Mars 2020 taa, Ɛjaɖɛ kpeekpe yɔɔ tɔnʋʋ taa alaafɩya ɛgbɛyɛ susaa se Covid-19 kʋdɔŋ kɛ kʋdɔŋ sɔsɔʋ ŋgʋ kitukuuni ɛjaɖɛ kpeekpe yɔɔ ɛyaa yɔ. Ɛyaa sakɩyɛ taamaɣzɩ se pɩnaɣ kʋɖʋmaɣ wayɩ lɛ, kʋdɔŋ ŋgʋ kɩwɛɣnɩ ɖoŋ ɛyaa wezuu caɣʋ yɔɔ mbʋ. Kʋdɔŋ ŋgʋ kitukuni ɛyaa miiliyɔɔwaa sakɩyɛ pɩkpɛndɩnɩ Yehowa Aseɣɖe Tɩnaa nabɛyɛ. Kɩkɔnɩ-wɛ kaɖɛ tomnaɣ yɔɔ, lɩmaɣza taa nɛ liidiye hɔɔlʋʋ taa ɖɔɖɔ. Sɩnʋʋ ɖʋtʋ ndʋ Yehowa Aseɣɖe Tɩnaa laba nɛ ɛzɩma pasɩnɩ ɛyaa kʋdɔŋ sɔsɔʋ alɩwaatʋ ndʋ tɩ-taa?

 Yehowa Aseɣɖe Tɩnaa tɛ Nɔɔɖɛyaa ɛgbɛyɛ tɛ ɖʋtʋ yɔɔ cɔnɩyaa kɔɔmitee labɩ ɖʋtʋ nɛ paɖʋ sɩnʋʋ Kɔɔmiteewaa (DRC) mba pɛcɛzɩ 950 yɔɔ yɔ kedeŋa kpeekpe yɔɔ se pɩsa nɛ pɔcɔnɩ ɛyaa kɩcɛyɩm ɖeɖe Covid 19 alɩwaatʋ taa. Ðo-koobiya nabɛyɛ hɔɔlʋʋ taa lɛ, Sɩnʋʋ kɔɔmiteewaa mba pɛwɛ pe-egeetiye taa yɔ, mba sɩnɩnɩ wɛ, ɛlɛ lalaa lɛ kominawaa sɩnɩnɩ-wɛ. DRC labɩ ɖɔɖɔ sɩnʋʋ ɖʋtʋ ndʋ titukuuni ɛyaa mba pɛwɛ hɔɔlɩŋ ndɩ ndɩ sakɩyɛ taa yɔ.

 Ðɩkpaɣ Paraguwee ɛjaɖɛ taa kɩɖaʋ. Ɛjaɖɛ yɔɔ tɔm susuu takayaɣ nakɛyɛ yɔɔdaa se ɛzɩma kʋdɔŋ sɔsɔʋ wɛnɩ ɖoŋ ɛyaa yɔɔ liidiye hɔɔlʋʋ taa yɔ pʋyɔɔ lɛ, «Paraguwee ɛjaɖɛ taa mba sakɩyɛ fɛyɩnɩ tɔɔnaɣ se pɔtɔɔ.» Ɛlɛ DRC kɔɔmiteewaa mba pɛwɛ ɛjaɖɛ nɖɩ ɖɩ-taa yɔ paatɛm labʋ ɖʋtʋ nɛ patayɩ ɛyaa kooliiwaa nabɛyɛ. Nɛ paa koolii ŋgʋ lɛ, kɩ-taa nɛ wondu kɩcɛyɩtʋ ndɩ ndɩ ɛzɩ tɔɔnasɩ, ɖɩɣa taa ñɔɔzʋʋ wondu nɛ cɩɖɩ cɩɖɩ wɛtʋ wondu mbʋ yɔ. Nɛ wondu ndʋ tɩpɩzɩɣ nɛ tɩwazɩ hɔŋ weyi ɩ-taa ɛyaa naanza wɛɛ yɔ kpɩtaŋ naalɛ. Paa koolii ŋgʋ lɛ, kɩ-taa wondu liidiye cɛzɩ 19700 Francs CFA yɔɔ.

 Koobiya mba pasɩɣaɣnɩ lalaa yɔ, ɛzɩma palakaɣ se Covid-19 kʋdɔŋ ɛtaakpa pa-maɣmaɣ yaa ɛyaa lalaa? Paɖʋwaɣ masque waa nɛ pañaŋ ɖɔɖɔ paɣtʋ ndʋ paɖʋwa pɩlɩɩnɩ ɖama posinuu yɔɔ yɔ. Pɩtasɩ lɛ faɣlɛɛ wena a-taa wɛ cɩɖɩ cɩɖɩ nɛ pañaŋ paɣtʋ ndʋ paɖʋwa pɩlɩɩnɩ kʋdɔŋ sɔsɔʋ yɔɔ yɔ, a-taa payakaɣ tɔɔnasɩ. Pɩwɩlɩɣ se mba potukaɣni kooliiwaa yɔ, posuwaɣ wondu ndʋ tihuuzuu pɔ-yɔɔ yɔ. Pɩtasɩ lɛ palakaɣnɩ tʋmɩyɛ kɔ wena pɩpɔzʋʋ yɔ nɛ pañalɩɣnɩ nɛ pakʋʋ ɖɔɖɔ sɔtʋ pɔ-lɔɔɖa taa nɛ lona wena a-taa pasɩɣ kooliiwaa mba yɔ. Kɛdɛzaɣ ɖeɖe lɛ, mba patayɩɣ kooliiwaa mba yɔ, pañaŋ ɖama posinuu paɣtʋ ndʋ paɖʋwa yɔ alɩwaatʋ ndʋ paacɛlɩɣ koobiya kooliiwaa yɔ.

 Janvier 2021 taa ɖʋtʋ yɔɔ cɔnɩyaa kɔɔmitee ha nʋmɔʋ se pakpaɣ liidiye nɖɩ ɖɩcɛzɩ 16 422 985 000 Francs CFA yɔɔ nɛ palabɩnɩ sɩnʋʋ tʋmɩyɛ Covid-19 kʋdɔŋ alɩwaatʋ taa. Ɛgbɛyɛ pilinzi nɛ DRC waa lakɩnɩ liidiye tʋmɩyɛ camɩyɛ, nɛ alɩwaatʋ ndʋ paayakɩ wondu yɔ, pɔpɔzʋʋ se patʋʋ-wɛ tɩ-yɔɔ. Kɩɖaʋ nakʋyʋ yɔ, Siilii ɛjaɖɛ taa koobiya ñɩnaɣ se paya lantiiyinaa kilonaa 750. Ɛlɛ posuyi lantiiyinaa liidiye yɔɔ siŋŋ, fenaɣ kʋɖʋmaɣ ɖeke taa kilonaa naalɛ liidiye pɩsɩ kiloo kʋɖʋmʋʋ liidiye. Ɛlɛ koobiya tisaa se payakɩ lantiiyinaa mbʋ. Pa nɛ pɛdɩyʋ pɔyɔɔdaa nɛ pɩla ñɩɣtʋ naalɛ lɛ, ɛlɛ heyi-wɛ se nɔɔyʋ kaatɛm yabʋ lantiiyinaa nabɛyɛ, ɛlɛ ɛpɩsɩnɩ-wɛ. Pʋyɔɔ lɛ, pɩtɩkɛ liidiye nɖɩ ɖɩ-tɔm paayɔɔdaa yɔ nɖɩ ɛpɛdɩɣnɩ-wɛ. Ɛlɛ liidiye nɖɩ pɛpɛdaɣ lantiiyinaa fenaɣ ŋga kaaɖɛwa yɔ nɖɩ ɛpɛdɩɣnɩ-wɛ.

 Ɛlɛ ɖo-koobiya pɩsaa nɛ powolo se pamʋʋ lantiiyinaa lɛ, pɛdɩyʋ kizi se ɛɛtasɩɣ-wɛ pɛdɩnʋʋ. Ɛtɔm se palakɩ tɛ-yɔɔ tɛ-yɔɔ lakasɩ alɩwaatʋ ndʋ patayɩɣ tɔɔnasɩ yɔ, ɛzɩ agbaa lɛɛna ɖɔɖɔ lakʋʋ yɔ. Koobiya kpaɣ alɩwaatʋ pazɩ nɛ patɩmɩ pa-laŋɩyɛ taa lɛ, peheyi pɛdɩyʋ se paa ɛgbɛyɛ nɖɩ lɛ ɖɩɩtɛm labʋ akɔnta nɛ ɖɩtɩlɩ koobiya mba pɛwɛ kɩcɛyɩm taa ɖeyi ɖeyi yɔ. Peheyi-i ɖɔɖɔ se mba pasɩɣnɩ-wɛ yɔ palɩnɩ lona ndɩ ndɩ nɛ pɛwɛnɩ sɔnzɩ ndɩ ndɩ nɛ pʋyɔɔ lɛ pɩtɩkɛ wondu kʋɖʋmtʋ paɖʋʋ kooliiwaa tɩŋa taa; paa hɔʋ ŋgʋ lɛ paɖʋʋ kɩ-tɛ koolii taa wondu ndʋ tɩkaɣ-kʋ wazʋʋ nɛ pɩkɩlɩ yɔ. Kɛdɛzaɣ lɛ peheyi-i se sɔɔlɩm tuyuuni ɛyaa nɛ palakɩ Yehowa Aseɣɖe Tɩnaa haɖɛ nɛ pahaɣ ɖɔɖɔ pa-tɩ faaa nɛ pasɩɣnɩ-wɛ. Pitukuni pɛdɩyʋ siŋŋ nɛ etisi nɛ ɛpasɩ-wɛ liidiye. Pɩtasɩ lɛ, etisaa se ɛhaɣ-wɛ lantiiyinaa kilonaa 400 alɩwaatʋ ndʋ papɩsɩɣ se patasɩ yabʋ lɛ.

 Lusu kɛ Liibeeriya ɛjaɖɛ taa lelu akpadɩyʋ nɔɔyʋ. Ɛ nɛ ɛ-hɔʋ taa mba kagbanzɩ pɛwɛna. Tanaŋ nakʋyʋ tɛɛ, palɩzaɣ sɔntɔ nɛ patazɩɣ evemiye mayaɣ taa lɛ , Lusu sayɩ weyi ɛwɛnɩ pɩnzɩ lʋbɛ yɔ, eɖiɣzina se patɩtasɩ wɛnʋʋ nabʋyʋ se pɔtɔɔ pʋwayɩ. Ɛpɔzaa se: «Ɛbɛ ɖɩkaɣ tɔɔʋ pʋwayɩ yɔ?» Lusu heyi-i se ɛnʋ tɛm tɩmnʋʋ Yehowa se ɛsɩnɩ-wɛ nɛ ɛ-taa tɛma se Yehowa kaɣ cosuu ɛ-adɩma yɔɔ. Ðanaɣ ɖanaa lɛ, ɛgbɛyɛ taa ɛzʋtʋyaa yaa Lusu se ewolo nɛ ɛmʋ tɔɔnasɩ nasɩyɩ. Ɛyɔɔdaa se: «Man-sayɩ yɔɔdaa se lɛɛlɛɛyɔ ɛnawa se Yehowa welisiɣ adɩma nɛ ecosuu mbʋ pʋyɔɔ yɔ ecosi ma-adɩma yɔɔ.»

 Kɔŋgoo Kinsaasaa ɛjaɖɛ taa, halʋ nɔɔyʋ ɖɩɣa ñɔtɩnɩ Yehowa Aseɣɖe Tɩnaa hɔʋ nakʋyʋ. Ɛna se hɔʋ ŋgʋ ki-koobiya Krɩstʋ mba kɔnɩ-kʋ tɔɔnaɣ lɛ, ɛyɔɔdɩ se: «Kʋdɔŋ sɔsɔʋ kʋnɛ kɩtɛŋ lɛ ɖɩpɩsɩɣ Yehowa Aseɣɖe Tɩnaa mbʋ pʋyɔɔ yɔ pɛwɛɛ nɛ pɔcɔŋnɩ po-koobiya halaa nɛ abalaa ɖeɖe kaɖɛ alɩwaatʋ tʋnɛ tɩ-taa.» Ɛ-walʋ pɔzɩ-ɩ se: «Mɔʋ saakɩ ɖeke yɔɔ ŋpɩsɩɣ Yehowa Aseɣɖe tʋ na?» Ecosi-i se: «Aayɩ, ɛlɛ toovenim taa lɛ, mɔʋ saakɩ ŋgʋ kɩkɛ yʋsaɣ ŋga kawɩlɩɣ se pɛwɛɛnɩ sɔɔlɩm siŋŋ yɔ.»

 Sɔɔlɩm haɖɛ nɖɩ ɩlakɩ yɔ, nɖɩ sɩnɩnɩ Yehowa Aseɣɖe Tɩnaa nɛ pɔcɔnɩ po-koobiya halaa nɛ abalaa kɩcɛyɩm ɖeɖe kʋdɔŋ sɔsɔʋ alɩwaatʋ tʋnɛ tɩ-taa. Ðɩsɛɣ-mɩ pɩdɩɩfɛyɩ ɛzɩma ɛtɩŋɩɣnɩ donate.pr418.com yɔɔ nɛ ɩlakɩ haɖɛ yɔ pɩ-yɔɔ.