1-2. Alɩwaatʋ ndʋ ɖe-wezuu caɣʋ lɛɣzɩɣ hɔɔlɩŋ nɩɩyɩ taa yɔ, ɛbɛ yɔɔ Bibl taa paɣtʋ kila naayɛ tɔm pɩzɩɣ nɛ acɛyɩ ɖɛ-ɛsɩndaa nɛ pɩkɩlɩ?

 KƖYAKƲ ŋgʋ ki-wiye abalʋ nɛ halʋ pɔɖɔkʋʋ nesi yɔ, pewelisiɣ samaɣ taa tɔm yɔɔdʋʋ mbʋ patɩŋɩɣnɩ Bibl yɔɔ nɛ pɔyɔɔdʋʋ se pɩwazɩ nesi ɖɔkɩyaa yɔ. Bibl paɣtʋ kila wena a-taa patazɩɣ tɔm yɔɔdʋʋ mbʋ pɩ-taa yɔ, pɛtɛm-yɛ sɩm. Ɛlɛ kpaɣnɩ kɩyakʋ ŋgʋ nɛ pɩɖɛɣ lɛ, paɣtʋ kila ana a-tɔm cɛyɩɣ pɛ-ɛsɩndaa nɛ pɩkɩlɩ. Ɛbɛ yɔɔ? Mbʋ pʋyɔɔ yɔ, pakaɣ-yɛ labɩnʋʋ tʋmɩyɛ pe-nesi ɖɔkʋʋ taa.

² Alɩwaatʋ ndʋ Krɩstʋ mba nabɛyɛ pɩsɩɣ lʋlɩyaa yɔ, mbʋ ɖɔɖɔ pɩwɛɛ. Pɩtɩla yɔ, paawelisi samaɣ taa tɔm yɔɔdʋʋ sakɩyɛ pɩlɩɩnɩ piya yɔɔ cɔnʋʋ yɔɔ pɩnzɩ sakɩyɛ. Ɛlɛ lɛɛlɛɛyɔ lɛ, paɣtʋ kila wena awɛ tɔm yɔɔdʋʋ mbʋ pɩ-taa yɔ, a-tɔm cɛyɩɣ pɛ-ɛsɩndaa nɛ pɩkɩlɩ. Pa-maɣmaɣ pakaɣ wɛnʋʋ piya nɛ pɩkaɣ pɔzʋʋ se pɔcɔnɩ sɩ-yɔɔ. Pɩkɛ tʋmɩyɛ sɔsɔɖɛ kpem! Toovenim taa lɛ, alɩwaatʋ ndʋ ɖe-wezuu caɣʋ lɛɣzɩɣ yɔ, Bibl masɩ nzɩ ɖɩɩsɩm-sɩ camɩyɛ yɔ sɩ-taa nasɩyɩ tɔm cɛyɩɣ ɖɛ-ɛsɩndaa nɛ pɩkɩlɩ. Lɩmaɣza wena a-yɔɔ Yehowa sɛyaa kalɩɣ Bibl nɛ pamaɣzɩɣ kɩ-yɔɔ pe-wezuu caɣʋ “kɩyakɩŋ kpeekpe” taa yɔ, a-taa naɖɩyɛ lɛ. Palakɩ ɛzɩ paapɔzʋʋ Izrayɛɛlɩ awiya se ala yɔ.—Wp. 17:19.

3. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Lʋlɩyaa, wala sɔsɔna wena Krɩstʋ tʋ nɔɔyʋ pɩzɩɣ nɛ ɛwɛɛna yɔ, ɩwɛnɩ a-taa naɖɩyɛ. Nɖɩ lɛ se ɩwɩlɩ mi-piya Yehowa tɔm. Pɩtasɩna se ɩsɔɔlaa se ɩwɩlɩ-sɩ Ɛsɔ yɔɔ toovenim tɔm lɛ, ɩsɔɔlaa ɖɔɖɔ se ɩla nɛ pɩkpaɖɩ mbʋ. Ɩsɔɔlaa se ɩsɩnɩ-sɩ nɛ  sɩsɔɔlɩ-ɩ siŋŋ. Ɛbɛ ɩpɩzɩɣ ɩla nɛ ɩsɩnɩ mi-piya nɛ sɩsɔɔlɩ Yehowa? Tɔm ñʋʋ kʋnɛ kɩ-taa, ɖɩkaɣ tazʋʋ Bibl paɣtʋ kila naanza wena apɩzɩɣ asɩnɩ-mɩ nɛ ɩla mbʋ yɔ a-taa. (2 Tim. 3:16) Ðɩkaɣ naʋ ɖɔɖɔ ɛzɩma lʋlɩyaa Krɩstʋ ñɩma nabɛyɛ labɩnɩ Bibl lɔŋ tasʋʋ tʋmɩyɛ nɛ pɩwazɩ-wɛ yɔ.

4. Paɣtʋ kila wena apɩzɩɣ nɛ asɩnɩ lʋlɩyaa nɛ pasɩnɩ pe-piya nɛ sɩsɔɔlɩ Yehowa yɔ a-taa naɖɩyɛ lɛ nɖɩ? (Yakubu 1:5)

⁴ Paɣtʋ kiɖe 1: Ñɩnɩ Yehowa lɔŋ tasʋʋ. Pɔzɩ Yehowa se ɛha-ŋ lɔŋsɩnɖɛ nɖɩ pɩpɔzʋʋ-ŋ yɔ nɛ ŋsɩnɩ ñe-piya nɛ sɩsɔɔlɩ-ɩ. (Kalɩ Yakubu 1:5.) Ɛnʋ kɛnɩ lɔŋ tasɩyʋ kɩbanʋ weyi ɛkpaɖaa yɔ. Lɩmaɣza sakɩyɛ yɔɔ ɖɩyɔɔdʋʋ mbʋ. Iyele nɛ ɖɩna lɩmaɣza ana a-taa naalɛ. Kajalaɣ lɛ, Yehowa kɛnɩ lʋlɩyʋ weyi ɛwɛ niye nɛ pɩkpaɖɩ yɔ. (Keɣa 35:10) Nabʋlɛ lɛ, lɔŋ weyi ɛtasɩɣ yɔ, ɩwazɩɣ paa ɛzɩmtaa.—Iza. 48:17.

5. (a) Ɛbɛ Yehowa ɛgbɛyɛ haɣ lʋlɩyaa se pɩsɩnɩ-wɛ? (b) Ɛzɩ video wɩlʋʋ yɔ, ɛzɩma koobu Amorim nɛ ɛ-halʋ pakpaɣnaa nɛ pafalɩsɩ pe-piya yɔ, lɔŋ weyi pɩkpɛlɩkɩɣ-ŋ?

⁵ Yehowa tɩŋɩɣnɩ ɛ-Tɔm nɛ ɛ-ɛgbɛyɛ yɔɔ nɛ ɛhaɣ fezuu taa tɔɔnasɩ sakɩyɛ lʋlɩyaa, nɛ tɔɔnasɩ nzɩ sɩpɩzɩɣ sɩsɩnɩ-wɛ nɛ pafalɩsɩ pe-piya nɛ sɩsɔɔlɩ-ɩ. (Mat. 24:45) Ɩpɩzɩɣ nɛ ɩna lɔŋ tasʋʋ kɩbam tɔm ñʋŋ “De l’aide pour les familles” taa. Palɩzɩ tɔm ñʋŋ ɛnɩ Réveillez-vous! takayaɣ taa pɩnzɩ sakɩyɛ; nɛ lɛɛlɛɛyɔ lɛ, ɩwɛ ɖɛ-tɛ intɛrnɛɛtɩ lone yɔɔ. Pɩtasɩ lɛ, videowaa sakɩyɛ wɛ jw.org yɔɔ nɛ papɩzɩɣ nɛ pasɩnɩ lʋlɩyaa nɛ palabɩnɩ tʋmɩyɛ Yehowa lɔŋ tasʋʋ alɩwaatʋ ndʋ pafalɩsɩɣ pe-piya yɔ. *—Adu. 2:4-6.

6. Lɩmaɣza wena caja nɔɔyʋ wɛna pɩlɩɩnɩ lɔŋ tasʋʋ mbʋ ɛ nɛ ɛ-halʋ pamʋʋ Yehowa ɛgbɛyɛ cɔlɔ yɔ pɩ-yɔɔ?

⁶ Lʋlɩyaa sakɩyɛ yɔɔdaa se pɛwɛnɩ ɛsɩmɩyɛ mbʋ Yehowa tɩŋɩɣnɩ ɛ-ɛgbɛyɛ yɔɔ nɛ ɛhaɣ-wɛ se pɩsɩnɩ-wɛ yɔ pɩ-yɔɔ. Payaɣ caja nɔɔyʋ se Joe. Ɛyɔɔdaa se: “Pɩfɛyɩ kɛlɛʋ se ɖɩcɔnɩ ɖe-piya naadozo yɔɔ nɛ sɩpaɣlɩ toovenim taa. Ma nɛ ma-halʋ ɖɩtɩmɩɣnɩ Yehowa paa ɛzɩmtaa se ɛsɩnɩ-ɖʋ. Nɛ ɖoŋ ɖoŋ lɛ, ɖɩnaɣ se tɔm ñʋʋ nakʋyʋ yaa video nakʋyʋ lɩɣ alɩwaatʋ ndʋ tɩmʋnaa yɔ tɩ-yɔɔ se pɩsɩnɩ-ɖʋ nɛ ɖɩcɔnɩ wɛtʋ ndʋ ɖɩwɛɛ nɛ ɖɩkatɩɣ  yɔ ti-ɖeɖe. Ðɩñɩnɩɣ Yehowa lɔŋ tasʋʋ paa ɛzɩmtaa.” Joe nɛ ɛ-halʋ peɖiɣzinaa se tɔm ñʋŋ ɛnɩ nɛ videowaa mba pɛwɛɛ nɛ pasɩɣnɩ pe-piya se sɩñɔtɩnɩ Yehowa kpam.

7. Ɛbɛ yɔɔ pɩcɛyaa se lʋlɩyaa ɩla po-ɖoŋ ɖeɖe nɛ paha kɩɖaʋ kɩbaŋʋ? (Roma mba 2:21)

⁷ Paɣtʋ kiɖe 2: Kɛ kɩɖaʋ kɩbaŋʋ. Piya cɔŋnɩ sɩ-lʋlɩyaa camɩyɛ nɛ ɖoŋ ɖoŋ lɛ sɩmaɣzɩɣnɩ-wɛ. Toovenim taa lɛ, lʋlɩyʋ nɔɔyʋ fɛyɩ se ɛtalɩ pilim. (Roma 3:23) Paa mbʋ yɔ, pɩwɛɛ se lʋlɩyaa ɩla po-ɖoŋ ɖeɖe siŋŋ nɛ paha pe-piya kɩɖaʋ kɩbaŋʋ. (Kalɩ Roma mba 2:21.) Caja nɔɔyʋ yɔɔdaɣ piya tɔm lɛ, ɛyɔɔdaa se: “Papɩzɩɣ nɛ pakpaɣ-sɩ nɛ pamaɣzɩnɩ kpootu. Mbʋ payɩ pɩcɔ-sɩ nɛ pɩta yɔ, pɩsʋʋ-sɩ ɛzɩ lɩm sʋʋ kpootu yɔ.” Ɛtasɩ yɔɔdʋʋ se: “Alɩwaatʋ ndʋ ɖa-kɩɖaʋ ɛɛlakɩ nɔɔ kʋɖʋmaɣ nɛ tɔm ndʋ ɖɩñakɩ pana se ɖɩwɩlɩ-sɩ yɔ, sɩkaɣ-ɖʋ heyuu.” Pʋyɔɔ lɛ, ye ɖɩsɔɔlaa se ɖe-piya ɩsɔɔlɩ Yehowa yɔ, sɔɔlɩm mbʋ ɖa-maɣmaɣ ɖɩwɛnɩ ɛ-yɔɔ yɔ pɩwɛɛ se pɩcɛyɩsɩ nɛ pɩnaɣ kaɣlaa.

8-9. Tɔm ndʋ Andrew nɛ Emma pɔyɔɔdaa yɔ, ɛbɛ tɩkpɛlɩkɩɣ-ŋ?

⁸ Nʋmɔŋ weyi ɩ-yɔɔ lʋlɩyaa pɩzɩɣ patɩŋna nɛ pasɩnɩ pe-piya nɛ sɩsɔɔlɩ Yehowa yɔ ɩɖɔwa. Payaɣ koobu pɩɣa evelaɣ nakɛyɛ se Andrew nɛ kɛwɛnɩ pɩnzɩ 17. Kɔyɔɔdaa se: “Ma-lʋlɩyaa wɩlɩ-m paa ɛzɩmtaa se adɩma tɔm cɛyaa. Paa ɖoo wena man-caa kpɛndaɣ mɔ-yɔɔ nɛ ɖɩtɩmɩɣ paa ma-maɣmaɣ maatɛm tɩmʋʋ yɔ. Ma-lʋlɩyaa tɔzaɣ ma nɛ me-neu paa ɛzɩmtaa se: ‘Ɩpɩzɩɣ nɛ ɩyɔɔdɩnɩ Yehowa alɩwaatʋ ndʋ payɩ ɩsɔɔlaa yɔ.’ Ɛzɩma pañɩkaɣ niye adɩma yɔɔ yɔ, pɩɩwɛnɩ ɖoŋ siŋŋ mɔ-yɔɔ, nɛ lɛɛlɛɛyɔ lɛ pɩwɛ-m kɛlɛʋ se mantɩmɩɣnɩ Yehowa nɛ manaɣ-ɩ ɛzɩ Caja kʋsɔɔlʋ nɔɔyʋ yɔ.” Lʋlɩyaa, ɩtɔzʋʋ paa ɛzɩmtaa se sɔɔlɩm mbʋ ɩwɛnɩ Yehowa yɔɔ yɔ, pɩpɩzɩɣ nɛ pɩsɩnɩ mi-piya nɛ sɩsɔɔlɩ-ɩ ɖɔɖɔ.

⁹ Iyele nɛ ɖɩna ɖɔɖɔ Emma kɩɖaʋ. Alɩwaatʋ ndʋ ɛ-caa ɖɛwa nɛ eyele ɛ-hɔʋ yɔ, ɛ-caa kaatɔɔ kɩma sakɩyɛ nɛ pɩɩwɛɛ se e-ɖoo ɛhɛyɩ-yɛ. Emma yɔɔdaa se: “Mon-ɖoo kaalabɩ liidiye kʋñɔŋ alɩwaatʋ sakɩyɛ, ɛlɛ paa ɛzɩmtaa ɛyɔɔdaɣ ɛzɩma Yehowa cɔŋnɩ ɛ-sɛyaa yɔɔ nɛ ɛhaɣ-wɛ mbʋ pɩpɔzʋʋ-wɛ yɔ pɩ-tɔm. Ɛzɩma ɛcakaɣ wezuu yɔ, piyeba nɛ mana se toovenim taa lɛ etisaɣ tɔm ndʋ tɩ-yɔɔ. Mon-ɖoo ɖɔŋaɣ tɔm ndʋ ɛwɩlaɣ-m yɔ tɩ-yɔɔ.” Ɛbɛ pɩkpɛlɩkɩɣ-ɖʋ? Lʋlɩyaa pɩzɩɣ nɛ pɛkɛ kɩɖaŋ kɩbaŋ halɩ pɩkpɛndɩnɩ kaɖɛ alɩwaatʋ taa.—Gal. 6:9.

10. Alɩwaatʋ ndʋ taa Izrayɛɛlɩ taa lʋlɩyaa pɩzaɣ se pawɩlɩ pe-piya Yehowa yɔɔ tɔm? (Wayɩ Wayɩ Paɣtʋ 6:6, 7)

¹⁰ Paɣtʋ kiɖe 3: Yɔɔdʋʋnɩ ñe-piya ɖoŋ ɖoŋ. Yehowa kaaheyi caanaʋ taa Izrayɛɛlɩ mba se pawɩlɩɣ pe-piya ɛ-tɔm ɖoŋ ɖoŋ. (Kalɩ Wayɩ Wayɩ Paɣtʋ 6:6, 7.) Lʋlɩyaa mba, paawɛnɩ wala sakɩyɛ evemiye taa se pɔyɔɔdɩnɩ pe-piya nɛ pasɩnɩ-sɩ nɛ sɩsɔɔlɩ Yehowa. Izrayɛɛlɩ taa abalɩbɩɣa pɩzaɣ se kakpaɣ ñɩɣtʋ sakɩyɛ nɛ kasɩnɩ ka-caa nɛ pahayɩ tɔɔnaɣ yaa pakʋ tɔɔnaɣ. Halɩbɩɣa ñapɩzaɣ se kakpaɣ alɩwaatʋ sakɩyɛ evemiye taa nɛ kasɩnɩ ko-ɖoo nɛ pɛñɛyɩɣ yaa palʋʋ wondu ndɩ ndɩ, nɛ pala ɖɩɣa taa tʋma lɛɛna. Alɩwaatʋ ndʋ piya nɛ lʋlɩyaa pɛkpɛndaɣ nɛ palakɩ tʋmɩyɛ mbʋ yɔ, papɩzaɣ se pala kɛdaɣ pɩlɩɩnɩ tɔm kɩcɛyɩtʋ sakɩyɛ yɔɔ. Papɩzaɣ se pala faawɩyɛ pɩlɩɩnɩ Yehowa kɩbandʋ labʋ yɔɔ nɛ ɛzɩma ɛwɛɛ nɛ ɛsɩɣnɩ pɔ-hɔʋ yɔ pɩ-yɔɔ.

11. Alɩwaatʋ ndʋ tɩ-taa lʋlɩyaa Krɩstʋ ñɩma wɛnɩ waɖɛ se pɔyɔɔdɩnɩ pe-piya yɔ, tɩ-taa natʋyʋ lɛ ndʋ?

¹¹ Sɔnɔ, wezuu caɣʋ fɛyɩ ɛzɩ caanaʋ taa yɔ. Ajɛɛ sakɩyɛ taa, lʋlɩyaa nɛ piya paapɩzɩɣ nɛ pakpaɣ alɩwaatʋ nɛ pɛwɛɛ ɖama cɔlɔ evemiye kpeekpe. Pɩtɩla yɔ, lʋlɩyaa wɛɣ tʋmɩyɛ taa nɛ piya ñɛwɛɛ sukuli taa. Pʋyɔɔ lɛ, pɩwɛɛ se lʋlɩyaa ɩñɩnɩ alɩwaatʋ ndʋ tɩ-yɔɔ papɩzɩɣ nɛ  pɔyɔɔdɩnɩ pe-piya yɔ. (Efɛz. 5:15, 16; Fil. 1:10) Alɩwaatʋ ndʋ tɩ-taa natʋyʋ lɛ hɔʋ taa Ɛsɔ sɛtʋ alɩwaatʋ. Payaɣ koobu pɩɣa evelaɣ nakɛyɛ se Alexander. Kɔyɔɔdaa se: “Man-caa lakɩ hɔʋ taa Ɛsɔ sɛtʋ ɖʋtʋ paa ɛzɩmtaa, nɛ ɛɛhaɣ nʋmɔʋ se nabʋyʋ eyele nɛ alɩwaatʋ ndʋ tɩɖɛɛ ɖɔ-yɔɔ. Ðɩtɛŋ kpɛlɩkʋʋ lɛ, ɖɩlakɩ kɛdaɣ pɩlɩɩnɩ mbʋ payɩ pɩcɛyɩ ɖɛ-ɛsɩndaa yɔ pɩ-yɔɔ.”

12. Hɔʋ taa Ɛsɔ sɛtʋ alɩwaatʋ taa, tɔm ndʋ pɩwɛɛ se tɩwɛɛ hɔʋ ñʋʋdʋ lɩmaɣza taa?

¹² Ye ŋkɛ hɔʋ ñʋʋdʋ yɔ, ɛbɛ ŋpɩzɩɣ ŋla nɛ piyele nɛ hɔʋ taa Ɛsɔ sɛtʋ kɛdɩnɩ ñe-piya? Pɩwɛɣ ɖeu se ŋkpɛlɩkɩnɩ ñe-piya ɖa-takayaɣ kɩfalaɣ Nɩɩ wezuu leleŋ tam! Kpɛlɩkʋʋ mbʋ, pɩhaɣ-ŋ waɖɛ kɩbanɖɛ se ña nɛ ñe-piya ɩlakɩ kɛdɛsɩ kɩbanzɩ. Ŋsɔɔlaa se ñe-piya ikuluu sɩ-laŋa nɛ siheyiɣ-ŋ sɩ-lɩmaɣza nɛ sɩ-nɩɣzɛ, pʋyɔɔ lɛ pɩtɩpɔzɩ se ŋhɔŋ-sɩ nɛ tɔm yaa ŋhɔŋ sɩ-nɩŋgbaaŋ hɔʋ taa Ɛsɔ sɛtʋ alɩwaatʋ taa. Nɛ ye nabʋyʋ taa ñe-piya ɩyɔɔdɩ tɔm natʋyʋ nɛ tɩɩlakɩ nɔɔ kʋɖʋmaɣ nɛ Bibl paɣtʋ kila yɔ, ñaɣ pana nɛ ŋtaakɔ pana. Ɛlɛ ña-taa ɛla leleŋ se sɩwɛɛ nɛ sɩyɔɔdʋʋ sɩ-lɩmaɣza kpayɩ, nɛ ŋseɣti-sɩ se siwolo pɩ-yɔɔ nɛ sɩyɔɔdʋʋ tɔm ndʋ sɩmaɣzɩɣ yɔ faaa. Ye ŋtɩlɩ ñe-piya lɩmaɣza toovenim taa yɔ, pi-ɖeke piyekina nɛ ŋpɩzɩ nɛ ŋsɩnɩ-sɩ camɩyɛ nɛ pɩkɩlɩ.

13. Wala lɛɛna wena lʋlɩyaa wɛna se pasɩnɩ pe-piya nɛ sɩñɔtɩnɩ Yehowa kpam?

¹³ Lʋlɩyaa, evemiye taa lɛ, ɩñɩnɩ wala wena a-yɔɔ ɩpɩzɩɣ ɩtɩŋna nɛ ɩsɩnɩ mi-piya nɛ sɩñɔtɩnɩ Yehowa kpam yɔ. Pɩtɩcɛyɩ se ɩɖaŋ Bibl kpɛlɩkʋʋ alɩwaatʋ se pʋcɔ nɛ ɩwɩlɩ-sɩ ɖɛ-Ɛsɔ kʋsɔɔlʋ yɔɔ tɔm. Payaɣ ɖoyo nɔɔyʋ se Lisa. Ɛyɔɔdaa se: “Ðɩsɩnɩ ɖe-piya nɛ sɩna nɔɔ kʋɖʋmaɣ ŋga kɛwɛ Yehowa nɛ wondu kɩlɩzɩtʋ pɛ-hɛkʋ taa yɔ. Kɩɖaʋ nakʋyʋ yɔ: Alɩwaatʋ ndʋ ɖa-haɣ lakɩ nabʋyʋ nɛ ɖe-piya hoŋ yɔ, ɖiheyiɣ-sɩ se pɩwɩlɩɣ se Yehowa kɛ Ɛsɔ koboyaɣ tʋ nɛ ɛlabɩ-ɖʋ se ɖɩkɛ koboyaɣ tɩnaa nɛ ɖɩnɩɩ leleŋ mbʋ pɩhaɣ ɛyʋ hoŋa yɔ pɩ-yɔɔ ɖɔɖɔ.”

14. Ɛbɛ yɔɔ pɩcɛyaa se lʋlɩyaa ɩsɩnɩ pe-piya nɛ sɩlɩzɩ sɩ-taabalaa nɛ lɔŋsɩnɖɛ? (Aduwa 13:20)

¹⁴ Paɣtʋ kiɖe 4: Sɩnɩ ñe-piya nɛ sɩlɩzɩ taabalaa kɩbama. Ɛsɔ tɔm wɩlɩɣ kpayɩ kpayɩ se ɖa-taabalaa pɩzɩɣ nɛ pɛwɛɛnɩ ɖoŋ kɩbaŋ yaa ɖoŋ kɩdɛkɛdɩŋ ɖɔ-yɔɔ. (Kalɩ Aduwa 13:20.) Lʋlɩyaa, ɩsɩm mi-piya taabalaa na?  Mɩ nɛ wɛ ɩtɛm katʋʋ nɛ ɩkpaɣ alɩwaatʋ natʋyʋ nɛ mɩ nɛ wɛ ɩcaɣ? Ɛbɛ ɩpɩzɩɣ ɩla nɛ ɩsɩnɩ mi-piya nɛ sɩɖʋ taabalɩyɛ nɛ mba pɔsɔɔlɩ Yehowa yɔ? (1 Kɔr. 15:33) Ye ɩyaɣ ɛyaa mba taabalɩyɛ kɩbanɖɛ wɛ pa nɛ Yehowa pɛ-hɛkʋ taa yɔ se pɛkpɛndɩɣ mɩ-yɔɔ nɛ ɩlakɩ hɔʋ taa tʋma ndɩ ndɩ yɔ, ɩpɩzɩɣ ɩsɩnɩ mi-piya nɛ sɩwɛɛnɩ taabalaa kɩbama.—Keɣa 118:63.

15. Ɛbɛ lʋlɩyaa pɩzɩɣ pala nɛ pasɩnɩ pe-piya nɛ sɩwɛɛnɩ taabalaa kɩbama?

¹⁵ Payaɣ caja nɔɔyʋ se Tony. Iyele nɛ ɖɩna ɛ-kɩɖaʋ. Ɛkɛdɩ mbʋ ɛ nɛ ɛ-halʋ palaba se pasɩnɩ pe-piya nɛ sɩwɛɛnɩ taabalaa kɩbama yɔ pɩ-tɔm. Ɛyɔɔdaa se: “Ma nɛ ma-halʋ, ɖɩyaɣaɣ koobiya mba pɛwɛnɩ pɩnzɩ ndɩ ndɩ nɛ palɩnɩ sɔnzɩ ndɩ ndɩ taa yɔ ɖɛ-tɛ, nɛ ɖɩlabɩ mbʋ pɩnzɩ sakɩyɛ. Ða nɛ wɛ ɖɩkpɛndaɣ nɛ ɖɩtɔkɩ tɔɔnaɣ nɛ ɖɩkpɛndaɣ ɖɔɖɔ nɛ ɖɩlakɩ hɔʋ taa Ɛsɔ sɛtʋ. Pɩkɛ nʋmɔʋ sɔsɔʋ ŋgʋ kɩ-yɔɔ ɖɩtɩŋnaa nɛ ɖɩtɩlɩ mba pɔsɔɔlɩ Yehowa nɛ pɛsɛɣ-ɩ nɛ taa leleŋ yɔ. Ðɩmʋwaɣ egeetiye yɔɔ cɔnɩyaa, Ɛsɔtɔm tiyiyaa, nɛ koobiya lalaa nɛ pacakɩ ɖɛ-tɛ. Mbʋ pɛkpɛlɩkɩ pe-wezuu caɣʋ taa yɔ, kpekpeka ŋga pɛwɛna yɔ, nɛ tɩ laʋ lɩmaɣza wena pɛwɛna yɔ, pɩɩwɛnɩ ɖoŋ siŋŋ ɖe-piya yɔɔ nɛ pɩsɩnɩ-sɩ nɛ sɩñɔtɩnɩ Yehowa kpam.” Lʋlɩyaa, ɩtɛ mɩ-taa se ɩsɩɣnɩ mi-piya nɛ sɩwɛɛnɩ taabalaa kɩbɩma.

16. Ye ña-pɩɣa nakɛyɛ ɛyɔɔdaa se katɩsɔɔlɩ se kɛsɛɛ Yehowa yɔ, ɛzɩma pɩwɛɛ se ŋla?

¹⁶ Ye ŋlabɩ ño-ɖoŋ ɖeɖe, ɛlɛ ña-pɩɣa nakɛyɛ heyi-ŋ se katɩsɔɔlɩ se kɛsɛɛ Yehowa yɔ, ɛbɛ pɩfɛyɩ se ŋla? Taakɔ tɔm ñʋʋ se ŋtɩpɩzɩ nɛ ŋla lʋlɩyʋ tʋmɩyɛ ɛzɩ pɩpɔzʋʋ yɔ. Yehowa ha ɖa-tɩŋa, pɩkpɛndɩnɩ ña-pɩɣa, tɩ-yɔɔ wɛʋ lɩzʋʋ waɖɛ; pʋ-tɔbʋʋ se ɖɩwɛnɩ waɖɛ se ɖɩlɩzɩ se ɖɩkaɣ sɛʋ Ɛsɔ yaa ɖɩɩsɛɣ-ɩ. Ye ña-pɩɣa ɛha Yehowa siɣye yɔ, taalɔ lidaʋ se wiɖiyi kaatasɩɣ pɩzʋʋ nɛ kapɩsɩ Yehowa cɔlɔ. Tɔzɩ pɩɣa kilebaɣ eduuye yɔɔ. (Luka 15:11-19, 22-24) Pɩɣa kilebaɣ ŋga, kalabɩ lakasɩ kɩdɛkɛdɩsɩ sakɩyɛ, ɛlɛ pʋwayɩ lɛ kɛlɛɣzɩ. Nabɛyɛ pɩzɩɣ nɛ pɔyɔɔdɩ se: “Pɩkɛ eduuye yem na. Ɛzɩ pɩpɩzɩɣ nɛ pɩla mbʋ wezuu caɣʋ taa toovenim na?” Ɛɛɛ, pɩpɩzɩɣ nɛ pɩla mbʋ! Toovenim taa lɛ, mbʋ pɩlabɩ pɩɣa nakɛyɛ wezuu caɣʋ taa; payaɣ-kɛ se Elie.

17. Ɛzɩma tɩyɛ Elie kɩɖaʋ kpazɩɣ-ŋ ɖoŋ?

 ¹⁷ Elie yɔɔdɩ ɛ-lʋlɩyaa tɔm se: “Paalabɩ po-ɖoŋ ɖeɖe se pasɩnɩ-m nɛ mɔnsɔɔlɩ Yehowa nɛ Bibl. Ɛlɛ, manpɩsɩ pɩɣa evelaɣ lɛ, manpaɣzɩ-wɛ kaɖɩnʋʋ.” Elie kaapaɣzɩ pɩ-tɛɛ nɛ pɩ-yɔɔ wezuu caɣʋ nɛ ekizi pana wena payɩ ɛ-lʋlɩyaa ñaɣaa se pasɩnɩ-ɩ fezuu taa yɔ. Ɛlɩ ɖɩɣa nɛ pɩtɛ lɛ, ɛpaɣzɩ wezuu kɩdɛkɛdʋʋ caɣʋ. Ɛlɛ nabʋyʋ taa, ɛ nɛ ɛ-taabalʋ nɔɔyʋ palakaɣ kɛdaɣ Bibl yɔɔ. Elie tasɩ yɔɔdʋʋ se: “Mɛwɛɛ nɛ meheyiɣ man-taabalʋ ɛnʋ Yehowa yɔɔ tɔm nɛ pɩkɩlɩɣ lɛ, menɖiɣzina se ma-maɣmaɣ mɛwɛɛ nɛ mamaɣzɩɣ Yehowa yɔɔ nɛ pɩkɩlɩɣ. Nɛ pazɩ pazɩ lɛ, Bibl taa toovenim ɖomaɣ ŋga ma-lʋlɩyaa kaañaɣ pana siŋŋ nɛ poɖuu ma-laŋɩyɛ taa nɛ kataapaɣlɩɣ yɔ, kapaɣzɩ paɣlʋʋ.” * Pʋwayɩ lɛ, Elie pɩsɩ toovenim taa. Maɣzɩ nɛ ŋna ɛzɩma ɛ-lʋlɩyaa taa kaalabɩ leleŋ se pañaɣ pana siŋŋ se pasɩnɩ-ɩ nɛ ɛsɔɔlɩ Yehowa kpaɣnɩ ɖooo ɛ-pɩjatʋ taa yɔ!—2 Tim. 3:14, 15.

18. Lʋlɩyaa mba pañakɩ pana siŋŋ se pasɩnɩ pe-piya nɛ sɩsɔɔlɩ Yehowa yɔ, lɩmaɣza wena ŋwɛnɩ pɔ-yɔɔ?

¹⁸ Lʋlɩyaa, Yehowa ha mɩ waɖɛ sɔsɔɖɛ naɖɩyɛ, nɖɩ lɛ se ɩfalɩsɩ ɛ-sɛyaa kpaɖʋʋ kɩfalʋʋ. (Keɣa 77:4-6) Tʋmɩyɛ nɖɩ, ɖɩ-labʋ fɛyɩ kɛlɛʋ nɛ ɖɩsaŋ mɩ nɛ ɖa-laŋɩyɛ pilim, pana wena ɩñakɩ siŋŋ se ɩsɩnɩ mi-piya yɔ a-yɔɔ! Ye iwobi pɩ-yɔɔ nɛ ɩlakɩ mi-ɖoŋ ɖeɖe se ɩsɩnɩ mi-piya nɛ sɩsɔɔlɩ Yehowa, nɛ ye ɩcɔnɩ sɩ-yɔɔ lɔŋ sɩɣzʋʋ nɛ paɣʋ mbʋ pɩlɩnɩ ɛ-cɔlɔ yɔ pɩ-taa yɔ, mɩ-taa pɩzɩɣ nɛ pɩtɛ se ɖa-Caa kʋsɔɔlʋ weyi ɛwɛ ɛsɔdaa yɔ, pɩkaɣ-ɩ kɛdɩnʋʋ.—Efɛz. 6:4.