ƐBƐ ÐƖPƖZƖƔ ÐƖLA NƐ PAÐƖYƐ SƖƖ TƖNAƔ
4 | Yele nɛ Ɛsɔ sɩnɩ-ŋ nɛ ŋwa paɖɩyɛ
Tɔm ndʋ Bibl wɩlɩɣ yɔ:
“Piyele nɛ piye nɖɩ fezuu lʋlʋʋ yɔ, nɖɩ yɔ sɔɔlɩm, taa leleŋ, laŋhɛzɩyɛ, suuɖu, camɩyɛ lakasɩ, kɩbandʋ labʋ, tisuu, hɛɛɛ wɛtʋ, tɩ ɖɔkʋʋ.”—GALAATII MBA 5:22, 23.
Pʋ-tɔbʋʋ lɛ se:
Ðɩpɩzɩɣ nɛ ɖɩwa paɖɩyɛ ye ɖiyeba nɛ Ɛsɔ sɩnɩ-ɖʋ yɔ. E-fezuu kiɖeɖeu pɩzɩɣ nɛ kiyele nɛ ɖɩwɛɛnɩ wɛtʋ kɩbandʋ ndʋ ɖa-maɣmaɣ ɖɩɩpɩzɩɣ se ɖɩwɛɛnɩ-tʋ ɖa-tɩ yɔɔ yɔ. Pʋyɔɔ lɛ, mbʋ ɛzɩ ɖɩɩñaɣ pana se ɖa-maɣmaɣ ɖɩwa paɖɩyɛ ɖo-ɖoŋ taa lɛ, pɩwɛɣ ɖeu se ɖɩpɔzɩ Ɛsɔ nɛ ɛsɩnɩ-ɖʋ. Ye ɖɩlabɩ mbʋ yɔ, pɩkaɣ-ɖʋ labʋ ɛzɩ pɩɩlabʋ apostoloo Pɔɔlɩ yɔ. Ɛmawa se: “Pɩtɩŋa payɩ pɩ-taa lɛ, mɛwɛnɩ ɖoŋ pɩtɩŋnɩ weyi ɛhaɣ-m ɖoŋ yɔ ɛ-yɔɔ.” (Filiipi mba 4:13) Nɛ ɖɩkaɣ pɩzʋʋ nɛ ɖɩyɔɔdɩ se: “Man-sɩnʋʋ lɩɣnɩ [Yehowa] cɔlɔ.” —Keɣa 120:2.
Mbʋ ŋpɩzɩɣ ŋla yɔ:
“Yehowa yeba nɛ ma weyi maakɛ puuyaɣ tʋ yɔ, manpɩsɩ laŋhɛzɩyɛ tʋ.”—WALDO
Tɩmnɩ Yehowa, nɛ ŋpɔzɩ-ɩ nɛ ña-laŋɩyɛ pilim se ɛha-ŋ e-fezuu kiɖeɖeu. (Luka 11:13) Pɔzɩ-ɩ se ɛsɩnɩ-ŋ nɛ ŋwɛɛnɩ wɛtʋ kɩbandʋ ñe-wezuu caɣʋ taa. Bibl yɔɔdʋʋ wɛtʋ kɩbandʋ ndʋ tɩkaɖɩɣnɩ paɖɩyɛ lakasɩ yɔ tɩ-tɔm; tɩ-taa natʋyʋ lɛ sɔɔlɩm, laŋhɛzɩyɛ, suuɖu nɛ tɩ ɖɔkʋʋ. Kpɛlɩkɩ nɛ ŋtɩlɩ wɛtʋ ndʋ tɩ-yɔɔ tɔm. Ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋwɛɛnɩ wɛtʋ kɩbandʋ ndʋ ñe-wezuu caɣʋ taa yɔ. Ðʋ taabalɩyɛ nɛ ɛyaa mba pañakɩ pana se pɛwɛɛnɩ wɛtʋ kɩbandʋ ndʋ yɔ. Ɛyaa mba, papɩzɩɣ pasɩnɩ-ŋ nɛ peseɣti-ŋ nɛ ‘ŋwɛɛnɩ sɔɔlɩm nɛ ŋla tʋma kɩbana.’—Ebree mba 10:24.
