Ðɛ-tɛ intɛrnɛɛtɩ lone ɖɩbazɩyɛ hɔɔlʋʋ yɔɔ, paɖʋʋ tɔm ñʋŋ nɩɩyɩ nɛ videowaa nabɛyɛ; papɩzɩɣ nɛ pɛkɛdɩnɩ ɛyaa mba pɛwɛnɩ laŋa kɩbana yɔ. (Tʋma 13:48) Ðoŋ ɖoŋ lɛ, wondu ndʋ tɩñɩkɩɣ niye mbʋ pɩlaba nɛ pitileɖi yɔ, yaa mbʋ pɩ-yɔɔ ɛyaa ɖiɣni maɣzʋʋ nɛ peɖiɣni pɩ-tɔm yɔɔdʋʋ yɔ pɩ-yɔɔ.

Ɛzɩma ŋpɩzɩɣ nɛ ŋlabɩnɩ tʋmɩyɛ jw.org ɖɩbazɩyɛ hɔɔlʋʋ ñɔ-tɔm susuu taa?

• Woki ɖɛ-tɛ intɛrnɛɛtɩ lone yɔɔ ɖoŋ ɖoŋ. Yʋsɩ wondu kɩfatʋ ndʋ paɖʋ peeɖe yɔ, nɛ ŋmaɣzɩ nɛ ŋna ɛzɩma ŋpɩzɩɣ nɛ ŋlabɩnɩ-tʋ tʋmɩyɛ nɛ ŋsɩnɩ laŋa kɩbana tɩnaa yɔ pɩ-yɔɔ. (Ye ŋsɔɔlaa se ŋna wondu kɩfatʋ lɛɛtʋ ndʋ paɖʋ ɖɛ-tɛ intɛrnɛɛtɩ lone ɖɩbazɩyɛ hɔɔlʋʋ yɔɔ yɔ, wolo hɔɔlʋʋ «Pɩna nɛ pɩkɩlɩ» taa.) Ye ŋwoki ɖɛ-tɛ intɛrnɛɛtɩ lone yɔɔ ɖoŋ ɖoŋ nɛ ŋnaɣ wondu kɩfatʋ ndʋ tɩwɛ peeɖe yɔ, pɩsɩɣnɩ-ŋ nɛ ŋlabɩnɩ tʋmɩyɛ tɔm kɩfatʋ ñɔ-tɔm susuu taa.

• Tɩŋnɩ tɔm ñʋŋ nɛ videowaa mba pɛwɛ ɖɛ-tɛ intɛrnɛɛtɩ lone ɖɩbazɩyɛ hɔɔlʋʋ yɔɔ yɔ ɖɩ-yɔɔ nɛ ŋpaɣzɩ kɛdaɣ. Tɔm ndʋ tɩwɛ hɔɔlʋʋ ŋgʋ kɩ-yɔɔ yɔ, tɩpɩzɩɣ nɛ tɩsɩnɩ-ɖʋ nɛ ɖɩtɩlɩ tɔm ndʋ tɩpɩzɩɣ nɛ tɩkɛdɩnɩ ɖo-kooka taa mba yɔ.

• Wɩlɩ ɛyaa ɖɛ-tɛ intɛrnɛɛtɩ lone ɖɩbazɩyɛ hɔɔlʋʋ. Ñɩɣ niye tɔm ñʋŋ weyi ɩpɩzɩɣ nɛ ɩkɛdɩnɩ-wɛ yɔ ɩ-yɔɔ nɛ ŋwɩlɩ-wɛ ɛzɩma papɩzɩɣ nɛ palabɩnɩ tʋmɩyɛ ɖɛ-tɛ intɛrnɛɛtɩ lone yɔ.

• Tiyini-wɛ lien. Ɛyaa nabɛyɛ tɩsɔɔlɩ se ɖa nɛ wɛ ɖɩla kɛdɛsɩ, ɛlɛ papɩzɩɣ nɛ petisi nɛ powolo ɖɛ-tɛ intɛrnɛɛtɩ lone yɔɔ. Ye mbʋ ye ŋnawa se ɖɔ-tɔm kɛdɩnɩ nɔɔyʋ yɔ, tiyini-i ɖɛ-tɛ intɛrnɛɛtɩ lone ɖɩbazɩyɛ hɔɔlʋʋ yaa tɔm ñʋʋ nakʋyʋ yaa video nakʋyʋ ŋgʋ kɩwɛ hɔɔlʋʋ ŋgʋ kɩ-yɔɔ yɔ kɩ-tɛ lien.