PAA ÐƆ-CƆZƆ Aɖam nɛ ɛ-halʋ Ɛva pa-kaañamtʋ ɛkɔnɩ kɩdɛkɛdɩm nɛ sɩm ɛjaɖɛ kpeekpe yɔɔ yɔ, kaɖʋwa ŋga Ɛsɔ wɛnɩ ɛyaa yɔɔ yɔ, katɩlɛɣzɩ. Ɛsɔ yeba nɛ pama ɛ-kaɖʋwa ŋga kɔ-yɔɔ tɔm tam sakɩyɛ Bibl taa, nɛ ɛwɩlɩ se katɩlɛɣzɩ.

• “Siɣsiɣ tʋ tɩnɩ tɛtʋ, ɛwɛɣ tɩ-yɔɔ tam.”—Keɣa 36:29.

• “Kɩbaɣlʋ kaɣ ɖezuu sɩm kpaagbaa ɖezuu nɛ Kɩbaɣlʋ Ɛsɔ kaɣ hɩzʋʋ ɛsɩtɛɣlɩm ɛyaa kpeekpe ɛsɩndaa.”—Izaayii 25:8.

• “Kɛdɛzaɣ koyindu weyi pakaɣ-ɩ ɖɩzʋʋ yɔ, ɛnʋ lɛ sɩm.”—1 Kɔrɛntɩ mba 15:26.

• “Sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.”—Natʋ 21:4.

Ɛzɩma tɩyɛ Ɛsɔ kaɣ ɖɩzʋʋ ɖo-koyindu sɩm? Bibl wɩlɩ kpayɩ kpayɩ se “Siɣsiɣ tʋ . . . wɛɣ . . . tam.” Ɛlɛ kɩtasɩ yɔɔdʋʋ ɖɔɖɔ se: “Ɛyʋ siɣsiɣ tʋ nɔɔyʋ fɛyɩ tɛtʋ yɔɔ nɛ ɛlakɩ kɩbandʋ yeke.” (Eklesɩyastɩ 7:20) Ye mbʋ, Ɛsɔ kaɣ sɔʋ ɛ-maɣmaɣ ɛ-paɣtʋ ndʋ tɩwɩlɩɣ se kɩwɛɛkɩm laɖaa ɩɩpɩzɩɣ nɛ pacaɣ wezuu tam yɔ tɩ-yɔɔ se pɩsa nɛ ɛwa sɩm na? Pɩɩkaɣ mbʋ labʋ kaaʋ, mbʋ pʋyɔɔ yɔ “Ɛsɔ . . . ɛɛpɩzɩɣ nɛ ɛcɛtɩ.” (Tiiti 1:2) Ye mbʋ, ɛbɛ Ɛsɔ kaɣ labʋ nɛ eyele nɛ ɛ-kaɖʋwa ŋga ɛɛwɛnɩ ɛyaa yɔɔ yɔ kala?

Yehowa Ɛsɔ labɩ sɔɔlɩm ɖʋtʋ natʋyʋ se ɛtɩŋnɩ tɩ-yɔɔ nɛ ɛlɩzɩ ɛyaa kpeekpe sɩm nesi tɛɛ, ndʋ lɛ kɩhɛyʋʋ pʋ-ñʋʋ taa. Kɩhɛyʋʋ pʋ-ñʋʋ taa kɛnɩnɩ mbʋ pɛhɛyɩɣ se palɩzɩnɩ nɔɔyʋ yomiye taa yaa se pɔñɔɔzɩnɩ mbʋ pɩwɛɛkaa yɔ; nɛ mbʋ pɛhɛyɩɣ yɔ, pɩwɛɛ se pʋmʋnɩ mbʋ pɩwɛɛkaa yɔ ɖeyi ɖeyi. Ɛzɩma ɛyaa kpeekpe kɛ kɩwɛɛkɩm laɖaa nɛ pamʋnɩ sɩm yɔ, pʋyɔɔ Bibl yɔɔdɩ kpayɩ se: “Ɛyʋ ɛɛpɩzɩɣ ɛya ɛ-maɣmaɣ ɛ-ñʋʋ yaa ɛhɛyɩ Ɛsɔ mbʋ pɩɩya ɛ-ñʋʋ yɔ; pɩkpaɖɩ mbʋ ɛyʋ pɩzɩɣ yabʋ yɔ, sɔnɔ nɛ cee ɛɛpɩzɩɣ.”—Keɣa 48:8, 9.

Ɛzɩma ɖɩtɩtalɩ pilim yɔ pʋyɔɔ lɛ, ɖa-taa paa weyi sɩm kɛ ɛ-maɣmaɣ ɛ-kɩwɛɛkɩm ɖeke kɩhɛyʋʋ, ɛɛpɩzɩɣ nɛ ɛya ɛ-maɣmaɣ ɛ-ñʋʋ; nɛ ɛɛpɩzɩɣ ɖɔɖɔ nɛ ɛhɛyɩ lalaa kɩwɛɛkɩm yɔɔ. (Roma mba 6:7) Pɩɩpɔzaa se ɛyʋ weyi ɛtalɩ pilim nɛ ɛfɛyɩnɩ kɩwɛɛkɩm nabʋyʋ yɔ, ɛlaa e-wezuu ɖa-kɩwɛɛkɩm yɔɔ.—Ebree mba 10:1-4.

Pɩ-tɛ ɖʋtʋ ɖeyi ɖeyi Ɛsɔ laba. Etiyi ɛ-Pɩyalʋ Yesu nɛ ɛlɛ lɩɩnɩ ɛsɔdaa nɛ ɛkɔɔ nɛ palʋlɩ-ɩ tɛtʋ yɔɔ nɛ ɛkɛ ɛyʋ weyi ɛtalɩ pilim nɛ ɛfɛyɩnɩ kɩwɛɛkɩm nabʋyʋ yɔ. (1 Pɩyɛɛrɩ 2:22) Yesu yɔɔdaa se ɛkɔm se “ɛcɛlɩ e-wezuu se pɩkɛ kɩhɛyʋʋ pʋ-ñʋʋ taa ɛyaa sakɩyɛ yɔɔ.” (Maarkɩ 10:45) Ɛsɩba se pawa sɩm nɛ pɩsa nɛ ɖɩpɩzɩ ɖihiɣ wezuu.—Yohanɛɛsɩ 3:16.

Sɔnɔ, ɖɩwɛ ‘alɩwaatʋ kaɖɛ ñɩndʋ ndʋ tɩ-lʋbɩnʋʋ wɛ kaɖɛ yɔ’ tɩ-taa nɛ pɩwɩlɩɣ se ɖɩwɛ ɛjaɖɛ kɩdɛkɛdɩyɛ ɖɩnɛ ‘ɖɩ-kɛdɛzaɣ kɩyakɩŋ taa’ ɛzɩ Bibl taa natʋ tɔm yɔɔdʋʋ yɔ. (2 Timootee 3:1) Kɛdɛzaɣ kɩyakɩŋ kaɣ sɩʋ tɩnaɣ “tɔm hʋʋ kɩyakʋ wiye nɛ ɛyaa mba paañaŋ Ɛsɔ yɔ pa-ɖɩzʋʋ kɩyakʋ wiye.” (2 Pɩyɛɛrɩ 3:3, 7) Ɛlɛ ɛyaa mba pɔsɔɔlɩ Ɛsɔ yɔ, pakaɣ hiɣu ñʋʋ yabʋ kɩyakʋ ŋgʋ ki-wiye nɛ paha-wɛ “wezuu maatɛŋ.”—Maatiyee 25:46.

 Pakaɣ fezuu ɛyaa miiliyɔɔwaa lalaa nɛ paha-wɛ waɖɛ se pehiɣ wezuu maatɛŋ. Yesu wɩlaa se sɩɖaa fezuu tɔm kɛ toovenim tɔm, alɩwaatʋ ndʋ eewobi Nayiinɩ tɛtʋ taa yɔ. Lelu nɔɔyʋ pɩyalʋ ɛgbamɩyɛ kaasɩba. Lelu ɛnʋ ɛ-tɔm la Yesu “pʋtɔdɩyɛ” nɛ efezi ɛ-pɩyalʋ. (Luka 7:11-15) Apostoloo Pɔɔlɩ mawa se: “Mɛwɛnɩ lidaʋ kʋnɛ Ɛsɔ yɔɔ . . . se pakaɣ fezuu ɛyaa siɣsiɣ tɩnaa nɛ mba pɛfɛyɩ siɣsiɣ yɔ.” Lidaʋ kʋnɛ, kɩkɛnɩ sɔɔlɩm sɔsɔm mbʋ Ɛsɔ wɩlɩ ɛjaɖɛ kpeekpe yɔ.—Tʋma Labʋ 24:15.

Ɛyaa miiliyaarɩwaa sakɩyɛ pɩzɩɣ nɛ pɛwɛɛnɩ wezuu maatɛŋ lidaʋ ŋgʋ. Bibl yɔɔdaa se: “Siɣsiɣ tʋ tɩnɩ tɛtʋ, ɛwɛɣ tɩ-yɔɔ tam.” (Keɣa 36:29) Alɩwaatʋ ndʋ tɩ-taa lɛ, tɔm ndʋ apostoloo Pɔɔlɩ mawa pɩlakɩ pɩnzɩ ɛzɩ 2000 mbʋ yɔ, tɩlakɩ nɛ pɩha taa leleŋ nɛ ɖoŋ kpazʋʋ ɛyaa siɣsiɣ tɩnaa. Ɛmawa se: “Sɩm, le ña-wabɩtʋ wɛɛ? Sɩm, le ñɛ-ɛjɔʋ wɛɛ?” (1 Kɔrɛntɩ mba 15:55) Pakaɣ wabʋ ɛyaa koyindu sɔsɔ sɩm.