Peɖiɣni susuu Ɛsɔ Kewiyaɣ tɔm kɩbandʋ ɛjaɖɛ kpeekpe yɔɔ ɛzɩ Yesu kaayɔɔdʋʋ yɔ. (Maatiyee 24:14) Bibl taa takayaɣ ŋga payaɣ se Danɩyɛɛlɩ yɔ, keheyiɣ-ɖʋ se Kewiyaɣ ŋga lɛ, Ɛsɔ tɛ komina. Natʋ tɔm natʋyʋ wɛ takayaɣ ŋga ka-ñʋʋ 2 taa, nɛ tɩyɔɔdʋʋ ɛyaa kominawaa yaa kewiyisi nzɩ sɩtɩŋ ɖama wayɩ kpaɣnɩ caanaʋ taa Babilɔɔnɩ kewiyaɣ nɛ pɩkɔɔ pɩtalɩ ɖa-alɩwaatʋ taa ñɩnzɩ yɔ sɩ-tɔm. Kalɩtʋ 44 yɔɔdɩ mbʋ pɩkaɣ tɛmnʋʋ kewiyisi nzɩ yɔ pɩ-tɔm se:

“Kewiyisi nzɩ sɩ-wɛɛ taa lɛ, ɛsɔdaa Ɛsɔ kaɣ lɩzʋʋ Kewiyaɣ nakɛyɛ nɛ nɔɔyʋ ɛɛkaɣ-kɛ ɖezuu, nɛ paakaɣ cɛlʋʋ Kewiyaɣ ŋga ɛyaa samaɣ lɛɛka; kakaɣ tuzuu nɛ kɛpɛɖɩ kewiyisi nzɩ yɔ sɩ-tɩŋa, nɛ ka-maɣmaɣ kakaɣ wɛʋ tam.”

Natʋ tɔm tʋnɛ nɛ Bibl taa natʋ tɔm lɛɛtʋ wɩlɩɣ se, Ɛsɔ Kewiyaɣ kaɣ lɛɣzʋʋ ɛyaa kominawaa nɛ kɔkɔnɩ pɛɛyɛ nɛ laŋhɛzɩyɛ tɛtʋ kpeekpe yɔɔ. Ɛzɩma wezuu caɣʋ kaɣ wɛʋ alɩwaatʋ ndʋ tɩ-taa?  Natʋ tɔm ndʋ tɩkaɣ labʋ alɩwaatʋ ndʋ tɩ-taa yɔ, tɩ-taa natʋyʋ yɔ.

• YOU ƐƐTASƖƔ WƐƲ

  Keɣa 45:10 yɔɔdɩ Ɛsɔ tɔm se: “Ɛsɩnzɩ yoŋ tɩŋa piwolo pɩtalɩ tɛtʋ kamaɣ yɔɔ, ɛpʋʋtɩ tɔŋ, ekpindiyi kɩgbɛzɩŋ nɛ ɛñaɣzɩ you kɛɛkɛɛnaa miŋ.”

  Maɣzɩ nɛ ŋna ɛzɩma ɛjaɖɛ yɔɔ wɛɣ, ye ɛyaa ɛkpakɩɣ po-wondu nɛ pɛ-lɛɣtʋ ndʋ palakɩnɩ you wondu yɔ, nɛ pañakɩ pana se palabɩnɩ mbʋ pɩpɩzɩɣ pɩwazɩ lalaa nɛ pɩtaakʋ-wɛ yɔ! Mbʋ pɩkaɣ wɛʋ alɩwaatʋ ndʋ Ɛsɔ Kewiyaɣ ɖiyiɣ tɛtʋ yɔ.

• KƲDƆMƖŊ ƖƖTASƖƔ WƐƲ

  Izaayii 33:24: “Ɛyʋ nɔɔyʋ ɛɛkaɣ tɔm se: ‘Pɩwɩɣ-m.’”

  Maɣzɩ ɛjaɖɛ nɖɩ ɖɩ-taa laŋɩyɛ kʋdɔŋ, kansɛɛrɩ, pɔtʋ kʋdɔŋ nɛ kʋdɔmɩŋ lɛɛŋ ɩɩtasɩɣ nɔɔyʋ cɛyʋʋ yɔ, ɖɩ-yɔɔ nɛ ŋna! Ðɔkɔtɔ ɖamɩŋ nɛ kɔ ɩɩtasɩɣ wɛʋ. Paa weyi ɛwɛɣnɩ tɔnʋʋ taa alaafɩya pilim. Mbʋ pɩkaɣ wɛʋ tɛtʋ yɔɔ cee wayɩ.

• ÑƆƆSƖ ƐƐTASƖƔ WƐƲ

  Keɣa 71:16: “Tɔɔnasɩ ɩtɔyɩ ɛjaɖɛ taa nɛ pɩkpɛndɩnɩ pʋŋ nɛ piyisi yɔɔ.”

  Tɔɔnaɣ kaɣ labʋ camɩyɛ tɛtʋ yɔɔ nɛ pɩtalɩ paa anɩ. Paa weyi ɛtɔkɩ camɩyɛ nɛ ñɔɔsɩ ɛɛtasɩɣ wɛʋ.

• SIZIŊ, KƲÑƆMƖŊ NƐ SƖM PAATASƖƔ WƐƲ

  Natʋ 21:4 yɔɔdɩ Ɛsɔ tɔm se: “Ɛkaɣ hɩzʋʋ pɛ-ɛsɩndaa ɛsɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.”

  Pɩwɩlɩɣ se ɛyaa kaɣ wɛʋ pilim nɛ pacaɣ wezuu maatɛŋ paradisuu taa tɛtʋ yɔɔ. Tamaɣ kɩbaŋa ŋga ɖa-Lɩzɩyʋ, sɔɔlɩm tʋ Yehowa Ɛsɔ labɩ-ɖʋ.

Ŋmaɣzɩɣ se pɩwɛɣ kaɖɛ se natʋ tɔm ndʋ tɩla na? Ɛyaa sakɩyɛ tisiɣ se wezuu ŋgʋ kɩ-tɔm Bibl yɔɔdʋʋ se ɛyaa kaɣ caɣʋ cee wayɩ yɔ, kɩkɛ wezuu kɩbaŋʋ toovenim, ɛlɛ lɩmaɣza naayɛ yɔ lɛ, pɩwɛ sakɩyɛ kaɖɛ se petisi se ɛyʋ pɩzɩɣ ɛcaɣ wezuu maatɛŋ. Wiɖiyi nɔɔyʋ tɩcaɣ wezuu ŋgʋ nɛ ɛkɛdɩ-ɖʋ kɩ-yɔɔ tɔm. Pʋyɔɔ pɩɩɖɩɣzɩɣ-ɖʋ se tɔm ndʋ tɩ-yɔɔ tisuu wɛ ɛyaa sakɩyɛ kaɖɛ.

Ɛzɩma ɛyaa kɛ kɩwɛɛkɩm nɛ sɩm po-yomaa ɖooo lɔŋ nɛ panɩɣ siziŋ nɛ wɩzasɩ nɛ palakɩ ɖɔɖɔ kʋñɔmɩŋ ndɩ ndɩ yɔ pʋyɔɔ lɛ, pɩlakɩ ɛyaa sakɩyɛ ɛzɩ mbʋ Ɛsɔ kaaɖʋwa se ɖɩcaɣ wezuu. Ɛlɛ wezuu ŋgʋ ɖɩcakɩ yɔ, kɩwɛ ndɩ kpem nɛ tamaɣ ŋga Ɛsɔ kaalabɩ ɛyaa ɖooo kiɖe tɛɛ yɔ.

Pɩsa nɛ ɖɩtaapɩtɩ paa ññɩɩ se lidaʋ tɔm ndʋ payɩ ɛyɔɔdaa yɔ, tɩkaɣ labʋ lɛ, Ɛsɔ yɔɔdɩ tɔm ndʋ tɩlɩɣnɩ ɛ-nɔɔ taa yɔ tɩ-yɔɔ se: “Tɩɩkaɣ pɩsʋʋ mɔn-cɔlɔ yem, ɛlɛ tɩkaɣ labʋ mbʋ mbʋ mɔnsɔɔlaa yɔ nɛ tɩkaɣ pɩzʋʋ nɛ tɩla mbʋ mentiyi-tʋ se tɩla yɔ.”​—Izaayii 55:11.

Pɔyɔɔdɩ Yehowa tɔm Bibl taa se ɛkɛ “Ɛsɔ weyi ɛɛcɛtɩɣ yɔ.” (Tiiti 1:2) Ɛzɩma Ɛsɔ ha-ɖʋ lidaʋ se ɖɩkaɣ caɣʋ wezuu kɩbaŋʋ siŋŋ cee wayɩ yɔ pʋyɔɔ lɛ, pɩwɛɣ ɖeu se ɖɩpɔzɩ ɖa-tɩ se: Toovenim se ɛyaa pɩzɩɣ pacaɣ wezuu maatɛŋ Paradisuu taa tɛtʋ yɔɔ? Ɛbɛ pɩwɛɛ se ɖɩla nɛ ɖɩpɩzɩ ɖɩcaɣ wezuu ŋgʋ? Takayaɣ kanɛ ka-taa tɔm ñʋŋ weyi ɩkɔŋ yɔ, ɩkaɣ-ŋ sɩnʋʋ nɛ ŋhiɣ tɔm ndʋ tɩ-yɔɔ cosuu.