Yehowa Aseɣɖe Tɩnaa maɣzɩɣ po-koobiya yɔɔ siŋŋ. (1 Pɩyɛɛrɩ 2:17) Pɩlakɩ ɖa-taa sakɩyɛ ɛzɩ pɩlakʋʋ Keniya ɛjaɖɛ taa koobu halɩñɩnʋ weyi payaɣ se Tannis yɔ. Ɛyɔɔdaa se: “Mɔnsɔɔlaa se mantɩlɩ mbʋ pɩwɛɛ nɛ pɩtalɩɣ mon-koobiya kʋsɔɔlaa mba pɛwɛ ɛjaɖɛ kpeekpe yɔɔ yɔ.” Nʋmɔʋ ŋgʋ yɔɔ pɩtɩŋɩɣna nɛ Tannis nɛ Aseɣɖe Tɩnaa lalaa miiliyɔɔwaa sakɩyɛ tɩlɩɣ mbʋ pɩwɛɛ nɛ pɩɖɔŋ yɔ? Kpaɣnɩ pɩnaɣ 2013 lɛ, ɖɩtɩŋaɣnaɣ jw.org hɔɔlʋʋ Tɔm kɩfatʋ yɔɔ nɛ ɖiyeki nɛ koobiya tɩlɩɣ mbʋ pɩwɛɛ nɛ pɩɖɔŋ yɔ.

 Hɔɔlʋʋ Tɔm kɩfatʋ taa, ɖɩnaɣ Yehowa Aseɣɖe Tɩnaa yɔɔ tɔm ndʋ papɩzɩɣ nɛ pataa-tʋ liu yɔ. Titukuuni Biblwaa lɩzʋʋ, sɩnʋʋ tʋma, Ɛsɔ sɛtʋ kuduyuŋ maʋ tʋma nɛ tɔm kɩcɛyɩtʋ lɛɛtʋ. Hɔɔlʋʋ ŋgʋ kiyeki se ɖɩtɩlɩ ɖo-koobiya mba paɖɩɣ-wɛ salaka pe-tisuu yɔɔ yɔ pɔ-yɔɔ tɔm. Ðɩnaɣ hɔɔlʋʋ ŋgʋ kɩ-taa ɖɔɖɔ ɖoŋ kpazʋʋ tɔm ndʋ titukuuni ɖe-ŋgee tɔm susuu nɛ Krɩstʋ sɩm yɔɔ tɔzʋʋ sɔnzɩ yɔ. Mba ñɩnɩɣ tɔm ndʋ nɛ ɛzɩma pɔñɔɔzʋʋ-tʋ?

 Service d’information (OPI) ɖʋʋnɩ tɔm Tɔm kɩfatʋ hɔɔlʋʋ taa. Tʋmɩyɛ nɖɩ, ɖɩwɛ ɖa-Tʋmɩyɛ ɖɩlaɖɛ sɔsɔɖɛ taa nɛ Nɔɔɖɛyaa ɛgbɛyɛ tɛ Ðʋtʋ yɔɔ cɔnɩyaa kɔɔmiite cɔŋnɩnɩ ɖɩ-yɔɔ. Koobiya halaa nɛ abalaa mba palakɩ tʋmɩyɛ OPI taa yɔ pɛcɛzɩ 100 yɔɔ; pa-taa sakɩyɛ lakɩ tʋmɩyɛ pa-ɖɩsɩ pɩkpɛndɩnɩ tɔm mayaa, ñɩnɩyaa, kɩlɛmɩŋ lɩzɩyaa nɛ tɔm ɖɛzɩyaa. Lalaa yɔɔdʋʋnɩ komina ñʋndɩnaa, wɩlɩyaa nɛ ɛjaɖɛ yɔɔ tɔm susuyaa. Tʋmɩyɛ nɖɩ ɖɩwɛ ɛjaɖɛ kpeekpe yɔɔ ɛgbɛyɛ pilinzi nzɩ sɩcɛzɩ 80 yɔ sɩ-taa nɛ payaɣ-ɖɩ se Bureau des relations publiques (PID) yɔ, ɖɩɖʋʋ nesi OPI.

 Paañɔɔzʋʋ tɔm kɩfatʋ natʋyʋ lɛ, OPI nɛ PID waa pɛkpɛndɩɣ nɛ palakɩ tʋmɩyɛ nɔɔ kʋɖʋmaɣ taa. Ye koobiya ɩmaɣzɩɣ se tɔm natʋyʋ wɛ ɖeu nɛ pɩwɛɛ se lalaa ɩtɩlɩ-tʋ yɔ, pañɩnɩɣ se pehiɣ tɔm ndʋ papɩzɩɣ nɛ pataa-tʋ liu yɔ. Nɛ paañɩnɩɣ mbʋ lɛ, papɩzɩɣ nɛ pɔpɔzɩ nabɛyɛ tɔm nɛ pɔyɔɔdɩnɩ lɔŋsɩnɖaa. Pehikiɣ tɔm ndʋ pañɩnɩɣ yɔ nɛ pɩtɛ lɛ, pama tɔm ñʋʋ, pɔñɔɔzɩ-kʋ, pakalɩ-kʋ, paɖʋ fotonaa nɛ petiyini-kʋ Ðʋtʋ yɔɔ cɔnɩyaa kɔɔmiite se paba ɩna se pɩwɛ ɖeu yaa we.

 Lɩmaɣza wena ɖo-koobiya wɛnɩ Tɔm kɩfatʋ yɔɔ? Payaɣ Filipiini ɛjaɖɛ taa koobu halɩñɩnʋ nɔɔyʋ se Cheryl. Ɛyɔɔdaa se: “Mɔnsɔɔlɩ siŋŋ se manpaɣzɩ paa evemiye nɖɩ nɛ Yehowa ɛgbɛyɛ nɛ ɛ-samaɣ yɔɔ tɔm kɩfatʋ natʋyʋ kalʋʋ.”

 Kalɩyaa sakɩyɛ yɔɔdɩ tʋkaɣ ŋga kɛwɛ jw.org yɔɔ Tɔm kɩfatʋ taa nɛ ndʋ pakalɩɣ intɛrnɛɛtɩ lona lɛɛna yɔɔ yɔ kɔ-tɔm. Tatiana wɛ Kazakhstan ɛjaɖɛ taa, ɛyɔɔdaa se: “Pɩkɛdɩnɩ-m se manpɩzɩɣ nɛ mantaa liu tɔm ndʋ tɩwɛ jw.org yɔɔ yɔ. Tɩkɛ toovenim tɔm nɛ tɩkpazɩɣ ɖoŋ.” Payaɣ Mɛkɩsiiki ɛjaɖɛ taa koobu halɩñɩnʋ nɔɔyʋ se Alma nɛ ɛyɔɔdaa se: “Tɔm kɩdɛkɛdɩtʋ ndʋ ɖɩnɩɣ ɛjaɖɛ yɔɔ tɔm susuyaa lalaa cɔlɔ yɔ tɩɩkpazɩɣ ɖoŋ, ɛlɛ ndʋ tɩwɛ JW yɔɔ tɔm kɩfatʋ hɔɔlʋʋ taa yɔ tʋtʋ ñakpazɩɣ ɖoŋ.”

 Pɩtasɩnɩ se ɖɩpɩzɩɣ nɛ ɖɩtaa liu JW yɔɔ tɔm kɩfatʋ lɛ, tɩkpazɩɣ ɖe-tisuu ɖoŋ ɖɔɖɔ. Bernard wɛ Keniya ɛjaɖɛ taa nɛ ɛyɔɔdaa se: “JW yɔɔ tɔm kɩfatʋ sɩnɩ-m nɛ manaɣ ɛjaɖɛ kpeekpe yɔɔ koobiya ɛzɩ mɔ-hɔʋ taa mba yɔ, paa le patɩɩwɛɛ yɔ. Manpɩzɩɣ nɛ mayaɣ pa-hɩla nɛ mɔyɔɔdʋʋ wɛtʋ ndʋ tɩ-taa ɖeyi ɖeyi pɛwɛɛ yɔ tɩ-tɔm ma-adɩma taa.” Payaɣ koobu halɩñɩnʋ nɔɔyʋ se Bybron nɛ ɛwɛ Keniya ɛjaɖɛ taa ɖɔɖɔ nɛ ɛyɔɔdaa se: “Pɩlakɩ-m leleŋ kpem paa ɛzɩmtaa alɩwaatʋ ndʋ manaɣ tɔm ñʋʋ nakʋyʋ nɛ kɩyɔɔdʋʋ se palɩzɩ Bibl kʋnʋŋ kɩfalʋʋ nakʋyʋ taa yɔ! Tɔm ñʋŋ ɛnɩ ɩtɔzʋʋ-m se Yehowa ɛɛtʋkʋʋ ɛyaa taa.”

 Halɩ tɔm kɩfatʋ hɔɔlʋʋ taa, ɖo-koobiya mba pɛwɛɛ nɛ panazɩɣ-wɛ yɔ pɔ-yɔɔ tɔm pɩzɩɣ nɛ tɩkpazɩ-ɖʋ ɖoŋ. Jackline wɛ Keniya ɛjaɖɛ taa, ɛyɔɔdaa se: “Mamaɣzɩ abalɩtʋ ndʋ pɛwɛna yɔ tɩ-yɔɔ lɛ, pɩkpazɩ men-tisuu ɖoŋ siŋŋ. Paa ɛzɩmtaa lɛ mañakɩ pana se mantɩlɩ mbʋ pɩsɩɣnɩ-wɛ nɛ pɔɖɔkʋʋ pa-tɩ yɔ. Mɛnkpɛlɩkaa se mbʋ ɛyaa maɣzɩɣ se pɩwɛ kɛlɛʋ ɛzɩ adɩma, Bibl kalʋʋ nɛ halɩ hendu teu mbʋ yɔ sɩɣnɩ ɖo-koobiya nɛ pɛwɛɣ ɖoŋ.”

 Payaɣ Kosta Rika koobu halɩñɩnʋ nɔɔyʋ se Beatriz, nɛ JW yɔɔ tɔm kɩfatʋ ndʋ tɩyɔɔdʋʋ asɛyɩŋ tɔm yɔ tɩkɛdɩnɩ-ɩ. Ɛyɔɔdaa se: “JW yɔɔ tɔm kɩfatʋ yeki nɛ manaɣ ɛzɩma ɖɛ-ɛgbɛyɛ cɔŋnɩ ɖo-koobiya kɩcɛyɩm ɖeɖe lɛɛ lɛɛ nɛ sɔɔlɩm yɔ. Piyeba nɛ man-taa tɛ se Yehowa ɛgbɛyɛ pɩkɛnaa.”

 Ðɩwɛnɩ ɛsɩmɩyɛ siŋŋ se JW yɔɔ tɔm kɩfatʋ haɣ-ɖʋ waɖɛ se ɖɩtɩlɩ ɖo-koobiya mba pɛwɛ ɛjaɖɛ kpeekpe yɔɔ yɔ, pɔ-yɔɔ tɔm paa ɛzɩmtaa! Haɖɛ nɖɩ ɩtɩŋɩɣna sakɩyɛ taa donate.pr418.com yɔɔ nɛ ɩlakɩ nɛ ɩɖʋʋnɩ nesi ɛjaɖɛ kpeekpe yɔɔ tɔm susuu tʋmɩyɛ yɔ, ɖɩ-yɔɔ ɖɩtɩŋɩɣna nɛ ɖɩlakɩ pɩtɩŋa payɩ mbʋ yɔ. Ðɩsɛɣ-mɩ pɩdɩɩfɛyɩ haɖɛ nɖɩ ɩlakɩ yɔ ɖɩ-yɔɔ.