Ma nɛ mɔn-kɔɔ nɛ man-ɖalʋ ɖɩpaɣlɩ Aŋgletɛɛrɩ kɔfɩ ŋgʋ kɩñɔtɩnɩ Bicester yɔ kɩ-taa Rʋwayom-unii ɛjaɖɛ taa. Ma-lʋlɩyaa labɩ haya ɖɩɣa nakɛyɛ hayɩm nabʋyʋ taa peeɖe. Maawɛnɩ pɩnzɩ 19 lɛ, manpaɣzɩ nʋmɔʋ lɩzʋʋ tʋmɩyɛ ɛzɩ mɔn-kɔɔ nɛ man-ɖalʋ yɔ. Pʋwayɩ, paha-m waɖɛ se mɛnkɛ nʋmɔʋ lɩzɩyʋ kiya Ekɔɔsɩ ɛjaɖɛ taa. Nɛ pɩnaɣ 1970 taa lɛ, paya-m se mowolo nɛ mala tʋmɩyɛ Betɛɛlɩ ŋgʋ kɩwɛ Lɔndrɩ yɔ kɩ-taa; maawɛnɩ pɩnzɩ 23 alɩwaatʋ ndʋ. Maawɛ peeɖe lɛ, malɩɩ ndamaa kʋnʋŋ yɔɔ. Ndamaa kʋnʋŋ lɛɣzɩ me-wezuu caɣʋ; kiyeba nɛ mehiɣ wazasɩ nɛ taa leleŋ me-wezuu caɣʋ taa.

Mɛnkpɛlɩkɩ ndamaa kʋnʋŋ

 Maawɛ Betɛɛlɩ lɛ, mowokaɣ kediɣzisi Yehowa Aseɣɖe Tɩnaa ɛgbɛyɛ nɖɩ payaɣ se Mill Hill yɔ ɖɩ-taa, nɛ maakatɩ koobiya ndamaa sakɩyɛ peeɖe. Ɛzɩma ɖɩtaayɔɔdʋʋ kʋnʋŋ kʋɖʋmʋʋ yɔ, mantaasɔɔlɩ se pɩɖɩɣ-ɖʋ nʋmɔʋ nɛ ɖɩtaakɛ taabalaa. Pʋyɔɔ mankpaɣ lɩmaɣzɩyɛ se mancakɩ koobiya ndamaa cɔlɔ kediɣzisi taa.

 Alɩwaatʋ ndʋ tɩ-taa lɛ, ndamaa kʋnʋŋ ɛgbɛyɛ naɖɩyɛ taawɛɛ Krandɩ-Pretaañɩ. Ndamaa wokaɣ kediɣzisi nzɩ palakaɣ Aŋglɛɛ kʋnʋŋ taa yɔ, nɛ koobiya mba pataakɛ ndamaa yɔ, patɩŋaɣnɩ Aŋglɛɛ kʋnʋŋ paɣtʋ yɔɔ nɛ pɛɖɛzɩɣ-wɛ kediɣzaɣ taa tɔm piye piye ndamaa kʋnʋŋ taa. Ɛlɛ alɩwaatʋ ndʋ koobiya ndamaa kpaɣ alɩwaatʋ nɛ pɛkpɛlɩkɩ-m ndamaa kʋnʋŋ yɔ, menɖiɣzinaa se kʋnʋŋ ŋgʋ, kɩwɛnɩ kɩ-maɣmaɣ kɩ-paɣtʋ. Toovenim taa lɛ, Aŋglɛɛ kaakɛnɩ-wɛ kʋnʋŋ kɩfalʋʋ nakʋyʋ kpem. Paa mbʋ yɔ, pataafɛɣ kediɣzaɣ nakɛyɛ. Mana mbʋ lɛ, mɔnsɔɔlɩ man-taabalaa ndamaa mba nɛ pɩkɩlɩ nɛ mañaŋ-wɛ ɖɔɖɔ nɛ pɩkɩlɩɣ. Pɩtasɩ lɛ, mañaɣ pana se mɛnkpɛlɩkɩ ndamaa kʋnʋŋ nɛ pɩkɩlɩ.

 Krandɩ-Pretaañɩ ɛjaɖɛ taa, kʋnʋŋ ŋgʋ ndamaa yɔɔdʋʋ yɔ, payaɣ-kʋ se Krandɩ-Pretaañɩ ndamaa kʋnʋŋ yaa BSL. Alɩwaatʋ wɛɛ nɛ tɩɖɛɣ lɛ, koobiya mba pɛɖɛzaɣ kediɣzisi taa tɔm ndamaa kʋnʋŋ taa yɔ, papaɣzɩ labɩnʋʋ tʋmɩyɛ Krandɩ-Pretaañɩ ndamaa kʋnʋŋ nɛ peyele tɩŋnʋʋ Aŋglɛɛ kʋnʋŋ paɣtʋ yɔɔ nɛ pɛɖɛzɩɣ tɔm. Piyeba nɛ kediɣzisi taa tɔm paɣzɩ wazʋʋ ndamaa nɛ pɩkɩlɩɣ. Piyeba ɖɔɖɔ nɛ pa nɛ koobiya mba patɩkɛ ndamaa yɔ, pɛwɛɛ nɔɔ kʋɖʋmaɣ taa nɛ pɩkɩlɩ. Mamaɣzɩɣ mbʋ pɩlabɩ pɩnzɩ 50 nzɩ sɩɖɛwa yɔ sɩ-taa yɔ pɩ-yɔɔ lɛ, manaɣ se Yehowa wazɩ ndamaa kʋnʋŋ siŋŋ. Iyele nɛ mɛnkɛdɩ-mɩ mbʋ mbʋ Yehowa laba nɛ ɛha-m waɖɛ se manɖʋ-pʋ nesi yɔ pɩ-taa nabʋyʋ.

Ndamaa kʋnʋŋ ɖɛnɩ ɛsɩndaa Yehowa ɛgbɛyɛ taa

 Manpɩsɩ ɛgbɛyɛ taa ɛzʋtʋyʋ nɛ pɩla pɩnaɣ kʋɖʋmaɣ mbʋ yɔ lɛ, koobu abalɩñɩnʋ ndam weyi payaɣ se Michael Eagers yɔ, ɛlɩzɩ lɩmaɣzɩyɛ se ɖɩla kediɣzisi nasɩyɩ BSL kʋnʋŋ taa; pɩɩkɛ pɩnaɣ 1973 taa. Ɛgbɛyɛ piliŋa lɩzɩ ma nɛ ɛgbɛyɛ taa ɛzʋtʋyʋ nɔɔyʋ se ɖɩla ɖʋtʋ nɛ ɖɩla kediɣzisi ndamaa kʋnʋŋ taa tam kʋɖʋm fenaɣ taa Deptford, Lɔndrɩ hadɛ kiŋ wɩsɩ ɖɩlɩyɛ taa.

 Pɩɩlʋlɩ pee kɩbana kpem. Koobiya ndamaa kaalɩnɩ Lɔndrɩ nɛ Aŋgletɛɛrɩ hadɛ kiŋ wɩsɩ ɖɩlɩyɛ hɔɔlɩŋ lɛɛŋ taa nɛ pɔkɔɔ kediɣzaɣ kajalaɣ ñɩŋga ŋga ɖɩɩlabɩ BSL kʋnʋŋ taa yɔ. Lɛɛlɛɛyɔ lɛ, koobiya ndamaa nɛ ndamaa lalaa mba toovenim tɔm kɛdɩnɩ-wɛ yɔ, panɩɣ Yehowa yɔɔ tɔm nɛ Bibl taa tɔm pa-maɣmaɣ pa-kʋnʋŋ taa. Kediɣzaɣ wayɩ lɛ, ɖɩkɛdɩ ɖama taa leleŋ tɔm nɛ ɖɩkpɛndɩ ɖɔɖɔ nɛ ɖɩtɔɔ nɛ ɖɩñɔɔ. Maahiɣ waɖɛ ɖɔɖɔ nɛ menkilimi koobiya ndamaa nabɛyɛ yɔɔ nɛ mankpazɩ-wɛ ɖoŋ.

 Pʋwayɩ palakaɣ ɖɔɖɔ kediɣzisi ndamaa kʋnʋŋ taa Birmingham nɛ Sheffield tɛtʋ taa. Koobiya sakɩyɛ mba pataakɛ ndamaa ɛlɛ paasɔɔlaa se pɛkpɛlɩkɩ BSL kʋnʋŋ yɔ powokaɣ kediɣzisi nzɩ. Pʋwayɩ koobiya mba, pasɩnaa nɛ posusi tɔm ndamaa kʋnʋŋ taa nɛ tɩyɛlɩ nɛ tɩtalɩ Aŋgletɛɛrɩ hɔɔlɩŋ lɛɛŋ taa.

Mehiɣ halʋ kɩbanʋ

 Pɩnaɣ 1974 taa, mankatɩ pɛlɛ kɩbanʋ nɔɔyʋ; payaɣ-ɩ se Stella Barker. Ɛɛkɛ nʋmɔʋ lɩzɩyʋ kiya ɛgbɛyɛ naɖɩyɛ taa Betɛɛlɩ cɔlɔ. Ma nɛ ɩ ɖɩsɔɔlɩ ɖama nɛ ɖɩɖɔkɩ nesi pɩnaɣ 1976 taa. Pʋwayɩ ɖa-naalɛ ɖɩpɩsɩ nʋmɔʋ lɩzɩyaa kiya. Ðɛ-ɛgbɛyɛ kaawɛ Hackney tɛtʋ taa Lɔndrɩ hayo kiŋ. Peeɖe Stella sɔzɩ mɔ-yɔɔ nɛ ɖɩɖʋ nesi tɔm susuu tʋmɩyɛ ndamaa kʋnʋŋ taa. Mamaɣzɩɣ alɩwaatʋ ndʋ tɩ-yɔɔ lɛ, manpɩzɩɣ nɛ mɔyɔɔdɩ kpayɩ se ɛzɩma ma nɛ ma-halʋ ɖɩɩkpɛndaa nɛ ɖɩlakɩ nʋmɔʋ lɩzʋʋ tʋmɩyɛ yɔ, pɩcɛyɩsɩ ɖe-nesi ɖɔkʋʋ.

 Alɩwaatʋ pazɩ pʋwayɩ lɛ, payaa ma nɛ Stella se ɖɩpɩsɩ Betɛɛlɩ tʋmlaɖaa mba paasʋʋ Betɛɛlɩ yɔ. Pɩɩɖɔkɩnɩ-ɖʋ kpem. Maakɛ ɖɔɖɔ egeetiye yɔɔ cɔnɩyʋ sɩnɩyʋ, ɛgbɛyɛ taa ɛzʋtʋyaa tɛ Kewiyaɣ Ɛsɔ sɛtʋ tʋmɩyɛ sukulinaa taa wɩlɩyʋ. Pʋwayɩ ɖɔɖɔ, manɖʋ nesi nɛ pala ɖʋtʋ se pɩsa nɛ pɛɖɛzɩ kigbeɣliŋ sɔsɔŋ weyi palakaɣ aŋglɛɛ kʋnʋŋ taa yɔ ɩ-taa tɔm ndamaa kʋnʋŋ taa. Pɩnɩɣaɣ-ɖʋ siŋŋ paa evemiye nɖɩ, paa mbʋ yɔ ɖihikaɣ taa leleŋ pɩdɩɩfɛyɩ.—Maatiyee 11:28-30.

 Ðɩlʋlɩ ɖa-pɩyalaa Simon nɛ Mark pɩnaɣ 1979 nɛ pɩnaɣ 1982 taa. Pɩɩha-ɖʋ taa leleŋ siŋŋ ɛlɛ pɩkɛnɩ-ɖʋ ɖɔɖɔ sʋʋtʋ sɔsɔtʋ lɛɛtʋ. Ɛbɛ sɩnɩ-ɖʋ? Ma nɛ Stella ɖɩkpaɣ lɩmaɣzɩyɛ se paa le mowoki se mala mɛ-Ɛsɔ sɛtʋ tʋmɩyɛ yɔ, ɖɔ-hɔʋ tɩŋa kpɛndɩɣ nɛ kiwolo peeɖe nɛ kɩmʋ helim ɖɔɖɔ. Ðɩsɔɔlaa se ɖe-piya ɩna se Yehowa sɛtʋ haɣ-ɖʋ taa leleŋ. Ɛbɛ lɩ pɩ-taa? Ðe-piya paɣlaa lɛ, pɩtasɩna se sɩnɩɣaɣ ndamaa kʋnʋŋ lɛ, sɩɩpaɣzɩ ɖɔɖɔ nʋmɔʋ lɩzʋʋ tʋmɩyɛ. Ma-lʋlɩyaa ha Betɛɛlɩ koobiya neɣye nɛ pɩla pɩnzɩ 40 mbʋ yɔ lɛ, Simon nɛ Mark papaɣzɩ labʋ tʋmɩyɛ Betɛɛlɩ. Ða-taa kaalabɩ leleŋ siŋŋ.

Ðɩñaɣ pana nɛ ɖɩsɩnɩ ndamaa

 Halɩ pɩnzɩ 1990 waa taa, ndam nɔɔyʋ taakɛ ɛgbɛyɛ taa ɛzʋtʋyʋ Krandɩ-Pretaañɩ ɛjaɖɛ taa, ɛlɛ ndamaa nabɛyɛ kaakɛ ɛgbɛyɛ taa tʋmlaɖaa. Pʋyɔɔ pɩɩwɛɛ se ɛzʋtʋyaa mba pataakɛ ndamaa nɛ pataapɩzɩɣ yɔɔdʋʋ ɖɔɖɔ ndamaa kʋnʋŋ yɔ, patazɩ nɛ pana se koobiya mba, ‘patɩlɩ tɔm wɩlʋʋ’ nɛ papɩzɩɣ nɛ pɛkɛ ɛgbɛyɛ yɔɔ cɔnɩyaa na. (1 Timootee 3:2) Ndamaa mba paakɛ ɛgbɛyɛ taa tʋmlaɖaa yɔ, payaɣ pa-taa lɛlʋ se Bernard Austin, ɛɛwɛ aŋglɛɛ ɛgbɛyɛ naɖɩyɛ taa. Koobu ɛnʋ ɛɛsɔɔlɩ koobiya pɩdɩɩfɛyɩ nɛ pañaŋaɣ-ɩ siŋŋ. Man-taa kaalabɩ leleŋ kpem alɩwaatʋ ndʋ manɩwa se Bernard pɩsɩ ɛgbɛyɛ taa ɛzʋtʋyʋ yɔ. Ɛnʋ kɛnɩ kajalaɣ ndam weyi ɛpɩsɩ ɛgbɛyɛ taa ɛzʋtʋyʋ Krandɩ-Pretaañɩ ɛjaɖɛ taa yɔ.

 Nabʋyʋ labɩ pɩnaɣ 1996 taa nɛ pɩwɛ piti kpem. Ɛgbɛyɛ piliŋa ha nʋmɔʋ se paɖʋ ndamaa ɛgbɛyɛ kajalaɣ ñɩnɖɛ Krandɩ-Pretaañɩ ɛjaɖɛ taa. Paaɖʋ ɛgbɛyɛ nɖɩ Ealing egeetiye taa, Lɔndrɩ wɩsɩ ɖɩɖʋyɛ hɔɔlʋʋ taa. Ɛlɛ pɩtɩsɩɩnɩ peeɖe.

Papaɣzɩ labʋ kediɣzisi nɛ kigbeɣliŋ tɩŋa ndamaa kʋnʋŋ taa

 Pɩnzɩ 1980 waa nɛ 1990 waa taa, maawɛ ɖɩɣa nɛ ma nɛ Ɛgbɛyɛ piliŋa hɔɔlʋʋ ŋgʋ kɩcɔŋnɩ Ɛsɔ sɛtʋ tʋmɩyɛ yɔɔ yɔ ɖɩlakɩ tʋmɩyɛ. Nɛ moncosaɣ tɔm ndʋ titukuuni ndamaa agbaa nɛ ndamaa tɔm susuu tʋmɩyɛ yɔ tɩ-yɔɔ. Nabʋyʋ taa koobiya maɣaɣ ɛgbɛyɛ piliŋa takayɩsɩ se pana se ɛzɩma papɩzɩɣ nɛ pasɩnɩ ndamaa nɛ panɩɩ tɔm kediɣzisi, egeetiye kigbeɣliŋ nɛ kigbeɣliŋ sɔsɔŋ weyi palakɩ aŋglɛɛ kʋnʋŋ taa yɔ ɩ-taa. Kiɖe tɛɛ lɛ, pataala ɖʋtʋ natʋyʋ se pɛɖɛzɩ kediɣzisi nɛ kigbeɣliŋ taa tɔm ndamaa kʋnʋŋ taa, nɛ ɛgbɛyɛ wondu natʋyʋ taawɛɛ ɖɔɖɔ ndamaa kʋnʋŋ taa. Pʋyɔɔ ɖoŋ ɖoŋ lɛ, mankpazaɣ koobiya ndamaa nɛ mba pataakɛ ndamaa yɔ ɖoŋ se pɛwɛɛ suuɖu nɛ paɖaŋ Yehowa.

 Yehowa wazɩ ɖo-suuɖu ɖʋʋ yɔɔ. Pitileɖi lɛ, ɛgbɛyɛ piliŋa la ɖʋtʋ se pɛɖɛzɩɣ kediɣzisi nɛ kigbeɣliŋ weyi palakɩ aŋglɛɛ kʋnʋŋ taa yɔ ɩ-taa tɔm ndamaa kʋnʋŋ taa. Mbʋ pɩtasɩ labʋ ɖeu yɔ lɛ se ndamaa cakaɣ ɛsɩndaa, nɛ papɩzɩɣ nɛ pana tɔm yɔɔdɩyʋ nɛ weyi ɛɖɛzɩɣ tɔm yɔ kpayɩ kpayɩ. Lɛɛlɛɛyɔ lɛ, koobiya ndamaa nawa se Yehowa sɔɔlɩ-wɛ siŋŋ nɛ pɛkɛ ɛ-hɔʋ taa ñɩma mba pamʋ ñɩm siŋŋ yɔ.

 1^er avril 1995 wiye, palabɩ kɩyakʋ kʋɖʋmʋʋ egeetiye kigbeɣluu kajalaɣ ñɩŋgʋ ndamaa kʋnʋŋ taa Dudley Kigbeɣluu kpaaŋ taa Midlands wɩsɩ ɖɩɖʋyɛ taa. Maasɩnɩ koobu David Merry kigbeɣluu ñɔɔzʋʋ; ɛɛkɛ egeetiye yɔɔ cɔnɩyʋ kɩbɩnʋ. Koobiya ndamaa nabɛyɛ ɖɔm nʋmɔʋ kilomɛtanaa mɩnɩŋ sakɩyɛ nɛ pɔkɔɔ kigbeɣluu ŋgʋ. Pa-taa nabɛyɛ lɩnɩ Ekɔɔsɩ hayo kiŋ nɛ Cornwall hadɛ kiŋ wɩsɩ ɖɩlɩyɛ taa. Menɖiɣni tɔzʋʋ ɛzɩma paa anɩ ɛ-taa kaalabɩ leleŋ alɩwaatʋ ndʋ ɛyaa mba pɛcɛzɩ 1 000 yɔ pɔkɔm kigbeɣluu ŋgʋ kɩ-taa yɔ.

 Pɩnaɣ 2001 taa, ɛgbɛyɛ piliŋa heyi ma nɛ koobu Merry se ɖɩla ɖʋtʋ nɛ pala kigbeɣluu BSL kʋnʋŋ taa pɩnaɣ ŋga kɔkɔŋ pʋwayɩ yɔ ka-taa. Pɩɩkɛ tʋmɩyɛ sɔsɔɖɛ kpem. Ɛlɛ Yehowa wazɩ pana wena koobiya sakɩyɛ mba paaha pa-tɩ faaa yɔ pañaɣaa yɔ a-yɔɔ, nɛ kigbeɣluu ɖɔ camɩyɛ nɛ ɖɩɩkaɣ kɩ-yɔɔ sɔʋ kpa. Pʋwayɩ lɛ, paha-m waɖɛ se manɖʋ nesi nɛ pɔñɔɔzɩ egeetiye kigbeɣliŋ nɛ kigbeɣliŋ sɔsɔŋ pɩnzɩ sakɩyɛ nɛ pɩkɔɔ pɩsɩɩnɩ alɩwaatʋ ndʋ Yehowa lɩzɩ koobiya evebiya mba pamʋnaa yɔ se pala tʋmɩyɛ nɖɩ yɔ.

Ndamaa videowaa

 Pɩnaɣ 1998 taa, ɖa-taa kaalabɩ leleŋ siŋŋ alɩwaatʋ ndʋ Yehowa ɛgbɛyɛ lɩzɩ hatʋ cabɩ takayaɣ ŋga payaɣ se Ce que Dieu attend de nous yɔ kɛ-tɛ video BSL kʋnʋŋ taa yɔ. Takayaɣ ŋga pacalɩ lɩzʋʋ ndamaa kʋnʋŋ taa, nɛ pʋwayɩ palɩzɩ takayɩsɩ lɛɛsɩ sakɩyɛ. Ðɩlabɩnɩ-kɛ tʋmɩyɛ nɛ ɖɩkpɛlɩkɩnɩ Bibl ɛyaa sakɩyɛ.

 Kigbeɣluu sɔsɔʋ ŋgʋ palabɩ pɩnaɣ 2002 taa yɔ, kɩ-taa pacalɩ ɖɛzʋʋ Kewiyaɣ hendu BSL kʋnʋŋ taa. Lɛɛlɛɛyɔ lɛ, koobiya ndamaa pɩzɩɣ nɛ patɩŋ hendu teyu nɛ petee hendu kɩbandʋ ndʋ nɛ panɩɩ ɖɔɖɔ ti-leleŋ. Halɩ nɛ sɔnɔ menɖiɣni tɔzʋʋ nɛ taa leleŋ ɛzʋtʋyʋ ndam nɔɔyʋ yɔɔ; eetisi taa leleŋ ɛsɩtɛɣlɩm alɩwaatʋ ndʋ ete Kewiyaɣ hendu kajalaɣ ɖeɖe yɔ.

 Nabʋyʋ labɩ ɖɔɖɔ pɩnaɣ 2002 kigbeɣluu sɔsɔʋ ŋgʋ kɩ-taa nɛ ɖɩɩkaɣ pɩ-yɔɔ sɔʋ. Paaheyi Lɔndrɩ ndamaa kʋnʋŋ ɛgbɛyɛ se ɖɩla drama nɛ pakpaɣ-kʋ video. Ɛlɛ ɛzɩma ɖɩpɩzɩɣ nɛ ɖɩla tʋmɩyɛ nɖɩ? Ðɩtaala tʋmɩyɛ nɖɩ wiɖiyi nɛ ɖɩna. Cɩnɛ ɖɔɖɔ lɛ, Yehowa tasɩ-ɖʋ sɩnʋʋ, ɛsɩnɩ-ɖʋ nɛ ɖihiɣ koobiya abalɩñɩma mba pasɩm ɛzɩma palakɩ filimwaa nɛ pɔñɔɔzʋʋ-wɛ yɔ. Tʋmɩyɛ nɖɩ ɖɩɖɔm camɩyɛ kpem. Pɩtasɩ lɛ, lɛɣtʋ ndʋ ɖɩkpɛlɩkɩ tʋmɩyɛ nɖɩ ɖɩ-taa yɔ, tɩsɩnɩ-ɖʋ siŋŋ alɩwaatʋ ndʋ paha-m waɖɛ kpaɣnɩ pɩnaɣ 2003 nɛ piwolo pɩnaɣ 2008 taa se mɛnɖɛɛ nɔɔ nɛ palɩzɩ dramawaa tɛ videowaa Betɛɛlɩ taa nɛ palabɩnɩ-wɛ tʋmɩyɛ BSL kigbeɣliŋ sɔsɔŋ taa yɔ.

 Ma nɛ Stella ɖɩɩsɔɔlaa se ɖa nɛ ɖa-pɩyalaa ɖɩwɛɛ Betɛɛlɩ taa. Paa mbʋ yɔ tʋmɩyɛ nɖɩ, ɖɩtaawɛɛ kɛlɛʋ. Ðɩkpaɣ kpɩtaŋ sakɩyɛ nɛ ɖɩfalɩsɩ ɖa-tɩ nɛ ɖɩlɩzɩ filimwaa mba lɛ, mba palakaɣ tʋmɩyɛ dramawaa mba pa-taa yɔ nɛ mba palakaɣ tʋmɩyɛ videowaa yɔɔ yɔ pɩnɩɩ-wɛ siŋŋ. Ɛlɛ Yehowa wazɩ ɖa-pana ñaɣʋ yɔɔ. Ða-taa kaalabɩ leleŋ siŋŋ alɩwaatʋ ndʋ ɖɩnaɣaɣ se koobiya ndamaa nɩɣaɣ Bibl kɛdɛsɩ taa kpayɩ kpayɩ yɔ, nɛ pa-taa sakɩyɛ tisi taa leleŋ ɛsɩtɛɣlɩm.

 Yehowa wobi pɩ-yɔɔ nɛ ɛhaɣ-ɖʋ fezuu taa tɔɔnaɣ. Pɩnaɣ 2015 taa, ɖɩmʋ Feŋuu Tilimiye nɖɩ pɛkpɛlɩkɩɣ yɔ ɖɩ-tɛ video BSL kʋnʋŋ taa. Pɩtalɩ 2019 taa lɛ, palɩzɩ Maatiyee takayaɣ tɛ video ɖɔɖɔ. Lɛɛlɛɛyɔ lɛ, ɖɩwɛnɩ Krɩstʋ Mba Grɛɛkɩ Masɩ tɩŋa nɛ koobiya ɖiɣni labʋ tʋmɩyɛ nɛ kpekpeka Ebree Masɩ yɔɔ. Koobiya ndamaa wɛnɩ ɛsɩmɩyɛ siŋŋ Yehowa yɔɔ.

 Ðɩkɛ Yehowa sɛyaa, pʋyɔɔ lɛ ɖɩwɛ ɛ-hɔʋ taa ñɩma mba pamaɣzɩɣnɩ ɛ-sɔɔlɩm nɛ paaɖʋʋ tʋkaɣ ɛyaa taa yɔ pa-taa. (Tʋma Labʋ 10:34, 35) Ma nɛ mɔ-hɔʋ ɖɩnaɣ alɩwaatʋ, ɖoŋ nɛ ñɩm mbʋ payɩ Yehowa ɛgbɛyɛ lakɩnɩ tʋmɩyɛ nɛ ɖɩsɩɣnɩ ɛyaa ndɩ ndɩ pɩkpɛndɩnɩ ndamaa nɛ yʋlʋmaa yɔ lɛ, pitukuuni ɖa-laŋɩyɛ. a

 Toovenim taa lɛ, ɖa-pana ñaɣʋ tɩkɛ falaa, mbʋ pʋyɔɔ yɔ lɛɛlɛɛyɔ lɛ, BSL agbaa sakɩyɛ wɛ Krandɩ-Pretaañɩ ɛjaɖɛ taa. Man-taa wɛ leleŋ siŋŋ mbʋ pʋyɔɔ yɔ mana alɩwaatʋ ndʋ ndamaa kʋnʋŋ «calɩ paɣzʋʋ ññɩɩ yɔ.» (Zakarii 4:10) Ɛlɛ Yehowa ɖoŋ taa ɖɩpɩzaa nɛ ɖɩla pɩtɩŋa payɩ mbʋ yɔ. Ɛnʋ ɖiyiɣni ɛ-ɛgbɛyɛ. Ɛhaɣ ɛ-sɛyaa mbʋ payɩ pɩpɔzʋʋ-wɛ se posusi tɔm kɩbandʋ ɛyaa ndɩ ndɩ yɔ. Nɛ eyeki nɛ Kewiyaɣ ɖomaɣ paɣlɩɣ mba pamʋnaa yɔ pa-laŋa taa.