Kpaɣnɩ pɩnaɣ 2018 lɛ, paa Feŋuu Tilimiye samaɣ ñɩnɖɛ nɖɩ lɛ, ɖɩtazɩɣ tɔm ñʋʋ kʋɖʋmʋʋ ɖeke taa. Fenaɣ fenaɣ takayɩsɩ nzɩ, sɩwɛ ɖɔ-Tɔm wɩlʋʋ wondu taa. Nɛ pʋyɔɔ lɛ pɩwɛɛ se ɖɩlabɩnɩ-sɩ tʋmɩyɛ tɔm susuu taa. Ðɩpɩzɩɣ ɖɔɖɔ ɖɩɖɔkɩ sɩ-taa nasɩyɩ alɩwaatʋ ndʋ ɖɩɖɔŋ nʋmɔʋ yaa ɖiwoki wondu yabʋ yɔ. Ðɩɩtɩŋɩɣnɩ fenaɣ fenaɣ takayɩsɩ yɔɔ nɛ ɖɩkpɛlɩkɩɣnɩ ɛyaa Bibl; paa mbʋ yɔ takayɩsɩ nzɩ sɩpɩzɩɣ siyele nɛ ɛyaa liŋ tɛɛ kɔtɩnɩ Ɛsɔtɔm.

Ña nɛ nɔɔyʋ ɩpaɣzɩɣ kɛdaɣ lɛ, ŋpɩzɩɣ ŋkalɩ-ɩ mayaɣ nakɛyɛ nɛ ŋhɔ ɛ-lɩmaɣza nɛ ŋwoni fenaɣ fenaɣ takayaɣ taa tɔm ndʋ tɩpɩzɩɣ nɛ tɩkɛdɩnɩ-ɩ yɔ tɩ-yɔɔ. Ye ɛkɛ hɔʋ caja yaa ɖoyo yɔ, yaa ye ɛwɛɛ nɛ ɛlʋkɩnɩ kaɖɛ naɖɩyɛ yɔ, ŋpɩzɩɣ ŋheyi-i se: “Pitileɖi yɔ mankalɩ tɔm kɩbandʋ natʋyʋ; tɩlabɩ nɔɔ kʋɖʋmaɣ nɛ wɛtʋ ndʋ tɩ-taa ŋwɛɛ yɔ. Manpɩzɩɣ nɛ mawɩlɩ-ŋ tʋ?” Ye ŋnawa se pɩkɛdɩnɩ-ɩ yɔ, ŋpɩzɩɣ ŋha-ɩ fenaɣ fenaɣ takayaɣ nakɛyɛ yaa ŋtiyini-i kɛ pɔrtaabɩlɩ yɔɔ yaa taabɩlɛɛtɩ yɔɔ. Ŋpɩzɩɣ nɛ ŋla mbʋ paa kajalaɣ ɖeɖe ŋkatɩ-ɩ yɔ. Pɩtɩkɛ ɖa-kaɖʋwa lɛ se ɖɩtayɩɣ ɛyaa takayɩsɩ, ɛlɛ fenaɣ fenaɣ takayɩsɩ sɩɣnɩ-ɖʋ se ɖɩtɩlɩ ɛyaa mba pɛwɛnɩ laŋa kɩbana yɔ.—Tʋm 13:48.