Bibl lɔŋ tasʋʋ: “Ɩtaawɛɛnɩ liidiye sɔɔlɩm mi-wezuu caɣʋ taa, ɛlɛ mi-liu ɛsɩbɩnɩ mbʋ ɩwɛnɩ lɛɛlɛɛyɔ yɔ.” —Ebree mba 13:5.

Mbʋ mbʋ ɛjaɖɛ seɣtiɣ-ɖʋ se ɖɩwɛɛna yɔ, pɩɖɔ siŋŋ. Ɛlɛ Bibl heyiɣ-ɖʋ se ‘ɖe-liu ɛsɩbɩnɩ mbʋ ɖɩwɛnɩ lɛɛlɛɛyɔ yɔ.’ Ɛzɩma ɖɩpɩzɩɣ ɖɩla mbʋ?

Ðɩtaawɛɛnɩ “liidiye sɔɔlɩm.” Ɛyaa mba pɛwɛnɩ ‘liidiye sɔɔlɩm’ yɔ, palakɩ mbʋ payɩ papɩzɩɣ yɔ se pehiɣ liidiye, paa pɩpɩzɩɣ se pɩkɔnɩ kaɖɛ pɔ-hɔʋ taa ñɩma nɛ pa-taabalaa yɔɔ yɔ, nɛ paa pɩpɩzɩɣ se pituyi-wɛ nɛ pacaɣ wezuu kɩdɛkɛdʋʋ nɛ halɩ pɩwɛɛkɩ pa-hɩla yɔ. (1 Timootee 6:10) Pɩlabɩ pʋtɔdɩyɛ kpem! Toovenim taa lɛ, weyi ɛsɔɔlɩ liidiye yɔ, “ɛɛhakɩ liidiye.”—Eklesɩyastɩ 5:10.

Ɛyaa ɩmʋ ñɩm ɖɛ-ɛsɩndaa nɛ pɩkpaɖɩ wondu. Tomnaɣ yɔɔ wondu wɛnɩ wazaɣ, ɛlɛ tɩɩpɩzɩɣ nɛ tɩsɔɔlɩ-ɖʋ. Ɛyaa ɖeke pɩzɩɣna nɛ pɔsɔɔlɩ-ɖʋ. Ye ɖɩwɛnɩ “ɛgbaɣdʋ” yaa taabalʋ kɩbanʋ yɔ, pɩpɩzɩɣ pɩhɛzɩ ɖa-laŋɩyɛ nɛ pɩha-ɖʋ taa leleŋ.—Aduwa 17:17.

Bibl lɔŋ tasʋʋ: “Laŋɩyɛ nɖɩ ɖɩ-taa nɛ leleŋ yɔ, ɖɩlakɩ nɛ weyi ɛsɔsaa yɔ ɛnɛɣdɩɣ.” —Aduwa 17:22.

Taa leleŋ kɛ kɔyɛ nɖɩ ɖɩsɩɣnɩ-ɖʋ kʋdɔŋ alɩwaatʋ taa yɔ. Ɛlɛ ɛzɩma ŋpɩzɩɣ nɛ ŋhiɣ taa leleŋ ye pɩwɩɣ-ŋ yɔ?

Wɛɛnɩ ɛsɩmɩyɛ. Ye ɖɩmaɣzɩɣ ɖa-kʋdɔŋ yɔɔ “kɩyakɩŋ kpeekpe” yɔ, piyeki nɛ ɖɩwɛɛ kʋñɔŋ taa. (Aduwa 15:15) Pʋyɔɔ Bibl heyiɣ-ɖʋ se ɖɩkɛ ɛyaa mba ‘pawɩlɩɣ se pɛwɛnɩ ɛsɩmɩyɛ’ yɔ. (Koloosi mba 3:15) Ye mbʋ, ña-taa ɛla leleŋ nɛ kɩbam mbʋ palakɩ-ŋ yɔ, paa pɩtɩɩwɛ ññɩɩ yɔ. Alɩwaatʋ ndʋ ŋnaɣ wɩsɩ ɖʋʋ yɔ, alɩwaatʋ ndʋ helifɛtaɣ nakɛyɛ fɛtɩɣ yɔ yaa alɩwaatʋ ndʋ ñɛ-ɛyʋ kʋsɔɔlʋ nɔɔyʋ mʋyʋʋnɩ-ŋ yɔ, pɩpɩzɩɣ nɛ pɩha-ŋ taa leleŋ.

Sɩnɩ lalaa. Paa pɩwɩɣ-ɖʋ yɔ, ɖɩnawa se “taa leleŋ wɛ haʋ taa nɛ pɩkɩlɩ mʋʋ taa.” (Tʋma Labʋ 20:35) Lalaa naɣ pana wena ɖɩñakɩ yɔ nɛ pɛsɛɣ-ɖʋ lɛ, pɩhaɣ-ɖʋ taa leleŋ nɛ pɩsɩɣnɩ-ɖʋ se ɖɩtaakɩlɩ maɣzʋʋ ɖa-kʋdɔŋ yɔɔ. Ye ɖɩsɩɣnɩ lalaa se pehiɣ taa leleŋ yɔ, piyeki nɛ ɖa-maɣmaɣ ɖihiɣ taa leleŋ ɖɔɖɔ.

Bibl yɔɔdaa se: “Ɩtɩlɩ mbʋ pɩ-tɔm kɩlɩ cɛyʋʋ yɔ.”—Filiipi mba 1:10.

Nesi ɖɔkɩyaa mba pacakɩ ɖama cɔlɔ nɛ palakɩ faawɩyɛ ɖoŋ ɖoŋ yɔ, pɛcɛyɩsɩɣ pe-nesi ɖɔkʋʋ. Pɩwɛɛ se abalʋ nɛ ɛ-halʋ panɩɩ pɩ-taa se mbʋ pɩ-tɔm kɩlɩ cɛyʋʋ pe-wezuu caɣʋ taa yɔ, pɩ-taa lɛɛbʋ lɛ pe-nesi ɖɔkʋʋ.

Nɔɔ kʋɖʋmaɣ labʋ. Pɩɩwɛɣ ɖeu se paa weyi lɛ, ɛlakɩ tʋmɩyɛ e-ɖeke se ehiɣ ɛ-maɣmaɣ ɛ-kɛzɛɣa, ɛlɛ pɩwɛɛ se ɩla nɔɔ kʋɖʋmaɣ nɛ ɩla mbʋ pɩwazɩɣ mɩ-naalɛ yɔ. Bibl yɔɔdaa se: “Naalɛ wɛʋ kɩlɩ ɖeu kʋɖʋm wɛʋ.” (Eklesɩyastɩ 4:9) Ɩpɩzɩɣ nɛ ɩkpɛndɩ nɛ ɩla tɔɔnaɣ, ɩla aleɣya yaa iwolo ɩmʋ helim.

Ɩwɩlɩ ɖama sɔɔlɩm. Bibl seɣtiɣ abalʋ nɛ ɛ-halʋ se pɔsɔɔlɩ ɖama nɛ pɛwɛɛnɩ ñamtʋ ɖama yɔɔ. (Efɛɛzɩ mba 5:28, 33) Papɩzɩɣ nɛ pakpazɩ pe-nesi ɖɔkʋʋ ɖoŋ, ye pamʋʋyʋʋnɩ ɖama, pekpiki ɖama nɛ sɔɔlɩm nɛ palakɩ ɖama kʋjɔŋ yɔ. Pɩtasɩ lɛ, pɩfɛyɩ se abalʋ yaa halʋ ɛsʋʋnɩ nɔɔyʋ nɛ pɩtasɩnɩ ɛ-tɛŋga.—Ebree mba 13:4.