɩkɛ toovenim
Toovenim taa lɛ, Bibl kɛ Ɛsɔ sɛtʋ nɛ caanaʋ taa tɔm takayaɣ. Paa mbʋ yɔ, lɛɣtʋ ñɩnʋʋ yɔɔ tɔm ndʋ kɔyɔɔdʋʋ yɔ, tɩkɛ toovenim. Kɩɖaʋ nakʋyʋ yɔ.
Pɩlakɩ ɛzɩ pɩnzɩ 3500 yɔ, Bibl yɔɔdaa se patisusi tɛtʋ “pʋyʋ nɔɔyʋ yɔɔ.” (Yɔɔb 26:7) Tɔm ndʋ tɩwɛ ndɩ kpem nɛ mʋya wena ɛyaa mʋyaɣ nɛ pɔtɔŋ se tɛtʋ wɛ lɩm yɔɔ yaa caaveɖe sɔsɔɖɛ naɖɩyɛ yɔɔ yɔ. Pama Yɔɔb takayaɣ nɛ pɩla ɛzɩ pɩnzɩ 1100 mbʋ yɔ lɛ, ɛyaa wobi pɩ-yɔɔ nɛ pamaɣzɩɣ se pasɩ tɛtʋ nabʋyʋ yɔɔ, tɩɩpɩzɩɣ nɛ tɩwɛ helim taa yem mbʋ. Pɩnaɣ 1687, pɩ-tɔbʋʋ se pɩnzɩ nasidozo wayɩ, Isaac Newton ñɩnaa nɛ ɛna se ɖoŋ nɩɩyɩ wɛɛ nɛ iyeki se paa kedeŋa yɔɔ wonuu ŋgʋ lɛ, kɩwɛɛ ki-lone taa, nɛ ɖoŋ ɛnɩ, ɛnɩ ɖɔkɩnɩ tɛtʋ helim taa. Bibl yɔɔdɩ tɔm ndʋ nɛ pɩcɛzɩ pɩnzɩ 3000 yɔɔ pʋcɔ nɛ lɛɣtʋ ñɩnɩyaa ñalɩɩ tɩ-yɔɔ.
Natʋ tɔm ndʋ kɩyɔɔdʋʋ yɔ, tɩkɛ toovenim
Ɛbɛ wɩlɩɣ se Bibl taa natʋ tɔm kɛ toovenim? Ðɩtazɩ kɩɖaʋ kʋɖʋmʋʋ taa: Natʋ tɔm ndʋ Izaayii kaayɔɔdaa pɩlɩɩnɩ Babilɔɔnɩ yɔkʋʋ yɔɔ yɔ.
Natʋ tɔm: Pʋcɔ nɛ Babilɔɔnɩ tɛtʋ pɩsɩɣ ɛjaɖɛ kpeekpe yɔɔ kewiyaɣ ŋga kakpaɖɩ ɖoŋ yɔ lɛ, Bibl mayʋ Izaayii kaayɔɔdɩ pɩnzɩ 700 waa taa P.P.Y. se pakaɣ-tʋ yɔkʋʋ. Nɛ pʋwayɩ lɛ, tɩpɩsɩɣ njɛyɛ. (Izaayii 13:17-20) Halɩ Izaayii ya weyi ɛkaɣ yɔkʋʋ tɛtʋ ndʋ yɔ ɛ-hɩɖɛ. Ɛnʋ lɛ Siiruusi. Ɛyɔɔdɩ ɖɔɖɔ ɛzɩma Siiruusi kaɣ labʋ nɛ pɔɔ ŋga kɔcɔ Babilɔɔnɩ tɛtʋ yɔ, ka-taa “lɩm sɔɔ”, nɛ ɛzɩma paakaɣ ɖɩʋ tɛtʋ nɔnɔsɩ yɔ pɩ-tɔm.—Izaayii 44:27–45:1.
Ɛzɩma tɩlaba yɔ: Izaayii ma natʋ tɔm ndʋ nɛ pɩla pɩnzɩ 200 mbʋ yɔ lɛ, Pɛrɩsɩ wiyaʋ nɔɔyʋ wolo se ɛyɔkʋʋ Babilɔɔnɩ tɛtʋ. Suwe payaɣaɣ-ɩ? Siiruusi. Ɛzɩma kolonzi sɔsɔsɩ nɛ Efraatɩ pɔɔ paacɔ Babilɔɔnɩ tɛtʋ yɔ pʋyɔɔ lɛ, pɩɩwɛ kaɖɛ se pasʋʋ tɩ-taa nɛ pɔyɔkɩ-tʋ. Pʋyɔɔ Siiruusi yeba nɛ ɛ-sɔɔjanaa hɛɛ lɔɔʋ sɔsɔʋ nakʋyʋ se pɔɔ taa lɩm ekpe kɩ-taa. Pɩla mbʋ nɛ lɩm pasɩ pɔɔ taa nɛ Siiruusi sɔɔjanaa tɛzɩ-kɛ nɛ powolo pɔñɔtɩnɩ tɛtʋ kolonzi. Ðoo ana a-taa, Babilɔɔnɩ ñɩma taaɖɩɣ tɛtʋ nɔnɔsɩ. Piyeba nɛ Siiruusi nɛ ɛ-sɔɔjanaa pasʋʋ Babilɔɔnɩ tɛtʋ taa nɛ pɔyɔkɩ-tʋ.
Ɛlɛ pɩkazɩ tɔm natʋyʋ: Babilɔɔnɩ pɩsɩ njɛyɛ pʋwayɩ toovenim na? Pɩnzɩ mɩnɩŋ weyi ɩtɩŋ Babilɔɔnɩ yɔkʋʋ wayɩ yɔ sɩ-taa, ɛyaa kaawɛ tɛtʋ ndʋ tɩ-taa. Ɛlɛ sɔnɔ, lone nɖɩ ɖɩ-taa Babilɔɔnɩ kaawɛɛ yɔ, nɔɔyʋ fɛyɩ ɖɩ-taa, ɖɩpɩsɩ njɛyɛ nɛ ɖɩñɔtɩnɩ Iraakɩ ɛjaɖɛ taa tɛtʋ ndʋ payaɣ se Bagdaadɩ yɔ. Pɩwɩlɩɣ se natʋ tɔm ndʋ tɩlabɩ ɖeyi ɖeyi. Pɩtʋʋ fɛyɩ se ɖɩpɩzɩɣ nɛ ɖɩtaa Bibl tɔm liu halɩ pɩkpɛndɩnɩ tɔm ndʋ titukuuni mbʋ pɩkaɣ labʋ cee wayɩ yɔ.
