1. Sɔnɔ, ɛbɛ Yehowa sɔɔlaa se pala?

 SƆNƆ, Ɛsɔ sɔɔlaa se posusi Kewiyaɣ tɔm kɩbandʋ tɛtʋ kpeekpe yɔɔ. (Mark. 13:10; 1 Tim. 2:3, 4) Pɩkɛ Yehowa tʋmɩyɛ nɛ ɖɩ-tɔm cɛyɩ kpem, pʋyɔɔ ɛlɩzɩ ɛ-Pɩyalʋ kʋsɔɔlʋ se ɛcɔnɩ ɖɩ-yɔɔ. Yesu ɖiyiɣni-ɖʋ; pʋyɔɔ lɛ, ɖa-taa pɩzɩɣ nɛ pɩtɛ se ɖɩkaɣ pɩzʋʋ nɛ ɖɩla tʋmɩyɛ nɖɩ ɛzɩ Yehowa sɔɔlʋʋ yɔ pʋcɔ nɛ ɛjaɖɛ tɛm talɩ.—Mat. 24:14.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Tɔm ñʋʋ kʋnɛ kɩ-taa, ɖɩkaɣ naʋ ɛzɩma Yesu wɛɛ nɛ ɛtɩŋɩɣnɩ “yom siɣsiɣ tʋ nɛ lɔŋsɩnɖʋ” yɔɔ nɛ ɛhaɣ fezuu taa tɔɔnaɣ ɛ-wayɩ tɩŋɩyaa nɛ ɛñɔɔzʋʋ-wɛ se pala tɔm susuu tʋmɩyɛ sɔsɔɖɛ nɖɩ yɔ. Tɔm susuu tʋmɩyɛ nɖɩ, wiɖiyi patɩlabɩtɩ-ɖɩ mbʋ ɛyaa wezuu caɣʋ taa. (Mat. 24:45). Ðɩkaɣ naʋ ɖɔɖɔ mbʋ ɖa-taa paa anɩ pɩzɩɣ ɛla nɛ ɛɖʋ nesi Yesu nɛ yom siɣsiɣ tʋ yɔ.

3. Ðoŋ weyi paha Yesu?

³ Yesu wɛɛ nɛ eɖiyiɣ tɔm susuu tʋmɩyɛ. Ɛbɛ yɔɔ ɖa-taa pɩzɩɣ nɛ pɩtɛmnɩ tɔm ndʋ? Alɩwaatʋ pazɩ pʋcɔ Yesu kpa ɛsɔdaa lɛ, ɛkatɩ ɛ-wayɩ tɩŋɩyaa siɣsiɣ tɩnaa taa nabɛyɛ Galilee pʋʋ nakʋyʋ yɔɔ. Eheyi-wɛ se: “Paha-m ɖoŋ tɩŋa ɛsɔdaa nɛ tataa.” Na tɔm ndʋ ɛyɔɔdɩ pʋwayɩ kpaagbaa yɔ. Ɛyɔɔdaa se:  “Pʋyɔɔ lɛ, iwolo nɛ ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa.” (Mat. 28:18, 19) Ye mbʋ, mbʋ paha Yesu ɖoŋ se ɛla yɔ, pɩ-taa nabʋyʋ lɛ se eɖiyi tɔm susuu tʋmɩyɛ.

4. Ɛbɛ yɔɔ ɖa-taa pɩzɩɣ nɛ pɩtɛ se Yesu wɛɛ nɛ eɖiyiɣ tɔm susuu tʋmɩyɛ halɩ nɛ sɔnɔ?

⁴ Yesu yɔɔdaa se ɛ-wayɩ tɩŋɩyaa kaɣ susuu tɔm nɛ pala kpɛlɩkɩyaa “ajɛɛ tɩŋa” taa, nɛ ɛyɔɔdaa ɖɔɖɔ se ɛkaɣ wɛʋ pɔ-cɔlɔ “kɩyakɩŋ tɩŋa nɛ pɩkɔɔ pɩtalɩ ɛjaɖɛ yɔɔ ɖʋtʋ tɛm alɩwaatʋ taa.” (Mat. 28:20) Tɔm ndʋ, tɩwɩlɩɣ kpayɩ kpayɩ se Yesu kaɣ wobu pɩ-yɔɔ nɛ eɖiyiɣ tɔm susuu tʋmɩyɛ pɩkɔɔ nɛ pɩtalɩ ɖa-kɩyakɩŋ ɛnɛ ɩ-taa.

5. Ɛzɩma ɖɩwɛɛ nɛ ɖɩɖʋʋ nesi se Keɣa 110:3 taa tɔm ɛla?

⁵ Yesu taanɩɣzɩɣ se ɛjaɖɛ tɛm alɩwaatʋ taa, tʋmlaɖaa ɩɩkaɣ ɖɔʋ. Ɛɛnawa se natʋ tɔm ndʋ keɣa maɖʋ kaayɔɔdaa yɔ tɩkaɣ labʋ. Tɩtɔŋ se: “Ña-samaɣ kaɣ ka-tɩ haʋ faaa, ñɔ-sɔɔjanaa you kɩyakʋ wiye.” (Keɣa 110:3; nwt) Ye ŋwɛɛ nɛ ŋsusuu tɔm kɩbandʋ yɔ, pʋbʋ ŋwɛɛ nɛ ŋɖʋʋ nesi Yesu nɛ yom siɣsiɣ tʋ, nɛ ŋwɛɛ nɛ ŋsɩɣna se natʋ ndʋ tɩla. Tʋmɩyɛ nɖɩ ɖɩwɛɛ nɛ ɖiwokini ɛsɩndaa, ɛlɛ ɖɩkatɩɣ kala.

6. Kala wena Kewiyaɣ tɔm susuyaa katɩɣ sɔnɔ yɔ, a-taa naɖɩyɛ lɛ nɖɩ?

⁶ Kala wena Kewiyaɣ tɔm susuyaa katɩɣ yɔ a-taa naɖɩyɛ lɛ se pakaɖɩɣnɩ-wɛ. Tisuu yebiyaa, Ɛsɔ sɛtʋ agbaa ñʋndɩnaa nɛ politiki laɖaa nabɛyɛ yeba nɛ ɛyaa sakɩyɛ wɛɛnɩ lɩmaɣza wena atɩtʋʋzɩ yɔ ɖa-tʋmɩyɛ yɔɔ. Ye ɖɔ-hɔʋ taa mba, ɖɛ-ɛyɩsɩmaa nɛ ɖa-tʋmɩyɛ taa taabalaa nabɛyɛ iyeba nɛ cɛtɩm tɔm ndʋ tipeɣzi-wɛ yɔ, papɩzɩɣ nɛ pañɩɣ ɖɔ-yɔɔ se ɖiyele Yehowa sɛʋ nɛ ɖiyele ɖɔɖɔ tɔm susuu. Ajɛɛ naayɛ taa lɛ, ɛzɩma pakaɖɩɣnɩ-ɖʋ yɔ pɩwɛ ndɩ ndɩ. Papɩzɩɣ nɛ paɖʋʋ koobiya sɔɔndʋ, yaa pakpaɣ-wɛ, nɛ halɩ nabʋyʋ taa paɖʋʋ-wɛ salaka. Lakasɩ nzɩ sɩɩɖɩɣzɩɣ-ɖʋ. Yesu kaayɔɔdaa se: “Ajɛɛ kpeekpe kaɣ-mɩ paɖʋʋ ma-hɩɖɛ yɔɔ.” (Mat. 24:9) Ɛzɩma ɛyaa wɛɛ nɛ papaɖɩɣ-ɖʋ mbʋ yɔ, pɩwɩlɩɣ se ɖɩwɛɛ nɛ ɖɩmaɣzɩɣnɩ Yesu kɩɖaʋ nɛ ɖɔ-tɔm kɛdɩɣnɩ Yehowa. (Mat. 5:11, 12) Eleeu seɣtiɣni ɛyaa nɛ pakaɖɩɣnɩ-ɖʋ. Ɛlɛ Yesu wɛ ɖoŋ siŋŋ nɛ pɩkpaɖɩ-ɩ. Yesu ɖoŋ taa lɛ, tɔm kɩbandʋ wɛɛ nɛ tɩtalɩɣ ajɛɛ kpeekpe taa ɛyaa. Iyele nɛ ɖɩna mbʋ pɩwɩlɩɣ se tɔm ndʋ tɩkɛ toovenim yɔ.

7. Ɛbɛ ŋnaɣ nɛ pɩwɩlɩɣ-ŋ kaɣlaa se Natʋ 14:6, 7 taa tɔm ɖiɣni labʋ?

⁷ Kaɖɛ lɛɛɖɛ nɖɩ ɖɩkatɩɣ yɔ nɖɩ yɔ: Ɛyaa mba ɖisusuu tɔm yɔ, ɖa nɛ pa-taa sakɩyɛ ɖɩɩyɔɔdʋʋ kʋnʋŋ kʋɖʋmʋʋ. Natʋ ndʋ Yesu wɩlɩ apostoloo Yohanɛɛsɩ yɔ tɩ-taa, ɛyɔɔdaa se ɖa-alɩwaatʋ tʋnɛ tɩ-taa, tɔm kɩbandʋ kaɣ wabʋ kaɖɛ nɖɩ. (Kalɩ Natʋ 14:6, 7.) Ɛzɩma tɩyɛ? Ðɩwɛɛ nɛ ɖɩñakɩ pana nɛ ɖɩhaɣ waɖɛ ɛyaa sakɩyɛ se petisi nɛ pamʋ Kewiyaɣ tɔm. Sɔnɔ, ɛjaɖɛ kpeekpe yɔɔ ɛyaa pɩzɩɣ nɛ pakalɩ wondu ndʋ patɩŋnɩ Bibl yɔɔ nɛ palɩzɩ nɛ paɖʋ-tʋ ɖɛ-tɛ intɛrnɛɛtɩ lone jw.org yɔɔ yɔ. Pɛɖɛzɩ wondu ndʋ kʋnʋmɩŋ weyi ɩ-taa yɔ, ɩcɛzɩ 1000! Nɔɔɖɛyaa Ɛgbɛyɛ ha nɔɔ se pɛɖɛzɩ Nɩɩ wezuu leleŋ tam! takayaɣ kʋnʋmɩŋ weyi ɩ-taa yɔ, ɩcɛzɩ 700; nɛ takayaɣ ŋga ɖɩkɩlɩɣ labɩnʋʋ tʋmɩyɛ lɛɛlɛɛyɔ nɛ ɖɩkpɛlɩkɩɣnɩ ɛyaa se papɩsɩ tɔmkpɛlɩkɩyaa. Pɩsa nɛ paha fezuu taa tɔɔnaɣ ndamaa nɛ yʋlʋmaa lɛ, palɩzɩɣ videowaa ndamaa kʋnʋŋ taa nɛ takayɩsɩ yʋlʋmaa kʋnʋŋ taa. Bibl taa natʋ tɔm ndɩ ndɩ ɖiɣni labʋ nɛ ɖɩnaɣ. “Ajɛɛ yɔɔdasɩ kpeekpe taa ɛyaa” ɖiɣni kpɛlɩkʋʋ se pɔyɔɔdɩ Bibl taa toovenim tɔm tɛ “kʋnʋŋ kele kele ñɩŋgʋ.” (Zak. 8:23; Sof. 3:9; nwt) Ðe-ɖiyiyu Yesu Krɩstʋ ɖoŋ taa ɖɩpɩzɩɣ nɛ ɖɩlakɩ pɩtɩŋa payɩ mbʋ yɔ.

8. Pɩkɔm nɛ pɩtalɩnɩ sɔnɔ yɔ, pee wena ɖɔ-tɔm susuu lʋlaa?

 ⁸ Sɔnɔ, ɛyaa mba pɛwɛ Yehowa ɛgbɛyɛ taa yɔ, pɛcɛzɩ miiliyɔɔwaa 8 nɛ pɛwɛ ajɛɛ 240 taa. Nɛ paa pɩnaɣ ŋga lɛ, ɛyaa kudokiŋ hiŋ sakɩyɛ haɣ pa-tɩ nɛ pamɩyɩsɩɣ-wɛ lɩm! Pɩwɛ ɖeu se ɛyaa sakɩyɛ wɛɛ nɛ pɔkɔŋ Yehowa ɛgbɛyɛ taa; ɛlɛ mbʋ pɩwɛ ɖeu nɛ pɩkɩlɩ yɔ lɛ se tɔmkpɛlɩkɩyaa kɩfama mba, pañaɣ pana nɛ pɛwɛɛnɩ Krɩstʋ mba wɛtʋ kɩbandʋ ndɩ ndɩ, pʋ-tɔbʋʋ se posu “ɛyʋtʋ kɩfatʋ.” (Kol. 3:8-10) Pa-taa sakɩyɛ yebi kʋzʋʋ kɩdɛkɛdʋ wezuu caɣʋ, puuyaɣ lakasɩ, lɩmaɣza kɩdɛkɛda wɛnʋʋ ɛyaa lalaa yɔ, nɛ peyebi maɣzʋʋ se ɛjaɖɛ nɖɩ ɖɩ-taa palɩnaa yɔ, ɖɩwɛ ɖeu nɛ pɩkɩlɩ ajɛɛ lɛɛna. Natʋ tɔm ndʋ tɩwɛ Izaayii 2:4 taa yɔ, tiɖiɣni labʋ. Tɩtɔŋ se: ‘Paatasɩɣ kpɛlɩkʋʋ you labʋ.’ Alɩwaatʋ ndʋ ɖɩñakɩ pana se ɖisuu ɛyʋtʋ kɩfatʋ yɔ, ɖɩsɩɣna se pɩhɔ ɛyaa nɛ pɩkɔnɩ Yehowa ɛgbɛyɛ taa, nɛ pɩwɩlɩɣ ɖɔɖɔ se ɖɩwɛɛ nɛ ɖɩtɩŋɩɣ ɖe-ɖiyiyu Krɩstʋ Yesu wayɩ. (Yoh. 13:35; 1 Pɩy. 2:12) Pɩ-taa nabʋyʋ ɛɛlakɩ pɩ-tɩ yɔɔ yem. Yesu wɛna nɛ ɛsɩɣnɩ-ɖʋ.

9. Ɛzɩ Maatiyee 24:45-47 yɔɔdʋʋ yɔ, tɔm ndʋ Yesu yɔɔdaa pɩlɩɩnɩ kɛdɛzaɣ alɩwaatʋ yɔɔ?

⁹ Kalɩ Maatiyee 24:45-47. Yesu kaayɔɔdaa se kɛdɛzaɣ alɩwaatʋ taa lɛ, ɛkaɣ lɩzʋʋ “yom siɣsiɣ tʋ nɛ lɔŋsɩnɖʋ” nɔɔyʋ nɛ ɛhaɣ fezuu taa tɔɔnaɣ. Ye mbʋ, pɩɩwɛɛ se ɖɩɖaŋ se yom ɛnʋ ɛkaɣ labʋ tʋmɩyɛ nɛ kpekpeka ɖa-alɩwaatʋ tʋnɛ tɩ-taa. Nɛ mbʋ pɩlaba. Yesu wɛɛ nɛ ɛtɩŋɩɣnɩ patam numwaa tindimiye cikpeɖe naɖɩyɛ yɔɔ nɛ ɛhaɣ Ɛsɔ samaɣ nɛ ɛyaa mba pɛwɛnɩ laŋa kɩbana yɔ fezuu taa “tɔɔnaɣ alɩwaatʋ ndʋ tɩmʋnaa yɔ tɩ-yɔɔ.” Abalaa mba, paamaɣzɩɣ se pɛwɛnɩ waɖɛ se pɔtɔɔ kewiyitu ɛyaa lalaa tisuu yɔɔ. (2 Kɔr. 1:24) Ɛlɛ, peɖiɣzinaa se Yesu kɛnɩ ɛ-samaɣ  “wiyaʋ nɛ cɩca” yaa ɖiyiyu nɛ ka-ñʋʋdʋ.—Iza. 55:4

10. Takayɩsɩ nzɩ ɖɩnaɣ fotonaa taa yɔ, sɩ-taa ŋga sɩnɩ-ŋ nɛ ŋpaɣzɩ Yehowa sɛʋ?

¹⁰ Kpaɣnɩ pɩnaɣ 1919 taa, yom siɣsiɣ tʋ ɛnʋ ɛlɩzɩ takayɩsɩ ndɩ ndɩ nɛ sɩha waɖɛ ɛyaa kɩfama mba pɛwɛnɩ laŋa kɩbana yɔ se pɛkpɛlɩkɩ Bibl taa toovenim tɔm kajalaɣ ɖeɖe. Pɩnaɣ 1921 taa, yom ɛnʋ ɛlɩzɩ takayaɣ ŋga payaɣ se La Harpe de Dieu yɔ se kasɩnɩ mba pɛkɛ laŋa kɩbana tɩnaa yɔ nɛ pɛkpɛlɩkɩ Bibl taa kajalaɣ wɩlɩtʋ. Alɩwaatʋ wɛɛ nɛ tɩlɛɣzɩɣ lɛ, ɛlɩzɩ takayɩsɩ lɛɛsɩ. Takayaɣ ŋga sɩnɩ-ŋ nɛ ŋtɩlɩ ɖa-Caa weyi ɛwɛ ɛsɔdaa yɔ nɛ ŋsɔɔlɩ-ɩ? “Que Dieu soit reconnu pour vrai!”; La vérité qui conduit à la vie éternelle; Vous pouvez vivre éternellement sur une terre qui deviendra un paradis; La connaissance qui mène à la vie éternelle; Tɔm ndʋ Bibl wɩlɩɣ toovenim taa?; Tɔm ndʋ Bibl wɩlɩɣ?, yaa Nɩɩ wezuu leleŋ tam! takayaɣ? Palɩzɩ takayɩsɩ nzɩ sɩtɩŋa se pɩsɩnɩ-ɖʋ nɛ ɖɩla kpɛlɩkɩyaa. Nɛ alɩwaatʋ ndʋ tɩ-taa palɩzɩ-sɩ yɔ, pɩɩkɛ mbʋ ɖeyi ɖeyi pɩpɔzaɣ-ɖʋ yɔ.

11. Ɛbɛ yɔɔ pɩcɛyaa se ɖa-tɩŋa ɖɩtɔkɩ fezuu taa tɔɔnaɣ?

¹¹ Ɛyaa kɩfama mba pɛwɛnɩ laŋa kɩbana yɔ, pɩtɩkɛ pe-ɖeke pɩpɔzʋʋ fezuu taa tɔɔnaɣ ŋga kɛwɛ yuŋ yɔ. Pɩpɔzʋʋ ɖa-tɩŋa tɔɔnaɣ ŋga. Apostoloo Pɔɔlɩ mawa se: “Ɛyaa mba papɩwa yɔ, mba tɩnɩ tɔɔnaɣ yuŋ ñɩŋga.” Pɔɔlɩ sɔzaa se ye ɖɩtɔkɩ fezuu taa tɔɔnaɣ yuŋ ñɩŋga ŋga yɔ, pɩkaɣ-ɖʋ sɩnʋʋ nɛ ‘ɖɩɖʋ tʋkaɣ kɩbam nɛ kɩdɛkɛdɩm pɛ-hɛkʋ taa.’ (Ebr. 5:14) Sɔnɔ, pɩpɩzɩɣ nɛ pɩwɛɛ kaɖɛ siŋŋ se ɖɩña Yehowa paɣtʋ nɛ ɛ-paɣtʋ kila mbʋ pʋyɔɔ yɔ, ɛyaa sakɩyɛ wezuu caɣʋ wɛɛkɩ siŋŋ. Ɛlɛ Yesu sɩɣnɩ-ɖʋ se ɖɩkpɛlɩkɩ tɔm ndʋ pɩpɔzʋʋ-ɖʋ yɔ nɛ pɩsa nɛ ɖe-tisuu wɛɛ ɖoŋ tam. Nɛ tɔm ndʋ, Ɛsɔtɔm Bibl taa tɩlɩɣna. Yesu ɖiyiɣ yom siɣsiɣ tʋ nɛ ɛlɛ ñɔɔzʋʋ fezuu taa tɔɔnaɣ ŋga nɛ ɛtayɩɣ-kɛ.

12. Ɛzɩ Yesu yɔ, ɛzɩma ɖɩwɩlaa se Ɛsɔ hɩɖɛ tɔm cɛyɩ ɖɛ-ɛsɩndaa?

 ¹² Ɛzɩ Yesu yɔ, ɖɩwɩlaa se Ɛsɔ hɩɖɛ tɔm cɛyɩ ɖɛ-ɛsɩndaa. (Yoh. 17:6, 26) Pɩnaɣ 1931 taa, ɖɩkpaɣ lɩmaɣzɩyɛ se papaɣzɩ-ɖʋ yaʋ se Yehowa Aseɣɖe Tɩnaa; nɛ hɩɖɛ nɖɩ ɖɩlɩnɩ Bibl taa. Ðɩtɩŋnɩ pɩ-yɔɔ nɛ ɖɩwɩlɩ se Ɛsɔ hɩɖɛ tɔm cɛyɩ ɖɛ-ɛsɩndaa, nɛ ɖɩsɔɔlaa se patɩlɩ-ɖʋ nɛ ɖa-Caa weyi ɛwɛ ɛsɔdaa yɔ ɛ-hɩɖɛ. (Iza. 43:10-12) Nɛ kpaɣnɩ octobre 1931 lɛ, paɖʋʋ Ɛsɔ hɩɖɛ paa Feŋuu Tilimiye takayaɣ ŋga lɛ ko-huyuu yɔɔ. Pɩtasɩ lɛ, Traduction du monde nouveau taa, papɩsɩnɩ Ɛsɔ hɩɖɛ lona wena a-taa ɖɩɩwɛ kiɖe tɛɛ yɔ. Ðɩwɛ ndɩ kpem nɛ coocinaa mba payaɣ pa-tɩ se Krɩstʋ ñɩma yɔ; mbʋ pʋyɔɔ yɔ, pahɩzɩ Ɛsɔ hɩɖɛ Yehowa Biblwaa mba pɛɖɛzaa yɔ pa-taa sakɩyɛ taa!

13. Sɔnɔ, ɛbɛ wɩlɩɣ kaɣlaa se Yesu wɛɛ nɛ ɛlakɩnɩ tʋmɩyɛ “yom siɣsiɣ tʋ nɛ lɔŋsɩnɖʋ”? (Yoh. 6:68)

¹³ Yesu tɩŋnɩ “yom siɣsiɣ tʋ nɛ lɔŋsɩnɖʋ” yɔɔ nɛ eyele nɛ ŋgee ɛgbɛyɛ naɖɩyɛ wɛɛ tɛtʋ yɔɔ nɛ ɖɩɖʋʋ nesi Ɛsɔ sɛtʋ kele kele ñɩndʋ. Lɩmaɣza wena ŋwɛnɩ ɛgbɛyɛ nɖɩ ɖɩ-yɔɔ? Pʋtɔma yɔ, ña-lɩmaɣza lakɩ nɔɔ kʋɖʋmaɣ nɛ apostoloo Pɩyɛɛrɩ ñɩna. Eheyi Yesu se: “A-cɔlɔ ɖiwoki? Ŋwɛnɩ tɔm ndʋ tɩhaɣ wezuu maatɛŋ yɔ.” (Yoh. 6:68) Ye ɖɩtaatɩlɩ Yehowa ɛgbɛyɛ yɔ, le ɖa-taa paa weyi kaawɛɛ? Krɩstʋ tɩŋɩɣnɩ ɖɩ-yɔɔ nɛ ɛcalɩɣ-ɖʋ fezuu taa camɩyɛ. Ɛfalɩsɩɣ-ɖʋ ɖɔɖɔ se ɖɩla tɔm susuu camɩyɛ. Pɩtasɩ lɛ, ɛsɩɣnɩ-ɖʋ se ɖisuu “ɛyʋtʋ kɩfatʋ” nɛ pɩsa nɛ ɖɔ-tɔm wɛɛ nɛ pɩkɛdɩɣnɩ Yehowa.—Efɛz. 4:24.

14. Ŋwɛʋ Yehowa ɛgbɛyɛ taa yɔ, ɛzɩma pɩwazɩ-ŋ COVID-19 kʋdɔŋ alɩwaatʋ taa?

¹⁴ Yesu tasɩɣ-ɖʋ lɔŋ kɩbaŋ kaɖɛ alɩwaatʋ taa. Alɩwaatʋ ndʋ COVID-19 kʋdɔŋ paɣzaa yɔ, ɖɩna ɛ-lɔŋ tasʋʋ mbʋ pɩ-wazaɣ kpayɩ kpayɩ. Alɩwaatʋ ndʋ tɩ-taa lɛ, ɛjaɖɛ yɔɔ  ɛyaa sakɩyɛ taatɩlɩ mbʋ pɩwɛɛ se pala yɔ; ɛlɛ Yesu yeba nɛ pawɩlɩɣ-ɖʋ mbʋ pɩwɛɛ se ɖɩla yɔ kpayɩ kpayɩ se pɩkandɩyɩ ɖe-wezuu yɔɔ. Peseɣti-ɖʋ se ɖihuuzuu ɖɔ-mɔɔŋ nɛ ɖɔ-nɔsɩ yɔɔ alɩwaatʋ ndʋ ɖɩwɛɣ samaɣ taa yɔ nɛ ɖiposuu ɖa-tɩ nɛ ɛyaa lalaa. Pɔtɔzɩ ɛgbɛyɛ taa ɛzʋtʋyaa se pɔpɔzʋʋ ɛgbɛyɛ taa mba tɩŋa yɔɔ ɖoŋ ɖoŋ nɛ pañɩnɩ ɖɔɖɔ nɛ patɩlɩ po-tomnaɣ yɔɔ nɛ pe-fezuu taa kɩcɛyɩm. (Iza. 32:1, 2) Pɩtasɩ lɛ, patɩŋnɩ Nɔɔɖɛyaa Ɛgbɛyɛ akɔntanaa yɔɔ nɛ patasɩ-ɖʋ lɔŋ nɛ pakpazɩ-ɖʋ ɖoŋ.

15. (a) COVID-19 kʋdɔŋ alɩwaatʋ taa, lɔŋ weyi patasɩ-ɖʋ pɩlɩɩnɩ kediɣzisi labʋ nɛ tɔm susuu yɔɔ? (b) Nɛ pee wena pɩlʋlaa?

¹⁵ COVID-19 kʋdɔŋ alɩwaatʋ taa patasɩ-ɖʋ ɖɔɖɔ lɔŋ pɩlɩɩnɩ ɛzɩma ɖɩlakɩ ɛgbɛyɛ taa kediɣzisi nɛ ɛzɩma ɖisusuu tɔm yɔ pɩ-yɔɔ. Kʋdɔŋ paɣzaa nɛ pitileɖi lɛ, ɖɩpaɣzɩ tɩŋnʋʋ vidéoconférence yɔɔ nɛ ɖɩlakɩ ɛgbɛyɛ taa kediɣzisi, kigbeɣliŋ cikpeŋ nɛ kigbeɣliŋ sɔsɔŋ. Pɩtasɩ lɛ, ɖɩpaɣzɩ tɩŋnʋʋ takayɩsɩ maʋ nɛ kaŋgalaafu yɔɔ nɛ pɩkɩlɩ nɛ ɖisusuu tɔm. Yehowa wazɩ ɖa-pana ñaɣʋ yɔɔ. Ɛgbɛyɛ pilinzi sakɩyɛ kɛdaa se tɔm susuyaa huwaa. Toovenim taa lɛ, koobiya sakɩyɛ kɛdɩ pee kɩbana wena pɔ-tɔm susuu lʋlɩ alɩwaatʋ ndʋ tɩ-taa yɔɔ a-tɔm nɛ pɩkpazɩɣ ɛyʋ ɖoŋ.—Kalɩ aɖakaɣ “ Yehowa wɛɛ nɛ ɛwazɩɣ ɖɔ-tɔm susuu.”

16. Tɔm ndʋ ɖa-taa pɩzɩɣ nɛ pɩtɛmna?

¹⁶ Nabɛyɛ pɩzɩɣ nɛ pamaɣzɩ se lɔŋ weyi ɛgbɛyɛ tasaɣ pɩlɩɩnɩ kʋdɔŋ kɩɖɛɖɛʋ ŋgʋ kɩ-yɔɔ yɔ, ɖɩɖɛlɛsaɣ niye. Ɛlɛ tam sakɩyɛ lɛ, ɖɩkɔm nɛ ɖɩna kpayɩ kpayɩ se lɔŋ tasʋʋ mbʋ pɩɩkɛ lɔŋ tasʋʋ kɩbam. Nɛ alɩwaatʋ ndʋ ɖɩmaɣzɩɣ ɛzɩma Yesu wɛɛ nɛ eɖiyiɣ ɛ-samaɣ nɛ sɔɔlɩm yɔ pɩ-yɔɔ yɔ, ɖa-taa tɛŋ se paa ɛbɛ ɛkaɣ labʋ cee wayɩ yɔ, Yehowa nɛ ɛ-Pɩyalʋ kʋsɔɔlʋ pakaɣ wɛʋ ɖɔ-cɔlɔ.—Kalɩ Ebree mba 13:5, 6.

17. Ɛzɩma Yesu ɖiyiɣni-ŋ yɔ, lɩmaɣza wena ŋwɛnɩ pɩ-yɔɔ?

¹⁷ Ða-taa wɛ leleŋ kpem se Yesu kɛnɩ ɖe-ɖiyiyu. Ðɩwɛ ɛgbɛyɛ nɖɩ ɖɩ-taa yɔ sɔnzɩ, ajɛɛ nɛ kʋnʋmɩŋ ndɩ ndɩ tiyele nɛ ɖɩ-taa tayɩ. Pacalɩɣ-ɖʋ camɩyɛ fezuu taa nɛ ɖɩmʋʋ ɖɔɖɔ falɩsʋʋ mbʋ pɩpɔzʋʋ-ɖʋ se ɖɩpɩzɩ nɛ ɖɩla tɔm susuu tʋmɩyɛ yɔ. Pɛwɛɛ nɛ pasɩɣnɩ ɖa-taa paa anɩ se esuu ɛyʋtʋ kɩfatʋ, nɛ ɖɩwɛɛ nɛ ɖɩkpɛlɩkɩɣ ɖɔɖɔ ɛzɩma ɖɩsɔɔlɩ ɖama yɔ. Ðɩwɛnɩ lɩmaɣza kɩbana wena a-yɔɔ pɩwɛɛ se ɖɩkʋndɩ se Yesu kɛnɩ ɖe-ɖiyiyu yɔ!