Paa weyi etisiɣ se lakasɩ nasɩyɩ wɛɛ lɛ pɩnaɣ kpayɩ se sɩwɛ ɖeu ɛlɛ lɛɛsɩ lɛ pɩnaɣ kpayɩ se sɩfɛyɩ ɖeu. Kɩɖaŋ nɩɩyɩ yɔ. Ɛyaa maɣzɩɣ se ɛyaa kʋʋ, ɛyaa sʋnʋʋ nɛ ɖoŋ, nɛ piya sʋnʋʋ fɛyɩ ɖeu; ɛlɛ pasaŋ siɣsiɣ wɛtʋ, camɩyɛ lakasɩ, nɛ pasaŋ ɖɔɖɔ mba panɩɣ lalaa siziŋ yɔ. Ɛlɛ wezuu caɣʋ hɔɔlɩŋ lɛɛŋ ɛzɩ kʋzʋʋ, toovenim wɛʋ, yaa piya yɔɔ cɔnʋʋ hɔɔlɩŋ taa mbʋ yɔ lɛ, ɛyaa sakɩyɛ maɣzɩɣ se paa weyi pɩwɛɛ se ɛlɩzɩ mbʋ ɛsɔɔlaa se ɛlakɩ yɔ. Pamaɣzɩɣ se paa lɩmaɣzɩyɛ nɖɩ ɛyʋ ɛkpaɣaa yɔ ɖɩpɩzɩɣ nɛ ɖɩwɛɛ ɖeu. Ndʋ pamaɣzɩɣ yɔ nɛ ndʋ ɛyaa mba pɔcɔ-wɛ nɛ pata yɔ pamaɣzɩɣ tɔm natʋyʋ yɔɔ yɔ, ɖoŋ ɖoŋ lɛ mbʋ ɖiyiɣni-wɛ nɛ pakpakɩɣ lɩmaɣza. Ɛzɩ pɩkɛ lɩmaɣzɩyɛ kɩbanɖɛ na?

Ɛzɩma pɩlakɩ-ɖʋ yaa mbʋ ɖɩmaɣzɩɣ se pɩkɛ kɩbam nɛ kɩdɛkɛdɩm yɔ, pʋ-tɔbʋʋ se ɖɛ-ɛhʋyɛ, ɖiyiɣ-ɖʋ ɖoŋ ɖoŋ. (Roma mba 2:​14, 15) Halɩ piya sɩm tʋkaɣ ŋga kɛwɛ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-hɛkʋ taa, nɛ ye sɩlabɩ mbʋ pɩfɛyɩ ɖeu yɔ pɩcɛyɩɣ-sɩ. Alɩwaatʋ wɛɣ nɛ tɩɖɛɣ lɛ, mbʋ ɖɩkpɛlɩkɩɣ ɖɔ-hɔʋ taa, ɖa-taabalaa cɔlɔ, ɖa-wɩlɩyaa cɔlɔ, ɖe-egeetiye taa mba cɔlɔ, ɖɛ-Ɛsɔ sɛtʋ ɛgbɛyɛ taa, nɛ ɖɔ-sɔnzɩ taa yɔ pɩwɛɣnɩ ɖoŋ ɖɛ-ɛhʋyɛ yɔɔ. Alɩwaatʋ ndʋ ɖɩkpakɩɣ lɩmaɣzɩyɛ naɖɩyɛ yɔ, ɖɛ-ɛhʋyɛ heyiɣ-ɖʋ se lɩmaɣzɩyɛ nɖɩ ɖɩkpaɣaa yɔ ɖɩlakɩ nɔɔ kʋɖʋmaɣ nɛ mbʋ ɖɩkpɛlɩkaa se pɩkɛ kɩbam yaa kɩdɛkɛdɩm yɔ, yaa ɖiheyiɣ-ɖʋ se pɩɩlakɩ nɔɔ kʋɖʋmaɣ nɛ pʋ.

Mbʋ ɖɩmaɣzɩɣ se pɩkɛ kɩbam nɛ kɩdɛkɛdɩm yɔ, pɩpɩzɩɣ piseɣti-ɖʋ nɛ ɖɩnɩɩ lalaa siziŋ, ɖɩwɩlɩ-wɛ ɖɛ-ɛsɩmɩyɛ, ɖɩwɩlɩ-wɛ siɣsiɣ wɛtʋ nɛ ɖɩna pa-pʋtɔdɩyɛ. Pɩpɩzɩɣ nɛ pɩsɩnɩ-ɖʋ ɖɔɖɔ se ɖɩtaala mbʋ pɩcɛyɩɣ ɖɛ-ɛyaa kʋsɔɔlaa yaa mbʋ pɩɖʋʋ-ɖʋ fɛyɛ yaa pɩcɛyɩɣ-ɖʋ yɔ.

Ndʋ ɖɩmaɣzɩɣ yɔ ɛzɩ pɩwɛɛ se ɖɩtaa liu se tiɖiyiɣ-ɖʋ camɩyɛ paa ɛzɩmtaa? Alɩwaatʋ ndʋ Garrick kaakɛ pɩɣa evelaɣ yɔ, ɛlɩzaa se ɛcakɩ wezuu ŋgʋ ɛsɔɔlaa yɔ. Ɛyɔɔdaa se: «Manpɩzɩɣ nɛ mala mbʋ payɩ mɔnsɔɔlaa se mala yɔ.» Ɛlɛ ɛkɔm nɛ eɖiɣzina se ɛlakaɣ mbʋ ɛmaɣzaɣ se pɩwɛ ɖeu yɔ lɛ pɩtɩlʋlɩ pee kɩbana. Ɛkɔm nɛ ɛpaɣzɩ caɣʋ wezuu ŋgʋ yɔ, ɛkɛdɩ pʋwayɩ se kɩkɛ: «Kʋzʋʋ kɩdɛkɛdʋʋ, tabakʋʋyaɣ labɩnʋʋ tʋmɩyɛ kadadayaɣ, sʋlʋm kpaŋʋʋ, nɛ puuyaɣ lakasɩ kadadayaɣ cɩkpɛndʋʋ sɔsɔʋ nʋmɔʋ.»

Pɩtasɩnɩ ɖa-maɣmaɣ ɖa-lɩmaɣza lɛ, ndʋ lalaa maɣzɩɣ lɩmaɣza wena ɖɩkpakɩɣ yɔ a-yɔɔ yɔ ɖoŋ ɖoŋ lɛ pɩwɛnɩ ɖoŋ ɖɔ-yɔɔ. Pɩpɩzɩɣ pɩsɩnɩ-ɖʋ nɛ pɛ-lɛɣtʋ nɛ pɔ-lɔŋsɩnɖɛ wazɩ-ɖʋ. Alɩwaatʋ ndʋ ɖɩlakɩ mbʋ ɖɔ-hɔʋ taa mba, ɖa-taabalaa, nɛ ɖe-egeetiye taa mba maɣzɩɣ se pɩtʋʋzaa yɔ, pañaŋ-ɖʋ.

Ndʋ lalaa maɣzɩɣ yɔ ɛzɩ pɩwɛɛ se ɖɩtaa liu se tiɖiyiɣ-ɖʋ camɩyɛ paa ɛzɩmtaa? Alɩwaatʋ ndʋ Priscila kaakɛ pɩɣa pelaɣ yɔ, ɛlakaɣ mbʋ ɛ-taabalaa sakɩyɛ lakaɣ yɔ nɛ ɛcakɩ kʋzʋʋ wezuu ŋgʋ ɛtɩɖɔkɩ nesi. Ɛlɛ paa lalaa kamaɣzaɣ se mbʋ ɛlakaɣ yɔ pɩwɛ ɖeu yɔ, ɛtaawɛɛ koboyaɣ taa. Ɛyɔɔdaa se: «Alɩwaatʋ ndʋ malakaɣ mbʋ lalaa lakaɣ yɔ, pitaaɖeɣni-m. Piyeba nɛ mala kɩmɛlɛndʋ lakasɩ nɛ mbʋ pɩpɩzaɣ se pɩkɔnɩ-m kaɖɛ yɔ.»

Alɩwaatʋ ndʋ ɖɩcaɣ se ɖɩkpaɣ lɩmaɣza kɩbam nɛ kɩdɛkɛdɩm hɔɔlʋʋ taa yɔ, ndʋ ɖɩmaɣzɩɣ yɔ nɛ ndʋ lalaa maɣzɩɣ yɔ pɩ-tɔm cɛyaa. Ɛlɛ ye pi-ɖeke piɖiyiɣni-ɖʋ yɔ pɩtɩkɛ paa ɛzɩmtaa pɩlʋlʋʋ pee kɩbana. Nabʋyʋ taa pɩpɩzɩɣ nɛ pɩkɔnɩ ɖa-maɣmaɣ yaa ɛyaa lalaa kaɖɛ mbʋ pʋyɔɔ yɔ pɩtɩkɛ paa ɛzɩmtaa ɖɩsɩm mbʋ pɩlɩɣ lɩmaɣza wena ɖɩkpakɩɣ yɔ a-taa yɔ. (Aduwa 14:12) Nɛ halɩ paa ɖa nɛ ɛyaa lalaa ɖɩmaɣzɩɣ se nabʋyʋ wɛ ɖeu yɔ pɩpɩzɩɣ nɛ pɩkɔnɩ-ɖʋ kaɖɛ nɛ pɩpɩzɩɣ nɛ pɩpɔzɩ se ɖɩlɛɣzɩ lɩmaɣza. Ðooo lɛ, lakasɩ nzɩ ɛyaa maɣzaɣ se sɩfɛyɩ ɖeu yɔ lɛɛlɛɛyɔ lɛ sakɩyɛ maɣzɩɣ se sɩwɛ ɖeu, nɛ nzɩ ɖooo lɛ pamaɣzaɣ se sɩwɛ ɖeu yɔ lɛɛlɛɛyɔ lɛ sakɩyɛ maɣzɩɣ se sɩfɛyɩ ɖeu.

Ɛzɩ pʋyʋ kɩbanʋ nɔɔyʋ wɛɛ se pɩpɩzɩɣ nɛ piɖiyi-ɖʋ mbʋ pɩkɛ kɩbam nɛ kɩdɛkɛdɩm yɔ pɩ-hɔɔlʋʋ taa? Wezuu kɩbaŋʋ caɣʋ hɔɔlʋʋ taa lɛ, ɛzɩ nabʋyʋ wɛɛ se pɩpɩzɩɣ pɩsɩnɩ-ɖʋ nɛ piɖeni-ɖʋ sɔnɔ nɛ cee wayɩ?

Tɔm kɩbandʋ lɛ se nabʋyʋ wɛɛ nɛ pɩɩlɛɣzɩɣ nɛ ɖɩpɩzɩɣ nɛ ɖɩtaa-pʋ liu nɛ piɖiyi-ɖʋ wezuu kɩbaŋʋ caɣʋ nʋmɔʋ taa paa le ɖɩwɛɛ yɔ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ wonuu kɩbaŋʋ ŋgʋ kɩpɩzɩɣ nɛ kiɖiyi-ɖʋ nɛ ɖɩtɩlɩ kɩbam nɛ kɩdɛkɛdɩm yɔ.