“Alɩwaatʋ ndʋ ŋtɩmɩɣ yɔ, taayɔɔdʋʋ tɔm kʋɖʋmtʋ tam.”—Maatiyee 6:7.

Yehowa tɩsɔɔlɩ se ɖɩkpɛlɩkɩ adɩma naayɛ ɖa-ñʋʋ taa nɛ ɖɩwɛɛ a-labʋ yɔɔ tam yaa ɖɩkalɩɣ ɖa-adɩma kɩkalʋ adɩma takayaɣ nakɛyɛ taa. Ɛlɛ ɛsɔɔlaa se ɖiheyi-i ɖa-laŋɩyɛ taa tɔm. Maɣzɩ tɔm tʋnɛ tɩ-yɔɔ nɛ ŋna! Ye ña-taabalʋ nɔɔyʋ eheyiɣ-ŋ tɔm kʋɖʋmtʋ ɖoo nɛ wɩsɩ kɩyakɩŋ tɩŋa, pɩlakɩ-ŋ camɩyɛ na? Taabalaa kɩbama heyiɣ ɖama tɔm ndʋ tɩwɛ pa-laŋa taa yɔ kpayɩ. Ye ɖɩtɩmɩɣnɩ ɖa-Caa weyi ɛwɛ ɛsɔdaa yɔ nɛ ɖa-maɣmaɣ ɖɔ-tɔm pee yɔ, pɩwɩlɩɣ se ɖɩnaɣ-ɩ ɛzɩ ɖa-taabalʋ yɔ.

“Alɩwaatʋ ndʋ ɩpɔzʋʋ yɔ, paahaɣ-mɩ mbʋ pʋyɔɔ yɔ lɩmaɣzɩyɛ kɩdɛkɛdɩyɛ yɔɔ ɩpɔzʋʋ.”—Yakubu 4:3.

Pɩtʋʋ fɛyɩ se ɖɩnɩɣ pɩ-taa se ye ɖɩpɔzɩ Ɛsɔ mbʋ ɛtɩsɔɔlɩ yɔ ɖa-adɩma taa yɔ, eecosuu a-yɔɔ. Kɩɖaʋ nakʋyʋ yɔ: Ye nɔɔyʋ ɛtɩmnɩ Ɛsɔ se ɛlɛ ɛha-ɩ ñʋʋ leleŋ nɛ ɛtɔ tɔmbolaa yaa looteri nɛ ehiɣ liidiye yɔ, Ɛsɔ kaɣ adɩma ana a-yɔɔ cosuu na? Ɛsɔ heyi-ɖʋ kpayɩ kpayɩ se ɖɩtaawɛɛnɩ ɛsa naɣ naɣ nɛ ɖitaatisi ɖɔɖɔ mbʋ pɩwɛ ɛyaa nabɛyɛ maɣzɩm taa ɖeke yɔ pɩ-yɔɔ, ɛzɩ ñʋʋ leleŋ mbʋ yɔ. (Luka 12:15) Pɩtʋʋ fɛyɩ se Yehowa ɛɛkaɣ cosuu adɩma ana a-yɔɔ. Pɩsa nɛ Ɛsɔ cosi ɖa-adɩma yɔɔ lɛ, pɩwɛɛ se ala nɔɔ kʋɖʋmaɣ nɛ tɔm ndʋ eheyiɣ-ɖʋ Bibl taa yɔ.

 “Weyi ɛɖɩkɩ ɛ-nɩŋgbaaŋ nɛ eewelisiɣ paɣtʋ yɔ, ɛ-adɩma ɖɔɖɔ kaɣ caɣʋ kiniŋ.”—Aduwa 28:9.

Alɩwaatʋ ndʋ pamaɣaɣ Bibl yɔ, Ɛsɔ taacosi ɛyaa mba pamaɣaɣnɩ ɛ-paɣtʋ siɣsiɣ ñɩndʋ yɔɔ yɔ, pa-adɩma yɔɔ. (Izaayii 1:15, 16) Ɛsɔ tɩlɛɣzɩ. (Malakiya 3:6) Ye ɖɩsɔɔlaa se Ɛsɔ ecosi ɖa-adɩma yɔɔ yɔ, pɩcɛyaa se ɖe-wezuu caɣʋ ɛla nɔɔ kʋɖʋmaɣ nɛ ɛ-paɣtʋ. Nɛ ye ɖooo lɔŋ ɖɩɩlabɩ kɩdɛkɛdɩm nabʋyʋ? Pɩwɩlɩɣ se Yehowa ɛɛkaɣ-ɖʋ welisinuu kaaʋ yaa we? Aayɩ, pɩtɩkɛ mbʋ. Ye ɖikpiɖi kɩwɛɛkɩm mbʋ ɖɩlaba yɔ pɩ-yɔɔ nɛ ɖɩñakɩ pana se ɖɔ-tɔm ɛkɛdɩnɩ Ɛsɔ yɔ ekpeɣu-ɖʋ faaa.—Tʋma Labʋ 3:19.