Yesu susi “Ɛsɔ Kewiyaɣ tɔm kɩbandʋ.” (Lk 4:43) Ɛwɩlɩ ɛ-tɔmkpɛlɩkɩyaa se patɩmɩ se Kewiyaɣ ŋga kɔkɔɔ. (Mt 6:9, 10) Ðɩkaɣ ñaɣʋ pana siŋŋ novembre fenaɣ taa nɛ ɖisusi Ɛsɔ Kewiyaɣ tɔm. (Mt 24:14) La ɖʋtʋ camɩyɛ nɛ ŋpɩzɩ nɛ ŋɖʋ nesi ŋgee tɔm susuu tʋmɩyɛ nɖɩ. Mba pakaɣ labʋ nʋmɔʋ lɩzɩyʋ sɩnɩyʋ tʋmɩyɛ fenaɣ ŋga ka-taa yɔ, pakaɣ wɛnʋʋ waɖɛ se palɩzɩ se posusuu tɔm ñɩɣtʋ 30 yaa 50.

Wɩlɩ ño-kooka taa ɛyaa sakɩyɛ masɩ nzɩ sɩyɔɔdʋʋ Ɛsɔ Kewiyaɣ tɔm yɔ. Pɩwɛɣ ɖeu se ŋmaɣzɩ Ɛsɔ sɛtʋ agbaa wena a-taa ñɔ-tɔm welisiyaa wɛɛ yɔ a-yɔɔ pʋcɔ nɛ ŋlɩzɩ masɩ nzɩ ŋkalɩɣ yɔ. Ye nɔɔyʋ ɛwɩlaa se Ɛsɔtɔm kɛdɩnɩ-ɩ yɔ, ha-ɩ Feŋuu Tilimiye, No. 2 2020. Pʋwayɩ lɛ, ŋpɩsɩ nɛ ŋna-ɩ lɔŋ nɛ ŋñaɣ pana nɛ ŋtɩŋnɩ Tɔm wɩlʋʋ wondu taa takayaɣ nakɛyɛ yɔɔ nɛ ña nɛ ɩ ɩpaɣzɩ kpɛlɩkʋʋ Bibl. Pɩkazɩ pazɩ, Ɛsɔ Kewiyaɣ ɖɩzɩɣ ɛjaɖɛ yɔɔ kominawaa kpeekpe. (Dan 2:44; 1Kɔ 15:24, 25) Pʋyɔɔ lɛ, ɖɩla mbʋ payɩ ɖɩpɩzɩɣ yɔ nɛ ɖɩɖʋ nesi ŋgee tɔm susuu tʋmɩyɛ ɖɩnɛ nɛ ɖɩwɩlɩ se ɖɩtɩnɩɣ Yehowa nɛ e-Kewiyaɣ pɔ-yɔɔ.