Pɩɩpɔzɩ tʋma nɛ liidiye sakɩyɛ pʋcɔ nɛ pama Izrayɛɛlɩ tɛ templo. Paa mbʋ yɔ, Izrayɛɛlɩ piya kaaɖʋ nesi tʋmɩyɛ nɖɩ nɛ kpekpeka. (3 Aw. 29:2-9; 4 Aw. 6:7, 8) Ɛlɛ ɛzɩma Izrayɛɛlɩ piya kaɣ cɔnʋʋ templo ŋgʋ kɩ-yɔɔ pʋwayɩ nɛ pɔñɔɔzɩ-kʋ yɔ, pɩkaɣ wɩlʋʋ se pɔsɔɔlɩ fezuu taa wondu yaa patɩsɔɔlɩ-tʋ. (2 Aw. 22:3-6; 4 Aw. 28:24; 29:3) Sɔnɔ, Krɩstʋ mba kpakɩɣ alɩwaatʋ sakɩyɛ nɛ pañakɩ pana nɛ pamaɣ nɛ pɔñɔɔzʋʋ Kewiyaɣ Kpaamɩŋ nɛ kigbeɣluu Kpaamɩŋ. Paa mbʋ yɔ, pɩkɛnɩ waɖɛ sɔsɔɖɛ se ɖɩɖʋ Yehowa nesi tʋmɩyɛ nɖɩ ɖɩ-labʋ taa nɛ tʋmɩyɛ nɖɩ ɖɩkɛnɩ ɖɔɖɔ ɖɛ-Ɛsɔ sɛtʋ hɔɔlʋʋ nakʋyʋ.—Keɣa 126:1; Natʋ 7:15.

• Ye ŋyeki se lone nɖɩ ɖɩ-taa ŋcaɣ kpaaŋ taa yɔ, ɖɩwɛɛ cɩɖɩ cɩɖɩ yɔ. Paa ñɛ-wɛtʋ ɛɛhaɣ-ŋ nʋmɔʋ yɔ, kediɣzisi tɛŋ lɛ, ŋpɩzɩɣ ŋñaɣ pana nɛ ŋtɔzɩ mbʋ mbʋ pɩtɔlɩ tataa ɖenɖe ŋcaɣ yɔ.

• Ye ŋɖʋʋ nesi ɖʋtʋ ndʋ ɛgbɛyɛ lakɩ ɖoŋ ɖoŋ se pañalɩ Kewiyaɣ Kpaaŋ nɛ pɔñɔɔzɩ mbʋ mbʋ pɩwɛɛkaa yɔ. Ye ɛyaa ɩkɔm sakɩyɛ yɔ, piyeki nɛ tʋmɩyɛ wɛɛ kɛlɛʋ nɛ panɩɩ leleŋ nɛ pɩkɩlɩ.—lv 92-93 § 18.

• Ye ŋhaɣ liidiye yɔ. Paa mbʋ ŋhaɣ yɔ pɩwɛ ɛzɩ “kobonaa naalɛ” nɛ pɩlɩɩnɩ ña-laŋɩyɛ taa yɔ, Yehowa nɩɣ leleŋ pɩ-yɔɔ.—Mark. 12:41-44.

• Ye ŋhaɣ ña-tɩ faaa alɩwaatʋ ndʋ ñɛ-wɛtʋ haɣ-ŋ nʋmɔʋ yɔ nɛ ŋsɩɣna nɛ pamaɣ nɛ pɔñɔɔzʋʋ Ɛsɔ sɛtʋ lona yɔ. Pɩtɩcɛyɩ se ŋwɛɛ niye kuduyiŋ maʋ taa pʋcɔ nɛ ŋɖʋ nesi tʋmɩyɛ nɖɩ.