Ðɛ-Ɛsɔ sɔɔlɩm tʋ cɔŋnɩ ɖɔ-yɔɔ
1. ÐA-LƖZƖYƲ YEKI NƐ WƖSƖ LƖƔ
Ye wɩsɩ ɛtaawɛɛ tɛtʋ yɔɔ ɛzɩma wezuu caɣʋ kaawɛɛ? Wɩsɩ sɩɣnɩ tɩŋ se ɩlɩɩ hatʋ, ɩkpaɣ hɛtʋ, ɩlʋlɩ tɩŋ pee, nɛ ɖomaɣ. Wɩsɩ sɩɣnɩ tɩŋ ɖɔɖɔ se ɩtɩŋnɩ i-lila yɔɔ nɛ ɩsɔyɩ lɩm tɛtɛɛ nɛ ɩkpanɩ ɩ-hatʋ taa nɛ pɩpɩsɩ hohou nɛ pɩkpa ɛsɔdaa.
2. ÐA-LƖZƖYƲ YEKI NƐ TƐƲ NƖƔ
Ɛsɔ ha-ɖʋ tɛʋ nɛ ɛsɔdaa kiŋ nɛ eyeki nɛ tɔɔnasɩ lakɩ sakɩyɛ sɩ-alɩwaatʋ yɔɔ, nɛ ɛhaɣzɩɣ-ɖʋ tɔɔnaɣ nɛ eyeki se ɖa-laŋa isuni laŋhʋlʋmɩyɛ.
3. ÐA-LƖZƖYƲ HAƔ-ÐƲ TƆƆNAƔ NƐ WONDU KUSUSUTU
Cajanaa sakɩyɛ nɩɣzɩɣ ɛzɩma pala nɛ pehiɣ tɔɔnaɣ nɛ wondu kususutu nɛ pɔcɔnɩnɩ pɔ-hɔʋ taa mba kɩcɛyɩm ɖeɖe yɔ pɩ-yɔɔ. Yʋsɩ ndʋ Masɩ yɔɔdʋʋ yɔ: “Ɩcɔnɩ ɛsɔdaa sumasɩ camɩyɛ; siiɖuu ɖomaɣ yaa sɩɩkʋŋ yaa siisuu tɔɔnaɣ kpou taa, paa mbʋ yɔ mɩ-Caa weyi ɛwɛ ɛsɔdaa yɔ ɛcalɩɣ-sɩ. Ɩfɛyɩ wazaɣ nɛ pɩkpaɖɩ-sɩ yaa we?”—Maatiyee 6:25, 26.
“Ɩkpɛlɩkɩ lɔŋ hayɩm taa hɛtʋ cɔlɔ, ɩna ɛzɩma tɩpaɣlɩɣ yɔ . . . ; ɛlɛ meheyiɣ-mɩ se halɩ [Wiyaʋ] Salomɔɔ maɣmaɣ ɛ-samtʋ kpeekpe taa, ɛtɩcanɩ ɛ-tɩ ɛzɩ hɛtʋ ndʋ tɩ-taa kʋɖʋmʋʋ yɔ. Lɛɛlɛɛyɔ, ye Ɛsɔ ɛcanɩɣ hayɩm taa ñɩtʋ . . . , ɛɛkaɣ-mɩ wondu suu nɛ pɩkɩlɩ yaa we?”—Maatiyee 6:28-30.
Ɛsɔ pɩzɩɣ nɛ ɛha-ɖʋ tɔɔnaɣ nɛ wondu kususutu pʋyɔɔ lɛ, ɖɩɩpɩtɩɣ se ɛpɩzɩɣ ɖɔɖɔ nɛ ɛsɩnɩ-ɖʋ nɛ ɖihiɣ wondu lɛɛtʋ ndʋ tɩ-tɔm cɛyɩ ɖe-wezuu caɣʋ taa yɔ. Ye ɖɩñɩnɩɣ se ɖɩla Ɛsɔ sɔɔlɩm yɔ, ɛpɩzɩɣ nɛ ɛwazɩ tɔɔnaɣ ŋga ɖɩhayɩɣ yɔ kɔ-yɔɔ yaa ɛpɩzɩɣ nɛ ɛwazɩ-ɖʋ nɛ ɖihiɣ tʋmɩyɛ naɖɩyɛ nɛ ɖɩla nɛ ɖɩpɩzɩ ɖɩya wondu ndʋ tɩtɛɖɩɣ-ɖʋ yɔ.—Maatiyee 6:32, 33.
Alɩwaatʋ ndʋ ɖɩnaɣ wɩsɩ, tɛʋ, sumasɩ, nɛ tɩŋ hɛtʋ yɔ, toovenim taa lɛ, pɩmʋnaa kpem se ɖɩsɔɔlɩ Ɛsɔ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma Ɛsɔ yɔɔdɩnɩ ɛyaa yɔ pɩ-tɔm.
