Videowaa mba ɖɩcɔŋnɩ ɖe-kigbeɣliŋ sɔsɔŋ taa yɔ, potukuuni ɖa-laŋa nɛ pasɩɣnɩ-ɖʋ se ɖɩnɩɩ Bibl wɩlɩtʋ taa camɩyɛ. Pɩnaɣ 2020 kigbeɣluu sɔsɔʋ “Paa ɛzɩmtaa lɛ, ɩwɛɛ laŋhʋlʋmɩyɛ taa”! taa pawɩlɩ videowaa 114 nɛ pa-taa 43 kɛ Nɔɔɖɛyaa Ɛgbɛyɛ taa koobiya nɛ pa-sɩnɩyaa tɔm yɔɔdʋʋ. Wiɖiyi ŋtɛm ña-tɩ pɔzʋʋ se tʋma wena payɩ pɩpɔzʋʋ se pala nɛ pɔñɔɔzɩnɩ videowaa mba nɛ liidiye ɛzɩma ɖɔɖɔ pɩpɔzʋʋ?

 Ɛjaɖɛ kpeekpe yɔɔ koobiya ɛzɩ 900 mbʋ yɔ kpaɣnɩ pa-alɩwaatʋ nɛ pɛ-lɛɣtʋ nɛ paɖʋ nesi nɛ pɔñɔɔzɩ ɖʋtʋ ndʋ. Pakpaɣ ñɩɣtʋ ɛzɩ 100 000 mbʋ yɔ nɛ palabɩnɩ tʋmɩyɛ nɖɩ pɩnzɩ naalɛ taa. Nɛ ñɩɣtʋ ndʋ tɩ-taa lɛ, pakpaɣ ñɩɣtʋ 70 000 nɛ pɔñɔɔzɩnɩ cɛcɛsɩ 76 tɛ filim Nehemiya: ‘Yehowa taa leleŋ kɛnɩ mi-ɖoŋ’.

 Pɩtʋʋ fɛyɩ se mɩ-maɣmaɣ ɩnawa se tʋmɩyɛ nɖɩ, ɖɩ-labʋ pɔzʋʋ liidiye sakɩyɛ: Pɩpɔzʋʋ se paha koobiya mba paha pa-tɩ faaa nɛ palakɩ tʋmɩyɛ nɖɩ yɔ tɔɔnaɣ, ɖɩzʋyɛ, ɖenɖe pala pa-tʋmɩyɛ yɔ nɛ wondu lɛɛtʋ ndʋ pɩpɔzʋʋ-wɛ yɔ.

 Jared Gossman weyi ɛha ɛ-tɩ nɛ ɛɖʋʋ nesi kɩlɛmɩŋ nɛ nɔsɩ kpaɣyaa yɔ ɛyɔɔdaa se: “Nɔɔɖɛyaa Ɛgbɛyɛ tɛ Tɔm wɩlʋʋ Kɔɔmiite sɔɔlɩ kpem se ɖɛ-tɛ videowaa ɩmʋnɩ wɛtʋ ndʋ tɩwɛ ajɛɛ ndɩ ndɩ taa yɔ. Mbʋ yekina nɛ ɖɩna kpayɩ kpayɩ se ɖɩwɛ ɛjaɖɛ kpeekpe yɔɔ hɔʋ nakʋyʋ taa. Lɩmaɣzɩyɛ nɖɩ ɖɩ-yɔɔ pɛtɛyɩ tʋmlaɖaa tindima 24 taa, nɛ tindima ana awɛ ajɛɛ 11 taa. Pɩɩpɔzɩ liidiye sakɩyɛ nɛ ɖʋtʋ labʋ camɩyɛ pʋcɔ nɛ tindima ana apɩzɩ ala tʋmɩyɛ nɔɔ kʋɖʋmaɣ taa.”

 Pɩtasɩ lɛ pʋcɔ nɛ ɖɩpɩzɩ ɖɩla ɖɛ-tɛ videowaa sakɩyɛ lɛ, pɩɩpɔzaa se ɖɩlabɩnɩ tʋmɩyɛ wondu ndʋ tɩwɛ ŋgee yɔ. Kɩɖaʋ nakʋyʋ yɔ: Pɩsa nɛ ɖɩla filim Nehemiya: ‘Yehowa taa leleŋ kɛnɩ mi-ɖoŋ’ lɛ, ɖɩñɔɔzɩ lone naɖɩyɛ Mt. Ebo videowaa ɖɩlaɖɛ taa nɛ pɩmʋnɩ filim ŋgʋ camɩyɛ. Mt. Ebo videowaa ɖɩlaɖɛ nɖɩ ɖɩñɔtɩnɩ Patterson, Niyuu Yɔrɩkɩ tɛtʋ taa, Etaazuunii ɛjaɖɛ taa. Koobiya kaasɔɔlaa se palabɩnɩ haɖɛ tʋmɩyɛ camɩyɛ. Paasɔɔlaa ɖɔɖɔ se wɛtʋ ndʋ tɩ-taa palakɩ filim ŋgʋ yɔ, tɩmʋnɩ wɛtʋ ndʋ tɩɩwɛ Nehemiya alɩwaatʋ taa yɔ. Pʋyɔɔ polubi wondu ndʋ tɩfɛyɩ yuŋ ɛlɛ tɩwɛ ɛzɩ caanaʋ taa Yeruzalɛm tɛtʋ yɔ. Paa wonuu ŋgʋ lɛ, palabɩ-kʋ nɛ kpoŋgbolonaa nɛ kɩ-tɛ kɩkʋyɩŋ kɛ mɛtanaa loɖo; pohuuzi kɩ-yɔɔ mousse yaa wonuu ŋgʋ kɩwɛ cafʋʋʋ yɔ, nɛ pataa kɩ-yɔɔ tɔlɩm nɛ kɩwɛɛ ɛzɩ koloŋa ŋga pamanɩ pɛɛ yɔ. Papɩzɩɣ nɛ pakpaɣ paa “koloŋa” ŋga lɛ kɛlɛʋ yem nɛ pɛkɛzɩ-kɛ lone nɛ palabɩnɩ-kɛ tʋmɩyɛ wɛtʋ ndɩ ndɩ taa se pɩsa nɛ pataakɩlɩ lubu wondu sakɩyɛ. Paa mbʋ yɔ, liidiye nɖɩ palabɩnɩ tʋmɩyɛ nɛ polu wondu ndɩ ndɩ yɔ pɩkazɩ pazɩ se ɖɩtalɩ 54 418 942 F CFA. a

 Ðɩtɩlʋʋ tɔm tʋnɛ yɔ, pɩsɩɣnɩ-ɖʋ se ɖɩlɩzɩ ɖɛ-ɛsɩmɩyɛ nɛ ɖɩwɩlɩ nɛ pɩkɩlɩ pɩnaɣ kanɛ kɛ-tɛ kigbeɣluu sɔsɔʋ ɖʋtʋ yɔɔ. Ða-taa tɛma se pana wena pañaɣ nɛ pɔñɔɔzɩ ɖʋtʋ tʋnɛ yɔ a-yɔɔ lɛ, ɛjaɖɛ kpeekpe yɔɔ ɛyaa kaɣ kpɛndʋʋ nɛ pasa Yehowa. Ðɩsɛɣ-mɩ pɩdɩɩfɛyɩ ɛzɩma ɩtɩŋɩɣnɩ donate.pr418.com nɛ nʋmɔŋ lɛɛŋ yɔɔ nɛ ɩlakɩ haɖɛ faaa nɛ ɩɖʋʋ nesi tʋmɩyɛ nɖɩ ɖɩlakɩ ɛjaɖɛ kpeekpe yɔɔ yɔ.