Ɛjaɖɛ ɖɩnɛ ɖɩ-tɛm wɛɣ nɛ pɩñɔtʋʋ lɛ, ñam ñam lakasɩ, ɛtɛlɛmwaa lakasɩ nɛ yoŋ pɩwɛɣ nɛ pɩkpaɣ ɖoŋ. (Nat 6:4) Ɛzɩma ɖɩpɩzɩɣ nɛ ɖɩñɔɔzɩ ɖa-tɩ nɛ ɖɩɖaŋ kala wena awɛnɩ ɛsɩndaa yɔ?

• Ñɔɔzɩ ña-tɩ fezuu taa: Ñɩnɩ Bibl paɣtʋ kila nɛ Bibl kɛdɛsɩ nzɩ sɩpɩzɩɣ nɛ sɩsɩnɩ-ŋ nɛ ŋtaa Yehowa nɛ ɛgbɛyɛ liu siŋŋ yɔ nɛ nzɩ sɩsɩɣnɩ-ŋ se ŋtaaɖʋ ñɔ-nɔɔ ɛjaɖɛ tɔm taa yɔ. (Adu 12:5; jr-F 125-126 § 23-24) Lɛɛlɛɛyɔ pɩwɛɛ se ɖɩɖʋ taabalɩyɛ nɖɩ ɖɩcɛyɩsɩ camɩyɛ yɔ nɛ ɛgbɛyɛ taa koobiya.—1Pɩ 4:7, 8

• Ñɔɔzɩ ña-tɩ tomnaɣ yɔɔ: Wɛɛnɩ ɖɩmɛlɩyɛ ɖɩɣa taa nɛ mbʋ mbʋ pɩpɩzɩɣ nɛ pɩsɩnɩ-ŋ nɛ ŋwɛɛ wezuu nɛ alaafɩya ye kaɖɛ naɖɩyɛ ɛtalaa yɔ. Pɩtasɩ lɛ, la ɖʋtʋ ndʋ tɩkaɣ-mɩ sɩnʋʋ nɛ ɩlɩɩ mɩ-ɖɩɣa nɛ ise yɔ. Ñɔɔzɩ wondu kɩcɛyɩtʋ natʋyʋ nɛ ŋɖʋ huyuu ŋgʋ ŋkaɣ kpaɣʋ kaɖɛ alɩwaatʋ taa nɛ ŋse yɔ, kɩ-taa. Ðʋ kɩ-taa ɖɔɖɔ wondu ndʋ ŋhuuzuuni ñɔ-yɔɔ yɔ nɛ liidiye. Tɩlɩ nʋmɔʋ ŋgʋ kɩ-yɔɔ ŋpɩzɩɣ nɛ ŋtɩŋna nɛ ŋyɔɔdɩnɩ ɛzʋtʋyaa yɔ nɛ ŋyele ɖɔɖɔ nɛ paba tɩlɩ nʋmɔʋ ŋgʋ kɩ-yɔɔ papɩzɩɣ nɛ patɩŋna nɛ pɔyɔɔdɩnɩ-ŋ yɔ.—Iza 32:2; g17-F 5 3-7

Ñam ñam lakasɩ alɩwaatʋ taa lɛ, wolo pɩ-yɔɔ nɛ ŋlakɩ fezuu taa tʋma ɛzɩ ŋtɩɩlakʋʋ yɔ. (Fil 1:10) Taalɛɣzɩɣ lona yem yem, ye komina etiheyi-mɩ se ɩla mbʋ yɔ. (Mt 10:16) Ha lalaa tɔɔnaɣ nɛ wondu kɩcɛyɩtʋ lɛɛtʋ.—Rom 12:13

ƖCƆNƖ VIDEO ŊÑƆƆZƖ ÑA-TƖ NƐ ŊÐAŊ ASƐYƖŊ WEYI ƖLAKƖ ƐJAÐƐ YƆƆ YƆ?; NƐ PƲWAYƖ LƐ ICOSI TƆM TƲNƐ TƖ-YƆƆ:

• Ɛzɩma Yehowa pɩzɩɣ nɛ ɛsɩnɩ-ɖʋ kaɖɛ alɩwaatʋ taa?

• Ɛbɛ ɖɩpɩzɩɣ ɖɩla nɛ ɖɩñɔɔzɩ ɖa-tɩ?

• Ɛzɩma ɖɩpɩzɩɣ nɛ ɖɩsɩnɩ lalaa mba asɛyʋʋ talɩ-wɛ yɔ?