Asɛyɩŋ lakɩ ɖoŋ ɖoŋ ɖa-alɩwaatʋ tʋnɛ tɩ-taa. Alɩwaatʋ ndʋ asɛyɩŋ lakɩ yɔ, pɩsa nɛ pasɩnɩ mba asɛyʋʋ talɩ-wɛ yɔ camɩyɛ lɛ, pɩpɔzʋʋ se mba paɖʋʋ nesi yɔ pɔñɔɔzɩ pa-tɩ camɩyɛ nɛ pala ɖɔɖɔ ɖʋtʋ kɩbandʋ. Pʋyɔɔ Nɔɔɖɛyaa ɛgbɛyɛ kpaɣ lɩmaɣzɩyɛ se paa ɛgbɛyɛ piliŋa ŋga ka-taa lɛ, palɩzɩ tʋmɩyɛ naɖɩyɛ nɛ ɖɩlakɩ ɖʋtʋ nɛ ɖɩcɔŋnɩ mba pahaɣ pa-tɩ se paɖʋ nesi mba asɛyʋʋ talɩ-wɛ yɔ pe-ɖeɖe.

Ye Koobiya mba palakɩ tʋmɩyɛ nɖɩ yɔ panɩwa se asɛyʋʋ labɩ lone naɖɩyɛ taa yɔ, payaɣ peeɖe ɛzʋtʋyaa kpaagbaa se pana sɩnʋʋ mbʋ pɩpɔzʋʋ koobiya yɔ. Ye mbʋ asɛyʋʋ ŋgʋ kɩwɛɛkaa yɔ pɩɖɔ siŋŋ nɛ peeɖe koobiya ɩɩpɩzɩɣ se pɔñɔɔzɩ-pʋ pa-maɣmaɣ yɔ, ɛgbɛyɛ piliŋa lɩzɩɣ koobiya abalaa mba pamʋnaa yɔ, se pɛɖɛɛ nɔɔ nɛ paɖʋ nesi mba asɛyʋʋ talɩ-wɛ yɔ. Koobiya abalaa mba papɩzɩɣ nɛ pañɩnɩ koobiya lalaa nɛ pasɩnɩ-wɛ yaa pɔpɔzɩ se koobiya ɩha liidiye yaa wondu ndʋ pɩpɔzʋʋ ɖeyi ɖeyi yɔ. Papɩzɩɣ ɖɔɖɔ nɛ paya wondu ndʋ pɩpɔzʋʋ yɔ nɛ patayɩ mba asɛyʋʋ talɩ-wɛ yɔ.

Ye palakɩ tʋmɩyɛ mbʋ yɔ, pɩwazɩɣ koobiya siŋŋ. Ye paa koobu weyi ɛkʋyɩ ɛ-tɩ yɔɔ se ɛɖʋʋ nesi yɔ pɩpɩzɩɣ nɛ piyele nɛ koobiya sakɩyɛ ha wonuu kʋɖʋmʋʋ nɛ piyele nɛ wondu lɛɛtʋ tɛɖɩɣ mba asɛyʋʋ talɩ-wɛ yɔ. Pɩtasɩ lɛ, ye koobiya ɩɩlakɩ tʋmɩyɛ nɔɔ kʋɖʋmaɣ taa yɔ, piyeki nɛ papɩzɩ nɛ pelesi alɩwaatʋ sakɩyɛ nɛ paalakɩnɩ tʋmɩyɛ camɩyɛ po-ɖoŋ nɛ pa-haɖɛ.

Koobiya mba ɛgbɛyɛ piliŋa lɩzaa yɔ, papɩzɩɣ nɛ pala akɔnta nɛ pana liidiye nɖɩ pɩpɔzʋʋ yɔ nɛ ɛyaa ɛzɩma pɩpɔzʋʋ se paɖʋ nesi yɔ. Papɩzɩɣ ɖɔɖɔ nɛ powolo nɛ pana lone nɖɩ ɖɩ-taa ñʋndɩnaa. Ðoŋ ɖoŋ lɛ, mba ɖʋʋnɩ nesi nɛ sɩnʋʋ ɖʋtʋ ndʋ palaba yɔ tɩɖɔ camɩyɛ. Ye mbʋ pɩfɛyɩ se nɔɔyʋ ɛkʋyɩ ɛ-maɣmaɣ ɛ-tɩ yɔɔ se ɛpɔzʋʋ ɛyaa nɛ pɔcɔɔ liidiye, etiyiɣni wondu yaa ɛɖɔŋ nʋmɔʋ nɛ ewolo ɖenɖe asɛyʋʋ laba yɔ nɛ ɛɖʋ nesi. Ye pɔpɔzɩ-ɩ se ɛla mbʋ lɛ, kalɩ pi-yeke.

Asɛyʋʋ lakɩ lɛ, ɖɩsɔɔlaa se ɖɩɖʋ nesi. (Ebr 13:16) Ðɩsɔɔlɩ ɖo-koobiya! Ɛbɛ ɖɩpɩzɩɣ nɛ ɖɩla? Mbʋ pɩ-tɔm kɩlɩ cɛyʋʋ yɔ lɛ se ɖɩtɩmɩ pa nɛ mba pasɩɣnɩ-wɛ yɔ pɔ-yɔɔ. Ðɩpɩzɩɣ ɖɔɖɔ nɛ ɖɩtɩŋnɩ ɛjaɖɛ kpeekpe yɔɔ ɖɛ-Ɛsɔ sɛtʋ tʋma aɖakaɣ yɔɔ nɛ ɖɩla haɖɛ. Nɔɔɖɛyaa ɛgbɛyɛ ɖiyiɣ ɛgbɛyɛ pilinzi, nɛ sɩlakɩnɩ haɖɛ nɖɩ tʋmɩyɛ camɩyɛ, nɛ sɩsɩɣnɩ mba ɖeyi ɖeyi pɛwɛ kɩcɛyɩm taa yɔ. Nɛ ye ɖɩsɔɔlaa se ɖiwolo nɛ ɖɩɖʋ nesi yɔ, ɖɩpɩzɩɣ nɛ ɖɩñɩɣ niye takayaɣ ŋga payaɣ se Demande d’admission comme volontaire Local Developpement/Construction (DC-50) yɔ ka-taa.

CƆNƖ VIDEO LƖM WADƖ PREEZIILI ƐJAÐƐ TAA, NƐ PƲWAYƖ LƐ ŊCOSI TƆM TƲNƐ TƖ-YƆƆ:

Ɛzɩma Yehowa Aseɣɖe Tɩnaa labɩ ɖʋtʋ nɛ paɖʋ nesi alɩwaatʋ ndʋ lɩm wadɩ Preeziili ɛjaɖɛ taa pɩnaɣ 2020 taa yɔ, ɛbɛ tukuni-ŋ pɩ-taa?