Ɛbɛ yɔɔ paɖɩyɛ tɔyɩ siŋŋ mbʋ?
Ɛbɛ yɔɔ paɖɩyɛ paɣzaa nɛ ɖɩtɔyɩ ɛjaɖɛ yɔɔ mbʋ? Pɩsa nɛ ɖicosi tɔm ndʋ tɩ-yɔɔ lɛ, pɩpɔzʋʋ se ɖɩtɩlɩ mbʋ payaɣ se paɖɩyɛ yɔ, mbʋ piyeki nɛ ɛyaa paɣzɩɣ ɖama paɖʋʋ yɔ, nɛ ɛzɩma paɖɩyɛ lakasɩ yɛlɩɣ yɔ.
Ɛbɛ payaɣ paɖɩyɛ?
Paɖɩyɛ kɛ lakasɩ nzɩ ɛyʋ lakɩ ɛyʋ lɛlʋ yaa ɛyaa nabɛyɛ nɛ sɩwɩlɩɣ se ɛtɩsɔɔlɩ-wɛ paa ññɩɩ yɔ. Ye ɛyʋ ewoki pɩ-yɔɔ nɛ ɛ-taa wɩɣnɩ nɔɔyʋ yɔ pɩwɩlɩɣ se ɛpaɖɩɣ-ɩ.
ƐBƐ YEKI NƐ ƐYAA PAƔZƖƔ ÐAMA PAÐƲƲ
Lɩmaɣza sakɩyɛ yekina nɛ ɛyaa paɣzɩɣ ɖama paɖʋʋ. Sakɩyɛ taa lɛ, pɩtɩkɛ mbʋ lalaa lakɩ yɔ mbʋ yekina nɛ papaɖɩɣ-wɛ ɛlɛ papaɖɩɣ-wɛ ɖenɖe palɩna yɔ pʋyɔɔ na. Papaɖɩɣ ɛyaa nabɛyɛ mbʋ pʋyɔɔ yɔ pamaɣzɩɣ se ɛyaa mba pɛkɛ kɩdɛkɛdaa, pɔkɔŋnɩ lalaa kaɖɛ yaa paapɩzɩɣ pɛlɛɣzɩ nɛ pala mbʋ pɩwɛ ɖeu yɔ. Pɩtɩla yɔ, pakpakɩɣ-wɛ se patɩlɩɩ pʋyʋ, paɖʋzʋʋ lalaa yaa pɔ-cɔlɔ pɩlɩɣna nɛ kala kɔŋ. Mba papaɖɩɣ lalaa yɔ, pɩtɩla yɔ palabɩ-wɛ puuyaɣ lakasɩ, pomuli-wɛ yaa nabʋyʋ yebina nɛ lɩmaɣza kɩdɛkɛda ñɔ pa-ñʋʋ taa.
MBƲ PIYEKI NƐ PAÐƖYƐ LAKASƖ YƐLƖƔ YƆ
Ɛyʋ nɔɔyʋ pɩzɩɣ nɛ ɛpaɖɩɣ ɛyaa nabɛyɛ ɛlɛ wiɖiyi ɛtɩkatɩ-wɛ nɛ ɛna. Kɩɖaʋ nakʋyʋ yɔ: Ðoŋ ɖoŋ lɛ, nɔɔyʋ pɩzɩɣ nɛ ɛwɛɛnɩ lɩmaɣza naayɛ ɛyaa nabɛyɛ yɔɔ mbʋ pʋyɔɔ yɔ ɛ-hɔʋ taa mba nɛ ɛ-taabalaa wɛnɩ-yɛ. Pʋyɔɔ lɛ ye hɔʋ nakʋyʋ taa tʋ ɛpaɖɩɣ ɛyaa nabɛyɛ yɔ pɩwɛ kɛlɛʋ se hɔʋ taa mba tɩŋa ɩpaɖɩ-wɛ ɖɔɖɔ.
Ye ɖɩna ɛzɩma pɩwɛ kɛlɛʋ se paɖɩyɛ lakasɩ ɩyɛlɩ yɔ, ɖɩnaɣ ɖɔɖɔ mbʋ pʋyɔɔ ɛyaa sakɩyɛ paɖɩɣ lalaa yɔ. Ɛlɛ pɩsa nɛ paɖɩyɛ lakasɩ nzɩ sɩtɔyɩ ɛjaɖɛ yɔɔ sɔnɔ yɔ sɩsɩɩ tɩnaɣ lɛ, pɩwɛɛ se ɖɩtɩlɩ ɖenɖe paɖɩyɛ lɩnaa yɔ. Bibl taa ɖɩpɩzɩɣ nɛ ɖɩna tɔm ndʋ.
BIBL WƖLƖƔ ÐENÐE PAÐƖYƐ LƖNAA YƆ
PƖTƖKƐ ƐYAA CƆLƆ PAÐƖYƐ LƖNƖ ÐOOO KIÐE TƐƐ. Paɖɩyɛ paɣzɩ alɩwaatʋ ndʋ ɛsɔdaa tiyiyu nɔɔyʋ kaɖɩnɩ Ɛsɔ nɛ ɛpɩsɩ Sataŋ Eleeu yɔ. Eleeu kaakɛ “ɛyaa kʋyʋ alɩwaatʋ ndʋ ɛpaɣzaa yɔ.” Ɛzɩma “ɛkɛ cɛtɩyʋ nɛ cɛtɩm caa” yɔ pʋyɔɔ lɛ ewobi pʋyɔɔ nɛ eseɣtiɣ paɖɩyɛ nɛ puuyaɣ lakasɩ. (Yohanɛɛsɩ 8:44; 1 Yohanɛɛsɩ 3:11, 12). Bibl yɔɔdaa se ɛkɛ peɣziyu, pana tʋ nɛ puuyaɣ tʋ.—Yɔɔb 2:7; Natʋ 12:9, 12, 17.
PƖWƐ KƐLƐƲ SE ƐYAA MANTƖTALƖ PILIMWAA ƖPAÐƖ ÐAMA. Kajalaɣ abalʋ Aɖam tɩŋ Sataŋ wayɩ nɛ ɛla kɩwɛɛkɩm ɖɔɖɔ. Piyeba nɛ ɛyaa kpeekpe pɩsɩ kɩwɛɛkɩm laɖaa nɛ pɛkɛ ɖɔɖɔ mantɩtalɩ pilimwaa. (Roma mba 5:12) Paɖɩyɛ yeba nɛ Aɖam pɩyalʋ kajalaɣ ñɩnʋ Kayɩnɩ kʋ ɛ-maɣmaɣ e-neu Aabɛɛlɩ. (1 Yohanɛɛsɩ 3:12) Toovenim taa lɛ, ɛyaa sakɩyɛ wɩlɩɣ se pɛwɛnɩ sɔɔlɩm nɛ pʋtɔdɩyɛ naʋ. Ɛlɛ ɛzɩma ɖɩkɛ kɩwɛɛkɩm laɖaa yɔ piyeba nɛ ɛyaa sakɩyɛ kɛ piɖeni men-ɖeke tɩnaa, pɛwɛɛnɩ ɛsa naɣ naɣ nɛ pɛkɛ tɩ kpazɩyaa; nɛ wɛtʋ ndʋ tiyeki nɛ papaɖɩɣ lalaa.—2 Timootee 3:1-5.
ƐYƲ WEYI ƐTƖSƆƆLƖ MBA PƐWƐ NDƖ NƐ Ɩ YƆ PƖWƐ KƐLƐƲ SE ƐWƐƐNƖ PAÐƖYƐ. Paɖɩyɛ tɔyɩ ɛjaɖɛ ɖɩnɛ ɖɩ-taa mbʋ pʋyɔɔ yɔ, ɛyaa fɛyɩnɩ pʋtɔdɩyɛ naʋ nɛ pɛwɛnɩ wɛtʋ ndʋ tɩkɔŋnɩ lalaa kaɖɛ yɔ. Kɩmɩyɛ kpaʋ, lɩmaɣza kɩdɛkɛdaa wɛnʋʋ lalaa yɔɔ, tʋtʋ, nɛ puuyaɣ lakasɩ tɔyaa mbʋ pʋyɔɔ yɔ, “ɛjaɖɛ kpeekpe wɛ kañatʋ tʋ” pʋ-tɔbʋʋ se Sataŋ Eleeu nesi taa.—1 Yohanɛɛsɩ 5:19.
Ɛlɛ ɖenɖe paɖɩyɛ lɩnaa yɔ pɩtɩkɛ pi-ɖeke pɩ-tɔm Bibl yɔɔdʋʋ. Kɩwɩlɩɣ-ɖʋ ɖɔɖɔ mbʋ ɖɩpɩzɩɣ ɖɩla nɛ paɖɩyɛ sɩɩ tɩnaɣ yɔ.
