Ye pakpaɣ ɖɔ-tɔm ɖɛzɩyaa 100 yɔ, pa-taa mba paalakɩ tʋmɩyɛ Betɛɛlɩ, ɛlɛ palakɩ tʋmɩyɛ tɔm ɖɛzʋʋ lona wena aposaa yɔ a-taa yɔ, pɛcɛzɩ 60. Wazasɩ nzɩ ɖʋtʋ ndʋ tɩkɔŋna? Wondu ndʋ pɩpɔzʋʋ tɔm ɖɛzɩyaa se papɩzɩ nɛ pala pa-tʋmɩyɛ camɩyɛ tɔm ɖɛzʋʋ lona wena aposaa yɔ a-taa? Lone nɖɩ ɖɩ-taa tɔm ɖɛzɩyaa wɛɛ yɔ, ɖoŋ weyi ɖɩwɛnɩ tʋmɩyɛ nɖɩ palakɩ yɔ ɖɩ-yɔɔ?

 Tɔm ɖɛzʋʋ lona wena aposaa yɔ, ahaɣ waɖɛ tɔm ɖɛzɩyaa se pala pa-tʋmɩyɛ lona wena a-taa ɛyaa sakɩyɛ yɔɔdʋʋ kʋnʋŋ ŋgʋ pɛɖɛzɩɣ yɔ. Koobu halɩñɩnʋ Karin weyi ɛɖɛzɩɣ kʋnʋŋ ŋgʋ payaɣ se Bas allemand yɔ, ɛyɔɔdaa se: “Kpaɣnɩ alɩwaatʋ ndʋ ɖɩkʋyaa nɛ ɖɩkɔɔ Cuauhtémoc, Mɛkɩsiiki tɛtʋ ndʋ payaɣ se Chihuahua yɔ, tɩ-taa yɔ, ɖɩyɔɔdʋʋ Bas allemand kʋnʋŋ paa ɛzɩmtaa, ɖa nɛ tɔm ɖɛzɩyaa lalaa, tɔm susuu taa nɛ alɩwaatʋ ndʋ ɖɩlɩɣ wondu yabʋ yɔ. Ɛyaa mba pɔyɔɔdʋʋ kʋnʋŋ ŋgʋ yɔ, mba cɔnɩ-ɖʋ nɛ pata. Pɩhaɣ-ɖʋ waɖɛ se ɖɩnɩɩ tɔm pee kɩfana nɛ ɖɩna ɛzɩma pɔyɔɔdʋʋ kʋnʋŋ ŋgʋ lɛɛlɛɛyɔ yɔ.”

 James weyi ɛɖɛzɩɣ Frafra kʋnʋŋ Gana ɛjaɖɛ taa yɔ, ɛyɔɔdaa se nabʋyʋ taa pɩlakɩ-ɩ liu se ɛkatɩ koobiya halaa nɛ abalaa mba ɛ nɛ wɛ palakaɣ tʋmɩyɛ Betɛɛlɩ yɔ. Ɛlɛ ɛtasɩ yɔɔdʋʋ se: “Mɔnsɔɔlɩ tʋmɩyɛ nɖɩ malakɩ tɔm ɖɛzʋʋ lone nɖɩ ɖiposaa yɔ ɖɩ-taa yɔ. Monsusuu tɔm egeetiye taa ɛyaa nɛ manaɣ ɛzɩma pɩlakɩ-wɛ alɩwaatʋ ndʋ panɩɣ laŋhɛzɩyɛ tɔm pa-maɣmaɣ pa-kʋnʋŋ taa yɔ lɛ, pɩkɛdɩɣnɩ-m pɩdɩɩfɛyɩ.”

 Ɛzɩma koobiya lakɩ nɛ patɩlɩɣ ɖenɖe pɩpɔzʋʋ se patʋlɩ tɔm ɖɛzʋʋ lone nɖɩ ɖiposaa yɔ? Joseph lakɩ tʋmɩyɛ Ɛjaɖɛ kpeekpe yɔɔ tʋmɩyɛ nɖɩ ɖɩmaɣ, ɖɩñɔɔzʋʋ nɛ ɖɩkandɩyɩɣ kuduyuŋ yɔɔ yɔ ɖɩ-taa. Ɛyɔɔdaa se: “Kala wena ɖɩkatɩɣ yɔ a-taa naɖɩyɛ lɛ se lona naayɛ taa, pɛcɛkɩ laatriki miŋ nɛ lɩm ɖoŋ ɖoŋ, yaa intɛrnɛɛtɩ ɛɛlakɩ tʋmɩyɛ camɩyɛ, nɛ pʋyɔɔ yɔ pɩfɛyɩ kɛlɛʋ se petiyini wondu ndʋ pɛɖɛzɩɣ-tʋ yɔ. Ye mbʋ, pʋcɔ nɛ ɖɩtʋlɩ tɔm ɖɛzʋʋ lone nɖɩ ɖiposaa yɔ lɛ, ɖɩmaɣzɩɣ lona sakɩyɛ wena a-taa pɔyɔɔdʋʋ kʋnʋŋ ŋgʋ yɔ a-yɔɔ.”

 Ðoŋ ɖoŋ lɛ, mbʋ pɩwɛ kɛlɛʋ yɔ lɛ se ɖɩtʋlɩ tɔm ɖɛzʋʋ lone nɖɩ ɖiposaa yɔ Kigbeɣluu Kpaaŋ, Kewiyaɣ Kpaaŋ yaa Ɛsɔtɔm tiyiyaa ɖɩɣa ŋga ka-taa tɔm ɖɛzɩyaa pɩzɩɣ nɛ powolo kɛlɛʋ yɔ ka-taa. Ye pɩɩsaŋ se pɛɖɛzɩ tɔm lona ana a-taa naɖɩyɛ taa yɔ, koobiya pɩzɩɣ nɛ pɔpɔzɩ se paha-wɛ nʋmɔʋ nɛ paya ɖɩɣa nakɛyɛ ŋga ka-taa tɔm ɖɛzɩyaa pɩzɩɣ nɛ pasʋʋ nɛ pala ɖɔɖɔ tʋmɩyɛ yɔ. Ye wɛtʋ ndʋ tɩ-taa tɔm ɖɛzɩyaa wɛɛ yɔ tɩkɔm nɛ tɩlɛɣzɩ yɔ, papɩzɩɣ nɛ pɛpɛdɩ ɖɩɣa ŋga nɛ pakpaɣ liidiye nɖɩ nɛ pɔcɔnɩnɩ kɩcɛyɩm lɛɛbʋ ɖeɖe.

 Pɩnaɣ 2020 taa, liidiye dɔlaarɩwaa miiliyɔɔwaa 13 pakpaɣ nɛ paɖʋnɩ nesi tʋma wena palakɩ tɔm ɖɛzʋʋ lona wena aposaa yɔ, a-taa yɔ. Pɩpɔzʋʋ tɔm ɖɛzɩyaa, ordinatɛɛrɩwaa, ordinatɛɛrɩwaa yɔɔ ɖʋtʋ ndʋ tɩmʋnaa yɔ, menziiniwaa mba pakpakɩɣnɩ nɔsɩ nɛ kɩlɛmɩŋ yɔ, intɛrnɛɛtɩ nɛ wondu lɛɛtʋ. Pɛpɛdɩɣ ordinatɛɛrɩ ŋgʋ papɩzɩɣ nɛ palabɩnɩ tʋmɩyɛ camɩyɛ yɔ liidiye dɔlaarɩwaa 750. Paɖʋʋ ordinatɛɛrɩwaa yɔɔ ɖʋtʋ ndʋ pɛpɛdɩɣ nɛ payaɣ-tʋ se Watchtower Translation System yɔ. Pɩkɛ ɖʋtʋ ndʋ tɩsɩɣnɩ tɔm ɖɛzɩyaa se pɔñɔɔzɩ pa-tʋmɩyɛ camɩyɛ nɛ pɛwɛɛnɩ ɖɔɖɔ wondu ndʋ payɩ pɩpɔzʋʋ yɔ pa-tʋmɩyɛ labʋ taa yɔ.

 Pɛcɛlɩ tɔm ɖɛzɩyaa nɔsɩ kpaɣʋ wondu ndʋ tɩsɩɣnɩ-wɛ se pakpaɣ nɔsɩ tatasɩ yɔɔ pa-tʋmɩyɛ ɖɩlaɖɛ taa yɔ. Wondu ndʋ tɩwazɩ-wɛ siŋŋ kɔzɩ kɔzɩ alɩwaatʋ ndʋ COVID-19 kʋdɔŋ sɔsɔʋ paɣzaa yɔ, mbʋ pʋyɔɔ yɔ tɔm ɖɛzɩyaa pɩzaa powoni wondu ndʋ pɛ-tɛ nɛ powolo pa-tʋmɩyɛ yɔɔ.

 Ðenɖe pamaɣ tɔm ɖɛzʋʋ lona wena aposaa yɔ, peeɖe koobiya haɣ pa-tɩ faaa nɛ pasɩɣnɩ tɔm ɖɛzɩyaa. Pakalɩɣ takayɩsɩ nzɩ pɛɖɛzaa yɔ se pana se pɛɖɛzɩ sɩ-taa tɔm camɩyɛ na. Pɔñɔɔzʋʋ ɖɔɖɔ tɔm ɖɛzʋʋ lona taa. Cirstin weyi ɛlakɩ tʋmɩyɛ Afrikaans tɔm ɖɛzʋʋ lone nɖɩ ɖɩwɛ Cap, Afrika Hadɛ Kiŋ ɛjaɖɛ taa yɔ ɖɩ-taa yɔ, ɛyɔɔdaa se: “Tɔm susuyaa nɛ nʋmɔʋ lɩzɩyaa wɛnɩ waɖɛ se paɖʋ-ɖʋ nesi cɩnɛ.”

 Koobiya mba pahaɣ pa-tɩ mbʋ yɔ, pɔsɔɔlɩ labʋ tʋmɩyɛ nɛ taa leleŋ. Koobu halɩñɩnʋ nɔɔyʋ yɔɔdaa se tʋmɩyɛ labʋ tɔm ɖɛzʋʋ lone nɖɩ ɖiposaa yɔ ɖɩ-taa “kpazɩɣ-ɩ ɖoŋ pɩdɩɩfɛyɩ.” Koobiya halaa nɛ abalaa nabɛyɛ ɖɔɖɔ ɖʋʋ nesi pɩtɩŋnɩ ɛzɩma pakpakɩɣ pɔ-nɔsɩ tatasɩ yɔɔ yɔ pɩ-yɔɔ. Koobu halɩñɩnʋ Juana weyi ɛkɛ tɔm ɖɛzɩyʋ totonaque tɔm ɖɛzʋʋ lone nɖɩ ɖɩwɛ Veracruz, Mɛkɩsiiki ɛjaɖɛ taa yɔ, ɖɩ-taa yɔ ɛyɔɔdaa se: “Lɛɛlɛɛyɔ ɖɩñɔtɩnɩ lona wena a-taa pɔyɔɔdʋʋ ɖa-kʋnʋŋ yɔ nɛ pʋyɔɔ lɛ, pɩwɛ kɛlɛʋ nɛ pihiɣ koobiya halaa nɛ abalaa mba papɩzɩɣ pakpaɣ pɔ-nɔsɩ tatasɩ yɔɔ nɛ videowaa taa yɔ.”

 Ɛlɛ ɛzɩ tɔm ɖɛzʋʋ lona wena aposaa yɔ, a-maʋ yeba nɛ tɔm ɖɛzɩyaa ɖɛzɩɣ tɔm camɩyɛ nɛ pɩkɩlɩ? Ða-takayɩsɩ kalɩyaa miiliyɔɔwaa sakɩyɛ maɣzɩɣ se ɛɛɛ. Cedric kɛ Kɔŋgoo Kinsaasaa ɛjaɖɛ taa kʋnʋŋ ŋgʋ payaɣ se konŋo yɔ kɩ-ɖɛzɩyʋ. Ɛyɔɔdaa: “Koobiya halaa nɛ abalaa nabɛyɛ yaɣaɣ koŋgo kʋnʋŋ ŋgʋ ɖɩɖɛzaɣ yɔ se ‘takayɩsɩ taa koŋgo,’ mbʋ pʋyɔɔ yɔ, ɛzɩma ɖɩɖɛzaɣ koŋgo kʋnʋŋ yɔ, pɩtaalakɩ nɔɔ kʋɖʋmaɣ nɛ ɛzɩma ɖeyi ɖeyi ɛyaa yɔɔdʋʋ kʋnʋŋ ŋgʋ yɔ. Ɛlɛ lɛɛlɛɛyɔ pɔyɔɔdʋʋ se ɛzɩma ɖɩɖɛzɩɣ koŋgo kʋnʋŋ yɔ, pɩmʋnɩ ɛzɩma ɛyaa yɔɔdʋʋ kʋnʋŋ ŋgʋ sɔnɔ yɔ.”

 Andile kɛ Afrika Hadɛ Kiŋ ɛjaɖɛ taa kʋnʋŋ ŋgʋ payaɣ se Xhosa yɔ, kɩ-ɖɛzɩyaa taa lɛlʋ. Ɛyɔɔdaa se: “Sakɩyɛ heyi-ɖʋ se pɔkɔm nɛ peɖiɣzina se ɛzɩma ɖɩɖɛzɩɣ tɔm yɔ, pɩlɛɣzaa. Halɩ piya nzɩ ɖooo lɛ, sɩkalaɣ Feŋuu Tilimiye takayɩsɩ aŋglɛɛ kʋnʋŋ taa yɔ, lɛɛlɛɛyɔ sɩkalɩɣ-sɩ Xhosa kʋnʋŋ taa. Sɩsɔɔlɩ kɔzɩ kɔzɩ ɛzɩma ɖɩcɔlʋʋ tɔm nɛ pɩlakɩ nɔɔ kʋɖʋmaɣ nɛ ɛzɩma ɛyaa yɔɔdʋʋ yɔ, nɛ Traduction du monde nouveau ŋgʋ paɖaɣnɩ ñɔɔzʋʋ yɔ.”

 Ɛyaa ndɩ ndɩ tɩŋɩɣnɩ nʋmɔŋ ndɩ ndɩ ɛzɩ donate.pr418.com yɔɔ, nɛ palakɩ haɖɛ faaa se paɖʋnɩ nesi Kewiyaɣ tɔm susuu tʋmɩyɛ ɛjaɖɛ kpeekpe yɔɔ. Haɖɛ nɖɩ, nɖɩ sɩɣnɩnɩ-ɖʋ nɛ ɖɩmaɣ tɔm ɖɛzʋʋ lona wena aposaa yɔ, ɖɩñɔɔzʋʋ a-taa nɛ ɖɩcɔŋnɩ ɖɔɖɔ mba palakɩ tʋmɩyɛ a-taa yɔ, pa-kɩcɛyɩm ɖeɖe.