2 | «Laŋɩyɛ hɛzʋʋ mbʋ pɩlɩnɩ Masɩ taa yɔ»
BIBL YƆƆDƲƲ SE: «Mbʋ payɩ paama ɖooo lɔndaa yɔ, pama-pʋ se pawɩlɩ-ɖʋ lɔŋ, se pɩsa nɛ pɩtɩŋnɩ ɖa-laŋɩyɛ ɖɔkʋʋ nɛ laŋɩyɛ hɛzʋʋ mbʋ pɩlɩnɩ Masɩ taa yɔ pɩ-yɔɔ lɛ, ɖɩpɩzɩ nɛ ɖɩwɛɛnɩ lidaʋ.»—ROMA MBA 15:4.
Pʋ-tɔbʋʋ lɛ se
Bibl yɔɔdʋʋ laŋɩyɛ hɛzʋʋ tɔm ndʋ tɩpɩzɩɣ nɛ tɩkpazɩ-ɖʋ ɖoŋ nɛ tɩsɩnɩ-ɖʋ alɩwaatʋ ndʋ lɩmaɣza kɩdɛkɛda kɔŋ ɖa-ñʋʋ taa yɔ. Bibl haɣ-ɖʋ lidaʋ ɖɔɖɔ se pɩkazɩ pazɩ lɛ, nɔɔyʋ ɛɛtasɩɣ wɛnʋʋ lɩmaɣza taa kʋdɔŋ nakʋyʋ.
Ɛzɩma tɔm tʋnɛ tɩpɩzɩɣ nɛ tɩsɩnɩ-ɖʋ?
Ða-tɩŋa payɩ ɖilesiɣ ɖa-taa leleŋ nabʋyʋ taa; ɛlɛ mba palʋkɩnɩ lɩmaɣza taa kʋdɔŋ yaa pɛwɛ nɩɣzɛ taa yɔ, panɩɣ wɩzasɩ pa-lɩmaɣza taa paa ɛzɩmtaa. Ɛzɩma Bibl pɩzɩɣ nɛ kɩsɩnɩ-ɖʋ?
Lɩmaɣza kɩbana sakɩyɛ wɛ Bibl taa nɛ apɩzɩɣ nɛ alɛɣzɩ lɩmaɣza kɩdɛkɛda wena akɔŋ ɖa-ñʋŋ taa yɔ a-lone taa. (Filiipi mba 4:8) Kɩpɩzɩɣ kiyele nɛ lɩmaɣza wena ahɛzɩɣ laŋa yɔ asu ɖa-maɣzɩm taa nɛ pɩsɩnɩ-ɖʋ nɛ ɖɩwɛɛnɩ lɩmaɣza kɩbana.—Keɣa 93:18, 19.
Bibl pɩzɩɣ kɩsɩnɩ-ɖʋ nɛ ɖiyele maɣzʋʋ se ɖɩfɛyɩ wazaɣ.—Luka 12:6, 7.
Bibl hɔɔlɩŋ sakɩyɛ sɩɣnɩ-ɖʋ se ɖa-taa ɛtɛ se ɖɩfɛyɩ ɖe-ɖeke nɛ Ɛsɔ weyi ɛkɛ ɖa-Lɩzɩyʋ yɔ ɛnɩɣ ɛzɩma pɩlakɩ-ɖʋ yɔ pɩ-taa camɩyɛ.—Keɣa 33:19; 1 Yohanɛɛsɩ 3:19, 20.
Bibl labɩ tamaɣ se Ɛsɔ kaɣ yebu nɛ mbʋ payɩ piyeki nɛ ɖɩnɩɣ wɩzasɩ yɔ pɩsɩɩ tɩnaɣ. (Izaayii 65:17; Natʋ 21:4) Alɩwaatʋ ndʋ lɩmaɣza kɩdɛkɛda naayɛ yeki nɛ sɔɔndʋ kpaɣ-ɖʋ yɔ, ɖɩkaɣ naʋ se tamaɣ kanɛ kakpazɩɣ-ɖʋ ɖoŋ se ɖiwolo pɩ-yɔɔ nɛ ɖɩɖɔkʋʋ ɖa-tɩ.
