Yesu yɔɔdaa se: “Paha-mɩ falaa, ɩha falaa.” (Mt 10:8) Pʋyɔɔ lɛ, ɖɩɩpɛdɩɣ Biblwaa nɛ ɖa-takayɩsɩ lɛɛsɩ. (2Kɔr 2:17) Ɛlɛ tɔm ndʋ tɩwɛ ɖa-takayɩsɩ taa yɔ, tɩmʋ ñɩm siŋŋ, mbʋ pʋyɔɔ yɔ tɩkɛnɩ Ɛsɔtɔm. Pʋcɔ nɛ palɩzɩ takayɩsɩ nɛ patanɩ-sɩ agbaa taa lɛ, pɩpɔzʋʋ pana ñaɣʋ siŋŋ nɛ liidiye sakɩyɛ. Pʋyɔɔ lɛ, takayɩsɩ nzɩ ɖɩpɩzɩɣ nɛ ɖɩlabɩnɩ tʋmɩyɛ yɔ si-ɖeke pɩwɛɛ se ɖɩmʋ.

Wɛɛ lɛɣtʋ alɩwaatʋ ndʋ ŋhaɣ lalaa takayɩsɩ yɔ, paa samaɣ taa ŋɖiɣni tɔm susuu yɔ. (Mt 7:6) Taatayɩɣ ɛyaa takayɩsɩ yem ɛzɩ kakayɩsɩ yɔ, ɛlɛ pʋcɔ nɛ ŋha nɔɔyʋ takayaɣ lɛ, ñaɣ pana nɛ ŋna se Bibl taa tɔm kɛdɩnɩ-ɩ. Aɖakaɣ ŋga kɛwɛ hɔɔlʋʋ kʋnɛ kɩ-yɔɔ yɔ, kapɩzɩɣ kasɩnɩ-ŋ. Paa pɩkɩlaa yɔ, pɩwɛɛ se ŋcosi ka-taa tɔm kʋɖʋmtʋ yɔɔ se ɛɛɛ pʋcɔ nɛ ŋcɛlɩ nɔɔyʋ takayaɣ nakɛyɛ. Ye ŋŋɖiɣziɣna se Bibl taa tɔm kɛdɩnɩ-ɩ yaa pɩtɩkɛdɩnɩ-ɩ yɔ, pɩwɛɣ weewee se ŋcɛlɩ-ɩ traktɩ nakʋyʋ. Ɛlɛ ye pʋdʋ maɣmaɣ ɛpɔzɩnɩ takayaɣ nakɛyɛ yɔ, ɖɩcɛlɩɣ-ɩ kɛ faaa.—Ad 3:27, 28.