Nabɛyɛ pɔzʋʋ pa-tɩ se ɛzɩ Ɛsɔtɔm tasɩ wɛʋ ti-ɖeɖe ɖeyi ɖeyi ɛzɩ pamaʋ-tʋ ɖooo kiɖe tɛɛ yɔ? Nayʋ Izaayii yɔɔdaa se Ɛsɔtɔm “wɛɣ tam.” (Izaayii 40:8) Ɛbɛ pɩzɩɣ pɩsɩnɩ-ɖʋ nɛ ɖa-taa tɛ se Ɛsɔ tamasɩ tɩlɛɣzɩ nɛ sɩwɛ ɖeyi ɖeyi ɛzɩ ɛlabʋ-sɩ ɖooo kiɖe tɛɛ yɔ?

Ɛsɔ wɛnɩ ɖoŋ se ɛkandɩyɩ ɛ-Tɔm yɔɔ nɛ tɔm lɛɛtʋ natʋyʋ ɛtaasɔzɩ tɩ-yɔɔ. Caanaʋ taa, ɛyaa mba paɖaɣnaɣ maʋ Masɩ Kiɖeɖesi taa tɔm nɛ nesi yɔ, pɛtɛŋ maʋ lɛ, paɖaɣnɩ sɩ-taa tɔm pee wiluu tete se pana se tɔm pee naayɛ sɔzaa, naayɛ lɛɣzaa, yaa pɔsɔ naayɛ yɔɔ. Paa mbʋ yɔ, ɛyʋ tɩtalɩ pilim, nɛ pʋyɔɔ lɛ piyiɣdi pa-taa nabɛyɛ pazɩ.

Caanaʋ taa takayɩsɩ kɩbɩnzɩ nzɩ sɩ-taa paɖaɣnɩ maʋ Masɩ Kiɖeɖesi taa tɔm nɛ nesi yɔ, sɩ-taa sakɩyɛ wɛ sɔnɔ. Ye pakpaɣ-sɩ nɛ pamaɣzɩnɩ ɖama tete yɔ, pɩwɛ kɛlɛʋ se patɩlɩ ɖenɖe picoɖaa yɔ. Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ “La Bible a-t-elle été modifiée ou falsifiée?” kɩwɛ jw.org yɔɔ.

Maɣzɩ caanaʋ taa takayɩsɩ nzɩ payaɣ se Teŋgu Kɩsɩbʋʋ taa takayɩsɩ yɔ sɩ-yɔɔ nɛ ŋna! Bedouin mba lɩnɩ sɩ-yɔɔ kaaŋ tɛɛ Teŋgu Kɩsɩbʋʋ cɔlɔ kpam pɩnaɣ 1947 taa. Takayɩsɩ kɩbɩnzɩ nzɩ sɩ-taa, pama Masɩ Kiɖeɖesi hɔɔlɩŋ nɩɩyɩ, nɛ pɩcɛzɩ pɩnzɩ kudokiŋ naalɛ yɔ pamaʋ-sɩ yɔ. Lɔŋsɩnɖaa nabɛyɛ kpaɣ takayɩsɩ kɩbɩnzɩ nzɩ sɩ-taa tɔm nɛ pamaɣzɩnɩ Masɩ Kiɖeɖesi nzɩ sɩwɛ sɔnɔ yɔ. Ɛbɛ yɔɔ palɩwa?

Bibl yɔɔ lɔŋsɩnɖaa ɖiɣzinaa se Ɛsɔtɔm ndʋ tɩwɛ Takayaɣ Kiɖeɖeɣa taa sɔnɔ yɔ tɩlabɩ nɔɔ kʋɖʋmaɣ ɖeyi ɖeyi nɛ ɖoo kiɖe tɛɛ ñɩndʋ. * Ye ɖiwili caanaʋ taa takayɩsɩ nzɩ paɖaɣnɩ maʋ nɛ nesi yɔ sɩ-taa tete yɔ, ɖiɖiɣziɣna se Ɛsɔtɔm ndʋ ɖɩkalɩɣ sɔnɔ yɔ, kʋɖʋmtʋ ndʋ tɩɩwɛnɩ ɖooo kiɖe tɛɛ. Ye mbʋ ɖa-taa pɩzɩɣ nɛ pɩtɛ se Ɛsɔ cɔnɩ pi-ɖeɖe camɩyɛ nɛ ɛkandɩyɩ Masɩ Kiɖeɖesi nzɩ ɖɩwɛnɩ sɔnɔ yɔ sɩ-yɔɔ.

Ye mbʋ ɖɩpɩzɩɣ nɛ ɖɩkalɩ Ɛsɔtɔm nɛ ɖɩtaa-tʋ liu kiya se tɔm lɛɛtʋ natʋyʋ tisidi tɩ-taa. Lɛɛlɛɛyɔ yele nɛ ɖɩna mbʋ ɖɩpɩzɩɣ nɛ ɖɩkpɛlɩkɩ Ɛsɔ yɔɔ pɩtɩŋnɩ nayaa yɔɔ yɔ.