María, Raúl, Arne nɛ ɛyaa lalaa sakɩyɛ ɛsɩndaa lɛ, adɩma kɛ kʋjɔʋ ŋgʋ kɩwɛ ŋgee yɔ. Pamaɣzɩɣ se papɩzɩɣ patɩŋnɩ adɩma yɔɔ nɛ pɔyɔɔdɩnɩ Ɛsɔ, pɛsɛɛ-ɩ se ɛlabaɣ lɛ nɛ pɔpɔzɩ-ɩ se ɛsɩnɩ-wɛ. Petisiɣni pa-laŋɩyɛ pilim se tɔm ndʋ Bibl yɔɔdɩ Ɛsɔ tɩmnʋʋ yɔɔ yɔ tɩkɛ toovenim. Kɩyɔɔdaa se: “Lidaʋ kʋnɛ ɖɩwɛnɩ ɛ-yɔɔ, se paa ɛbɛ ɖɩpɔzʋʋ nɛ pɩlakɩ nɔɔ kʋɖʋmaɣ nɛ ɛ-sɔɔlɩm yɔ, ewelisiɣni-ɖʋ.”—1 Yohanɛɛsɩ 5:14.

Hɔɔlʋʋ lɛɛkʋ taa lɛ, pɩwɛ ɛyaa sakɩyɛ kaɖɛ se petisi tɔm ndʋ Bibl yɔɔdʋʋ adɩma yɔɔ yɔ tɩ-yɔɔ. Steve yɔɔdɩ ndʋ ɛmaɣzɩɣ adɩma yɔɔ yɔ se: “Alɩwaatʋ ndʋ maawɛnɩ pɩnzɩ 17 mbʋ yɔ lɛ, man-taabalaa naadozo lesi pe-weziŋ kɛgbɛdɩsasɩ nasɩyɩ taa. Lɔɔɖɩyɛ kɛgbɛdɩsaɣ nakɛyɛ taa lɛlʋ  sɩba, nɛ naalɛ lɛ teŋgu taa pasɩba.” Ɛzɩma Steve laba? Ɛyɔɔdaa se: “Mantɩmnɩ Ɛsɔ se eyele nɛ mantɩlɩ mbʋ pʋyɔɔ pɩtɩŋa payɩ mbʋ yɔ pɩlaba yɔ, ɛlɛ eticosi-m. Pʋyɔɔ mɔnpɔzɩ man-tɩ se, ‘Ɛbɛ yɔɔ pɩwɛɛ se ɛyʋ ɛla adɩma?’” Pɩlabɩ ɛyaa sakɩyɛ ɛzɩ paticosi pa-adɩma yɔɔ yɔ, nɛ pʋyɔɔ lɛ pɔpɔzʋʋ pa-tɩ se ɛbɛ yɔɔ pɩwɛɛ se powolo pɩ-yɔɔ nɛ patɩmɩɣ.

Lɩmaɣza lɛɛna yɔɔ ɖɔɖɔ lɛ, ɛyaa nabɛyɛ maɣzɩɣ se adɩma ɩɩsɩɣnɩ-wɛ. Nabɛyɛ yɔɔdʋʋ se Ɛsɔ sɩm pɩtɩŋa, ɛsɩm ɖa-kɩcɛyɩm nɛ kala wena ɖɩkatɩɣ yɔ, ye mbʋ pɩtɩcɛyɩ se ɖɩtasɩ-ɩ heyuu pɩ-tɔm.

Lalaa maɣzɩɣ se kɩdɛkɛdɩm mbʋ palaba nɛ pɩɖɛɛ yɔ pʋyɔɔ lɛ, Ɛsɔ tɩsɔɔlɩ se ewelisi pa-adɩma. Jenny yɔɔdaa se: “Kala wena mankatɩɣ yɔ a-taa nɖɩ ɖɩkpaɖaa yɔ lɛ se mamaɣzɩɣ se mɛnfɛyɩ wazaɣ. Menkpiɖiɣ mbʋ malaba nɛ pɩɖɛɛ yɔ pɩ-yɔɔ, pʋyɔɔ lɛ meheyiɣ man-tɩ se mantɩmʋna se Ɛsɔ ewelisini-m.”

Suwe ŋmaɣzɩɣ adɩma yɔɔ? Ye pɩlakɩ-ŋ ɛzɩ pɩɩlabʋ mba pɔ-tɔm ɖɩyɔɔdaa nɛ pɩɖɛɛ yɔ yaa ŋpɩtɩɣ adɩma yɔɔ yɔ, ña-laŋɩyɛ pɩzɩɣ nɛ pɩhɛɛ mbʋ pʋyɔɔ yɔ Bibl pɩzɩɣ nɛ kicosi tɔm ndʋ ŋpɔzʋʋ ña-tɩ pɩlɩɩnɩ adɩma yɔɔ yɔ tɩ-yɔɔ. Ðɩpɩzɩɣ nɛ ɖɩtaa tɔm ndʋ Bibl yɔɔdʋʋ adɩma yɔɔ yɔ liu; * kɩpɩzɩɣ kɩsɩnɩ-ɖʋ nɛ ɖicosi tɔm ɛzɩ tʋnɛ yɔ tɩ-yɔɔ:

• Ɛzɩ Ɛsɔ welisiɣ ɖa-adɩma toovenim na?

• Ɛbɛ yɔɔ Ɛsɔ eecosuu adɩma naayɛ yɔɔ?

• Ɛzɩma ŋpɩzɩɣ ŋtɩmɩ nɛ Ɛsɔ welisini-ŋ?

• Ɛzɩma adɩma labʋ pɩzɩɣ nɛ pɩsɩnɩ-ŋ?