Pɩkazɩ pazɩ Yehowa suuɖu sɩɣ tɩnaɣ. Pakaɣ ɖɩzʋʋ cɛtɩm Ɛsɔ sɛtʋ agbaa, ajɛɛ naayɛ kaɣ kpɛndʋʋ nɛ akʋyɩ Ɛsɔ samaɣ yɔɔ, nɛ Yehowa kaɣ ɖɩzʋʋ ɛyaa kɩdɛkɛdaa Armaagedɔɔ you taa. Krɩstʋ mba ɖaŋ ŋgee alɩwaatʋ ndʋ kpam.

Toovenim, ɖɩɩsɩŋ mbʋ payɩ pɩkaɣ labʋ kʋñɔŋ sɔsɔʋ alɩwaatʋ taa yɔ. Kɩɖaŋ nɩɩyɩ yɔ: Ðɩɩsɩŋ ɛzɩmtaa ɖeyi ɖeyi alɩwaatʋ ndʋ tɩpazɩɣ yɔ. Ðɩɩsɩŋ mbʋ ɖeyi ɖeyi pɩkaɣ tuyuu politiki ñʋndɩnaa nɛ pakʋyɩ Ɛsɔ sɛtʋ agbaa yɔɔ yɔ. Ðɩɩsɩŋ alɩwaatʋ ɛzɩma ɖeyi ɖeyi ajɛɛ kaɣ kʋyʋʋ Yehowa samaɣ yɔɔ yɔ nɛ mbʋ ɖeyi ɖeyi pakaɣ-kɛ labʋ yɔ. Ðɩɩsɩŋ ɖɔɖɔ ɛzɩma ɖeyi ɖeyi Yehowa kaɣ kpaɣnʋʋ nɛ ɛɖɩzɩ ɛyaa Armaagedɔɔ you taa yɔ.

Paa mbʋ yɔ, Masɩ heyi-ɖʋ mbʋ pɩpɔzʋʋ-ɖʋ ɖeyi ɖeyi se pɩsa nɛ ɖɩɖaŋ alɩwaatʋ ndʋ nɛ lidaʋ nɛ abalɩtʋ yɔ. Kɩɖaŋ nɩɩyɩ yɔ: Ðɩnawa se ɖɩwɛ «kɛdɛzaɣ kɩyakɩŋ» taa. (2Ti 3:1) Ðɩnawa se «pakaɣ pasʋʋ» kɩyakɩŋ weyi pakaɣ kʋyʋʋ Ɛsɔ sɛtʋ agbaa yɔɔ yɔ se pɩsa nɛ pataaɖɩzɩ toovenim Ɛsɔ sɛtʋ. (Mt 24:22) Ðɩnawa se Yehowa kaɣ yabʋ ɛ-samaɣ ñʋʋ. (2Pɩ 2:9) Nɛ ɖɩnawa ɖɔɖɔ se weyi Yehowa lɩzaa se ɛɖɩzɩ ɛyaa kɩdɛkɛdaa nɛ ɛya samaɣ sɔsɔɔ ñʋʋ Armaagedɔɔ you taa yɔ, ɛwɛ siɣsiɣ nɛ ɛwɛɛ ɖoŋ ɖɔɖɔ.—Nat 19:11, 15, 16.

Pɩtʋʋ fɛyɩ se mbʋ pɩkaɣ labʋ cee wayɩ yɔ pɩkaɣ yebu nɛ «sɔɔndʋ» kpa ɛyaa. Ɛlɛ ye ɖɩkalɩɣ nɛ ɖɩmaɣzɩɣ tɔm ndʋ Yehowa kaayɔɔdaa nɛ mbʋ ɛɛlaba nɛ pɩɖɛɛ yɔ pɩ-yɔɔ yɔ, ɖɩkaɣ pɩzʋʋ nɛ ‘ɖɩkʋyɩ nɛ ɖɩsɩŋ yiɣ yiɣ nɛ ɖɩkʋsɩ ɖa-ñʋŋ’ nɛ lidaʋ mbʋ pʋyɔɔ yɔ ɖa-taa tɛma se ɖa-ñʋʋ yabʋ ɖiɣni ñɔtʋʋ.—Lk 21:26, 28.