Kʋñɔŋ sɔsɔʋ ŋgʋ kiɖiɣni kɔm lɛɛ lɛɛ yɔ kɩ-yɔɔ lɛ, pɩpɔzaa se posusi tɔm kpɛdɛyɛ. (Ad 24:11, 12, 20) Ðɩpɩzɩɣ nɛ ɖɩlabɩnɩ tʋmɩyɛ JW.ORG tɛ cartes waa nɛ ɖɩhɔ ɛyaa lɩmaɣza nɛ ɖiwoni Ɛsɔtɔm yaa ɖɛ-tɛ intɛrnɛɛtɩ lone yɔɔ. Yʋsaɣ nakɛyɛ wɛ cartes waa mba pɔ-yɔɔ nɛ kowokini Ɛbɛ yɔɔ pɩwɛɛ se ɛyʋ ɛkpɛlɩkɩ Bibl? tɛ video yɔɔ. Hɔɔlʋʋ nakʋyʋ wɛ pɔ-yɔɔ nɛ ɛyaa pɩzɩɣ nɛ patɩŋnɩ kɩ-yɔɔ nɛ pɔpɔzɩ se pasɩnɩ-wɛ nɛ patɩlɩ nɛ pɩkɩlɩ yaa pɛkpɛlɩkɩnɩ-wɛ Bibl. Ɛyaa nabɛyɛ tɩsɔɔlɩ se pakalɩ ɖa-takayɩsɩ, ɛlɛ pɔsɔɔlaa se powolo ɖɛ-tɛ intɛrnɛɛtɩ lone yɔɔ. Ye mbʋ sɔɔndʋ ɛtaakpa-ŋ, ha-wɛ cartes waa mba. Ɛlɛ ye ŋwobi ɖɩɣa nakɛyɛ taa nɛ ɛyaa fɛyɩ yɔ, taasɩɩ cartes waa peeɖe.

Ŋŋlakɩ ñe-evemiye taa tʋma lɛ, ŋpɩzɩɣ nɛ ŋheyi ɛyaa se: “Mancaɣ se maha-ŋ nabʋyʋ. Carte kʋnɛ kɩyɔɔdʋʋ intɛrnɛɛtɩ lone naɖɩyɛ tɔm. Videowaa nɛ tɔm ndɩ ndɩ wɛ ɖɩ-yɔɔ; ŋpɩzɩɣ nɛ ŋkpaɣ pɩtɩŋa peeɖe, ŋŋhɛyɩɣ nabʋyʋ.” (Yoh 4:7) Cartes waa mba patɩpaɣlɩ, ye mbʋ ŋpɩzɩɣ nɛ ŋɖɔkɩ nabɛyɛ nɛ ŋha ɛyaa paa ɛzɩmtaa.