TƖƖNZƖ CƆŊƲƲ: Ɛyaa nabɛyɛ maɣzɩɣ se ɛzɩma tɩɩnzɩ kaapɩlɩ ɖama wayɩ pa-lʋlʋʋ kɩyakʋ wiye yɔ, mbʋ yekina se patɩlɩ ɛzɩma pɩkaɣ ɖɔm pe-wezuu caɣʋ taa yɔ. Pɔpɔzʋʋ tɩɩnzɩ cɔŋɩyaa se pana se ɛbɛ kaɣ-wɛ talʋʋ, nɛ pɩsɩnɩ-wɛ nɛ pakpaɣ lɩmaɣza.

ÐEƔA TAA WILUU: Lalaa ñamaɣzɩɣ se ye pewili ɖeɣa taa yɔ, pɩpɩzɩɣ piyele nɛ pana mbʋ pʋyɔɔ wɛtʋ natʋyʋ talɩɣ-wɛ yɔ, nɛ mbʋ pɩpɔzʋʋ se pala yɔ. Nɛ panaɣ mbʋ pʋyɔɔ nabʋyʋ talɩɣ-wɛ lɛ, piyeki nɛ pana ɛzɩma papɩzɩɣ nɛ pɛfɛɛ kaɖɛ nɖɩ ɖɩpɩzaɣ se ɖɩtalɩ-wɛ yɔ, nɛ piɖeni-wɛ.

HADƐ TƖNAA SƐƲ: Lalaa ɖɔɖɔ ñamaɣzɩɣ se pɩwɛɛ se pɛhɛzɩ pɔ-cɔzɔnaa mba pasɩba yɔ pa-laŋa, yaa pɛsɛɛ-wɛ nɛ pɩsa nɛ paba kandɩyɩ pɔ-yɔɔ nɛ pehiɣ wazasɩ. Van * wɛ Vɩyɛtɩnam ɛjaɖɛ taa nɛ ɛyɔɔdaa se: “Mamaɣzaɣ se ye manɖʋʋ mɔn-cɔzɔnaa hɩɖɛ yɔ, piɖeɣni-m me-wezuu caɣʋ taa lɛɛlɛɛyɔ nɛ pɩkandɩyɩ ma nɛ men-piya ɖɔ-yɔɔ cee wayɩ.”

WOLOŊGITI: Ɛyaa sakɩyɛ maɣzɩɣ se alɩwaatʋ ndʋ ɛyʋ nɔɔyʋ sɩkɩ yɔ, paɖaɣnɩ-ɩ lʋlʋʋ, nɛ pɩwɛɛ mbʋ labʋ yɔɔ tam. Pamaɣzɩɣ se mbʋ pɩtalɩɣ-wɛ pe-wezuu caɣʋ taa yɔ, paa pɩkɛ kɩbam yaa kɩdɛkɛdɩm yɔ, pɩlɩnɩ wezuu ŋgʋ paacaɣaa pʋcɔ nɛ pasɩkɩ yɔ, kɩ-cɔlɔ na.

Paa mbʋ yɔ, ɛyaa sakɩyɛ ñamaɣzɩɣ se pɩtɩŋa mbʋ yɔ pɩkɛ aleewaa sɔɔndʋ seu na. Paa ɛyaa sakɩyɛ ɩmaɣzɩɣ se paatisiɣ pɩtɩŋa payɩ mbʋ yɔ pɩ-yɔɔ yɔ, pɛwɛɛ powoki pɩ-yɔɔ nɛ pɔcɔŋʋʋ tɩɩnzɩ, patɩyɩɣ, pɔtɔʋ pɔɔyɩsɩ, pewiliɣ ɖeɣsi taa, nɛ pasʋzʋʋ yaa palakɩ lakasɩ lɛɛsɩ. Pamaɣzɩɣ se pɩtɩla yɔ, ye palakɩ lakasɩ nzɩ yɔ, pɩpɩzɩɣ pɩsɩnɩ-wɛ nɛ patɩlɩ mbʋ pɩkaɣ labʋ pe-wezuu caɣʋ taa yɔ.

Mba petisiɣ lakasɩ nzɩ sɩ-yɔɔ nɛ palakɩ-sɩ yɔ, ɛzɩ pɩñɔɔzɩ pe-wezuu caɣʋ nɛ piɖeni-wɛ yɔ?

Hào wɛ Vɩyɛtɩnam ɛjaɖɛ taa; na mbʋ ɛkatɩ e-wezuu caɣʋ taa yɔ. Ɛcɔŋaɣ tɩɩnzɩ, ewiliɣ ɖeɣsi taa nɛ ɛsɛɣ ɛ-cɔzɔnaa se pɩsa peɖiyi-i e-wezuu caɣʋ taa. Pɩpɩzaa nɛ piɖeni-i e-wezuu caɣʋ taa? Hào yɔɔdaa se: “Melesi liidiye sakɩyɛ, mansʋʋ kɩmɩyɛ, ñaɖʋʋ kɔɔ ma nɛ mɔ-hɔʋ taa mba ɖɛ-hɛtʋ taa, nɛ mansʋʋ nɩɣzɛ taa kpem.”

Qiuming wɛ Tayɩwaanɩ ɛjaɖɛ taa. Etisaɣ tɩɩnzɩ cɔŋʋʋ, woloŋgiti, ɖeɣsi taa wiluu, ñʋʋ leleŋ, nɛ cɔzɔnaa sɛʋ lakasɩ yɔɔ. Ɛtazɩ lakasɩ nzɩ sɩ-taa camɩyɛ pʋwayɩ lɛ, ɛyɔɔdɩ se: “Mɔnkɔm nɛ menɖiɣzina se wɩlɩtʋ ndʋ nɛ lakasɩ nzɩ sɩkaɖɩɣnɩ ɖama, nɛ sɩ-taa fɛyɩ nɩʋ. Mɔnkɔm nɛ mana se ɖoŋ ɖoŋ lɛ, tɔm ndʋ tɩɩnzɩ cɔŋɩyaa yɔɔdʋʋ yɔ tɩkɛ cɛtɩm. Nɛ woloŋgiti hɔɔlʋʋ taa lɛ, ye wezuu ŋgʋ ŋcaɣaa nɛ pʋcɔ ŋsɩ yɔ, ye ŋŋtɔzʋʋ tɔm natʋyʋ kɩ-yɔɔ, ɛzɩma ŋpɩzɩɣ ŋlɛɣzɩ nɛ ŋcaɣ wezuu kɩbaŋʋ pʋwayɩ?”

Ɛzɩ Hào, Qiuming, nɛ ɛyaa lalaa sakɩyɛ kɔm nɛ peɖiɣzina yɔ, ñʋʋ leleŋ, tɩɩnzɩ cɔŋʋʋ, cɔzɔnaa sɛʋ yaa woloŋgiti eeyeki se ɖɩna mbʋ pɩkaɣ labʋ ɖe-wezuu caɣʋ taa cee wayɩ yɔ. Pɩwɩlɩɣ se nabʋyʋ fɛyɩ se pɩpɩzɩɣ pɩsɩnɩ-ɖʋ nɛ piɖeni-ɖʋ cee wayɩ?

Ɛyaa sakɩyɛ maɣzɩɣ se pɩsa nɛ piɖeni-wɛ cee wayɩ lɛ, pɩpɔzʋʋ se pala sukuli kɩɖaɣlʋʋ nɛ pɛwɛɛnɩ ñɩm sakɩyɛ. Ɛyaa nabɛyɛ lɩzaa se palakɩ mbʋ lɛ, ɛbɛ lɩ pɩ-taa?