1. Ɛsɔ lɩzɩ-ɖʋ ɛ-lɛzʋʋ, pʋyɔɔ lɛ waɖɛ nɖɩ ɖɩwɛna?

 “HAƔ ɛɛlʋlʋʋ pʋnʋ.” Eduuye ɖɩnɛ ɖɩlɩɣ ɛyaa nɔsɩ taa ɖoŋ ɖoŋ. Toovenim taa lɛ, piya sakɩyɛ lɩɣ sɩ-lʋlɩyaa kpem. Pɩtɩkɛ piti tɔm, mbʋ pʋyɔɔ yɔ caja nɛ ɖoyo pa-calɩm kpɛndɩɣna nɛ pɩla pɩɣa. Yehowa, ɖa-Caa weyi ɛwɛ ɛsɔdaa yɔ, ɛnʋ haɣnɩ wezuu. (Keɣa 35:10) Nɛ ɖa mba ɖɩkɛ e-piya tɛtʋ yɔɔ yɔ, ɖɩkpaɣ ɛ-wɛtʋ hɔɔlɩŋ nɩɩyɩ taa. Ɛlɩzɩ-ɖʋ ɛ-lɛzʋʋ, pʋyɔɔ lɛ ɖɩpɩzɩɣ nɛ ɖɩmaɣzɩɣ, ɖɩkpakɩɣ lɩmaɣza nɛ ɖɩɖʋʋ taabalɩyɛ.—Kiɖe 1:26.

2. Ɛbɛ kɛ ɖa nɛ Yehowa ɖa-taabalɩyɛ tigiɖe?

² Yehowa pɩzɩɣ nɛ ɛkɛ ɖa-Taabalʋ sɔsɔ. Taabalɩyɛ nɖɩ, ɖi-tigiɖe lɛ sɔɔlɩm mbʋ Yehowa wɩlɩ-ɖʋ yɔ, nɛ tisuu mbʋ ɖɩwɛnɩ ɛ nɛ ɛ-Pɩyalʋ pɔ-yɔɔ yɔ. Yesu tɔm se: “Ɛsɔ sɔɔlɩ ɛjaɖɛ pɩŋŋ nɛ ɛcɛlɩ-ɖɩ ɛ-Pɩyalʋ ɛgbamɩyɛ se weyi etisiɣ ɛ-yɔɔ lɛ, etaale, ɛlɛ ehiɣ tamtam wezuu.” (Yoh. 3:16) Kɩɖaŋ wɛɛ nɛ ɩwɩlɩɣ se ɛyaa sakɩyɛ kaakɛ Ɛsɔ taabalaa kɩbama. Iyele nɛ ɖɩyɔɔdɩ ɛyaa mba, pa-taa naalɛ tɔm.

3, 4. Taabalɩyɛ ɖʋʋ hɔɔlʋʋ taa lɛ, tʋkaɣ ŋga wɛ Abraham nɛ e-liɖe taa mba pɛ-hɛkʋ taa?

³ Yehowa kaaya Izrayɛɛlɩ piya cɔzɔ Abraham se “mɛ-ɛgbaɣdʋ.” (Iz. 41:8) Paya Abraham 4 Awiya 20:7 taa ɖɔɖɔ se  Ɛsɔ ɛgbaɣdʋ. Ɛbɛ yeba nɛ taabalɩyɛ kɩbanɖɛ wɛɛ Abraham nɛ ɛ-Lɩzɩyʋ pɛ-hɛkʋ taa? Abraham tisuu yɔɔ.—Kiɖe 15:6; kalɩ Yakubu 2:21-23.

⁴ Abraham liɖe taa mba pɩsɩnɩ caanaʋ taa Izrayɛɛlɩ ɛjaɖɛ. Nɛ kiɖe tɛɛ lɛ, Yehowa kaakɛ pa-Caa nɛ pa-Taabalʋ. Ɛlɛ pʋtɔdɩyɛ tɔm, Izrayɛɛlɩ piya kɔm nɛ silesi taabalɩyɛ nɖɩ. Ɛbɛ yɔɔ? Mbʋ pʋyɔɔ yɔ, sɩtaatasɩ wɛnʋʋ tisuu Yehowa lidaʋ tɔm yɔɔ.

5, 6. (a) Ɛzɩma ŋlaba nɛ Yehowa pɩsɩ ña-taabalʋ? (b) Tɔm ndʋ pɩwɛɛ se ɖɩpɔzɩ ɖa-tɩ?

⁵ Ye ŋñakɩ pana se ŋtɩlɩ Yehowa nɛ pɩkɩlɩ yɔ, ñe-tisuu kpaɣ ɖoŋ nɛ ŋsɔɔlɩ-ɩ nɛ pɩkɩlɩ. Maɣzɩ alɩwaatʋ ndʋ ŋkpɛlɩkaa nɛ ŋtɩlɩ se toovenim lɛ, Ɛsɔ wɛɛ yɔ nɛ ña nɛ ɩ ɩpɩzɩɣ nɛ ɩɖʋ taabalɩyɛ yɔ, tɩ-yɔɔ nɛ ŋna. Ŋkpɛlɩkaa ɖɔɖɔ se Aɖam kaañamtʋ yɔɔ lɛ palʋlɩ ɖa-tɩŋa payɩ kɩdɛkɛdɩm taa. Ŋkɔɔ nɛ ŋnɩɩ pɩ-taa se ɛyaa posi pa-tɩ nɛ Ɛsɔ. (Kol. 1:21) Ɛlɛ ŋkɔɔ nɛ ŋɖiɣzina se ɖa-Caa kʋsɔɔlʋ weyi ɛwɛ ɛsɔdaa yɔ, etiposini-ɖʋ nɛ ɖɩpɩzɩɣ ɖɩñɔtɩnɩ-ɩ. Ŋtɩlaa ɖɔɖɔ se ɛmaɣzɩɣ ɖɔ-yɔɔ. Ye mbʋ, alɩwaatʋ ndʋ ɖɩkpɛlɩkɩ Yesu Krɩstʋ kɩhɛyʋʋ pʋ-ñʋʋ taa kɩlaʋ tɔm nɛ ɖitisi tɩ-yɔɔ yɔ, ɖa nɛ Ɛsɔ ɖɩpaɣzɩ taabalɩyɛ ɖʋʋ kɛlɛ.

⁶ Ðɩɩmaɣzɩɣ mbʋ pɩɖɛwa yɔ pɩ-yɔɔ lɛ, pɩwɛɣ ɖeu se ɖɩpɔzɩ ɖa-tɩ tɔm tʋnɛ: ‘Ma nɛ Ɛsɔ ɖa-taabalɩyɛ wɛɛ nɛ ɖɩcɛyɩsɩɣ na? Sɔɔlɩm mbʋ mɔnsɔɔlɩnɩ Yehowa nɛ ɛzɩma mantaɣ-ɩ liu yɔ pɩwɛɛ nɛ pɩpaɣlɩɣ paa ɖooye?’ Caanaʋ taa ɛyʋ lɛlʋ weyi ɛ nɛ Yehowa paaɖʋ taabalɩyɛ ɖɔɖɔ yɔ, ɛnʋ lɛ Gideyɔɔ. Iyele nɛ ɖɩtazɩ ɛ-kɩɖaʋ taa nɛ ɖɩpɩzɩ ɖɩmaɣzɩnɩ-ɩ.

7-9. (a) Ɛbɛ labɩ Gideyɔɔ wezuu caɣʋ taa kɩyakʋ nakʋyʋ? (b) Nɛ ɛbɛ pɩtɛmnaa? (Cɔnɩ kiɖe tɛɛ kɩlɛmʋʋ.) (c) Ɛbɛ pɩzɩɣ pɩsɩnɩ-ɖʋ nɛ taabalɩyɛ wɛɛ ɖa nɛ Yehowa ɖɛ-hɛkʋ taa?

⁷ Tɔm hʋyʋ Gideyɔɔ kaakɛ Yehowa sɛyʋ alɩwaatʋ kaɖɛ ñɩndʋ natʋyʋ taa. Alɩwaatʋ ndʋ tɩ-taa Izrayɛɛlɩ piya kaatɛm sʋʋ Kanaŋ ɛjaɖɛ taa. Tɔm hʋyaa takayaɣ ñʋʋ 6 kɛdaa se Yehowa tiyiyu wobi Gideyɔɔ cɔlɔ Ofra. Pʋbʋ taa lɛ, Madiiyaŋ mba nazaɣ Izrayɛɛlɩ piya pɩfɛyɩ yɔɔdʋʋ. Pʋyɔɔ Gideyɔɔ mɛlɩ pɩlʋʋ nakʋyʋ taa nɛ ɛmakɩ blee. Ɛtaamakɩ-kʋ kadaɣ taa yem se paa weyi ɛna-ɩ. Ɛlakaɣ mbʋ se ye Madiiyaŋ mba ɩkɔŋ yɔ, ɛmɛsɩ blee ŋgʋ lɛɛ lɛɛ. Alɩwaatʋ ndʋ Ɛsɔ tiyiyu lɩ Gideyɔɔ yɔɔ nɛ ɛyaa-ɩ se “you laɖʋ sɔdʋʋ” lɛ, pɩlabɩ-ɩ piti. Peeɖe ɛpɔzɩ Ɛsɔ tiyiyu ɛnʋ se Yehowa weyi eeholi Izrayɛɛlɩ piya Egipiti yɔ, ɛkaɣ-wɛ sɩnʋʋ toovenim taa? Ɛsɔ tiyiyu hɛzɩ Gideyɔɔ laŋɩyɛ nɛ eheyi-i se toovenim lɛ, Yehowa kaɣ-ɩ sɩnʋʋ.

⁸ Gideyɔɔ tasɩ pɔzʋʋ se ɛzɩma ɛnʋ kaɣ pɩzʋʋ nɛ eholi Izrayɛɛlɩ piya “Madiiyaŋ mba nesi tɛɛ.” Yehowa cosi-i kpayɩ se: “Mankaɣ wɛʋ ñɔ-cɔlɔ, nɛ ŋkaɣ wabʋ Madiiyaŋ mba, ɛzɩ ɛyʋ kʋyʋm koŋ yɔ.” (Th. 6:11-16) Pɩtʋʋ fɛyɩ se Gideyɔɔ kaawɛɛ ɛmaɣzɩɣ se ɛna ɛzɩma tɔm ndʋ tɩkaɣ labʋ yɔ, nɛ pʋyɔɔ lɛ ɛñɩnaɣ se pawɩlɩ-ɩ yʋsaɣ nakɛyɛ. Kɛdaɣ kanɛ kawɩlɩɣ kaɣlaa se Gideyɔɔ kpaɣ Yehowa ɛzɩ ɛyʋ maɣmaɣ yɔ.

⁹ Mbʋ pɩlabɩ pʋwayɩ yɔ, pɩkpazɩ Gideyɔɔ tisuu ɖoŋ nɛ piyele nɛ ɛñɔtɩnɩ Ɛsɔ nɛ pɩkɩlɩ. Gideyɔɔ labɩ tɔɔnaɣ nɛ ɛɖʋ Ɛsɔ tiyiyu. Tiyiyu tukuni tɔɔnaɣ ŋga nɛ ɛ-ɖaʋ, nɛ miŋ lɩɩ nɛ ɩñaɣ-kɛ. Peeɖe Gideyɔɔ nawa se toovenim lɛ, Yehowa tiyini tiyiyu ɛnʋ. Sɔɔndʋ kpa-ɩ nɛ ɛma kubuka se: “Meleba, mbʋ yɔ ma nɛ [Yehowa] ɖɛ-ɛza ɖʋ ɖama taa.” (Th. 6:17-22) Ɛzɩma Gideyɔɔ na Ɛsɔ tiyiyu yɔ, piyeba se ɛ nɛ Ɛsɔ pa-taabalɩyɛ ɛcɛ yaa we? Aayɩ; halɩ pa-taabalɩyɛ cɛyɩsɩ kɩcɛyɩsʋ. Piyeba nɛ Gideyɔɔ tɩlɩ Yehowa camɩyɛ nɛ laŋhɛzɩyɛ wɛɛ ɛ nɛ ɩ pɛ-hɛkʋ taa. Pʋyɔɔ Gideyɔɔ ma altaaru nakʋyʋ lone nɖɩ ɖɩ-taa nɛ ɛha-kʋ hɩɖɛ se “[Yehowa] kɛ laŋhɛzɩyɛ.” (Kalɩ Tɔm Hʋyaa 6:23, 24.) Ye ɖɩmaɣzɩɣ mbʋ Yehowa lakɩ-ɖʋ paa evemiye nɖɩ yɔ pɩ-yɔɔ yɔ, ɖɩkaɣ naʋ se ɛkɛ  Taabalʋ kɩbanʋ. Ye ɖɩñɔtʋʋnɩ Ɛsɔ adɩma taa paa ɛzɩmtaa yɔ, ɖɩwɛɣ laŋhɛzɩyɛ taa nɛ pɩkpaɖɩ nɛ ɖa nɛ ɩ ɖa-taabalɩyɛ cɛyɩsɩɣ nɛ pɩkɩlɩ.

10. Ɛzɩ pɔyɔɔdʋʋ Keɣa 14:3, 5 taa yɔ, ɛbɛ Yehowa sɔɔlaa se ɖɩla nɛ pʋcɔ nɛ ɖɩkɛ ɛ-taabalaa?

¹⁰ Ɛlɛ pʋcɔ nɛ Yehowa kɛ ɖa-Taabalʋ lɛ, pɩpɔzʋʋ se ɖɩla nabʋyʋ. Keɣa 14 taa, Daviid te hendu nɛ ɛyɔɔdɩ mbʋ pɩpɔzʋʋ-ɖʋ se ɖɩla nɛ pʋcɔ nɛ ‘ɖɩsʋʋ Yehowa cokiye tɛɛ’ yaa ɖɩkɛ ɛ-taabalaa yɔ. (Keɣa 14:1) Iyele nɛ ɖɩtazɩ mbʋ pɩwɛɛ se ɖɩla yɔ, pɩ-taa naalɛ taa: Ðɩtaakɛ kɔlɔmɔtʋ tɩnaa, ɖɩwɛɛ toovenim pɩtɩŋa pɩ-taa. Pʋyɔɔ Daviid yɔɔdaa se weyi ɛpɩzɩɣ nɛ ɛsʋʋ Yehowa cokiye tɛɛ yɔ, “ɛ-nɔɔ taa ɛɛlɩɣ lɛlʋ ndʋ. . . Ɛtɩsɔɔlɩ mbʋ pɩɖʋzʋʋ ɛjam yɔ.”—Keɣa 14:3, 5.

11. Ɛbɛ yɔɔ pɩfɛyɩ ɖeu se ɖɩla kɔlɔmɔtʋ?

¹¹ Daviid paɣ-ɖʋ Keɣa lɛɛka taa se: “Kpa ña-nzʋlʋmɩyɛ nɛ kɩdɛkɛdɩm.” (Keɣa 33:14) Ye ɖikizaa se ɖɩɩkpakɩɣ lɔŋ kɩbaŋ ɛnɩ nɛ ɖɩlabɩnɩ tʋmɩyɛ yɔ, pɩkaɣ yebu nɛ ɖa nɛ Yehowa ɖa-taabalɩyɛ wɛɛkɩ. Toovenim taa lɛ, kɔlɔmɔtʋ kɛ Yehowa koyindu sɔsɔ Sataŋ tɛ wɛtʋ natʋyʋ. Hela tɔm piye nɖɩ pɛɖɛzɩ-ɖɩ se “Yiliyu” yɔ, ɖɩ-tɔbʋʋ lɛ se “kɔlɔmɔtʋ tʋ.” Ye ɖɩcɔŋnɩ ɖa-nzʋlʋmɩyɛ yɔɔ camɩyɛ alɩwaatʋ ndʋ ɖɩyɔɔdʋʋ lalaa tɔm yɔ yɔ, piyeki nɛ ɖa nɛ Yehowa ɖa-taabalɩyɛ cɛyɩsɩ. Kɔzɩ kɔzɩ lɛ, ɛyaa mba Yehowa lɩzaa se pɔcɔnɩ ɛ-ɛgbɛyɛ yɔɔ yɔ, pɩwɛɛ se ɖɩkpa ɖa-tɩ nɛ tɔm ndʋ ɖɩyɔɔdʋʋ pɔ-yɔɔ yɔ.—Kalɩ Ebree 13:17; Yuudi 8.

12, 13. (a) Ɛbɛ yɔɔ pɩwɛɛ se ɖɩwɛɛ toovenim pɩtɩŋa pɩ-taa? (b) Ɛzɩma tɩyɛ ɖo-toovenim wɛʋ pɩzɩɣ nɛ pitukuni ɛyaa lalaa?

¹² Pasɩm Yehowa sɛyaa se pɛwɛ toovenim nɛ paamuluu nɔɔyʋ. Apostoloo Pɔɔlɩ mawa se: “Ɩtɩmnɩ Ɛsɔ ɖɔ-yɔɔ, mbʋ pʋyɔɔ yɔ ɖɩmaɣzɩɣ se ɖɩwɛnɩ laŋɩyɛ kɩbanɖɛ, ɖɩtɛm ɖa-taa se ɖɩɖɔ ɖɔnɛ kɩbanɖɛ pɩtɩŋa pɩ-taa.” (Ebr. 13:18) Ɛzɩma ɖɩtɛm ɖa-taa se ɖɩwɛɛ toovenim “pɩtɩŋa pɩ-taa” yɔ pʋyɔɔ lɛ, ɖiimuluu ɖo-koobiya Krɩstʋ mba. Ðɩkpaɣ kɩɖaʋ kʋnɛ: Ye koobiya nabɛyɛ ɩlakɩ-ɖʋ tʋmɩyɛ se ɖɩhɛyɩ-wɛ yɔ, pɩwɛɛ se ɖɩcɔnɩ pɔ-yɔɔ camɩyɛ nɛ ɖɩhɛyɩ-wɛ pe-liidiye ɛzɩ ɖa nɛ wɛ ɖɩnɩnʋʋ ɖama kiɖe tɛɛ yɔ. Ðɩkɛ Krɩstʋ mba, ye mbʋ pɩwɛɛ se ɖɩwɛɛ toovenim nɛ ɖa-tʋmlaɖaa nɛ ɛyaa tɩŋa. Ye ɖɩlakɩ tʋmɩyɛ koobu nɔɔyʋ cɔlɔ se ɛhɛyɩ-ɖʋ yɔ, pɩwɛɛ se ɖɩkpa ɖa-tɩ nɛ ɖɩtaapɔzɩ-ɩ se ɛcɔnɩ ɖɔ-yɔɔ camɩyɛ nɛ pɩkɩlɩ lalaa.

¹³ Ðoŋ ɖoŋ lɛ, ɛjaɖɛ yɔɔ ñɩma mba pa nɛ Yehowa Aseɣɖe Tɩnaa palakɩ tʋmɩyɛ yɔ, pasaŋ-wɛ pɩdɩɩfɛyɩ. Tʋmɩyɛ sɔsɔɖɛ naɖɩyɛ ñʋʋdʋ na ɛzɩma Yehowa Aseɣɖe Tɩnaa cakɩ pɔ-tɔm yɔɔ yɔ lɛ, ɛyɔɔdɩ se: “Paa ɛzɩmtaa lɛ, ɩñɔʋnɩ ndʋ ɩyɔɔdʋʋ yɔ kpam.” (Keɣa 14:4) Wɛtʋ ndʋ, tɩsɩɣnɩ-ɖʋ se ɖɩkandɩyɩ ɖa nɛ Yehowa ɖa-taabalɩyɛ yɔɔ kpam. Pɩtasɩ lɛ, pɩɖʋʋ hɩɖɛ ɖa-Caa kʋsɔɔlʋ weyi ɛwɛ ɛsɔdaa yɔ.

14, 15. Ɛzɩma ɖɩpɩzɩɣ nɛ ɖɩsɩnɩ lalaa nɛ papɩsɩ Yehowa taabalaa ɖɔ-tɔm susuu taa?

¹⁴ Paa ɛyaa mba ɖɩkatɩɣ ɖɔ-tɔm susuu taa yɔ petisiɣ se Ɛsɔ wɛɛ yɔ, pa-taa sakɩyɛ ɩɩmaɣzɩɣ se Ɛsɔ pɩzɩɣ nɛ ɛkɛ pa-Taabalʋ sɔsɔ. Ɛzɩma ɖɩpɩzɩɣ nɛ ɖɩsɩnɩ-wɛ? Maɣzɩ tɔm ndʋ Yesu heyi ɛ-tɔmkpɛlɩkɩyaa 70, alɩwaatʋ ndʋ etiyi-wɛ naalɛ naalɛ se posusi tɔm yɔ, tɩ-yɔɔ nɛ ŋna. Eheyi-wɛ se: “Ɩsʋ ɖɩɣa ŋga ka-taa lɛ, ɩcalɩnɩ ka-taa mba sɛʋ se: ‘Mɩ nɛ laŋhɛzɩyɛ.’ Ye laŋhɛzɩyɛ tʋ nɔɔyʋ ɛwɛ ka-taa kɔyɔ, mɩ-laŋhɛzɩyɛ caɣ ɛ-yɔɔ, ye nɔɔyʋ ɛfɛyɩ kɔyɔ, mɩ-laŋhɛzɩyɛ pɩsɩɣ mɩ-yɔɔ.” (Luka 10:5, 6) Ye ɖɩkpakɩɣnɩ ɛyaa hɛɛɛ ɛzɩ taabalaa yɔ, ɖɩpɩzɩɣ nɛ ɖɩhɔm-wɛ nɛ pɔkɔɔ toovenim taa. Ye ɖɩlakɩ mbʋ yɔ, pɩpɩzɩɣ nɛ pɩhɛzɩ  mba pakaɖɩɣnɩ ɖɔ-tɔm yɔ pa-pana, nɛ pamʋ-ɖʋ camɩyɛ alɩwaatʋ lɛɛtʋ taa.

¹⁵ Alɩwaatʋ ndʋ ɖɩkatɩɣ ɛyaa mba pakam lila cɛtɩm Ɛsɔ sɛtʋ taa yaa mba palakɩ sɔnzɩ nzɩ sɩkaɖɩɣnɩ Bibl paɣtʋ yɔ, pɩwɛɛ se ɖiwolo pɩ-yɔɔ nɛ ɖɩkpaɣnɩ-wɛ hɛɛɛ ɛzɩ taabalaa yɔ. Ɛyaa mba patɩsɔɔlɩ ɛjaɖɛ ɖɩnɛ ɖɩ-lakasɩ kɩdɛkɛdɩsɩ nɛ pañɩnɩɣ se patɩlɩ ɖɛ-Ɛsɔ camɩyɛ yɔ, ɖɩmʋʋ-wɛ nɛ nesi naalɛ ɖe-kediɣzisi taa. Kɩɖaŋ kɩbaŋ sakɩyɛ wɛ tɔm ñʋʋ ŋgʋ pamaɣ ɖoŋ ɖoŋ Feŋuu Tilimiye taa nɛ payaɣ-kʋ se “La Bible transforme des vies” yɔ, kɩ-taa.

16. Ɛbɛ yɔɔ papɩzɩɣ nɛ pɔtɔ se ɖɩkɛ Yehowa taabalaa nɛ ‘ɛ-sɩnɩyaa’?

¹⁶ Ɛyaa mba paɖʋʋ ɛgbɛyɛ nɛ palakɩ tʋmɩyɛ yɔ, ɖoŋ ɖoŋ lɛ taabalɩyɛ kɩbanɖɛ wɛɣ pɛ-hɛkʋ taa. Mba payɩ paha pa-tɩ Yehowa yɔ patɩkɛ ɛ-taabalaa yem na, ɛlɛ pɛkɛ ɖɔɖɔ “Ɛsɔ sɩnɩyaa.” (Kalɩ 1 Kɔrɛntɩ 3:9.) Toovenim lɛ, alɩwaatʋ ndʋ ɖiwoki pɩ-yɔɔ nɛ ɖisusuu tɔm nɛ ɖɩlakɩ kpɛlɩkɩyaa yɔ, pɩsɩɣnɩ-ɖʋ se ɖɩtɩlɩ ɖa-Caa weyi ɛwɛ ɛsɔdaa yɔ ɛ-wɛtʋ kɩbandʋ nɛ pɩkɩlɩ. Ðɩnaɣ ɖɔɖɔ ɛzɩma e-fezuu kiɖeɖeu sɩɣnɩ-ɖʋ se ɖɩpɩzɩ nɛ ɖɩla laŋhɛzɩyɛ tɔm susuu tʋmɩyɛ nɖɩ yɔ.

17. Fezuu taa tɔɔnaɣ ŋga ɖɩmʋʋ kigbeɣliŋ taa yɔ, ɛzɩma kawɩlɩɣ se Yehowa kɛ ɖa-Taabalʋ?

¹⁷ Ye ɖisusuu tɔm sakɩyɛ yɔ, pɩkaɣ-ɖʋ sɩnʋʋ se ɖɩñɔtɩnɩ Yehowa nɛ pɩkɩlɩ. Ðɩkaɣ naʋ ɛzɩma Yehowa ɖʋʋ ɖo-koyindinaa fɛyɛ yɔ. Maɣzɩ mbʋ pɩlabɩ pɩnzɩ nzɩ sɩɖɛwa yɔ sɩ-taa yɔ, pɩ-yɔɔ nɛ ŋna. Mbʋ pɩlaba yɔ pɩwɩlɩɣ kaɣlaa se Yehowa wɩlɩɣnɩ-ɖʋ nʋmɔʋ. Ða-taa wɛ leleŋ pɩdɩɩfɛyɩ se ɛwɛɛ nɛ ɛhaɣ-ɖʋ fezuu taa tɔɔnaɣ kɩbaŋa kaahɛzaɣ. Tɔm ndʋ pawɩlɩɣ-ɖʋ kigbeɣliŋ taa yɔ, tɩwɩlɩɣ se ɖa-Caa kʋsɔɔlʋ Yehowa sɩm ɖa-tɩlasɩ nɛ ɖa-kɩcɛyɩm camɩyɛ. Palabɩ kigbeɣluu nakʋyʋ nɛ pɩtɛ lɛ, hɔʋ nakʋyʋ ma takayaɣ nɛ kɩyɔɔdɩ se: “Tɔm ndʋ ɖɩnɩwa yɔ, titukuni ɖa-laŋa siŋŋ. Ðɩpɩzaa nɛ ɖɩna ɛzɩma Yehowa sɔɔlɩ ɖa-taa paa anɩ nɛ ɛñɩnɩɣ se piɖeni-ɖʋ yɔ.” Caama halʋ nɔɔyʋ nɛ ɛ-walʋ palɩnɩ ŋgee kigbeɣluu nakʋyʋ nɛ pɔkɔɔ lɛ, pɛkɛdɩnɩ ɛsɩmɩyɛ ɛzɩma pamʋ-wɛ camɩyɛ nɛ pɔcɔnɩ pɔ-yɔɔ yɔ nɛ pɛtɛzɩna se: “Yehowa nɛ Wiyaʋ Yesu Krɩstʋ ɖɩcɛlɩɣ sɛtʋ sɔsɔtʋ. Mba yanɩ-ɖʋ se ɖɩkɔɔ nɛ ɖɩsʋʋ ɛyaa samaɣ kanɛ ka-taa, ŋga kɛwɛnɩ nɔɔ kʋyʋmaɣ siŋŋ yɔ. Ða Yehowa Aseɣɖe Tɩnaa ɖɩɩlakɩ nɔɔ taa yem na, ɛlɛ wezuu ŋgʋ ɖɩcakɩ paa evemiye nɖɩ yɔ, kɩwɩlɩɣ se toovenim lɛ nɔɔ kʋyʋmaɣ wɛ ɖɛ-hɛkʋ taa. Mbʋ ɖɩna ŋgee kigbeɣluu taa Dublin yɔ, pɩkaɣ-ɖʋ tɔzʋʋ paa ɛzɩmtaa se waɖɛ sɔsɔɖɛ siŋŋ pɩkɛnɩ-ɖʋ se ɖa nɛ mɩ-tɩŋa ɖɩsɛɛ ɖɛ-Ɛsɔ sɔsɔ nɔɔ kʋyʋmaɣ taa.”

18. Tɔm ndʋ pɩwɛɛ se ɖɩpɔzɩ ɖa-tɩ pɩlɩɩnɩ ɛzɩma ɖa nɛ Yehowa ɖɩyɔɔdʋʋnɩ ɖama yɔ pɩ-yɔɔ?

¹⁸ Ye taabalaa ɩyɔɔdʋʋnɩ ɖama camɩyɛ yɔ, pa-taabalɩyɛ cɛyɩsɩɣ nɛ pɩkɩlɩ. Sɔnɔ ɛyaa sɔɔlɩ tɩŋnʋʋ intɛrnɛɛtɩ nɛ pɔrtaabɩlɩwaa yɔɔ nɛ pɔyɔɔdʋʋnɩ ɖama yaa pamaɣ ɖama tɔm. Ɛlɛ, alɩwaatʋ ɛzɩma ɖɩkpakɩɣ nɛ ɖa nɛ ɖa-Taabalʋ sɔsɔ Yehowa ɖɩyɔɔdʋʋnɩ ɖama? Toovenim se ɛkɛ “adɩma Welisiyu.” (Keɣa 65:2, NW) Ɛlɛ, tam ɛzɩma ɖɩyɔɔdʋʋnɩ-ɩ evemiye taa?

19. Ye pɩwɛ-ɖʋ kaɖɛ se ɖikuli ɖa-laŋa nɛ ɖiheyi Yehowa ɖa-taa tɔm yɔ, ɛbɛ pɩzɩɣ nɛ pɩsɩnɩ-ɖʋ?

¹⁹ Pɩwɛ Ɛsɔ sɛyaa nabɛyɛ kaɖɛ se pokuli pa-laŋa nɛ peheyi Yehowa mbʋ pɩwɛ pa-taa yɔ. Ɛlɛ, Yehowa ñañɩnɩɣ se alɩwaatʋ ndʋ ɖɩtɩmɩɣnɩ-ɩ yɔ ɖiheyi-i mbʋ pɩwɛ ɖa-laŋa taa yɔ. (Keɣa 118:145; Wit. 3:41) Paa pɩlakɩ-ɖʋ kaɖɛ se ɖɩpɩzɩ nɛ ɖihiɣ tɔm pee wena amʋnaa nɛ ɖiheyi Ɛsɔ mbʋ pɩwɛ ɖa-laŋa taa yɔ, nabʋyʋ pɩzɩɣ nɛ pɩsɩnɩ-ɖʋ. Pɔɔlɩ kaama takayaɣ Krɩstʋ ñɩma mba pɛwɛ Room yɔ nɛ eheyi-wɛ se: “Ðɩɩsɩŋ mbʋ ɖɩpɔzɩ yɔ se ɖɩtɩmɩ camɩyɛ; fezuu kiɖeɖeu maɣmaɣ tɩmɩɣ ɖɔ-yɔɔ nɛ kubusi nzɩ sɩfɛyɩ yɔɔdʋʋ yɔ. Nɛ weyi ɛcɔŋʋʋ laŋa taa yɔ, ɛsɩm fezuu kiɖeɖeu sɔɔlɩ mbʋ yɔ, ɛsɩm mbʋ se ye fezuu ɛlʋkɩ tɔm mʋyaa yɔɔ kɔyɔ, kɩsɔɔlɩ mbʋ Ɛsɔ sɔɔlaa yɔ.” (Rom. 8:26, 27) Ye ɖɩkalɩɣ Bibl taa takayɩsɩ ɛzɩ Yɔb, Keɣsi nɛ Aduwa yɔ, pɩkaɣ-ɖʋ sɩnʋʋ nɛ ɖihiɣ tɔm pee wena amʋnaa yɔ nɛ ɖiheyi Yehowa mbʋ pɩwɛ ɖa-laŋa taa yɔ.

20, 21. Tɔm ndʋ Pɔɔlɩ ma Filiipu 4:6, 7 taa yɔ, ɛzɩma tɩyɛ tɩhɛzɩɣ ɖa-laŋa?

²⁰ Ye ɖɩwɛ kʋñɔŋ nakʋyʋ taa yɔ, pɩwɛɣ ɖeu se ɖɩɖɔ lɔŋ weyi Pɔɔlɩ kaatasɩ Filiipu mba yɔ ɩ-yɔɔ. Ɛtɔm se: “Ɩtaalɛyɩ natʋyʋ; paa kɛdɛɖaɣ ŋga taa, ɩɖɔkɩ adɩma, sɛtʋ ɛsʋʋ-mɩ nɛ iheyi Ɛsɔ mbʋ ɩtɛɖɩɣ yɔ.” Pɩtʋʋ fɛyɩ se ye ɖikuli ɖa-laŋɩyɛ mbʋ, nɛ ɖiheyi ɖa-Taabalʋ sɔsɔ Yehowa ɖa-nɩɣzɛ yɔ, pɩkaɣ ɖa-laŋɩyɛ hɛzʋʋ. Pʋyɔɔ Pɔɔlɩ wobi pɩ-yɔɔ nɛ ɛtɔ se: “Ɛsɔ tɛ laŋhɛzɩyɛ nɖɩ ɖɩkpaɖɩ lɔŋ kpeekpe yɔ, ɖɩɖɔkɩ mɩ-laŋa nɛ mɩ-maɣzɩm Yesu Krɩstʋ taa.” (Fil. 4:6, 7) Tɛtɛ pɩla mbʋ nɛ paa ɛzɩmtaa lɛ, ɖɩñɩnɩ “Ɛsɔ tɛ laŋhɛzɩyɛ” nɖɩ ɖɩɖɔkʋʋ ɖa-laŋa nɛ ɖa-maɣzɩm siŋŋ yɔ.

²¹ Adɩma sɩɣnɩ-ɖʋ se ɖɩcɛyɩsɩ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ. Pʋyɔɔ lɛ ‘ɖɩtɩmɩ kaahɛzaɣ.’ (1 Tes. 5:17) Tɛtɛ pɩla mbʋ nɛ tɔm ndʋ ɖɩkpɛlɩkaa yɔ, tɩsɩnɩ-ɖʋ nɛ ɖɩcɛyɩsɩ taabalɩyɛ kɩbanɖɛ nɖɩ ɖɩwɛ ɖa nɛ Ɛsɔ ɖɛ-hɛkʋ taa yɔ, nɛ ɖɩɖɔ ɛ-paɣtʋ yɔɔ. Pɩtasɩ lɛ, ɖihiɣ wazasɩ sakɩyɛ mbʋ pʋyɔɔ yɔ Yehowa kɛ ɖa-Caa, ɖɛ-Ɛsɔ nɛ ɖa-Taabalʋ. Ye mbʋ, pɩwɛɣ ɖeu se ɖɩkpakɩɣ alɩwaatʋ nɛ ɖɩmaɣzɩɣ wazasɩ nzɩ sɩ-yɔɔ.