Kigbeɣluu sɔsɔʋ ŋgʋ ɖɩlabɩ pɩnaɣ 2020 taa yɔ kɩ-wayɩ fɛyɩ. Ŋgʋ kɛnɩ kigbeɣluu sɔsɔʋ kajalaɣ ñɩŋgʋ ŋgʋ paɖʋ ki-kpeekpe intɛrnɛɛtɩ yɔɔ se ɛjaɖɛ kpeekpe yɔɔ koobiya ɩpɩzɩ nɛ pɔcɔna yɔ. Ɛlɛ Malaawii nɛ Moozambiiki ajɛɛ taa lɛ, pɩtɩkɛ intɛrnɛɛtɩ yɔɔ koobiya sakɩyɛ tɩŋnaa nɛ pɔcɔnɩ kɩ-ɖʋtʋ. Ɛzɩma palaba?

 Nɔɔɖɛyaa Ɛgbɛyɛ tɛ Ðʋtʋ yɔɔ cɔnɩyaa Kɔɔmiite nɛ Tɔm wɩlʋʋ Kɔɔmiite paha nʋmɔʋ se paɖʋ kigbeɣluu ɖʋtʋ teeleewaa nɛ raadiyoowaa yɔɔ Malaawii nɛ Moozambiiki ajɛɛ taa. Ɛbɛ yɔɔ palabɩ ŋgee ɖʋtʋ ndʋ? Kedeŋa kpeekpe yɔɔ lɛ, ajɛɛ wena a-taa intɛrnɛɛtɩ wɛ liidiye siŋŋ yɔ, a-taa naɖɩyɛ lɛ Malaawii, nɛ pʋyɔɔ lɛ Aseɣɖe Tɩnaa pazɩ yem lakɩnɩnɩ tʋmɩyɛ intɛrnɛɛtɩ. Koobu William Chumbi weyi ɛwɛ Malaawii Ɛgbɛyɛ piliŋa kɔɔmiite taa yɔ, ɛlɩzɩ pɩ-taa nɛ ɛyɔɔdɩ se: “Raadiyoo nɛ teelee ɖeke yɔɔ papɩzaɣ nɛ patɩŋna nɛ paha koobiya fezuu taa tɔɔnaɣ kanɛ.” Luka Sibeko weyi ɛwɛ ɖɔɖɔ Malaawii ɛgbɛyɛ piliŋa kɔɔmiite taa yɔ, esuyaa se: “Ye pataala kigbeɣluu ŋgʋ Raadiyoo nɛ teelee yɔɔ yɔ, ɖɛ-ɛgbɛyɛ piliŋa ageeta taa koobiya sakɩyɛ taapɩzɩ nɛ pɔcɔnɩ kigbeɣluu ŋgʋ kɩ-ɖʋtʋ.” Moozambiiki ɛjaɖɛ taa, pɩtasɩna se intɛrnɛɛtɩ wɛ liidiye siŋŋ lɛ, koobiya pazɩ yem pɩzaɣna se paya pɔrtaabɩlɩwaa yaa taabɩlɛɛtɩwaa mba pamʋna yɔ.

 COVID-19 kʋdɔŋ sɔsɔʋ yɔɔ lɛ, ɖɩɩtɛm paɣzʋʋ labʋ ɛgbɛyɛ taa kediɣzisi Raadiyoowaa nɛ teeleewaa yɔ. a Ðo-koobiya pɔzɩ teeleewaa nɛ raadiyoowaa mba pa-ñʋndɩnaa se patasɩ-wɛ haʋ alɩwaatʋ natʋyʋ se pɩsa nɛ paɖʋ kigbeɣluu ɖʋtʋ nɛ ɛyaa cɔna yaa pewelisi.

 Ðo-koobiya katɩ kaɖɛ naɖɩyɛ Malaawii ajɛɛ taa. Ðoŋ ɖoŋ lɛ, teeleewaa nɛ raadiyoowaa ɩɩhaɣ nʋmɔʋ se pala ɖʋtʋ natʋyʋ nɛ pɩcɛzɩ ñɩyʋʋ kʋɖʋmʋʋ yɔɔ. Pamaɣzɩɣ se ye ɖʋtʋ natʋyʋ ɛkɩlɩ ɖaɣlʋʋ yɔ, pɩnɩɣ ɛyaa nɛ peyele tɩ-cɔnʋʋ yaa ti-welisuu. Ɛlɛ ɖo-koobiya lɩzɩ pɩ-taa se tʋmɩyɛ nɖɩ ɖɩlakɩ yɔ ɖɩwazɩɣ samaɣ. Halɩ pɩkpɛndɩnɩ alɩwaatʋ ndʋ tɩ-taa ɛyaa fɛyɩnɩ waɖɛ se palɩɩ pa-ɖɩsɩ yɔ, ɖiwobi pɩ-yɔɔ nɛ ɖisusuu-wɛ laŋhɛzɩyɛ tɔm ndʋ tɩwɛ Bibl taa yɔ, nɛ pɩsɩɣnɩ-wɛ se pɛkɛ tɛtʋ taa ɛyaa kɩbama nɛ pehiɣ koboyaɣ pɔ-hɔʋ taa. Panɩ mbʋ lɛ, petisi nɛ patasɩ ɖo-koobiya haʋ alɩwaatʋ.

 Malaawii ɛjaɖɛ taa, palabɩ kigbeɣluu ɖʋtʋ teelee kʋɖʋmʋʋ nɛ Raadiyoo kʋɖʋmʋʋ yɔɔ, nɛ ɖʋtʋ ndʋ tɩpɩzaɣ se tɩtalɩ ɛyaa miiliyɔɔwaa sakɩyɛ pɛ-ɛjaɖɛ kpeekpe taa. Moozambiiki ɛjaɖɛ taa lɛ, palabɩ kigbeɣluu ŋgʋ teelee kʋɖʋmʋʋ nɛ raadiyoowaa 85 yɔɔ.

 Pɩsa nɛ ɛyaa pɩzɩ nɛ pɔcɔnɩ kigbeɣluu ɖʋtʋ teeleewaa yɔɔ ajɛɛ ana a-taa lɛ, palabɩnɩ tʋmɩyɛ liidiye $28,227 b (yaa franc cfa 16 miiliyɔɔ mbʋ yɔ), nɛ pɩsa nɛ ɛyaa welisi kigbeɣluu ɖʋtʋ raadiyoowaa yɔɔ ajɛɛ ana a-taa lɛ, palabɩnɩ tʋmɩyɛ liidiye $20,000 (yaa franc cfa 11 miiliyɔɔ mbʋ yɔ). Pɛhɛyaɣ liidiye nɖɩ raadiyoowaa cikpema yɔ, ɖɩtaaɖɔʋ nɛ pɩtalɩɣ nɖɩ pɛhɛyɩɣ raadiyoowaa mba pɔ-tɔm talɩɣ paa ɛjaɖɛ nɖɩ lɛ, ɖɩ-tɛtʋ kpeekpe taa yɔ. Pɛhɛyaɣ-wɛ kpaɣnɩ ɛzɩ $15 (yaa franc cfa 8000 mbʋ yɔ) nɛ puwolo $2,777 (yaa franc cfa 1,5 miiliyɔɔ mbʋ yɔ).

 Ðo-koobiya ñaɣ pana nɛ palabɩnɩ haɖɛ tʋmɩyɛ camɩyɛ. Malaawii ajɛɛ taa, koobiya pɔzaa se papasɩ liidiye nɛ papasɩ-wɛ canta nɛ piye mɩnʋʋ yɔɔ. Piyeba nɛ papɩzɩ nɛ pɔtɔsɩ liidiye $1,711 (yaa franc cfa 950 000 mbʋ yɔ). Moozambiiki ɛjaɖɛ taa lɛ, raadiyoowaa nabɛyɛ tisaa nɛ papasɩ pe-liidiye yɔɔ mbʋ pʋyɔɔ yɔ pasɩm Yehowa Aseɣɖe Tɩnaa se pɛkɛ ɛyaa mba pɛwɛ toovenim nɛ pɛhɛyɩɣ alɩwaatʋ yɔɔ yɔ.

 Ðo-koobiya taa labɩ leleŋ siŋŋ se papɩzaa nɛ patɩŋnɩ raadiyoowaa nɛ teeleewaa yɔɔ nɛ pala kigbeɣluu. Malaawii ɛjaɖɛ taa ɛzʋtʋyʋ weyi payaɣ-ɩ se Patrick yɔ, ɛyɔɔdaa se: “Ðɩsɛɣ Nɔɔɖɛyaa Ɛgbɛyɛ taa koobiya ɛzɩma pamaɣzɩ ɖɔ-yɔɔ kʋdɔŋ sɔsɔʋ kʋnɛ kɩ-alɩwaatʋ taa yɔ pɩ-yɔɔ.” Isaac wɛ ɖɔɖɔ Malaawii ɛjaɖɛ taa. Ɛyɔɔdaa se: “Ðɩfɛyɩnɩ pɔrtaabɩlɩ yaa taabɩlɛɛtɩ, pʋyɔɔ ɖa-taa labɩ leleŋ siŋŋ se Yehowa ɛgbɛyɛ labɩ ɖʋtʋ se ɖɩpɩzɩ nɛ ɖiwelisi kigbeɣluu raadiyoo yɔɔ. Ðʋtʋ tʋnɛ tiyeba nɛ kigbeɣluu wazɩ mɔ-hɔʋ kpeekpe. Pɩkɛnɩ-ɖʋ yʋsaɣ ŋga kawɩlɩɣ se Yehowa sɔɔlɩ ɛ-samaɣ yɔ.”

 Pɩnaɣ 2020 kigbeɣluu sɔsɔʋ kɛnɩ kajalaɣ ñɩŋgʋ ŋgʋ Moozambiiki tɔm susuyu nɔɔyʋ woba yɔ. Ɛyɔɔdaa se: “Mbʋ payɩ palaba se pɩsa nɛ ɖɩcɔnɩ kigbeɣluu ɖʋtʋ teelee yɔɔ yɔ, pɩtɔzɩ-m se Yehowa kɛnɩ Ðoŋ tɩŋa tʋ. Kʋdɔŋ sɔsɔʋ kʋnɛ kɩtɩpɩzɩ nɛ kɩɖɩɣ-ɩ nʋmɔʋ se ewolo pɩ-yɔɔ nɛ ɛha-ɖʋ fezuu taa tɔɔnaɣ, nɛ halɩ ɛkɔnɩ-m tɔɔnaɣ ŋga ma-maɣmaɣ mon-kuduyuu tɛɛ. Piyeba nɛ mana se sɔɔlɩm wɛ Yehowa sɛyaa hɛkʋ taa. Man-taa tɛma se toovenim Ɛsɔ sɛtʋ taa mɛwɛɛ.”

 Payaɣ ɛgbɛyɛ taa ɛzʋtʋyʋ nɔɔyʋ se Wyson, ɛyɔɔdaa se: “Mɔnsɔɔlaa se mawɩlɩ mɛ-ɛsɩmɩyɛ yom siɣsiɣ tʋ ɛzɩma ɛcɔŋnɩ ɖɔ-yɔɔ camɩyɛ kʋdɔŋ sɔsɔʋ alɩwaatʋ taa yɔ pɩ-yɔɔ. Tanɩm ageeta wena awɛ kedeŋa yɔɔ yɔ, a-taa naɖɩyɛ taa ɖɩwɛɛ nɛ ɛzɩma palabɩ ɖʋtʋ se ɖɩcɔnɩ kigbeɣluu ɖʋtʋ teelee yɔɔ yaa ɖiwelisi-tʋ raadiyoo yɔɔ yɔ, pɩwazɩ ɖa mba ɖɩwɛ tanɩm taa yɔ pɩdɩɩfɛyɩ.”

 Nɔɔɖɛyaa Ɛgbɛyɛ tɛ Ðʋtʋ yɔɔ cɔnɩyaa Kɔɔmiite nɛ Tɔm wɩlʋʋ Kɔɔmiite tasɩ haʋ nʋmɔʋ se pala 2021 kigbeɣluu ɖʋtʋ teeleewaa nɛ raadiyoowaa yɔ ageeta naayɛ taa. Le ɖɩkaɣ lɩʋ liidiye yɔɔ nɛ ɖɩpɩzɩ nɛ ɖɩla mbʋ? Haɖɛ nɖɩ ɩtɩŋɩɣnɩ nʋmɔŋ ndɩ ndɩ yɔɔ nɛ ɩlakɩ ɛzɩ pɔyɔɔdʋʋ donate.pr418.com yɔɔ, se ɩɖʋnɩ nesi ɛjaɖɛ kpeekpe yɔɔ tɔm susuu tʋmɩyɛ yɔ, ɖɩ-yɔɔ ɖɩtɩŋɩɣna. Ðɩsɛɣ-mɩ pɩdɩɩfɛyɩ haɖɛ nɖɩ ɩlakɩ yɔ ɖɩ-yɔɔ.