Ye pɩtɩkɛ Ɛsɔ cɔlɔ ɖa-kʋñɔmɩŋ lɩɣna, ayeba nɛ ñɔɔsɩ, kʋñɔndʋtʋ, yoŋ, kʋdɔmɩŋ nɛ kɛgbɛdɩsasɩ wɛɛ ɛjaɖɛ yɔɔ? Ɛsɔtɔm wɩlɩɣ-ɖʋ wɛtʋ naadozo ndʋ tɩ-yɔɔ kʋñɔmɩŋ wɛ ɛjaɖɛ yɔɔ yɔ:

1. Piɖeni men-ɖeke, tɩ kpazʋʋ nɛ paɖɩyɛ. “Ɛyʋ ñazɩɣ ɛyʋ nɛ ɛwɩlɩɣ-ɩ kʋñɔŋ.” (Eklesɩyastɩ 8:9) Ðoŋ ɖoŋ lɛ, nabɛyɛ tɛ pilim mantɩtalɩ lakasɩ, piɖeni men-ɖeke lakasɩ, yaa kañatʋ lakasɩ yekina nɛ lalaa lakɩ kʋñɔŋ.

2. Mbʋ ɛyʋ tɩɖʋna yɔ. Ðoŋ ɖoŋ lɛ, ɛyaa lakɩ kʋñɔŋ mbʋ pʋyɔɔ yɔ, “wɩyɛ nɛ kʋñɔŋ pɔtɔlʋʋ pe-kpeekpe pɔ-yɔɔ.” (Eklesɩyastɩ 9:11) Nabʋyʋ taa asɛyʋʋ pɩzɩɣ nɛ kɩtalɩ nɔɔyʋ, mbʋ pʋyɔɔ yɔ, ɛwɛɛ lone nɖɩ ɖɩ-taa asɛyʋʋ laba, alɩwaatʋ ndʋ ɖeyi ɖeyi kɩlaba, yaa ɛ-maɣmaɣ ɛlabɩ kaakendu yaa picoɖi-i kicoɖuu yɔ.

3. Kɩdɛkɛdʋʋ ɖiyiɣni ɛjaɖɛ. Bibl heyiɣ-ɖʋ weyi ɛ-cɔlɔ ɛjaɖɛ yɔɔ kʋñɔmɩŋ lɩɣna yɔ ɛ-tɔm kpayɩ. Kɩtɔm se: “Ɛjaɖɛ pilim wɛ kɩdɛkɛdɩm tʋ taa [yaa e-nesi tɛɛ.]” (1 Yohanɛɛsɩ 5:19) Sataŋ Eleeu payaɣ se “kɩdɛkɛdɩm tʋ.” Ɛkɛ fezuu ŋgʋ kɩwɛ ɖoŋ siŋŋ yɔ nɛ kiɖe tɛɛ lɛ, ɛɛkɛ Ɛsɔ tiyiyu ɛlɛ “ɛtɩcaɣ tʋtʋyɛ tɔm taa.” (Yohanɛɛsɩ 8:44) Ɛsɔ tiyiyaa nabɛyɛ kɔm nɛ pakʋyɩ Ɛsɔ yɔɔ nɛ patɩŋ Sataŋ wayɩ nɛ pañɩnɩɣ pa-maɣmaɣ pɛ-kɛzɛɣa; payaɣ-wɛ se aleewaa. (Kiɖe Tɛɛ Tɔm 6:1-5) Kpaɣnɩ alɩwaatʋ ndʋ, Sataŋ nɛ ɛ-aleewaa pɛwɛnɩ ɖoŋ kɩdɛkɛdɩŋ ɛjaɖɛ yɔɔ. Ða-alɩwaatʋ tʋnɛ tɩ-taa kpem kɛ pakɩlɩ wɛnʋʋ ɖoŋ ɛyaa yɔɔ. Lɛɛlɛɛyɔ, Sataŋ weyi ɛkɔ pana siŋŋ yɔ, ɛnʋ kɛnɩ “ɛjaɖɛ kpeekpe peɣziyu”, pʋyɔɔ Bibl yɔɔdaa se “pɩtɔɔ-mɩ, tɛtʋ.” (Natʋ 12:9, 12) Toovenim taa lɛ, Sataŋ kɛ ɖiyiyu weyi ɛwɛ kañatʋ pɩdɩɩfɛyɩ yɔ. Ɛyaa lakɩ kʋñɔŋ lɛ, pɩlakɩ-ɩ leleŋ siŋŋ. Ye mbʋ, pɩtɩkɛ Ɛsɔ cɔlɔ ɛyaa kʋñɔmɩŋ lɩɣna, ɛlɛ Sataŋ cɔlɔ ɩlɩɣna.

MAƔZƖ NƐ ŊNA: Fezuu kɩdɛkɛdʋʋ ŋgʋ kɩfɛyɩnɩ sɔɔlɩm paa ññɩɩ yɔ, ŋgʋ pɩzɩɣna nɛ kɩkɔnɩ kʋñɔmɩŋ ɛyaa yɔɔ. Ŋgʋ Bibl yɔɔdaa se: “Ɛsɔ kɛ Sɔɔlɩm.” (1 Yohanɛɛsɩ 4:8) Ɛzɩma Ɛsɔ kɛ sɔɔlɩm yɔ, pʋyɔɔ Bibl tasɩ yɔɔdʋʋ ɛ-yɔɔ se: “Kañatʋ fɛyɩ Ɛsɔ cɔlɔ nɛ nɔɔkuye fɛyɩ Ðoŋ Tɩŋa Tʋ cɔlɔ.” (Yɔɔb 34:10)

Ɛlɛ ɖɩpɩzɩɣ ɖɩpɔzɩ ɖa-tɩ se: ‘Alɩwaatʋ ɛzɩma Ðoŋ Tɩŋa Tʋ haɣ nʋmɔʋ Sataŋ se eɖiyi ɛjaɖɛ nɛ kañatʋ?’ Ɛzɩ ɖɩtɛm naʋ yɔ, Ɛsɔ paɖɩɣ kɩdɛkɛdɩm nɛ ɛnɩɣ siziŋ siŋŋ alɩwaatʋ ndʋ ɛnaɣ ɛyaa kʋñɔmɩŋ yɔ. Pɩtasɩ lɛ, ɛ-Tɔm seɣtiɣ-ɖʋ se: “Ɩɖʋzɩ mɩ-ɛhʋyɛ [yaa mɩ-nɩɣzɛ] kpeekpe e-nesi tɛɛ.” (1 Pɩyɛɛrɩ 5:7) Ɛsɔ sɔɔlɩ-ɖʋ nɛ ɛkɛ ɖɔɖɔ Ðoŋ Tɩŋa Tʋ. Pʋyɔɔ lɛ, pɩkazɩ pazɩ eyeki nɛ kʋñɔmɩŋ nɛ mulum lakasɩ tɩŋa sɩɩ tɩnaɣ ɛzɩ ɖɩkɔŋʋʋ naʋ ñʋʋ ŋgʋ kɩkɔŋ yɔ, kɩ-taa yɔ. *